Yirile 38
38
Bɛtisalɛli wi 'gbùʔɔrɔdiʔɛ yafanʔa kpíʔile gè
1A Bɛtisalɛli wi sí Yewe gbùʔɔrɔdiʔɛ faan gè, kire gáà ki 'puu kakuɔrɔ kaasuʔuro wuʔu gè, nɛ́ akasiya tiire ní dè. Ki tɔnigɛnmɛ pi 'puu kabuunyiʔɛnɛ kogunɔ, nɛ́ ki píɛlɛgɛnmɛ pi 'puu kabuunyiʔɛnɛ kogunɔ. Gbùʔɔrɔdiʔɛ ki kayɔbiyɔ sicɛri yi mìɛni 'puu nuyɔ. Ki kpàʔalagɛnmɛ pi 'puu kabuunyiʔɛnɛ taanri. 2A wi 'nyɛgɛlɛ kpíʔile gèle nɛ̀ tárigɛ gbùʔɔrɔdiʔɛ ki gɔ̀ninɔ tiʔɛlɛ sicɛri ke mìɛni nɛ̄ gèle, kire ga buu nyɛgɛlɛ gèle nɛ́ gbùʔɔrɔdiʔɛ ní gè, ti mìɛni- pínɛ bè puu sìnbogo. A wi 'ki mìɛni pínɛ nɛ̀ tɔ́n nɛ́ kányiɛrɛ ní. 3A wi 'ki yakpiʔilide kpíʔile dè nɛ́ kányiɛrɛ ní: wi 'yaleye yáà kpíʔile bèri cúnʔɔ kɔ̀ngí gè, nɛ́ ki yakɔnyɔ kpíʔile yè, nɛ́ ki sìsiɛn nyɛri tasaadurulo ní bèle, nɛ́ ki gànʔana dɛ̀ngɛlɛ ní gèle, kaara wuʔulo gèle, nɛ́ ki kàsun kɔ̀nyɛrɛ ní dè.
4A wi 'kányiɛrɛ kàwiire nɛ̀gɛ kpíʔile bɛ̀ jùɔwiʔile tíɛlɛ, nɛ́ ki timɔri dáà tárigɛ dè ki nyuɔyɔ táanmɛ gè, kire ga buu timɔri ti- gbùʔɔrɔdiʔɛ cò gè sunʔɔmɔ nī bè, bè tìgi táanmɛ gè. 5A wi 'kájingele sicɛri kpíʔile, kányiɛrɛ kàwiire nɛ̀gɛ gɔ̀ninɔ tiʔɛlɛ sicɛri nɛ̄ gèle, bè kàgbiʔile le gèle baa. 6A wi 'akasiya kàgbiʔile siin tɛn gèle, nɛ́ kányiɛrɛ nyɛgɛ nɛ̀ ke tɔ́n nɛ́ ti ní. 7A wi 'kàgbiʔile le gèle kájingele nī gèle ki nɔgɔn tiʔɛlɛ nɛ̄ gèle. Kàgbiʔile ke 'puu ki lìʔɛgɛlɛ siin tiɛyɛ nī yè, kire ga buu pe- gbɛ̀ ki líɛ. Kire gbùʔɔrɔdiʔɛ gáà wi 'kpíʔile nɛ́ tiitɛnkpɔbiyɔ ní yè; ki laamɛ pi 'puu waʔanɛ.
8A wi sí tasaakpuʔɔ kpíʔile gè nɛ́ ki tɛ́ngɛdiʔɛ ní gè nɛ́ kányiɛrɛ ní dè. Cɛlilɛ gboli náà ni 'puu nɛ baara kúu dè Kpàlidiʔɛ Kpátaʔa ki wìile nɛ̄ lè, a peli míɛni 'pɛn nɛ́ kányiɛrɛ dibalele bálì ní bèle, nɛ̀ pɛ́nì pe kɛn Bɛtisalɛli mɛ́, a wi 'pe nyɛgɛ nɛ̀ tasaakpuʔɔ kpíʔile gè nɛ́ pe ní#38.8 Wéli baa 30.17-21..
Bɛtisalɛli wi 'Kòridiʔɛ dàligɛ sùlu gè
9A Bɛtisalɛli wi sí Kòridiʔɛ dàligɛ sùlu gè nɛ́ fɛ̀ninɛ ní bèle bàli pe yé tíin nɛ́ lɛn lagbɛnrɛ jèsii pìniwe ní wè. Cɛngɛnyɛnifolimɛ kàliige kɔli mɛ́ gè, dàligɛ fɛ̀ninɛ pe yé tɔni nɛ̀ sɛ́nì nɔ̀ fúɔ kabuunyiʔɛnɛ dabataan kire kayɔbigɔ nɛ̄ gè#38.9 Koliyo 9-20 wuʔu nī gè, wéli baa 27.9-19.. 10A pe 'kire fɛ̀ninɛ bálì tùɔn tùɔn bèle tiindugugolo togo nɛ̄ gèle, gàli pe 'cɔ́ri nɛ̀ yérige kányiɛrɛ táanmɛ nyùyɔ nɛ̄ yè. A pe 'walifiiwe yakparigɛlɛ le gèle tiindugugolo nɛ̄ gèle nɛ́ walifiiwe yatunʔɔnɔ ní gèle, bè fɛ̀ninɛ tùɔn tùɔn bèle ke nɛ̄. 11Bɛ̀ ki 'puu míɛni cɛngɛnyɛnifolimɛ kàmɛgɛ kɔli mɛ́ gè. Dàligɛ tiʔɛ ki tɔnigɛnmɛ pi 'puu míɛni kabuunyiʔɛnɛ dabataan (100). A pe 'fɛ̀ninɛ bálì tùɔn tùɔn bèle kányiɛrɛ tiindugugolo togo nɛ̄ gèle, nɛ́ ke kányiɛrɛ táanmɛ nyùyɔ ní yè, gàli gīɛlɛ nɛ́ walifiiwe yakparigɛlɛ nɛ́ ke yatunʔɔnɔ ní gèle.
12Cɛngɛnyɛnijiinmɛ kɔli mɛ́ gè, dàligɛ tiʔɛ ki píɛlɛgɛnmɛ pi 'puu kabuunyiʔɛnɛ togosiin nɛ́ kpɔrigɔ. Pe yé ki fɛ̀ninɛ tùɔn bèle tiindugugolo kiɛ nɛ̄ gèle, gàli pe 'cɔ́ri nɛ̀ yérige kányiɛrɛ tiindugugolo nyùyɔ kiɛ nɛ̄ yè, gàli gīɛlɛ nɛ́ walifiiwe yakparigɛlɛ nɛ́ ke yatunʔɔnɔ ní gèle. 13Cɛngɛnyɛnifolimɛ kɔli mɛ́ gè, dàligɛ tiʔɛ ki píɛlɛgɛnmɛ pi 'puu míɛni kabuunyiʔɛnɛ togosiin nɛ́ kpɔrigɔ.
14,15Wìile náà nī baa dàligɛ ki jíindiʔɛ nī gè kire kɔli mɛ́ gè, fɛ̀ninɛ pe 'puu wìile ni kayɔbiyɔ siin nɛ̄ yè. Pe tɔnigɛnmɛ pi 'puu kabuunyiʔɛnɛ kiɛ nɛ́ kogunɔ; pe 'pe tùɔn tiindugugolo taanri nɛ̄ gèle, gàli pe 'cɔ́ri nɛ̀ yérige nyùyɔ taanri nɛ̄ yè.
16Fɛ̀ninɛ bálì pe 'Kòridiʔɛ dàligɛ tiʔɛ sùlu gè, pe 'pe mìɛni tìin nɛ́ lɛn lagbɛnrɛ jèsii pìniwe ní wè. 17Tiindugugolo ke táanmɛ nyùyɔ yè, pe 'yi kpíʔile nɛ́ kányiɛrɛ ní, nɛ̀ ki yaʔa ke yakparigɛlɛ nɛ́ ke yatunʔɔnɔ ní gèle, nɛ́ míɛni ke naminimɛ nyùyɔ tiɛyɛ ní yè, pe 'yi tɔ́n nɛ́ walifiiwe ní. Dàligɛ tiindugugolo ke mìɛni gèle a pe 'ke suʔulo kìye nɛ̄ nɛ́ walifiiwe yakparigɛlɛ ní gèle.
18 Nàkpanʔa wìile tɔ́nfɛni ŋáà pe 'súu nɛ́ jèsii ní wè ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lɛn lagbɛnrɛ jèsii pìniwe ní wè, a wi 'dàligɛ wìile tɔ́n lè. Wi 'puu bɛ̀ dàligɛ ki fɛ̀ninɛ tíɛlɛ bèle: wi píɛlɛgɛnmɛ pi 'puu kabuunyiʔɛnɛ togo, nɛ́ wi kpàʔalagɛnmɛ pi 'puu kabuunyiʔɛnɛ kogunɔ. 19Wi tiindugugolo sicɛri ke táanmɛ nyùyɔ yè, pe yé yi kpíʔile nɛ́ kányiɛrɛ ní. Ke yakparigɛlɛ gèle nɛ́ ke yatunʔɔnɔ ní gèle, nɛ́ míɛni ke naminimɛ nyùyɔ yè, pe yé ti mìɛni kpíʔile nɛ́ walifiiwe ní. 20Kòridiʔɛ ki tínganʔana, nɛ́ dàligɛ tiʔɛ ki fɛ̀ninɛ gunyɔ tínganʔana ní gèle, ke mìɛni 'puu kányiɛrɛ.
Pe 'lɔri ti niʔɛgɛnmɛ tɔ́ri bè
21Lɔri ti niʔɛgɛnmɛ pi m'bɛ, lɔri dáà pe 'líɛ nɛ̀ Kòridiʔɛ faan gè, Kòridiʔɛ gáà nī nyakungɛngɛ siɛnrɛ ti 'puu nɛ kòrí dè. Kire tɔ́rilɔ lire pe yé kpíʔile nɛ̀ yɛli nɛ́ Misa nyasiɛnrɛ ní dè. Leviiyé peli pe yé ti tɔ́ri; Itamari wi 'puu pe yiɛginiwɛ wè. Wire wi 'puu kacuɔnriwɔ Arawɔn jaa wè. 22Bɛtisalɛli wè, Uri jaa wè, Uri ŋáà wī Kuri jaa wè, Zuda saʔa tùlugo nī gè, wire wi yé baara dáà ti mìɛni kúɔ dàa Yewe cé juu nɛ̀ gbɛ̀ngɛ Misa mɛ́ wè. 23A Woliyabi pɛ́nì wi sáʔa, wire ŋáà wi 'puu Akisamaki jaa wè, Dan saʔa tùlugo nī gè, wire ŋáà mɛ́ baara ti kacɛ́nnɛ ni 'puu lè: kàdɛnitɛnwɛ wi 'puu, nɛ wi 'puu nɛ jaʔa nɛ baara táà cɛ́ngi bé ti kpíʔile wi nyùgo kúrugu. Wire míɛni wi yé fɛ̀ninɛ sɔ́migɔ bèle nɛ̀ súu nɛ́ sìnbasiire jèsii ní wè, ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lɛn lagbɛnrɛ jèsii pìniwe ní wè.
24Tiɛ ŋáà nyuɔ pe yé tíʔɛ nɛ̀ saawalidɛngɛgɛ baara kúɔ dè, tiɛ ŋáà pe yé yɛ̀gɛ naamɛ nɛ̀ tìɛ Yewe nɛ̄ wè kpuʔɔrɔ wuu wè, wi 'puu culolo sirakogunɔ (1 000) felige. Pe yé wi kíri nɛ̀ taʔa culo nɛ̄ wè nɛ̀ yɛli nɛ́ Yewe saawalidɛngɛgɛ culolo kɛnmɛ ní bè#38.24 culolo sirakogunɔ: Eburu siɛnrɛ nī dè, pe 'ki juu nɛ́ jo: talan pígele togo nɛ́ kacɛri nɛ́ sikile pígele sirataanri nɛ́ tekɔlini nɛ́ kpɔrigɔ (730). Talan nigbe, wire nɛ̂ nyaa sikilele togotaanri (300); nɛ́ míɛni talan nigbe wire nɛ̂ nyaa culolo togo nɛ́ kpɔrigɔ. Sikile nigbe wè, wire nɛ̂ puu giraminɛ kiɛ nɛ́ nigbe nɛ́ tílaga (11,4).. 25Isirayɛli tògo siɛnnɛ bálì pe yé tɔ́ri nɛ́ pe míɛyɛ sɛbɛ yè, a peli 'pɛn nɛ́ pe walifiiwe ní wè. Wire 'puu culolo sirakiɛ nɛ́ kɔlisiin nɛ́ togosiin (3 440) felige. Pe yé wi kíri nɛ̀ taʔa culo nɛ̄ wè nɛ̀ yɛli nɛ́ Yewe saawalidɛngɛgɛ culolo kɛnmɛ ní bè#38.25 Koliyo 25-26 wuʔu nī gè, wéli baa 30.11-16.. 26A ki 'nyaa nàguɔlɔ pe mìɛni bálì pe yé tɔ́ri á pe 'yiʔɛlɛ togo taa gèle nɛ́ bàli pe 'kàa taʔa gè, peli yé puu siɛnnɛ siramuʔɔyɔ tekɔlisiin nɛ́ kpɔrigɔ nɛ́ sirakiɛ nɛ́ kɔlisiin nɛ́ tekɔlisiin nɛ́ kpɔrigɔ (603 550). A pe mìɛni nigbe nigbe pe 'wali liʔɛlɛ kɛn gèle, a siɛn ó siɛn wuu 'niʔɛ nɛ̀ kò cɛ̀ri bè giraminɛ kogunɔ kúɔ#38.26 siɛn wuu 'niʔɛ nɛ̀ kò cɛ̀ri bè giraminɛ kogunɔ kúɔ: Nyuɔ gáà ki 'tìɛ náʔa gè, eburu siɛnrɛ ti 'ki juu nɛ́ jo bɛka nigbe, ŋàa wi 'puu sikile tílaga. Wéli baa 38.24 kaliwɛgɛ ki táanmɛ gè., a wi mìɛni pɛ́nì nyaa Yewe saawalidɛngɛgɛ ki wali tɔ́rigɛnmɛ bè.
27A pe 'walifiiwe culolo sirakiɛ nɛ́ kɔlisiin nɛ́ togo (3 420) líɛ wè nɛ̀ wi nyɛgɛ nɛ̀ Yewe saawalidɛngɛgɛ ki tingele táanmɛ nyùyɔ nɛ́ gunbɔli fɛ̀ni tiindugugolo táanmɛ nyùyɔ kpíʔile yè, a ti mìɛni bìnɛ wi 'nyaa tingele dabataan (100). A pe 'walifiiwe culolo togo nɛ́ kpɔrigɔ nɛ́ sicɛri felige líɛ nɛ̀ nyùgo ó nyùgo kpíʔile. 28Culolo togo bálì pe yé kò bèle, a pe 'peli tíʔɛ nɛ̀ yatunʔɔnɔ nɛ́ yakparigɛlɛ kpíʔile gèle, gàli ke tiindugugolo sunʔuni gèle kìye nɛ̄ wè, nɛ́ walifiiwe sɛnwɛ nyɛgɛ wè nɛ̀ tiindugugolo naminimɛ nyùyɔ tɔ́n yè nɛ́ wi ní.
29Kányiɛrɛ niʔɛgɛnmɛ báà pe 'yɛ̀gɛ naamɛ nɛ̀ tìɛ Yewe nɛ̄ wè kpuʔɔrɔ wori dè, tire 'puu culolo sirakiɛ nɛ́ siin nɛ́ togo (2 420) felige. 30A pe 'tire kányiɛrɛ tíʔɛ dè nɛ̀ Kpàlidiʔɛ Kpátaʔa wìile tingele táanmɛ nyùyɔ kpíʔile yè, nɛ́ Yewe gbùʔɔrɔdiʔɛ nɛ́ ki kányiɛrɛ kàwiire nɛ̀gɛ, nɛ́ ki yakpiʔilide ti mìɛni kpíʔile, 31nɛ́ dàligɛ ki fɛ̀ninɛ gunyɔ tingele ke táanmɛ nyùyɔ kpíʔile yè nɛ̀ ki màʔa nɛ̀ suʔu, nɛ́ nàkpanʔa wìile tingele nyùyɔ ní yè, nɛ́ míɛni Kòridiʔɛ ki tínganʔana nɛ́ dàligɛ wuʔulo ní gèle.
Currently Selected:
Yirile 38: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
