Ŋúnuyɔ 20
20
Kulocɛliɛ wi- kùlofɔli sáʔa wè !
1Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2 Yewe wi‑ lúʔu muɔ mɛ́ muɔ funbiɛnrɛ lɛ̀lɛ nī lè,
dí Yakuba Kulocɛliɛ wi‑ sí muɔ màʔa bè suʔu !
3Bè wi yaʔa baa wi saawalidɛngɛgɛ nī gè, Siyɔn kàʔa nī gè,
wi‑ wi kɔli sáʔa gè wi‑ muɔ suɔ bè muɔ kpɔni.
4Wi‑ fɔ̀li muɔ yaliire yakɛnrɛ ti mìɛni nɛ̄ dè,
wi‑ sɔ̀ngi wi taa nɛ́ muɔ kakuɔrɔ kaasuʔuro wori ní dè. Ye‑ ŋɔ́ cɛ̀.
5Wi‑ ki kpíʔile muɔ mɛ́ gàa muɔ fungo ki caa gè !
Wi‑ ki yaʔa gìi muɔ nɛ sɔ̀ngí gè, ki mìɛni ki‑ fori.
6Bà weli bé fundaanra yékpuʔulo wáa, bɛ̀ wi 'muɔ suɔ wè,
weli bé sí weli káfali yɛ̀gɛ wè bè weli Kulocɛliɛ kpúʔɔ wè.
Yewe wi‑ ki kpíʔile gàa ki mìɛni muɔ nɛ náari wi mɛ́ gè.
7Píra ŋáà ní wè mi 'ki cɛ́n:
Yewe nɛ wi kùlofɔli suu wè ŋàa wi 'nyíɛnɛ nɛ̀ kɔ̀n wè;
wiī nɛ siɛnnugoro kanʔa dè wi mɛ́ nɛ́ wi kàliige kɔli ŋɔri ní dè
bè wi yaʔa baa wi nàkpaanjɛngɛ nī gè, nyìʔɛnɛ nī lè.
8Pàli 'pe sɔ̀ngirɔ taʔa dè suɔnyɔ wotorilo nɛ̄,
a bìli 'pe funyɔ taʔa yè suɔnyɔ nɛ̄.
Nɛ̀ ki yaʔa weli bèle, Yewe weli Kulocɛliɛ wire míʔɛ weli nɛ yeri.
9Peli bèle, pe céri tiī nɛ pegi pe nɛ̄, pe láʔala nɛ tun;
weli bèle, weli 'nìre wáa nɛ̀ yéri.
10Yewe yo, ‑kùlofɔli suɔ wè;
ma weli náarigɛ cò gè a weli nɛ muɔ yeri wè !
Currently Selected:
Ŋúnuyɔ 20: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
