Yirile 39
39
Pe 'kacuɔnrilɔ kàfɔli burudo kpíʔile dè
1A pe 'tiɛ jèsii líɛ wè, nɛ́ jèsii ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, bè burudiinre kpíʔile dè dàa pe béri nii bèri baara kúu dè saawalidɛngɛgɛ nī gè. A pe 'Arawɔn burudo wàlidɛngɛrɛ kpíʔile dè míɛni, majo bɛ̀ Yewe cé ki juu nɛ̀ gbɛ̀ngɛ Misa mɛ́ wè.
2A pe 'efodi burubile tìin lè nɛ́ tiɛ jèsii ní wè, nɛ́ jèsii ŋáà wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lɛn lagbɛnrɛ jèsii pìniwe ní wè. 3A pe 'tiɛkpeye kpúɔn yè nɛ́ yi cùnʔɔ nɛ̀ yi kpíʔile màʔabigele nɛ̀ ke tìin nɛ́ jèsii ŋíì ní wè ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lɛn lagbɛnrɛ jèsii pìniwe ní wè, a pe 'pe baara sɔ́migɔ dè nɛ̀ kúɔ. 4A pe 'fíkɛnyɛ màʔagɛlɛ siin jɔli nɛ̀ tárigɛ efodi burubile naamɛ nyuɔyɔ siin nɛ̄ yè, nɛ́ ke kàduʔu mɛ́ nyuɔyɔ nɛ́ ke yiʔɛ mɛ́ nyuɔyɔ sigi yè nɛ̀ yérige peri ki nii fíkɛnnyuyɔ nɛ̄ yè.
5Burugbuʔɔ ki màʔana ni 'pínɛ nɛ̀ suʔu nɛ̀ puu sìnbogo nɛ́ efodi burubile ní lè. Pe yé ni kpíʔile kanumɔ nɛ̄: nɛ́ jèsii ní ŋàa wī tiɛ wè, nɛ́ ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè nɛ́ lɛn lagbɛnrɛ jèsii pìniwe ní wè, ŋàa kpìɛndiinnɛ pe sɔ́migɔ nɛ̀ kpíʔile wè, majo bɛ̀ Yewe cé ki juu nɛ̀ gbɛ̀ngɛ Misa mɛ́ wè. 6A pe sí ɔnikisi kàdɛniyɛ líɛ yè nɛ̀ Isirayɛli jaala míɛyɛ gbógo yè nɛ̀ kɔ̀n yi nɛ̄, nɛ́ tiɛ nɛ̀joyo kpíʔile yè nɛ̀ kàdɛniyɛ le yè ke nī, 7nɛ̀ ke jɔli nɛ̀ tárigɛ efodi fíkɛnyɛ màʔagɛlɛ nɛ̄ gèle. Kire kàdɛnitɛnyɛ nyáà yi bé ki yaʔa Yewe de sɔ̀ngí de taʔa nɛ́ Isirayɛli jaala ní, majo bɛ̀ Yewe cé ki juu nɛ̀ gbɛ̀ngɛ Misa mɛ́ wè.
8A kpìɛndiinnɛ pe 'sìndinge kpɔ̀bi sɔ́migɔ wè nɛ̀ kpíʔile kanumɔ nɛ̄ nɛ́ efodi burubile ní lè: pe 'wi tìin nɛ́ jèsii ní ŋàa wī tiɛ wè, nɛ́ ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lɛn lagbɛnrɛ jèsii pìniwe ní wè. 9A pe 'sìndinge kpɔ̀bi wáa wè nɛ̀ taʔa, a wi 'kò jifaa. Wi tɔnigɛnmɛ nɛ́ wi píɛlɛgɛnmɛ pi mìɛni 'puu nubo; wi kayɔbiyɔ yi mìɛni sicɛri 'puu kadaala nigbe. 10A pe sí tùluyo sicɛri kpíʔile lagbɛnrɛ kàdɛniyɛ woyo. Sariduwani, nɛ́ topazi, nɛ́ ɛmɛrɔdi 'puu tùlubelige nɛ̄ gè#39.10 Koliyo 10-13 wuʔu nī gè, lagbɛnrɛ kàdɛniyɛ nyáà yè, yàa yiī baa, yiì fílige nɛ̀ cɛ́nʔ.. 11Sikaribuli, nɛ́ safiiri, nɛ́ luluu 'puu tùluyo siinwuʔu nɛ̄ gè. 12Tùluyo taanriwuʔu nɛ̄ gè, wopali, nɛ́ agati, nɛ́ amɛtiisi 'puu baa. 13Nɛ́ tùluyo sicɛriwuʔu nɛ̄ gè, kirisoliti, nɛ́ ɔnikisi, nɛ́ jasipi 'puu baa. Yire kàdɛniyɛ nyáà yè, pe yé yi le tiɛ yalebigele nī gèle. 14Isirayɛli jaala pe míɛyɛ kiɛ nɛ́ siin yi mìɛni yé gbógo nɛ̀ kɔ̀n kàdɛniyɛ nyáà yi mìɛni nigbe nigbe nɛ̄ yè, saaya tùluyo kiɛ nɛ́ siinwuʔu nɛ̄ gè, majo bɛ̀ siɛn cî fìɛ kpúɔn yakaa nɛ̄ gè.
15A pe 'tiɛ cɛ̀nwɛ nyùʔɔbigele siin cùnʔɔ nɛ̀ ke tìin bɛ̀ jèsii pìniwe tíɛlɛ, nɛ́ le sìndinge kpɔ̀bi nɛ̄ wè. 16A pe 'tiɛ yalebigele siin kpíʔile gèle, nɛ́ tiɛ fìʔile siin ní bèle, nɛ̀ pe tárigɛ sìndinge kpɔ̀bi nyuɔyɔ siin nɛ̄ yè. 17A pe sí tiɛ nyùʔɔbigele siin líɛ gèle nɛ̀ ke sùuri tiɛ fìʔile siin bálì nī bèle, bàli bīɛlɛ sìndinge kpɔ̀bi nyuɔyɔ siin nɛ̄ yè. 18A pe sí tiɛ nyùʔɔbigele nyuɔyɔ nyíì siin líɛ yè nɛ̀ yi suʔu efodi burubile tiɛ yalebigele siin nɛ̄ gèle, gàli pe cé suʔu fíkɛnyɛ màʔagɛlɛ nɛ̄ gèle, sìndinge yiʔɛ mɛ́ gè.
19A pe sí tiɛ fìʔile siin pálì kpíʔile, nɛ̀ pe jɔli nɛ̀ tárigɛ sìndinge kpɔ̀bi wi táanmɛ nyuɔyɔ siin nɛ̄ yè, laamɛ kayɔbigɔ nɛ̄ gè, efodi burubile kɔli mɛ́ gè. 20A pe sí ń'nɛ̀ tiɛ fìʔile siin pálì kpíʔile nɛ̀ pe jɔli nɛ̀ tárigɛ efodi burubile yiʔɛ mɛ́ gè fíkɛnyɛ màʔagɛlɛ táanmɛ gè, tiʔɛ gíì nī efodi màʔana ni 'suʔu lè efodi burubile nɛ̄ lè. 21A pe 'fali nɛ̀ sìndinge kpɔ̀bi fìʔile suʔu bèle efodi burubile fìʔile nɛ̄ bèle, nɛ́ jèsii ní wè ŋàa wī gàri céri dè, kire ga buu sìndinge kpɔ̀bi wi- puu suʔuwo súuri efodi màʔana nɛ̄ lè, wi fǎga gbɛ̀ jáa bè sáʔaʔ, majo bɛ̀ Yewe cé ki juu nɛ̀ gbɛ̀ngɛ Misa mɛ́ wè.
22Burugbuɔyɛligɛ gáà nɛ̄ pe 'efodi burubile taʔa lè, ki mìɛni 'puu tìinge nɛ́ jèsii ní wè ŋàa wī gàri céri dè. 23Burugbuɔyɛligɛ ki 'puu nɛ́ yétiige ní, kire ga buu nyùgo ki de jíin ki nī. A pe 'ki yétiige tiɛyɛ tìin yè nɛ̀ ki súu nɛ̀ màʔa, kire ga buu ki fǎga gbɛ̀ ciɛnʔ. 24A pe 'burugbuɔyɛligɛ ki táanmɛ nyuɔyɔ kpíʔile yè cɛ̀nyɛ, nɛ́ yɛrɛ táà tìin bɛ̀ girenadi yasɛnrɛ tíɛlɛ dè, nɛ́ jèsii ní wè ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lɛn lagbɛnrɛ jèsii pìniwe ní wè. 25Girenadi yasɛnrɛ sunʔɔmɔ nī bè, a pe 'tiɛ cɛ̀nwɛ wòrigbuʔulo kpíʔile nɛ̀ le baa ki táanmɛ nyuɔyɔ nɛ̄ yè nɛ́ yi màʔa nɛ̀ suʔu: 26wòrigbolo nigbe, girenadi yasɛngɛ nigbe, wòrigbolo nigbe, girenadi yasɛngɛ nigbe, fúɔ nɛ̀ wi baarakuɔ burugbuɔyɛligɛ ki táanmɛ nyuɔyɔ màʔa yè nɛ̀ suʔu, majo bɛ̀ Yewe cé ki juu nɛ̀ gbɛ̀ngɛ Misa mɛ́ wè.
27Arawɔn nɛ́ wi jaala burudɔniyɔ yè, a pe 'yi fɛ̀ni tìin wè nɛ́ lɛn lagbɛnrɛ jèsii ní wè, 28nɛ́ ndɔ̀njɛngɛ ní gè nɛ́ lɛn lagbɛnrɛ jèsii ní wè, nɛ́ ndɔ̀ngɔlɔ ní gèle nɛ́ lɛn lagbɛnrɛ jèsii ní wè, nɛ́ sí jàdigile kpíʔile, lɛn lagbɛnrɛ jèsii pìniwe wuulo bèle. 29A pe sí buruyo màʔagɛlɛ kpíʔile gèle nɛ́ lɛn lagbɛnrɛ jèsii pìniwe ní míɛni, nɛ́ jèsii ní ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ̀ ke jɔli nɛ̀ ke súu, majo bɛ̀ Yewe cé ki juu nɛ̀ gbɛ̀ngɛ Misa mɛ́ wè.
30A pe 'tiɛ cɛ̀nwɛ wáà kpúɔn nɛ̀ kpɔbi bɛ̀ tiige fiɛnrɛ tíɛlɛ nɛ̀ ndɔ̀njɛngɛ wàlidɛngɛgɛ kpíʔile gè, nɛ́ ki sɛbɛ tiɛ nɛ̄ wè kɛnmɛ bíì nɛ̄ pe 'ki sɛbɛ fìɛ nɛ̄ wè: «Wàlidɛngɛgɛ Yewe mɛ́». 31A pe sí gàri céri jèsii màʔana tíʔɛ lè nɛ̀ yakpɔbigɔ puɔ gè ndɔ̀njɛngɛ nɛ̄ gè gbɛlɛ yiʔɛ mɛ́ gè, majo bɛ̀ Yewe cé ki juu nɛ̀ gbɛ̀ngɛ Misa mɛ́ wè.
Kòridiʔɛ baara ti 'kúɔ
32Bà sí ki kpíʔile a Kòridiʔɛ gè, Kpàlidiʔɛ Kpátaʔa gè, a ki baara ti 'kúɔ. A Isirayɛli siɛnnɛ pe 'ti mìɛni kúɔ nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè. 33A pe 'pɛn nɛ́ Kòridiʔɛ ní gè nɛ̀ pɛ́nì ki kɛn Misa mɛ́ wè, kpátaʔa gè nɛ́ ki yakpiʔilide ti mìɛni ní dè, nɛ́ ki yatunʔɔnɔ ní gèle, nɛ́ ki tingele ní gèle, nɛ́ ki kàgbiiparigɛlɛ ní gèle, nɛ́ kpátaʔa ki tiindugugolo ní gèle, nɛ́ ki táanmɛ nyùyɔ ní yè; 34nɛ́ kpátaʔa yatɔngɔ ní gè gàa pe 'kpíʔile nɛ́ sìnbapɔlilɔ sɛ̀nyɛ ní yè nyàa pe 'nyɛ́nigɛ yè, nɛ́ sɛ̀nguʔu yatɔngɔ ní gè, nɛ́ gunbɔli fɛ̀ni ní wè; 35nɛ́ nyakungɛngɛ finʔɛgɛ ní gè nɛ́ ki kàgbiʔile gálì ní pe ki líi gè, nɛ́ kàsulugo suɔdiʔɛ ní gè; 36nɛ́ tabali nɛ́ wi yakpiʔilide ti mìɛni ní dè, nɛ́ búru feliye nyáà pe tɛ́ngi Yewe yiʔɛ mɛ́ gè; 37nɛ́ tiɛ cɛ̀nwɛ fètindaʔagɛlɛ tiige nɛ́ ke fètingele ní gèle gàli pe 'gbòbori nɛ̀ tɛ́ngɛ gèle, nɛ́ ke yakpiʔilide ti mìɛni ní dè, nɛ́ sùnmɔ ní bè bàa pe béri nii ke nī gèle; 38nɛ́ tiɛ cɛ̀nwɛ wusuna sórigodiʔɛ ní gè, nɛ́ siɛnnyiɛnɛgɔn sùnmɔ nɛ́ nùdaanna wusuna; nɛ́ Kpátaʔa wìile fɛ̀ni ní wè; 39nɛ́ Yewe gbùʔɔrɔdiʔɛ gáà pe 'kpíʔile nɛ́ kányiɛrɛ ní dè nɛ́ ki kányiɛrɛ kàwiire nɛ̀gɛ ní wè, nɛ́ ki kàgbiʔile gálì ní pe ki líi gè nɛ́ ki yakpiʔilide ti mìɛni ní dè; tasaakpuʔɔ nɛ́ ki tɛ́ngɛdiʔɛ ní gè; 40nɛ́ Kòridiʔɛ ki dàligɛ sùlufɛninɛ ní bèle, nɛ́ ki tiindugugolo ní gèle, nɛ́ ki táanmɛ nyùyɔ ní yè; nɛ́ nàkpanʔa wìile tɔ́nfɛni ní wè, nɛ́ wi màʔagɛlɛ ní gèle, nɛ́ wi tínganʔana ní gèle; nɛ́ yakpiʔilide ti mìɛni dáà pe líi nɛ Yewe gbùʔɔrɔ baara kúu dè Kòridiʔɛ nī gè, gàa pe 'ye míɛni Kpàlidiʔɛ Kpátaʔa gè; 41nɛ́ burudiinre ní dè dàa pe béri nii bèri baara kúu dè tiɛcɛ̀ngɛ wàlidɛngɛgɛ nī gè, nɛ́ míɛni kacuɔnriwɔ Arawɔn wi buruwalidɛngɛrɛ ní dè, nɛ́ wi jaala wori ní dè kire ga buu peri kacuɔnrilɔ baara kúu dè.
42A Isirayɛli siɛnnɛ pe 'baara ti mìɛni kúɔ nɛ̀ yɛli nɛ́ gàa ní Yewe cé juu nɛ̀ gbɛ̀ngɛ Misa mɛ́ wè. 43Bà Misa 'ki nyaa a pe 'baara ti mìɛni kúɔ a ti 'nyuɔ dè, a wi 'ki nyaa pe cé ti mìɛni kúɔ nɛ̀ yɛli nɛ́ dàa ní Yewe cé juu nɛ̀ gbɛ̀ngɛ dè. A Misa wi 'diba kpíʔile wè pe mɛ́.
Currently Selected:
Yirile 39: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
