Ŋúnuyɔ 50
50
Kulocɛliɛ wi bé wi siɛnnɛ kàyuʔu juu gè
1Asafi ŋúnudanʔa gī gàa pe ŋú nɛ́ yakpuɔnrɔ ní dè#50.1 Asafi wi yé puu ŋúnuŋuminɔ yiɛgininɛ taanriwuu wáà, Dawuda lɛ̀lɛ nī lè. Wi ŋúnuyɔ kiɛ nɛ́ siin yē Ŋúnuyɔ Sɛbɛ nī wè. Bè kàa cɛ́n wi kele nī gèle, wéli baa Kaj1 6.16,17,24; 25.1; Kaj2 35.15..
Kulocɛliɛ wè, Yewe wè, Kulocɛliɛ wi duniya siɛnnɛ yeri bèle níɛ nyu
kire ga buu peri báan duniya tiɛrɛ ti mìɛni nī,
nɛ̀ ki líɛ cɛngɛnyɛnifoligɔli mɛ́ gè,
nɛ̀ sɛ́nì nɔ̀ cɛngɛnyɛnijiingɔli mɛ́ gè.
2Bè wi yaʔa baa Siyɔn kàʔa nī gè, gàa ki 'sɔ́migɔ nɛ̀ nyuɔ gè,
Kulocɛliɛ wiī nɛ nyíʔɛnɛ bɛ̀ kpìɛnmɛ tíɛlɛ.
3Weli Kulocɛliɛ wiī nɛ báan#50.3 Wéli baa Yir 19.16., wi sí wè nɛ báan pìiriwe wīʔ !
Cúʔɔmɔ kàsun yē wi yiʔɛ mɛ́ gè,
káfaligbuʔɔ nɛ báan nɛ́ ŋɔri ní nɛ̀ wi màʔa nɛ̀ suʔu.
4Wi 'nyìʔɛnɛ yeri lè naamɛ gè nɛ́ dàala yeri lè
ti‑ puu baa lɛ̀lɛ líì nī wi bé siɛnnɛ kàyuʔu juu gè#50.4 Wéli baa Fàn 4.26; 31.28; 32.1; Eza 1.2; Mis 6.1,2..
5A wi 'jo: «Siɛnnɛ bálì pe 'pìye puɔ mi nɛ̄ wè,
ye‑ pe mìɛni gbuʔulo mi yiʔɛ mɛ́ gè,
bàli pe kakuɔrɔ yɛrɛ kɔ̀ngí dè
níɛ nyakungɛngɛ kpínʔini gè nɛ́ mi ní wè#50.5 Wéli baa Yir 24.7-8..»
6Nyìʔɛnɛ ni bé wi sínnɛ jáari lè,
nɛ́ ki cɛ́n Kulocɛliɛ wire wī kàyuʔujuuwo wè. Ye‑ ŋɔ́ cɛ̀.
7A Kulocɛliɛ wi 'jo#50.7 Weli 'tiʔɛ gáà siɛnrɛ taʔa dè baa wī bè ti lúʔugɛnnɛ cìile lè.: «Yeri lúru, mi siɛnnɛ, mi nɛ nyu !
Isirayɛli yo, mi 'tìgi muɔ nɛ̄ ! Mi yē Kulocɛliɛ, muɔ Kulocɛliɛ wè !#50.7 Wéli baa Yir 20.2.
8Muɔ kakuɔrɔ yajuuro tire kɛnmɛ nɛ̄ bɛ̀ʔ mi 'tìgi muɔ nɛ̄ʔ,
nɛ́ míɛni muɔ kakuɔrɔ kaasuʔuro dáà dī mi yiʔɛ mɛ́ gè súuri dèʔ.
9Mi màakuu wè nɛ̀piʔɛlɛ nɛ̄ʔ gàli ke kɔ́ngi muɔ mɛ́ gèleʔ,
nɛ́ síkapɔlilɔ ní bèleʔ bàli pe kɔ́ngi muɔ síkaduuyo nī yèʔ.
10Nɛ́ ki cɛ́n sìnbirige nyàʔayɛrɛ ti mìɛni yē mi wori,
nɛ́ yajuuro ní dè dàa dī nìʔɛboro dè nyaguruyo nɛ̄ yè.
11Mi nyɛ́nì sínjari ti mìɛni cɛ́n, dàa dī nyaguruyo nɛ̄ yè,
nɛ́ yawiire dáà ti mìɛni ti nyaari nyàʔa nī gè, mi wori dī.
12A fungo cé puu mi nɛ̄ wè o, miǐ cî cɛ ki juu muɔ mɛ́ʔ,
nɛ́ ki cɛ́n, duniya wi mìɛni yē mi wuu, nɛ́ wi laamɛ yɛrɛ ní dè.
13Muɔ nɛ sɔ̀ngí lé mi nɛ nɛ̀piʔɛlɛ kaara káa dè wī lé ?
Muɔ nɛ sɔ̀ngí míɛni lé mi nɛ síkapɛngɛlɛ sìsiɛn gbun wī lé ?
14A muɔ nɛ caa bè kakuɔrɔ yakɔngɔ kpíʔile gè Kulocɛliɛ mɛ́ wè,
mari wi gbùʔɔrɔ́ mari wi síɛri#50.14 Wéli baa Lev 7.12; Eb 13.15. Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: mari kacɛ̀ngɛ síɛrilɛ yakɔngɔ tìí gè Kulocɛliɛ nɛ̄.,
mari muɔ nyakungɛnyɛ forigi yè mi Kulocɛliɛ mɛ́ wè#50.14 Wéli baa Fàn 23.22.,
ŋàa wī Duniya wi Mìɛni Nyùgo nɛ̄ gè.
15Fùrɔgɔ lɛ̀lɛ nī lè, mari mi náari.
M'bé muɔ líɛ bè yige ki nī, kire ga buu muɔ de mi kpóri.»
16Nɛ̀ ki yaʔa Kulocɛliɛ 'ki juu siɛnpiiwe mɛ́ wè nɛ́ jo:
«Gáa nɛ̄ muɔ nɛ mi fànʔa kele nyu gèle yákuɔ ?
Gáa nɛ̄ mi nyakungɛngɛ kiī muɔ mɛ́ nyuɔ nī gè yákuɔ ?
17Muɔ wè, mi korimɔ pi 'muɔ biɛn;
muɔ 'cíi nɛ̀ mi siɛnrɛ wáa dè kàduʔu mɛ́ !
18A muɔ 'kàyuuwo nyaa wè, wi nɛ̂ muɔ dɛ́ni,
muɔ nɛ̂ wúɔ nɛ́ pe ní bàli pe ceyuugo kpínʔini gè.
19Muɔ nɛ̂ muɔ nyuɔ tíʔɛ gè nɛ̀ kapiile kpíʔile lè,
níɛ muɔ nyinɛ tíʔɛ lè nɛ̀ siɛnnɛ fáanni bèle.
20Muɔ nɛ tɛ̀ní nɛ muɔ siinyɛni sànʔá wè,
muɔ nɛ muɔ laayirinyɛni wi míʔɛ córi gè.
21Ki n'gɛ gàa muɔ 'kpíʔile, á mi 'pìiri ki nɛ̄ gè. A muɔ 'ki nyaa majo mi yē bɛ̀ muɔ tíɛlɛ wī.
Nɛ̀ ki yaʔa mi 'tìgi muɔ nɛ̄, m'bé ti mìɛni yige kpànʔanɛ muɔ yiʔɛ mɛ́ gè.
22Ye‑ ki sɔ́migɔ ye lúʔu, yeli bálì ye 'fìʔɛ nɛ́ Kulocɛliɛ ní wè !
Á kire bɛ̀ʔ gè, m'bé yeli cɛnminɛ; siɛn sì ga tíi taa bè yeli suɔʔ !
23A siɛn wáà nɛ mi gbùʔɔrɔ́ níɛ mi síɛri wè, kire yē kakuɔrɔ yakɔngɔ gáà ki mi kpóri gè.
Ŋàa sí wi tári mi koligo nɛ̄ gè nɛ wi nyɔdanʔagɛlɛ ciʔigi gèle,
m'bé ki yaʔa wi‑ ki cɛ́n mi Kulocɛliɛ wè, mi yē suɔfɔli.»
Currently Selected:
Ŋúnuyɔ 50: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
