Ŋúnuyɔ 40
40
Yewe, pa mi suɔ !
1Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2Mi yé Yewe sige wè nɛ̀ mi sɔ̀ngirɔ taʔa dè wi nɛ̄ kpuʔɔ;
a wi 'nyùgo cùungu gè nɛ̀ mi yékpoli lúʔu lè.
3A wi 'mi píle nɛ̀ yige kùu kàwiʔi nī gè, nɛ̀ mi yige fàrigɛluulo nī lè,
níɛ mi tɔliyɔ yérige yè kàdɛnigbaala nɛ̄ lè
nɛ́ ki kpíʔile a mi yedanyɔgɔlɔ ke 'fèriye kɛ́ndiʔɛ taa.
4A wi 'ŋúnuvɔngɔ le mi nyuɔ nī gè gàa ní m'béri weli Kulocɛliɛ gbùʔɔrɔ́ wè.
Siɛnnɛ sáa bé ki nyaa; pe béri fìʔɛ́ Yewe nɛ̄ wè bé pe sɔ̀ngirɔ taʔa dè wi nɛ̄.
5Siɛn ŋáà wi 'wi sɔ̀ngirɔ taʔa dè Yewe nɛ̄ wè, wi wuʔu kiī tànʔa;
wi nɛ̌ fɔ̀li bè taʔa nìɛnyiɛnigɛfɔlilɔ nɛ̄ bèleʔ, peli bálì pe waa káfinɛrɛ kúrugu dè#40.5 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: peli bálì pe waa yasunro kúrugu dè..
6ʔe Yewe mi Kulocɛliɛ, muɔ kacɛ̀ngɛlɛ kiyē nìʔɛgɛlɛ díɛʔ !
Muɔ 'kakpoliyo kpíʔile nɛ́ sɔ̀ngijɛnrɛ ní weli kɔli mɛ́ gè ! Siɛn wè bile bɛ̀ muɔ tíɛlɛʔ !
Mi nɛ caa bè ki jáari bè muɔ kakpoliyo juu yè, nɛ̀ sí ki yaʔa yi 'niʔɛ nɛ̀ tóri siɛn gbɛ̀ yi tɔ́ri yè.
7Kakuɔrɔ yajuuro dè nɛ́ yaliire yakɛnrɛ ní dè, tire yákuɔ bɛ̀ʔ muɔ nɛ caaʔ.
ʔmʔm, muɔ nyɛ́nì mi ngbúʔulo múgu gèle kire ga buu mi‑ gbɛ̀ lúʔu:
muɔ wè nɛ kakuɔrɔ kaasuʔuro nɛ́ kapiʔile kàsulugo kakuɔrɔ ŋàʔaná dè nɛ caaʔ#40.7 Koliyo nyáà wuʔu gè 7-9, ki 'juu baa Eb 10.5-7..
8Kire nɛ̄ a mi 'ki juu nɛ́ jo: «Ki n'gɛ, mi nyɛ́nì pɛn !
Ki nyɛ́nì sɛbɛ mi wuʔu nɛ̄ gè sɛbɛkuruwo nī wè#40.8 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: mi nɛ báan nɛ́ sɛbɛ ní wè ŋàa pe 'sɛbɛ mi wuʔu nɛ̄ gè..»
9Ki 'mi dɛ́ni mi‑ de muɔ nyɛ́ni kele kpínʔini gèle, mi Kulocɛliɛ.
Muɔ Fànʔa Siɛnrɛ tiī sɛbɛrɛ mi fungo nī gè.
10Mi nyɛ́nì muɔ sínmɛ juu bè siɛnniʔɛmɛ gboli nī lè#40.10 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: mi nɛ ki nyu nɛ jo Kulocɛliɛ nyɛ́nì tànʔa kɛn m'mɛ́.,
mi sì pìiri ti nɛ̄ʔ, Yewe yo, muɔ 'ki cɛ́n.
11Mi sì muɔ sínnɛ làrigɛ lè mi fungo nī gèʔ;
mi nyɛ́nì muɔ kasingele nɛ́ muɔ suɔlɔ wuʔu juu gè.
Mi sì muɔ bànguɔ dɛ́nigɛ nɛ́ muɔ kányiʔɛ kaala làrigɛ lè siɛnniʔɛmɛ gboli nī lèʔ.
12Muɔ Yewe wè, muɔ sǐ ga fɔ̀li bè muɔ nyinidaaguugo láʔa gè mi nɛ̄ʔ.
Muɔ bànguɔ dɛ́nigɛ nɛ́ muɔ kányiʔɛ kaala ní lè, ti bága de mi wéli súuri.
13Nɛ́ ki cɛ́n mi wuʔɔgboliyo yi nyɛ́nì niʔɛ nɛ̀ mi màʔa nɛ̀ suʔu, mi kolimɔ pi 'mi cìra nɛ̀ cò.
Miǐ ní gbɛ̀ jáa bè ke kpàri jò bèri ke nyaʔaʔ, ke 'niʔɛ nɛ̀ tóri mi nyùgo nzìire nɛ̄ dè; mi lèbaanna ni 'kúɔ.
14Yewe yo, yéri ki nɛ̄ ma mi cò ma suɔ !
Yewe, te báan fáari ma pa mi sáʔa#40.14 Koliyo nyáà wuʔu gè 14-18, wéli baa 70.2-6. !
15‑Ki yaʔa pe‑ faʔama taa, dí fìɛrɛ tɔ́n pe nɛ̄, siɛnnɛ bálì pe caa bè mi sìi kúɔ wè !
Pe‑ koli pe kàduʔu wáa, faʔama‑ sí pe taa, siɛnnɛ bálì pe caa yawuʔɔ mi taa wè !
16‑Ki yaʔa ki‑ puu pe nɛ̄ funwuɔrɔ dí fìɛrɛ‑ sí tɔ́n pe nɛ̄,
bàli pe nyu mi wuʔu nɛ̄ gè nɛ́ jo: «Cúɔʔ ! Cúɔʔ !»
17‑Ki yaʔa bìli pe muɔ caa bèle, pe mìɛni pe‑ puu fundaanra nɛ̄ bèri muguri muɔ kɛnmɛ nɛ̄ bè.
Bàli ki 'dɛ́ni á muɔ ní pe suɔfɔli wè, peri ki nyu súuri pe jo:
«Kpuʔɔrɔ 'yɛli ti de tari Yewe míʔɛ nɛ̄ gè !»
18Bɛ̀ mi yē fuunmɔfɔli nɛ́ ní fùrɔgɔfɔli wè, ki 'yɛli mi Kàfɔli wi‑ sɔ̀ngi daa nɛ́ mi ní.
Muɔ yē mi sáʔafɔli nɛ́ ní ŋàa wi mi píle nɛ suu wè ! Mi Kulocɛliɛ yo, fǎga mɔgɔ díɛʔ !
Currently Selected:
Ŋúnuyɔ 40: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
