Ŋúnuyɔ 41
41
Wuʔɔgɔfɔli náarigɛ gī
1Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2Wire ŋáà wi sɔ̀ngí fɔ̀ngɔfɔli wuʔu nɛ̄ gè, wi wuʔu kiī tànʔa.
Wuʔɔgɔ cɛngɛ nī gè, Yewe bé wi suɔ.
3Yewe nɛ wi wéli nɛ wi sìi ciʔige wè.
Wi nɛ̂ ki kpíʔile wi‑ fundaanra taa dàala nɛ̄ lè,
wi nɛ̌ wi yaʔa wi leguulo kiyɛ nī yèʔ.
4Yewe yē nɛ́ wi ní wi wuʔɔgɔ yasinɛgɛ nɛ̄ gè.
A wiī nɛ yáa wè, muɔ Yewe wè, muɔ nɛ̂ wi dànguu yiʔɛ wè#41.4 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: wi nɛ̂ wi líɛ nɛ̀ láʔa wi yasinɛgɛ nɛ̄ gè..
5Mi yé ki juu nɛ́ jo: «Yewe yo, ‑nyinimɛ taa mi nɛ̄ !
Ma mi puʔɔ, nɛ́ ki cɛ́n mi nyɛ́nì kapiile kpíʔile muɔ nɛ̄.»
6Mi leguulo piyē nɛ siɛnpiire nyu nɛ wáari mi nɛ̄ nɛ́ jo:
«Lɛ̀lɛ líi nī wi bága kùu dí siɛnnɛ pe sí fìʔɛ nɛ́ wi míʔɛ ní gè díɛ ?»
7A pe wàa 'pɛn bè ba mi wéli wè, wi nɛ̂ wìi kpíʔile majo wire nɛ siɛntaanra nyu wī.
Nɛ̀ ki yaʔa baa wi fungo nī gè wi nìɛ kapiʔi gbòborí bè mi luɔ.
A wi kɛ́nì yiri wè, wi nɛ̂ ti jáari siɛnnɛ mɛ́ bèle.
8Siɛnnɛ bálì mi 'biɛn bèle, pe 'pìye pínɛ nɛ palilɛ nɛ nyu;
piyē nɛ pìye kìí mi wuʔɔgɔ wori nɛ̄ dè nɛ́ jo:
9«Wi yaaguumɔ pi 'wi cò !
Wi 'sínɛ yasinɛgɛ nɛ̄ gè; wiǐ ní ga yɛ̀ cíginiʔ !»
10Mi tíimɛ gbuɔnyɛni wè, ŋàa tíimɛ nɛ̄ mi cé tɛ́ngɛ wè,
ŋàa wi 'puu nɛ wúu nɛ líi nɛ́ mi ní wè, wire wi 'koli nɛ̀ yiʔɛ nɛ́ túngu nɛ́ mi ní#41.10 Ki siɛnrɛ ti 'juu baa Mar 14.18; Zan 13.18..
11Muɔ Yewe wè, ma nyinimɛ taa mi nɛ̄ !
Te báan ma pa mi yɛ̀gɛ; m'bé mi fuʔɔ tɔ́n gè pe mɛ́.
12A kire 'kpíʔile gè, a mi kɛ́nì ki cɛ́n mi woli ni 'kpúʔɔ muɔ mɛ́ lè,
mi leguuwo wiǐ ní ga kòkuulo wáa mi wori nɛ̄ dè bé jo wire 'fànʔa taa mi nɛ̄ʔ.
13Mi wè, mi funviige kire kɛnmɛ nɛ̄, a muɔ 'mi cò,
nɛ́ koli nɛ̀ mi tɛ́ngɛ muɔ yiʔɛ mɛ́ gè lɛ̀lɛ ó lɛ̀lɛ.
14Kpuʔɔrɔ 'yɛli ti de tari Yewe nɛ̄, Isirayɛli Kulocɛliɛ wè,
lɛ̀lɛ ó lɛ̀lɛ, bè ki líɛ baa ki sélimɛ nɛ̄ bè, bèri waa súuri.
Ki- taa ki puu bɛ̀ # 41.14 Koligo gáà siɛnrɛ dáà tiī nɛ kpuʔɔrɔ tari Kulocɛliɛ nɛ̄, tire ti 'Ŋúnuyɔ Sɛbɛ Péliwe kúɔ wè. Ŋúnuyɔ sɛbɛ sɛnminɛ nī bèle, nyasiɛnkɛniyɛ nyáà yiī baa pe kúɔdiɛyɛ nī yè (wéli baa 72.18-19; 89.53; 106.48). !
SƐBƐ SIINWUU
(42–72)
Currently Selected:
Ŋúnuyɔ 41: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
