Yirile 16
16
Yewe wi 'yaliire kɛn Isirayɛliyé mɛ́ bèle
1A Isirayɛli tògo siɛnnɛ pe mìɛni 'yiri Elimi tiʔɛ nī gè nɛ̀ kɛ́ nɛ̀ sɛ́nì nɔ̀ Sɛnɛ waama kùlo nɛ̄ lè, yeye siinwuʔu nɛ̄ gè ki cɛnyɛ kiɛ nɛ́ kogunɔwuʔu nɛ̄ gè pe yirile kàduʔumɛ gè Ezipiti kùlo nī lè. Pe yé yege nigbe#16.1 Ki 'juu eburu siɛnrɛ nī dè nɛ́ jo yiɛlɛ ni yeziinwuʔu ki cɛnyɛ kiɛ nɛ́ kogunɔwuʔu nɛ̄ pe 'nɔ̀ Sɛnɛ waama kùlo nɛ̄ lè. Torimakiyaʔa cɛngɛ ki 'puu yiɛlɛ ni yebelige cɛnyɛ kiɛ nɛ́ sicɛriwuʔu nɛ̄ gè. Wéli baa 12.6. tánʔa nɛ́ nɛ́ nɔ̀ baa kire tiʔɛ nī gè; ki 'puu Elimi nɛ́ Sinayii nyagurugo#16.1 Nyagurugo gáà nɛ̄ Kulocɛliɛ wìi tìɛ Misa nɛ̄ wè, kire pe 'puu nɛ ye Sinayii nyagurugo gè. Pe 'puu nɛ nyagurugo tɛ́nimɛ yeri bè nɛ pínɛ Sinayii; waama kùlo tiʔɛ ki 'puu. Kuʔɔjii luʔɔ ki yé ki màʔa kàliige mɛ́ nɛ́ kàmɛgɛ mɛ́. Isirayɛli siɛnnɛ peli yé puu nɛ tári nɛ waa cɛngɛnyɛnifolimɛ kàliige kɔli mɛ́ gè, bè sa sùuri Sɛnɛ waama kùlo nī lè, bè sa nɔ̀ Sinayii nyagurugo nɛ̄ gè. sunʔɔmɔ nī bè. 2Baa waama kùlo nī lè, a Isirayɛli tògo siɛnnɛ pe mìɛni 'yɛ̀ nɛ kúnʔɔri Misa nɛ́ Arawɔn nɛ̄ wè.
3A pe 'jo: «ʔá ! A ki yé Yewe yé cɛ́nì weli kpúu baa Ezipiti kùlo nī lè o, kire sì yé pɔ́ri lé ? Bà weli 'puu tɛ́ninɛ kire tiʔɛ nī gè kaara kàjuɔyɔ táanni yè o, kire tiʔɛ nī gè weli yé puu nɛ líi nɛ tíngi. Á yeli 'weli kɔ́ri nɛ̀ yige náʔa waama kùlo náà nī lè, bè siɛnniʔɛmɛ báà yaʔa bè pi pa kùu náʔa gè fungo nɛ̄ gè !»
4A Yewe 'ki juu Misa mɛ́ nɛ́ jo: «Nyaa, m'bé yaliire tìrige dè dàa ti bé kɔ́n nyìʔɛnɛ nī lè bè tìgi yeli mɛ́ dàala nɛ̄ lè, bà siɛnnɛ pe béri yigi cɛngɛ ó cɛngɛ bèri pe liʔɛlɛ jún gèle. Bà m'bé pe puu wéli a ki yē pe béri lúru mi fànʔa kajuʔulo mɛ́ gèle, kire ga laa pe bé cíi wè. 5Cɛnyɛ kɔliniwuʔu nɛ̄ gè, a pe kɛ́nì yaliire liɛlɛ dè pìye nɛ̄ dè, dàa pe 'jó dè, ti 'yɛli bè niʔɛ tɔliyɔ siin bè tóri cɛnzɛnyɛ wori nɛ̄ dè dàa pe dàli nɛ jún dè.»
6A Misa nɛ́ Arawɔn 'ti juu Isirayɛli siɛnnɛ mɛ́ bèle nɛ́ jo: «Pàngɛ cɛnguʔɔ gè, yeli bé ki cɛ́n Yewe wire wi 'yeli yige Ezipiti kùlo nī lè. 7Sínbinimɛ táanni bè, yeli bé Yewe cɛ̀nmɛ nɛ́ wi kpuɔmɔ nyaa bè, nɛ́ ki cɛ́n wi nyɛ́nì kúnʔɔrilɔ lúʔu lè nàa yeli 'juu nɛ̀ wáa Yewe mɛ́ wè. Nɛ́ weli ní bèle, báli bīɛlɛ weli bèle kire ga buu yeli de kúnʔɔri weli nɛ̄ ?»
8A Misa 'kɛ́ yiʔɛ mɛ́ nɛ́ juu nɛ́ jo: «ʔaan, yeli bé ki cɛ́n, a Yewe kɛ́nì kaara kɛn dè yeli mɛ́ wè dàa yeli bé káa cɛnguʔɔ táanni gè, nɛ́ yaliire ní dè sínbinimɛ táanni bè, yeli bé lìi bè tín. Nɛ́ ki cɛ́n Yewe nyɛ́nì ti lúʔu kúnʔɔrilɔ náà yeli 'kúnʔɔri wi nɛ̄ wè. Weli bèle, weli yē báli ? Sànʔara dáà yeli 'juu nɛ̀ wáa weli kɔli mɛ́ gè, Yewe wori dī.»
9A Misa 'ki juu Arawɔn mɛ́ nɛ́ jo: «-Ki juu Isirayɛli tògo siɛnnɛ pe mìɛni mɛ́ pe- sìʔɛrɛ pe kpɔni Yewe nɛ̄ wè. Nɛ́ ki cɛ́n Yewe nyɛ́nì pe kúnʔɔrilɔ lúʔu lè.» 10Bà Arawɔn 'puu nɛ nyu nɛ́ Isirayɛli tògo siɛnnɛ ní bèle, a pe 'yiʔɛ nɛ̀ yiɛyɛ wáa yè waama kùlo kɔli mɛ́ gè. Kire tiʔɛ nī gè, a Yewe 'wi cɛ̀nmɛ nɛ́ wi kpuɔmɔ tìɛ bè pe nɛ̄ kàsadibagɛ nī gè.
11A Yewe 'ki juu Misa mɛ́ nɛ́ jo: 12«Mi nyɛ́nì Isirayɛli siɛnnɛ kúnʔɔrilɔ lúʔu nàa pe 'kúnʔɔri lè. -Ki juu pe mɛ́ ma jo: ‹Cɛnguɔwuɔmɔ nī bè, yeli bé kaara káa; sínbinimɛ táanni bè yeli bé lìi bè tín yaliire nɛ̄ dè. Bà yeli bé ki cɛ́n mi yē Yewe, yeli Kulocɛliɛ wè.› »
13Bà sí ki kpíʔile, cɛnguʔɔ gè, a tingbɛniserire#16.13 Tingbɛniserire, tiī sítubilo pálì felige. 'pɛn nɛ̀ pɛ́nì tìgi pe bùguro nī dè nɛ̀ tiʔɛ nyì gè. Sínbinimɛ táanni bè, kámɛgɛ ki yé puu nɛ̀ bùguro màʔa dè nɛ suʔu dàala nɛ̄ lè. 14Bà kámɛgɛ ki pɛ́nì cɛrigɛ gè, yɛrɛ táà yé kò dàala nɛ̄ lè yìride múrumuru#16.14 yìride múrumuru: Eburu siɛnrɛ ti nɛ jo: tiī bɛ̀ kámɛgɛ tíɛlɛ gàa wiire ti 'waʔa gè.. 15Isirayɛli siɛnnɛ pe yé ti nyaa; piyè sí ti cɛ́nʔ. A pe 'pìye yúgo nɛ́ jo: «Gáayɛgɛ gī gàa gè#16.15 Eburu siɛnrɛ nī dè, a pe 'jo gáayɛgɛ gī gàa gè ?, pe nɛ̂ jo man hu. Kire nyasiɛnkɛnigɛ gáà kire ki 'yiʔɛ nɛ̀ kò mana. Wéli baa 16.31. ?»
A Misa sí ki juu pe mɛ́ nɛ́ jo: «Yaliire dī dàa Yewe 'kɛn yeli mɛ́ yeli de líi dè. 16Ti n'dɛ dàa Yewe 'juu nɛ̀ gbɛ̀ngɛ dè: ‹Siɛn ó siɛn 'yɛli wi- sa tàa jó nìʔɛrɛ bè yɛli nɛ́ wi kpáa wuulo lìigɛnnɛ ní lè, gbɔngbonyiʔɛ nigbe siɛn ó siɛn mɛ́.› »
17A Isirayɛli siɛnnɛ pe sí ki kpíʔile bɛ̀. A pàli 'jó nìʔɛgɛ, a pàli 'jó cɛ̀ri. 18Bà pe kɛ́nì ti kíri dè dàa pe yé jó dè, bàli pe yé jó nìʔɛgɛ bèle, peli wori tiì yé niʔɛ nɛ̀ tóriʔ; bàli míɛni pe yé jó cɛ̀ri bèle, peli wori tiì pe kóligoʔ. Siɛn ó siɛn yé jó nɛ̀ yɛli nɛ́ wi lìigɛnnɛ ní lè.
19A Misa 'pe yɛ: «Siɛn wáà fǎga tàa tɛ́ngɛ yeli nī ti- súɔnʔ.»
20Kire nɛ́ ki mìɛni a pàli 'cíi, piyè lúʔu wi mɛ́ʔ. A pe 'tàa wàli nɛ̀ tɛ́ngɛ a ti 'súɔn. A ti 'fúnʔɔ, a fiɛnrɛ 'jíin ti nī, a ti 'kò nɛ númɔ. A Misa fungo ki 'yɛ̀ pe kúrugu.
21Bà ki 'láʔa kire nɛ̄ gè, cɛngɛ ó cɛngɛ sínbinimɛ táanni bè, siɛn ó siɛn nɛ̂ sɛ́nì jó nɛ̀ yɛli nɛ́ dàa ní wi bé gbɛ̀ pa lìi dè, nɛ́ ki cɛ́n, a cɛngɛ pɛ́ni wáari gè, ti nɛ̂ nyɛgɛ. 22Cɛnyɛ kɔliniwuʔu nɛ̄ gè, pe nɛ̂ ti jó nɛ̀ taʔala tɔliyɔ siin, kire 'jo siɛn ó siɛn nɛ̂ jó yalenyiʔɛnɛ siin. A Isirayɛli tògo siɛnnɛ yiɛgininɛ pe pɛ́nì ki juu Misa mɛ́.
23A Misa 'ki juu pe mɛ́ nɛ́ jo: «Tire dī dàa Yewe cé juu nɛ̀ gbɛ̀ngɛ dè. Mbànʔa gè, kire yē cɛndɛnigɛ nɛ́ ní cɛnŋɔdaʔa wàlidɛngɛgɛ Yewe mɛ́ wè; yeli sǐ baara yafiɛn kúɔʔ#16.23 Cɛndɛnigɛ ki sélidiʔɛ kire ki 'puu lɛ̀lɛ líì nī Kulocɛliɛ duniya faan wè, cɛnyɛ kɔlisiinwuʔu nɛ̄ gè, a wi 'ŋɔ́ nɛ̀ taa. Wéli baa Sél 2.3; Yir 20.8-11.. A yɛgɛ ó yɛgɛ yē yeli mɛ́ bè fúɔ gè, ye- ti fúɔ pàngɛ gè. A dìi yē yeli mɛ́ bè ti suʔɔ dè, ye- ti suʔɔ pàngɛ gè. A yaliire díì 'kò dè, ye- ti gbòbori ye tɛ́ngɛ ti- puu kpìɛnduu wori.»
24A pe 'ti gbòbori nɛ̀ tɛ́ngɛ tiiyɛ fúɔ nɛ̀ pɛ́nì kpìɛnmɛ tuu bè, bɛ̀ Misa yé ti juu nɛ̀ gbɛ̀ngɛ dè. Ki kpìɛnduu gè, yafiɛn sì ti taaʔ: tiì cé fúnʔɔʔ, fiɛnrɛ sì yé jíin ti nīʔ. 25A Misa 'pe yɛ: «Ye- ti lìi pàngɛ gè, nɛ́ ki cɛ́n pàngɛ kire gī Yewe cɛndɛnigɛ gè; baara wè nɛ kúuʔ. Yeli sǐ ga tíi yaliire táà nyaa dàala nɛ̄ lè pàngɛ gèʔ. 26Cɛnyɛ kɔlini sunʔɔmɔ nī bè, yeli béri yaliire jún dè; kɔlisiinwuʔu nɛ̄ gè, cɛndɛnigɛ gī. Yeli sǐ ga tíi yaliire táà nyaa bileʔ.»
27Kire nɛ́ ki mìɛni, cɛnyɛ kɔlisiinwuʔu nɛ̄ gè, a pàli 'yiri siɛnnɛ sunʔɔmɔ nī bè, bè sa yaliire táà jó; piyè sɛ́nì yafiɛn nyaa baaʔ. 28A Yewe sí Misa yúgo wè nɛ́ jo: «Lɛ̀lɛ níi nī yeli bé fɔ̀li bèri mi kajuudiʔɛlɛ lúru gèle, nɛ́ mi fànʔa kajuʔulo ní gèle ? 29Yeli ki 'nyaa kìɛ, mi Yewe wè, mi nyɛ́nì cɛndɛnigɛ kɛn gè yeli mɛ́, kire kɛnmɛ nɛ̄ mi nɛ̂ yaliire kɛn dè yeli mɛ́ cɛnyɛ siinwori cɛnyɛ kɔliniwuʔu nɛ̄ gè. Cɛnyɛ kɔlisiinwuʔu nɛ̄ gè, siɛn ó siɛn 'yɛli bè kò wi kpáa mɛ́ gè, siɛn sì yɛli bè yiri kpànʔanɛ cɛnyɛ kɔlisiinwuʔu nī gèʔ.» 30A siɛnnɛ pe 'kò nɛ ŋɔ́gi nɛ taʔa cɛnyɛ kɔlisiinwuʔu nī gè.
31A Isirayɛli siɛnnɛ pe 'yaliire dáà ti míʔɛ le gè nɛ ti yeri mana#16.31 Wéli baa 16.15 kaliwɛgɛ ki táanmɛ gè. (ki kɔri wire wī: gáayɛgɛ gī ?). Ti 'puu bɛ̀ sùɔlɔ tíɛlɛ#16.31 Eburu siɛnrɛ tiī nɛ jo koriyanidiri. Ki yé puu yaliire táà dàa tiī nɛ fíin baa pe tiʔɛ nī gè. Ti yē fìire, nɛ́ ní yìride bɛ̀ suɔlɔ tíɛlɛ. níɛ fíligi. Ti tàanma pi 'puu bɛ̀ ŋɔ̀mi tíɛlɛ ŋàa nī pe cî sárigɛ le gè.
32A Misa sí pe yɛ: «Ti n'dɛ dàa Yewe 'juu nɛ̀ gbɛ̀ngɛ dè: ‹Ye- mana gbɔngbonyiʔɛ nigbe kíri, ye tɛ́ngɛ yeli siimɛ mɛ́ bè, kire ga buu pe bága pa ti nyaa dàa mi 'kɛn yeli mɛ́ dè, a yeli 'lìi waama kùlo nī lè lɛ̀lɛ líì nī mi 'yeli yige Ezipiti kùlo nī lè.› »
33A Misa sí ki juu Arawɔn mɛ́ nɛ́ jo: «Yaliire daanbile láà líɛ, ma mana yalenyɛni nigbe kíri, ma tɛ́ngɛ Yewe yiʔɛ mɛ́ gè, kire ga buu yeli kɛ̀ngɛlɛ gálì ke báan gèle pe- pa ti nyaa.»
34A Arawɔn kɛ́nì mana yalenyɛni líɛ lè, nɛ̀ ni tɛ́ngɛ nyakungɛngɛ finʔɛgɛ#16.34 Náʔa gè Misa nɛ nyu nyakungɛngɛ finʔɛgɛ wuʔu nɛ̄ gè gàa nī nyakungɛngɛ siɛnrɛ kàdɛnitɛnyɛ siin yi bága puu yè, nɛ́ mana yaliire ní dè. Wéli baa 25.16,21; 26.33; 31.18; 32.15; 34.29; Eb 9.4; Tìɛ 2.17. táanni gè ti- kò sɔ̀ngidaadiʔɛ, majo bɛ̀ Yewe yé ki juu nɛ̀ gbɛ̀ngɛ Misa mɛ́ wè.
35A Isirayɛli siɛnnɛ pe 'mana lìi wè fúɔ nɛ̀ taa yiʔɛlɛ togosiin nɛ̀ sɛ́nì nɔ̀ kùlo nɛ̄ lè baa siɛnnɛ 'puu bèle. Pe yaliire tire ti 'puu mana wè fúɔ nɛ̀ taa a pe sɛ́nì nɔ̀ Kanaa kùlo jíinmɛ nɛ̄ bè. 36Yaliire daanbile náà ní pe 'puu nɛ kíri lè, lire pe 'puu nɛ yeri womɛri wè. Yaliire danʔa káà 'puu baa gàa pe 'puu nɛ yeri efaa wè. Womɛrinyɛni nigbe, ni nɛ̂ puu yaliire daanbile nyɛ́ni, lire nɛ̂ nyaa efaanyɛni#16.36 Efaanyɛni nigbe, lire nɛ̂ nyaa liitirile 25 félige; weli bé gbɛ̀ ni tɔ́nminɔ nɛ́ gbɔngbonyiʔɛ ní gè. Wéli baa Tɔ́nminɔgɛnnɛ Tìɛdiʔɛ nī gè. tílaya tiɛyɛ kiɛwoli.
Currently Selected:
Yirile 16: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
