Ŋúnuyɔ 34
34
Yewe nyɛ́nì mi suɔ mi fùrɔgɔ nī gè
1 Dawuda wuʔu gī#34.1 Ŋúnugo gáà ki siɛnkanʔana gboli ó gboli nɛ séligi nɛ́ sɛbɛkaanna láà ní; sɛbɛkanʔana ó sɛbɛkanʔana ke taanni kìye táanni nɛ̀ yɛli nɛ́ Eburulo alifabe ní wè (wéli baa 9.1 kaliwɛgɛ ki táanmɛ gè).. Bà wi yé wìi kpíʔile kàalafɔli Abimɛlɛki yiʔɛ mɛ́ gè, á wi 'wi cìra a wi 'kɛ́ wè#34.1 Abimɛlɛki wi 'puu fànʔafɔli kàʔa káà nī Filisiti kùlo nī; pe 'puu nɛ fànʔafɔli yeri míɛni Akisi. Dawuda yé fɛ̀ nɛ̀ kɛ́ baa nɛ̀ sɛ́nì làri kùlofɔli Sawuli nɛ̄ wè. Wiì puu nɛ caaʔ Abimɛlɛki- ki cɛ́n wire yē kapiɛngbuɔn sànbali, kire nɛ̄ wi wìi kpíʔile kàalafɔli. Wéli baa Sam1 21.11-16..
2M'béri kpuʔɔrɔ tari dè Yewe nɛ̄ lɛ̀lɛ ó lɛ̀lɛ nī,
wi gbùʔɔrigɔ ki bé puu mi nyuɔ nī gè súuri.
3Mi nɛ nìɛ kpóri Yewe nī.
Ki 'yɛli siɛnnɛ pe‑ ki cɛ́n, siɛnnɛ bálì ní pe wè tɔ́ri bèleʔ, peri fundaanra kpínʔini.
4Yeri Yewe kpuɔmɔ wuʔu jáari gè nɛ́ mi ní !
Ye‑ puu weri wi míʔɛ kpóri gè !
5Mi 'Yewe caa wè, á wi 'lúʔu m'mɛ́,
á wi 'mi suɔ mi fíɛrɛ ti mìɛni mɛ́.
6Bàli pe wéli wi mɛ́ wè, pe yiɛyɛ yiī nɛ nyíʔɛnɛ;
fìɛrɛ sǐ ga tíi tɔ́n pe nɛ̄ʔ.
7Fuunmɔfɔli wáà yé Yewe yeri wè,
a wi 'lúʔu wi mɛ́ nɛ̀ wi suɔ wi fùrɔgɔ ki mìɛni mɛ́.
8 Yewe tundunwɔ # 34.8 Tundunwɔ wè náʔa gè, wi bé gbɛ̀ Yewe wire tíimɛ kɛnmɛ tìɛ (wéli baa 35.5-6; Sél 16.7; 32.1-2; Kùlo2 6.14-23), nɛ́ míɛni wi baara tire dī bèri Yewe wi wuulo wéli bèle (wéli baa Yir 14.19; Kùlo2 19.35; Dan 6.22). wi nɛ̂ pe màʔa nɛ̀ suʔu,
bàli pe fìʔɛ́ Yewe nɛ̄ wè; wi nɛ̂ pe píle nɛ̀ suɔ.
9Ye‑ ki laala ye wéli ye ki cɛ́n kɛnmɛ bíì nɛ̄ Yewe wi 'nyuɔ wè#34.9 Wéli baa Piɛ1 2.3. !
Siɛn ŋáà wi 'líʔire jó wi mɛ́ wè, wi wuʔu kiī tànʔa !
10Yeri fìʔɛ́ Yewe nɛ̄, yeli bálì wi 'wàli nɛ̀ tɛ́ngɛ bèle,
nɛ́ ki cɛ́n yafiɛn sì pe laaʔ, bàli pe wi fìʔɛ́ wè.
11Jàriyɛlilɛ pe cî nɛ pe lìile caa lè nɛ fùrɔ́,
nɛ̀ ki yaʔa bàli pe 'pe sɔ̀ngirɔ taʔa dè Yewe nɛ̄ wè, yafiɛn sì pe laaʔ.
12Mi pìile, yeri báan ye pa lúʔu m'mɛ́#34.12 Nyasiɛnrɛ juugɛnmɛ páà bī, tɛnmɛfɔlilɔ pe 'puu nɛ pe pìtɛnminɛ yeri bèle mmɛ gè a pe gbɛ̀nɛ séli nɛ pe tɛnmɛ sícilige nɛ̄ gè (wéli baa Kàs 1.8,10; 2.1). !
M'béri yeli tɛnmɛ kɛnmɛ báà nɛ̄ yeli 'yɛli bèri fìʔɛ́ Yewe nɛ̄ wè.
13Yeli nī bèle, a sìi wi 'siɛn ŋíì dɛ́ni wè,
a wiī nɛ caa bè yacɛ̀nrɛ nyaa wi sìi cɛnyɛ nī yè#34.13 Koliyo 13-17 wuʔu nī gè, ki 'juu baa Piɛ1 3.10-12.,
14wi‑ wi nyinɛ cò lè kapiʔi nɛ̄ gè,
wi‑ wi nyasɛnyɛ cò yè káfinɛrɛ siɛnrɛ nɛ̄ dè.
15Ma láʔa kapiʔi nɛ̄ gè, mari kacɛ̀ngɛ kpínʔini,
mari yanyige caa gè, ma ki cìra ma cò.
16Yewe nyapigele kiyē siɛnsinminɛ nɛ̄ bèle,
wi ngbúʔulo kiyē múgugolo bè lúʔu bàli mɛ́ pe 'wi yeri wi‑ peli sáʔa wè.
17Yewe nɛ túngu nɛ́ kapiigbiʔilile ní bèle
kire ga buu siɛn fǎ ní sɔ̀ngi daa nɛ́ pe míʔɛ ní gè dàala nɛ̄ lèʔ.
18A siɛnsinminɛ pe kɛ́ni kòkuʔulo wáari gèle, Yewe nɛ̂ lúʔu pe mɛ́;
wi nɛ̂ pe píle nɛ̀ suɔ pe funbiɛnrɛ ti mìɛni mɛ́.
19Yewe yē pe táanni bàli bīɛlɛ funbiɛnrɛ nɛ̄ dè,
wiī nɛ pe pígele suu gèle gàli ke 'máama gèle.
20Siɛnsinwɛ wi bé wuʔɔyɔ taa nìʔɛyɛ,
nɛ̀ ki yaʔa Yewe bé wi cò bè suɔ yi mìɛni mɛ́.
21Yewe nɛ wi káceye yi mìɛni wéli,
kàa nigbe sì cɛ́nì kaaʔ#34.21 Ki siɛnrɛ ti 'juu baa Zan 19.36..
22Kapiile ni bé siɛnpiiwe kpúu wè.
Bàli bīɛlɛ siɛnsinminɛ piyè pe dɛ́ni bèleʔ,
kàyuʔu bága tuu pe nɛ̄.
23Nɛ̀ sí ki taa Yewe bé wi baakuɔlɔ sìi fùgu wè bè suɔ;
bàli pe 'líʔire jó wi mɛ́ wè, kàyuʔu sǐ ga tíi tuu pe nɛ̄ʔ.
Currently Selected:
Ŋúnuyɔ 34: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
