Ŋúnuyɔ 21
21
Yewe, nicii, suɔlɔ náà muɔ 'kɛn kùlofɔli mɛ́ wè !
1Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2 Yewe yo, kùlofɔli wiī nɛ muguri muɔ ŋɔri ti wuʔu nɛ̄ gè.
Wi fundaanra ti 'kpúʔɔ nɛ̀ tóri,
gàa muɔ 'kpíʔile nɛ̀ suɔlɔ kɛn lè wi mɛ́ wè.
3Muɔ 'ki kɛn wi mɛ́ gàa wi fungo ki 'puu nɛ caa gè;
muɔ sì cíi wi nyuɔ náarigɛ nɛ̄ gèʔ. Ye‑ ŋɔ́ cɛ̀.
4Nɛ́ ki cɛ́n muɔ nɛ̂ wi kpàli,
níɛ diba tari wè wi nɛ̄, diba ŋáà wi 'sɔ́migɔ nɛ̀ nyuɔ wè.
Muɔ nɛ̂ tiɛ ndɔ̀ngɔ tɔ́n gè kùlofɔli wi nyùgo nɛ̄ gè.
5Wi nyɛ́nì sìi náari wè muɔ mɛ́, a muɔ 'wi kɛn wi mɛ́,
sìi cɛnyɛ nyáà yi 'niʔɛ yè, fúɔ nɛ̀ wi tín wè#21.5 Eburu siɛnrɛ nī dè, ti nɛ̂ jo: bànguɔ sìi wè. Baa pe kùlo ni tɛ́nimɛ nī bè, siɛnnɛ pe 'dàli nɛ ki nyu fànʔafɔli mɛ́ wè mmɛ gè faʔa gè; ki kɔri wire wī «wi- sìitɔniwɔ taa»..
6Muɔ 'wi kpúʔɔ kányiʔɛ ní nɛ́ suɔlɔ ní lè nàa muɔ 'kɛn wi mɛ́ lè.
Muɔ 'nyíʔɛnimɛ nɛ́ kpuɔmɔ le bè wi nɛ̄
bɛ̀ burugo tíɛlɛ gàa ki 'nyíʔɛnɛ gè.
7Bɛ̀ muɔ nɛ diba tari wè wi nɛ̄ wè,
siɛnnɛ míɛni pe béri diba tari wè siɛnnɛ nɛ̄ bèle
wire kɛnmɛ nɛ̄#21.7 Tiī nɛ nyu nɛ waa nyakungɛngɛ siɛnrɛ kúrugu dè, dàa Kulocɛliɛ cé juu Birayima mɛ́ wè (wéli baa Sél 12.2). Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: Muɔ nyɛ́nì bànguɔ diba taʔa wè wi nɛ̄, kire ga laa muɔ 'wi kpíʔile fundaanra siɛn lɛ̀lɛ ó lɛ̀lɛ nī. lɛ̀lɛ ó lɛ̀lɛ nī.
Muɔ 'wi fungo nyì gè fundaanra nɛ̄ muɔ yiʔɛ mɛ́ gè.
8Nɛ́ ki cɛ́n kùlofɔli wi 'wi sɔ̀ngirɔ taʔa dè Yewe nɛ̄,
Kulocɛliɛ ŋáà wī Duniya wi Mìɛni Nyùgo nɛ̄ gè,
wi bànguɔ dɛ́nigɛ kire kɛnmɛ nɛ̄ bè,
wiǐ gbɛ̀ jáa bè láʔa duuʔ.
9Muɔ kɔli ki bé muɔ leguulo pe mìɛni cò bèle;
muɔ kàliige ki bé pe taa jò bàli muɔ 'biɛn bèle.
10A muɔ kɛ́nì pɛ́nì mìɛ tìɛ cɛngɛ gíì gè,
muɔ bé pe kpíʔile bɛ̀ kàsunkpuʔɔ tíɛlɛ gàa ki sórigi gè;
Yewe bé pe júɔ wi fundanʔanigɛ lɛ̀lɛ nī lè;
kàsun ki bé pe sórigo.
11Muɔ bé pe wésiile cúʔɔ bèle bè yige dàala nī lè,
pe siimɛ bè, lewiile nī bèle.
12A pe 'sìpiʔi sɔ̀ngi nɛ́ muɔ ní wè,
nɛ́ sɛ́nì pìye nyaa nɛ́ kpìlikpili puɔ wè, wiǐ nyuɔ pe nɛ̄ʔ.
13Nɛ́ ki cɛ́n muɔ bé ki kpíʔile pe bé kàduʔu wáa bè fɛ̀,
nɛ́ muɔ sandaliyɛ ní yè, nyàa muɔ nɛ ŋɔgi yè pe yiɛyɛ nī yè.
14Yewe yo, ki 'yɛli siɛnnɛ peri muɔ kpóri muɔ ŋɔri tire kɛnmɛ nɛ̄ !
Weli béri muɔ fànʔa ŋúnuyɔ nii yè, bèri muɔ gbùʔɔrɔ́.
Currently Selected:
Ŋúnuyɔ 21: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
