Ŋúnuyɔ 51
51
Dawuda 'jo Kulocɛliɛ- wire cìile bè wi yige wire kapiile nī lè
1Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè. 2Lɛ̀lɛ líì nī Kulocɛliɛ siɛnjuuwo Natan wi pɛ́nì juu nɛ́ wi ní wè, bà Dawuda yé kɛ́ nɛ̀ sɛ́nì kapiile kpíʔile nɛ́ Beti Seba ní wè#51.2 Wéli baa Sam2 11; 12..
3ʔé, Kulocɛliɛ, ‑nyinimɛ taa mi nɛ̄ yo
nɛ̀ yɛli nɛ́ muɔ bànguɔ dɛ́nigɛ ní gè !
‑Mi tuudiʔɛlɛ kurugo gèle ma láʔa mi nɛ̄;
muɔ yē nyinidaaguugofɔli, feliye yi míɛni !
4‑Mi jíge péwu ma yige mi kolimɔ nī bè,
‑mi cìile ma yige mi kapiile nī lè !
5Nɛ́ ki cɛ́n mi nyɛ́nì yéri mi tuudiʔɛlɛ nɛ̄ lè;
mi kapiile niī mi yiʔɛ mɛ́ lɛ̀lɛ ó lɛ̀lɛ nī.
6Muɔ nɛ̄, muɔ nigbe nɛ̄, mi 'kapiile kpíʔile lè;
gàa ki 'pii muɔ yiʔɛ mɛ́ gè, kire mi nyɛ́nì kpíʔile.
Kire kɛnmɛ nɛ̄, muɔ yē sínwɛ muɔ siɛnrɛ nī dè,
muɔ yē dìgire fùn a muɔ gbɛ́ni muɔ kàyuʔu juu gè#51.6 Ki siɛnrɛ ti 'juu baa Wurɔ 3.4 nɛ̀ yɛli nɛ́ girɛki siɛnliɛrɛ ní dè, dàa ti wè nuroʔ. .
7ʔaan, kányiʔɛ nɛ̄, bà mi 'sii wè, mi yé puu koliwo;
sɛ́nì mi 'jíin baa mi yàa liyɛ nī yè, mi yé puu kapiigbiʔiliwe nɛ̀ kúɔ.
8Nɛ̀ ki yaʔa, kányiʔɛ nɛ̄, muɔ nɛ ki caa mi‑ puu funviige ní,
muɔ nɛ mi tɛnmɛ nɛ́ sícilimɛ ní mi fungo laamɛ nī bè.
9Ma mi cìile mi kapiile wuʔu nɛ̄ gè#51.9 Eburu siɛnrɛ nī dè, ti 'ki juu nɛ́ isɔpi ní. Ki yé buu wɛrɛ dáà pe 'puu nɛ líi dè nɛ ti puu tìi nɛ̄, nɛ ti nii luʔɔ nī, nɛ siɛnnɛ nyɛri nyɛri bèle bè pe cìile a kakuɔrɔ yē baa dè. Wéli baa Lev 14.4,6; Tɔ́r 19.18; Eb 9.19., bà m'bé kò cìiliwe;
‑mi jíge ma mùnu kire ga buu m'bé yiʔɛ bè fílige pérepere.
10Ma tí mi‑ kiyaʔa wori lúʔu dè bèri muguri bè puu fundaanra nɛ̄,
bà ki bé kpíʔile kácere dáà muɔ 'muʔɔrɔ dè, ti bé yiʔɛ bèri yúu !
11Fǎga ní mi kapiʔile tɔ́ri gèle mi kúruguʔ !
‑Mi kolimɔ kurugo bè ma láʔa mi nɛ̄ !
12Kulocɛliɛ yo, ‑mi fungo yiʔɛ gè ma ki cìile,
ma ki yaʔa sɔ̀ngifɔnrɔ ti‑ nìre wáa mi nī.
13Fǎga mi ŋɔrigɔ núgo muɔ yiʔɛ mɛ́ gè !
Ma fǎga muɔ Tiɛlɛfun Pìle yige lè mi nīʔ !
14Koli ma suɔlɔ fundaanra nyɔ́gɔ dè mi nī,
ma fungo káà kɛn m'mɛ́ gàa ki béri lúru muɔ mɛ́ gè, dí muɔ sí ŋɔri nyɔ́gɔ mi nī.
15Bà m'béri kacuʔɔrɔfɔlilɔ tɛnmɛ bèle muɔ koligo nɛ̄ gè,
bà kapiigbiʔilile pe bé koli bè pɛn muɔ mɛ́.
16Kulocɛliɛ yo, mi suɔfɔli Kulocɛliɛ, bɛ̀ mi 'sìsiɛn wo gè,
ma mi kàsulugo suɔ gè !
Bà mi nyinɛ ni béri muɔ kasingele ŋú gèle.
17Mi Kàfɔli yo, ‑mi nyasɛnyɛ múgu yè,
dí mi nyuɔ ki sí de muɔ gbùʔɔrɔ́.
18Kakuɔrɔ yajuuro, tire bɛ̀ʔ muɔ nɛ caaʔ.
Á kire bɛ̀ʔ gè, mi cî tàa kɛn muɔ mɛ́.
Kiǐ je muɔ dɛ́niʔ a mi 'kakuɔrɔ kaasuʔuro kɔ̀n muɔ mɛ́ dèʔ.
19Kulocɛliɛ, kakuɔrɔ dáà ti 'muɔ dɛ́ni dè,
tire dī fungo gáà nī laabiɛnmɛ yē wè.
Kulocɛliɛ yo, muɔ wè nɛ kàduʔu wáariʔ nàzɔn mɛ́ wè
ŋàa wī laabiɛnmɛ ní bèʔ, níɛ caa bè yiʔɛ wè.
20Muɔ funjɛ̀ngɛ kire kɛnmɛ nɛ̄ bè, ‑nyinimɛ taa Siyɔn kàʔa nɛ̄ gè,
ma Zerizalɛmi kàʔa gunzuluyo faan yè.
21A kire 'kpíʔile gè, muɔ bé nɛ́ gbɛ̀ fundaanra taa kakuɔrɔ nī dè
dàa ti kɔ̀ngí muɔ mɛ́ dè nɛ́ sínmɛ ní bè,
kakuɔrɔ kaasuʔuro nɛ́ kakuɔrɔ yakɔnrɔ ní dè.
Bà míɛni weli béri nɛ̀piʔɛlɛ kɔ̀ngí muɔ gbùʔɔrɔdiʔɛ yafanʔa nɛ̄ gè.
Currently Selected:
Ŋúnuyɔ 51: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
