Yirile 15

Isirayɛliyé pe 'ŋú nɛ̀ Yewe gbùʔɔrɔ wè

1A Misa nɛ́ Isirayɛli siɛnnɛ pe 'fali nɛ̀ Yewe ŋúnugo gáà ŋú gè, nɛ́ jo:

M'béri Yewe gbùʔɔrɔ́ wè nɛ́ ŋúnugo gáà ní gè;

wi nyɛ́nì fànʔa taa wi leguulo nɛ̄ bèle nɛ́ wi kpuɔmɔ ní bè.

Suɔnyɔ yè nɛ́ yi fɛ̀vɔlilɔ ní bèle,

wi 'pe wáa kuʔɔjii luʔɔ nī gè !

2 Yewe # 15.2 Náʔa gè ki Yewe míʔɛ 'juu werige ebururo nī dè nɛ̀ jo: Ya. wire wī mi ŋɔri dè nɛ́ mi ŋúnugo gè, wire wi 'mi suɔ#15.2 Wéli baa Ŋún 118.14; Eza 12.2..

Wire wī mi Kulocɛliɛ wè, m'béri wi tòbiló;

wire wī mi tuu wi Kulocɛliɛ wè, m'béri wi kpóri#15.2 Wéli baa Tìɛ 15.3..

3Yewe wiī kapiɛngbuɔn sànbali;

wi míʔɛ kire gī Yewe.

4 Farawɔn suɔnyɔ wotorilo bèle, nɛ́ wi kapiɛngbuɔnnɔ ní bèle,

Yewe 'ti mìɛni wáa kuʔɔjii nī wè !

Farawɔn kapiɛngbuɔn kàfɔlilɔ bèle,

Nyàʔanivɛgɛ Tiire kuʔɔjii wi 'pe mìɛni lìi !

5Luʔɔ sícuugo ki 'pe mìɛni júɔ,

a pe 'tìgi luʔɔ nī gè bɛ̀ kàdɛnigɛ tíɛlɛ.

6Yewe yo, muɔ kàliige kɔli kiī nɛ́ ŋɔri ní níɛ nyíʔɛnɛ.

Yewe yo, muɔ kàliige kɔli ki 'muɔ leguulo muʔɔrɔ bèle.

7Muɔ kpuɔmɔ nìʔɛmɛ nī bè

a muɔ 'muɔ leguulo tìrige bèle.

A muɔ 'muɔ fundanʔanigɛ kàsun wo gè pe nɛ̄,

a pe 'súʔu kpógori bɛ̀ nyàsige tíɛlɛ.

8Bà muɔ 'ŋɔ́ muɔ fínawiʔile nī gèle,

a luʔɔ ki 'pínɛ nɛ̀ gbuʔulo kìi nɛ̄,

lakoliyo luɔyɔ yi 'pínɛ yìi nī nɛ̀ kpàʔala bɛ̀ gunyɔ tíɛlɛ,

luɔyɔ sícuuyo yi 'gbɛ̀n kuʔɔjii laamɛ nī bè.

9Leguu wi 'ki sɔ̀ngi nɛ̀ jo:

«M'bé taʔa pe nɛ̄ bè pe cò bè pe kɔliyɛrɛ fùʔuro dè bè suɔ,

bè ti tíla wìye nɛ̄; mi pìle ni bé káa bè tíin.

M'bé mi kapiɛngbuɔn ŋɔnɔ píle lè bè yige; mi kɔli ki bé pe cúʔɔ.»

10Muɔ nyɛ́nì muɔ káfaligɛ fiɛ gè a kuʔɔjii wi 'pe júɔ.

A pe 'tuu ŋɔri luʔɔ nī gè bɛ̀ timɔri tíɛlɛ.

11Yewe yo, ŋáa wī muɔ tíɛlɛ kulocɛlɛlɛ nī bèle ?

Ŋáa wī tiɛlɛ fùn níɛ nyíʔɛnɛ bɛ̀ muɔ tíɛlɛ,

ŋàa nɛ̄ pe 'yɛli bèri fìʔɛ́ wè,

muɔ ŋáà ma kakpoliyo kpínʔini yè ?

12Muɔ nyɛ́nì muɔ kàliige kɔli sáʔa gè,

a dàala ni 'weli leguulo júɔ bèle.

13Muɔ nyɛ́nì pe yiʔɛ kíni muɔ bànguɔ dɛ́nigɛ nī gè,

muɔ siɛnnɛ bèle, bàli muɔ 'suɔ nɛ̀ yige bèle.

Muɔ 'pe yiʔɛ kíni nɛ́ muɔ ŋɔri ní dè

pe waa muɔ kòridiʔɛ wàlidɛngɛgɛ mɛ́ gè#15.13 Kòridiʔɛ gáà ki bé gbɛ̀ nyaa kùlo náà Yewe yé jo wi bé kɛn pe mɛ́ wè (wéli baa 15.17) á kire 'laa tiʔɛ gáà Yewe yé nyíɛnɛ nɛ̀ kɔ̀n gè baa pe cî de Yewe gbùʔɔrɔ́ wè (wéli baa Fàn 12.14,18,26; 14.25; 16.7,15-16; 17.8,10; 18.6; 31.11)..

14Siɛnnɛ pe bé ti lúʔu bèri fún;

ki bé puu Filisiti kùlo siɛnnɛ mɛ́ bèle funwuɔrɔ wuʔu.

15Kire lɛ̀lɛ nī lè, fíɛrɛ bé Edɔmi kàfɔlilɔ cò bèle, pe béri fún.

Mowabi siɛnnɛ fànʔafɔlilɔ, pe béri fún de yàʔará pe funyɔ nī yè.

Kanaa kùlo siɛnnɛ pe mìɛni pe bé nyɛgɛ#15.15 Filisiti kùlo lè (koliyo 14), nɛ́ Edɔmi kùlo lè, nɛ́ Mowabi kùlo lè, keli yé puu kùlogolo kálì gàli nɛ̄ Isirayɛli siɛnnɛ pe yé yɛli bè tóri bè nɛ́ nɔ̀ Kanaa kùlo nɛ̄ lè..

16Fíɛgbuɔrɔ bé tuu pe nɛ̄;

muɔ kɔli ki fànʔa ki bé pe yaʔa pe- kò bobobilo bɛ̀ kàdɛniyɛ tíɛlɛ,

fúɔ bè taa muɔ siɛnnɛ pe tóri, Yewe,

siɛnnɛ bálì muɔ 'suɔ nɛ̀ taa bèle.

17Muɔ bé pɛn nɛ́ pe ní bè pa pe sɔ̀migɔ bè tɛ́ngɛ

muɔ nyagurugo nɛ̄ gè gàa gī muɔ kɔrigɔ gè.

Kire tiʔɛ kire gī, Yewe, gàa muɔ 'nyíɛnɛ nɛ̀ kɔ̀n gè

ki- puu muɔ saawalidɛngɛgɛ gè gàa ki 'nyuɔ gè,

ʔaan, Kàfɔli, tiʔɛ gàa muɔ tíimɛ kiyɛ yi 'kpíʔile yè.

18Weli Kàfɔli Yewe wire sí wi bé puu fànʔa nɛ̄ gè lɛ̀lɛ ó lɛ̀lɛ !

19Nɛ́ ki cɛ́n Farawɔn nɛ́ wi suɔnyɔ wotorilo, nɛ́ wi suɔnyɔ, nɛ́ yi fɛ̀vɔlilɔ ní bèle,

pe mìɛni 'jíin kuʔɔjii luʔɔ nī gè,

a Yewe wi 'kuʔɔjii luʔɔ ki mìɛni tɔ́n pe nɛ̄ !

Nɛ̀ ki yaʔa Isirayɛli siɛnnɛ bèle,

a peli 'tánʔa dàawaʔala nɛ̄ lè kuʔɔjii sunʔɔmɔ nī bè nɛ̀ jeli.

20 Miriyami wè, Kulocɛliɛ siɛnjuuwo wè, Arawɔn juɔ wè, a wire pìnbile láà líɛ wi kɔli nī gè, a cɛlilɛ pe mìɛni 'taʔa wi nɛ̄ nɛ yúu, níɛ pìnbigele kpúɔn gèle.

21A Miriyami wi 'ŋúnugo suɔ gè Isirayɛli siɛnnɛ mɛ́ bèle, nɛ́ jo:

Ye- weri ŋú Yewe mɛ́:

wire wi nyɛ́nì fànʔa taa wi leguulo nɛ̄ bèle

nɛ́ wi kpuɔmɔ ní bè !

Suɔnyɔ yè nɛ́ yi fɛ̀vɔlilɔ ní bèle,

wi 'pe wáa kuʔɔjii luʔɔ nī gè !

Luʔɔ sìsorigo ki 'kò gbuɔdanʔa

22A Misa 'Isirayɛliyé siɛnnɛ kɔ́ri bèle Nyàʔanivɛgɛ Tiire kuʔɔjii tiʔɛ nī gè, a pe 'kɛ́ waama kùlo mɛ́ lè, nàa pe 'ye Suri wè. A pe 'tánʔa cɛnyɛ taanri waama kùlo nī lè; piyè luʔɔ taaʔ. 23A pe sɛ́nì nɔ̀ tiʔɛ káà nɛ̄ gàa pe 'ye Mara. Luʔɔ yé puu baa, nɛ̀ ki yaʔa piyě cî gbɛ̀ ki gbuɔʔ; ki yé puu sìsorigo#15.23 Waama kùlo náà nī lè luɔyɔ yi nɛ̂ puu sìsoriyo tiɛyɛ yáà nī.. Kire kɛnmɛ nɛ̄ pe 'puu nɛ ki ye Mara (ki kɔri wire wī: luʔɔ sìsorigo).

24A siɛnnɛ pe 'yɛ̀ nɛ nyu nɛ kúnʔɔri Misa nɛ̄ nɛ́ jo: «Gáa weli bé gbuɔ#15.24 Bè Isirayɛli siɛnnɛ yaʔa bèle tánʔana nɛ̄ lè waama kùlo nī lè, pe yé puu nɛ túngu lɛ̀gɛlɛ sáamɛ nī nɛ́ Misa nɛ́ Arawɔn ní wè. Wéli baa 16.2-3; 17.3; Tɔ́r 14.2; 16.3-11,14. ?»

25A Misa sí kòkuulo wáa Yewe mɛ́, a Yewe wi 'tiige káà tìɛ wi nɛ̄. A Misa sɛ́nì lège káà ceri nɛ̀ pɛ́nì cáan luʔɔ nī gè, a luʔɔ ki 'kò gbuɔdanʔa.

Kire tiʔɛ gáà kire nī Yewe 'fànʔa kaala náà juu lè nɛ̀ yaʔa pe mɛ́, nɛ́ kàyuʔujuu wori ní dè, nɛ́ pe siʔɛ nɛ̀ wéli, 26nɛ́ ki juu pe mɛ́ nɛ́ jo: «A ki yē yeli nɛ sɔ́migi nɛ lúru Yewe yeli Kulocɛliɛ mɛ́ wè, níɛ kasingele kpínʔini gèle wi yiʔɛ mɛ́ gè, a yeli nɛ líiye cáanri wi kajuudiʔɛlɛ mɛ́ gèle, a yeli nɛ lúru wi fànʔa kele ke mìɛni mɛ́ gèle, mi sǐ ga tíi yaama wáa yeli nɛ̄ʔ, bɛ̀ mi 'pi wáa Ezipiti siɛnnɛ nɛ̄ bèle. Nɛ́ ki cɛ́n mi yē Yewe, yeli gbarifɔli wè.»

27A Isirayɛli siɛnnɛ pe sɛ́nì nɔ̀ Elimi tiʔɛ nɛ̄ gè, baa pìndiʔɛlɛ kiɛ nɛ́ siin yē gèle, nɛ́ támari tiiye togotaanri nɛ́ kpɔrigɔ ní yè. A pe 'súɔn baa kire tiʔɛ nī gè luʔɔ táanni gè.

Currently Selected:

Yirile 15: sev

Highlight

Copy

Compare