Ŋúnuyɔ 5
5
Yewe, ma mi suɔ káfinɛrɛfɔlilɔ mɛ́ bèle !
1Ŋúnuŋuminɔ yiɛginiwɛ wuʔu gī, Dawuda ŋúnudanʔa gī gàa pe ŋú nɛ́ yakpuɔnrɔ ní dè, maʔana gèle.
2ʔé Yewe, te mi siɛnrɛ lúru dè, ‑líiye cáan ma mi cíɛnmɛ lúʔu bè.
3Sɔ̀ngi ma taa nɛ́ mi kòkuulo ní lè, mi Kùlofɔli nɛ́ mi Kulocɛliɛ,
nɛ́ ki cɛ́n muɔ mɛ́ mi nɛ náari.
4Yewe, muɔ nɛ mi yékpoli lúru lè sínbinimɛ táanni bè;
sínbinimɛ táanni bè, mi nɛ̂ juu nɛ̀ tìɛ muɔ nɛ̄, mi nɛ wéli muɔ mɛ́.
5Muɔ wè kulocɛliɛ wáàʔ ŋàa kapiile ni 'dɛ́ni lèʔ;
siɛnpiiwe wiǐ gbɛ̀ súɔn nɛ́ muɔ níʔ.
6Nyawaalafɔlilɔ piyě gbɛ̀ yéri muɔ yiʔɛ mɛ́ʔ;
bàli pe kapiʔile kpínʔini siɛnnɛ nɛ̄ bèle, pe 'muɔ biɛn.
7Muɔ nɛ káfinɛvinɛnɛ córi bèle nɛ yigi baa.
Bàli pe sìsiɛn ŋu gè, nɛ́ bàli pe siɛnnɛ nùʔɔrɔ́ bèle,
piyē nɛ laamɛ yɛ̀gí bè Yewe nī wè.
8Mi wè, muɔ bànguɔ dɛ́nigɛ kire nɛ̄, mi nɛ̂ jíin muɔ saʔa nī gè,
mi nɛ̂ tuu nɛ̀ cúbulo muɔ yiʔɛ mɛ́ gè fíɛrɛ nɛ̄ dè,
muɔ Gbùʔɔrɔsaʔa wàlidɛngɛgɛ kɔli mɛ́ gè.
9Yewe, ‑mi yiʔɛ kíni gè, nɛ̀ yɛli nɛ́ muɔ sínmɛ ní bè,
nɛ́ ki cɛ́n mi leguulo piyē nɛ mi palilɛ nɛ mári.
‑Muɔ koligo sìɛn gè mi yiʔɛ mɛ́ gè, gàa muɔ 'jo mi líɛ gè.
10ʔm, nɛ̀ ki taa siɛn sǐ gbɛ̀ tɛ́ngɛ pe nyasiɛnrɛ nɛ̄ dèʔ.
Pe funyɔ nī yè, cúʔɔmɔ yákuɔ bī baa.
Pe yékpogaanya yiī bɛ̀ nyɛyɛ tíɛlɛ nyàa yi múgu nɛ̀ yaʔa yè.
Piyē kpìlikpilifɔlilɔ#5.10 Ki siɛnrɛ ti 'juu baa Wurɔ 3.13..
11Kulocɛliɛ yo, ‑ki yaʔa pe‑ pe kapiʔile fuʔɔ tɔ́n gè pe mɛ́.
‑Ki yaʔa pe siɛnjuuro ti‑ koli tuu pe nɛ̄ bè pe ŋɔrigɔ jáan.
‑Pe cìra ma yige pe tuudiʔɛlɛ nìʔɛgɛlɛ keli kɛnmɛ nɛ̄ bè,
nɛ́ ki cɛ́n pe nyɛ́nì muɔ cíi.
12Ma ki yaʔa bàli pe mìɛni pe 'líʔire jó muɔ láara bèle, pe‑ fundaanra taa !
Pé sí de yékpuʔulo wáari béri muguri !
Bà muɔ 'pe tɔ́n nɛ̀ pe làrigɛ bèle,
ma ki yaʔa fundaangbuɔrɔ ti‑ pe nyì,
bàli bīɛlɛ muɔ míʔɛ ki pe 'dɛ́ni bèle.
13Yewe, muɔ wī ma diba taʔa wè siɛnsinwɛ nɛ̄ wè,
muɔ nɛ̂ wi màʔa nɛ̀ suʔu nɛ́ muɔ kpuʔɔrɔ ní dè bɛ̀ timɔzigege tíɛlɛ.
Currently Selected:
Ŋúnuyɔ 5: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
