Ŋúnuyɔ 33
33
Kulocɛliɛ wī duniya faanfɔli wè, nɛ́ ní suɔfɔli
1Siɛnsinminɛ, ye‑ fundaanra yékpuʔulo wáa Yewe mɛ́ !
Siɛn ŋáà wi fungo ki 'sín gè, ki 'yɛli wiri Yewe kpóri.
2Ye‑ Yewe gbùʔɔrɔ wè nɛ́ gɔripile ní lè,
yeri màʔagɛlɛ kiɛ bɔ̀licɛrigɛ kpúɔn gè wi mɛ́ !
3Yeri ŋúnuvɔngɔ ŋú wi mɛ́, yeri yakpuɔnrɔ sɔ́migi dè de kpúɔn wi mɛ́,
yeri wi gbùʔɔrɔ kòkuʔulo wáari gèle !
4Nɛ́ ki cɛ́n Yewe siɛnrɛ dè ti nyɛ́nì sín,
wi kakpiʔiligele ke mìɛni yē kányiʔɛ wuʔulo.
5Yewe wiī sìɛnwɛ; ki 'wi dɛ́ni bè kàyuʔu juu nɛ́ sínmɛ ní.
Yewe bànguɔ dɛ́nigɛ ki 'dàala nyì lè.
6Yewe 'juu, a nyìʔɛnɛ ni 'yiri,
nɛ́ wi nyuɔ káfaligɛ ní gè a wi 'ŋɔgɔlɔ gbuʔulo ke mìɛni faan.
7Wiī nɛ kuʔɔjii luɔyɔ pínɛ yè yìi nī nɛ̀ yɛli nɛ́ yi láʔagɛlɛ ní gèle,
wiī nɛ ki kpínʔini lakpoliyo sícuuyo yi fúu nɛ jiin wi yaleye nī yè.
8Ki 'yɛli dàala siɛnnɛ pe mìɛni de fìʔɛ́ Yewe nɛ̄ !
Ki 'yɛli duniya siɛnnɛ pe mìɛni de fún wi yiʔɛ mɛ́ !
9Wire wi 'juu á ki 'kpíʔile bɛ̀,
wire wi 'ki juu nɛ̀ gbɛ̀ngɛ á ki 'yéri bɛ̀.
10Gàa kùlogolo siɛnnɛ pe caa ki de kpínʔini gè, Yewe nɛ ki córi,
wiī nɛ kùlogolo siɛnfeliye sɔ̀ngirɔ curugi dè.
11Yewe nyɛ́ni kele kiyē nɛ kpínʔini súuri,
wi funzɔngirɔ kele kiyē nɛ forigi kɛ̀ngɛlɛ ke mìɛni nī.
12Kùlo náà nī Yewe yē ni Kulocɛliɛ wè, ni wuʔu kiī tànʔa;
kire kùlo siɛnnɛ bálì wi 'nyíɛnɛ nɛ̀ kɔ̀n wi wuulo bèle, peli wuʔu kiī tànʔa.
13Bè wi yaʔa baa nyìʔɛnɛ nī lè,
a Yewe 'wéli náʔa dàala nɛ̄ lè, a wi 'lewiile pe mìɛni nyaa.
14Tiʔɛ gáà nī wi yē tɛ́niwɛ wè,
wiī nɛ dàala siɛnnɛ pe mìɛni nyaʔa.
15Wire ŋáà wi 'siɛn ó siɛn fungo faan gè,
wire wiī nɛ pe kakpiʔiligele ke mìɛni ciʔige gèle nɛ wéli.
16Kùlofɔli wiǐ gbɛ̀ wìi suɔ nɛ́ kapiɛngbuɔnniʔɛnɛ ní bèleʔ.
Nàyeliwe wiǐ gbɛ̀ wìi suɔ nɛ́ wi ŋɔri ní dèʔ, dàa ti 'niʔɛ dè#33.16 Koliyo 16-17 wuʔu nī gè, wéli baa 18.30-34; 147.10..
17Siɛn sǐ gbɛ̀ wi sɔ̀ngirɔ taʔa dè kapiɛngbuɔn sunʔɔ nɛ̄ gèʔ,
nɛ́ ki cɛ́n ki bága wi biɛn; kiǐ gbɛ̀ wi suɔ nɛ́ ki ŋɔri ní dè nìʔɛrɛ dèʔ.
18Ye‑ ki cɛ́n, Yewe nyapile niī nɛ pe nyaʔa bàli pe wi fìʔɛ́ bèle,
bàli pe 'pe sɔ̀ngirɔ taʔa dè wi bànguɔ dɛ́nigɛ nɛ̄ gè.
19Wi bé pe píle bè suɔ kùu mɛ́ wè bé sí pe wéli fungo lɛ̀lɛ nī lè.
20Weli bèle, weli nyɛ́nì weli sɔ̀ngirɔ taʔa dè Yewe nɛ̄.
Wire wī weli sáʔafɔli nɛ́ ní weli timɔzigege !
21Nɛ́ ki cɛ́n weli funyɔ yi béri fundaanra kpínʔini wi nī,
bɛ̀ weli 'weli sɔ̀ngirɔ taʔa dè wi tiɛlɛfun míʔɛ nɛ̄ gè.
22Yewe yo, ‑muɔ bànguɔ dɛ́nigɛ yaʔa gè ki‑ puu weli nɛ̄,
nɛ̀ yɛli nɛ́ weli tɛ́ngɛlɛ ní lè muɔ nɛ̄ wè.
Currently Selected:
Ŋúnuyɔ 33: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
