Ŋúnuyɔ 4
4
Yewe wire wiī nɛ yanyige kanʔa gè
1Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnri ní dè, gɔrilɔ bèle.
2A mi 'muɔ yeri wè, ma mi náarigɛ cò gè,
ʔé mi Kulocɛliɛ, muɔ ŋáà ma tànʔa kanʔa mi mɛ́ wè !
Kaala náà nī lè nàa ni 'mi cɔ̀ri lè, ‑mi líɛ ni nī ma tɛ́ngɛ larigbuʔɔ káà nī.
‑Kpuʔɔrɔ taʔa dè mi nɛ̄; ma sí mi náarigɛ lúʔu gè.
3Yeli siɛnnɛ bèle, lɛ̀lɛ jori nī yeli bé ní de mi kpuʔɔrɔ faʔa dè ?
Lɛ̀lɛ jori nī nyùgofun kele ke bé yeli dɛ́ni,
dí yeli sí taʔa káfinɛrɛ kúrugu dè ? Ye‑ ŋɔ́ cɛ̀.
4Ye‑ ki cɛ́n: siɛn ŋáà wi 'wìi puɔ Yewe nɛ̄ wè, Yewe nyɛ́nì wi wàli nɛ̀ tɛ́ngɛ wìi tíimɛ wuu.
Yewe wire tíimɛ nɛ lúru mi mɛ́ a mi gbɛ̀ni wi yeri wè.
5A yeli funyɔ yi 'yɛ̀, ye fǎga kapiile kpíʔileʔ#4.5 Ki siɛnrɛ ti 'juu baa Efɛ 4.26. !
Ye‑ sɔ̀ngi yeli funyɔ nī yè yeli yasinɛrɛ nɛ̄ dè, yé pìiri. Ye‑ ŋɔ́ cɛ̀.
6Yeri kakuɔrɔ yajuuro kúu dè nɛ̀ yɛli nɛ́ dàa ní Yewe yé juu dè,
ye‑ yeli sɔ̀ngirɔ taʔa dè Yewe nɛ̄.
7Siɛnniʔɛmɛ nɛ ki nyu nɛ́ jo: «Ŋáa wi bé kacɛ̀ngɛ kpíʔile weli nɛ̄ ?»
ʔé Yewe! ‑Weli wéli nɛ́ funjɛ̀ngɛ ní yo !
8Muɔ nɛ fundaanra nyɔ́gi mi nī
nɛ̀ tóri bìli nɛ̄ pe sî yaliire taa nìʔɛrɛ dè,
lɛ̀lɛ líì nī pe ɛrɛzɛn sunvɔnbɔ pi cî nɛ fúu bè.
9Yanyige kire nī mi nɛ sìnɛ́ níɛ̀ fali nɛ ŋɔ́ni,
nɛ́ ki cɛ́n, Yewe muɔ nigbe wī muɔ nɛ̂ mi màʔa nɛ̀ suʔu,
yakaa fǎa ga mi taaʔ.
Currently Selected:
Ŋúnuyɔ 4: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
