Ŋúnuyɔ 19
19
Kulocɛliɛ yafaanra nɛ́ wi kàyuʔujuuro wori dī
1Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2Nyìʔɛnɛ niī nɛ Kulocɛliɛ kpuɔmɔ tìí bè,
naamɛ larigɛ kiī nɛ wi kiyɛ yakpiʔilide nyu dè nɛ tìí.
3Cɛngɛ ó cɛngɛ, nyìʔɛnɛ niī nɛ siɛnrɛ kɛ́ngi dè nɛ yigi;
pìlige ó pìlige, niī nɛ siɛnnɛ tɛnmɛ bèle sícilimɛ nɛ̄ bè.
4Ni wè nɛ nyu wīʔ, nyasiɛnkanʔana sí bɛ̀ʔ,
ngbúʔulo wè ni yékpoli lúru lèʔ.
5Nɛ̀ sí ki yaʔa ni siɛnrɛ tiī nɛ fé nɛ dàala ni mìɛni kpàrí,
ti tùnmɔ piī nɛ nɔ̀gí duniya tiɛrɛ ti mìɛni nī#19.5 Ki siɛnrɛ ti 'juu baa Wurɔ 10.18, nɛ̀ yɛli nɛ́ girɛki siɛnliɛrɛ ní dè..
Kulocɛliɛ nyɛ́nì fɛ̀ni saʔa káà faan cɛngɛ mɛ́ gè nyìʔɛnɛ nī lè.
6Cɛngɛ kiī bɛ̀ nàgafɔnwɔ tíɛlɛ ŋàa wi péli nɛ̀ cɛliwɛ líɛ wè,
wi nɛ̂ yiri wi saʔa nī gè fundaanra nɛ̄ dè,
wi nìɛ muguri bɛ̀ nàgalirige tíɛlɛ
gàa ki fé ki koligo nī gè bàa jíin wè.
7Cɛngɛ ki nɛ̂ yɛ̀ cɛngɛnyɛnifoligɔli mɛ́ gè,
nɛ̀ kɛ́ nɛ̀ sɛ́nì jíin cɛngɛnyɛnijiingɔli mɛ́ gè.
Yakaa sǐ gbɛ̀ làri ki káfugo nɛ̄ gèʔ.
8 Yewe Fànʔa Siɛnrɛ ti nyɛ́nì sɔ́migɔ nɛ̀ nyuɔ,
tiī nɛ ŋɔri kanʔa siɛn sìi mɛ́ wè.
Yewe nyakungɛngɛ siɛnrɛ tiī siɛn tɛ́ngɛ ti nɛ̄;
tiī nɛ sícilige kanʔa bàli mɛ́ piyè fìɛ kaala cɛ́n wèʔ.
9Yewe kacinʔɛnɛ kele kiyē síngele
nɛ fundaanra kanʔa siɛn fungo mɛ́ gè.
Yewe kajuudiʔɛlɛ siɛnrɛ ti 'fílige, ti nɛ̂ siɛn sáʔa wi nìɛ nyaʔa cìilige.
10Fíɛrɛ dáà ti yē siɛn mɛ́ Yewe yiʔɛ mɛ́ gè, tiī cìilide;
ki fíɛrɛ ti nɛ̂ kò baa súuri lɛ̀lɛ ó lɛ̀lɛ nī.
Yewe kàyuʔujuuro tiī kányiʔɛ, ti sí sɔ́migɔ nɛ̀ sín.
11Tɔ̀ni yē ti nī nɛ̀ tóri tiɛ nɛ̄, fúɔ nɛ̀ tóri tiɛciiliwe nɛ̄.
Tiī tàanra nɛ̀ tóri sáluʔɔ nɛ̄, sáluʔɔ gáà ki yigi sásiɛrɛ nī dè.
12Yewe yo, muɔ siɛnrɛ tiī nɛ mi sɔ̀mí, mi ŋáà wī muɔ baakuɔwɔ wè.
Ŋàa wi tári nɛ yɛligi nɛ́ ti ní dè, wiī nɛ tɔ̀ni taʔa ti nī.
13Ŋáa wi bé gbɛ̀ wi pùunnidiɛyɛ yi mìɛni cɛ́n ?
‑Mi pùunnidiɛyɛ yi mìɛni yige mi nī, nyàa yi 'làri mi nī !
14ʔaan, nɛ̀ pínɛ ‑mi suɔ nìɛnyiɛnigɛ sɔ̀ngirɔ mɛ́ dè#19.14 nìɛnyiɛnigɛ sɔ̀ngirɔ mɛ́ dè:Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: fungboliyofɔlilɔ mɛ́ bèle.,
kire ga buu ti fǎga fànʔa taa mi nɛ̄ʔ.
Bà m'bé puu nɛ́ funviige ní nɛ́ tiɛlɛ fùn bè suɔ tuudiɛlɛ mɛ́ lè.
15ʔé Yewe, ‑ki kpíʔile mi nyasiɛnrɛ nɛ́ mi funzɔngirɔ ní dè
ti‑ muɔ dɛ́ni,
muɔ ŋáà wī mi kàdɛnigbaala lè,
muɔ ŋáà wī mi suɔfɔli wè.
Currently Selected:
Ŋúnuyɔ 19: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
