Ŋúnuyɔ 14
14
Siɛn nigbe wè bile nɛ kacɛ̀ngɛ kpínʔiniʔ
1Ŋúnuŋuminɔ yiɛginiwɛ wuʔu gī. Dawuda wuʔu gī.
Lelabiligɛ kiī nɛ ki sɔ̀ngí ki fungo nī gè nɛ́ jo:
«Kulocɛliɛ wè baaʔ.»
Wi fungo ki 'núʔɔ kacɛ́nmɛ fùn;
wi kakpiʔiligele kiyē karigɛlɛ.
Siɛn nigbe wè bile nɛ kacɛ̀ngɛ kpínʔiniʔ#14.1 Koliyo nyáà wuʔu 1-3, Pɔli 'ki siɛnrɛ líɛ dè nɛ̀ ti juu baa Wurɔ 3.10-12..
2 Nyìʔɛnɛ naamɛ gè,
a Yewe wi 'nyùgo cùungu gè nɛ̀ lewiile wéli bèle,
bè ki wéli a ki yē wàa yē síciliwe,
a ki yē wàa nɛ Kulocɛliɛ caa wè.
3A wi 'ki nyaa pe mìɛni nyɛ́nì koligo wáa gè.
Pe mìɛni bìnɛ funyɔ yiī núʔɔyɔ.
Wàa wè kacɛ̀ngɛ kpínʔiniʔ, wàa fáalaʔ.
4Siɛnnɛ bálì pe mìɛni pe kapiʔi kpínʔini gè,
piyè yakaa cɛ́nʔ wī lé ?
Nɛ́ ki cɛ́n piyē nɛ mi siɛnnɛ káa bèle
majo bɛ̀ pe cî nɛ suro líi dè#14.4 majo bɛ̀ pe cî nɛ suro líi dè: Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: bɛ̀ pe cî nɛ búru káa wè..
Pe cɛ wè nɛ Yewe míʔɛ yeri gè púloʔ !
5Pe m'bɛlɛ, fíɛrɛ nɛ pe cògí, pe 'fún nɛ yàʔará,
nɛ́ ki cɛ́n Kulocɛliɛ yē wi siɛnsinminɛ gboli
ni sunʔɔmɔ nī bè.
6Yeli siɛnpiile bèle,
yeli bé cɛ gbɛ̀ri fuunmɔfɔlilɔ tíʔɛ bèle wī;
gàa pe sɔ̀ngí bè kpíʔile gè, yeli bèri fìɛrɛ tɔ́ngi ki nɛ̄,
kire nɛ́ ki mìɛni ní Yewe wī pe làridiʔɛ gè.
7Yeli sì ki cɛ́nʔ lé, Yewe wire bɛ̀ʔ lé
wi bé kɔ́n Siyɔn nyagurugo mɛ́ gè
bè suɔlɔ kɛn lè Isirayɛliyé mɛ́ bèle lé ?
A Yewe kɛ́nì wi siɛnnɛ pe kele cuɔnri gèle,
Yakuba # 14.7 Yakuba wire wī Isirayɛliyé tuuliʔɛ gè. béri fundaanra kpínʔini,
Isirayɛli siɛnnɛ pe bé puu fundaangbuɔrɔ nɛ̄ !
Currently Selected:
Ŋúnuyɔ 14: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
