Yirile 11

Yewe wi 'wuʔɔgbuʔɔ kiɛwuʔu tìɛ gè

1A Yewe 'ki juu Misa mɛ́ nɛ́ jo: «M'bé ní kagbɛnnɛ sɛnnɛ láà tíʔɛ bè Farawɔn nɛ́ Ezipiti kùlo kpúɔn lè. Kire kàduʔumɛ gè wi bé yeli yaʔa yeli yiri náʔa gè, wire tíimɛ wi bé yeli cìra bè yige péwu tiʔɛ gáà nī gè ! 2-Ki juu Isirayɛli siɛnnɛ mɛ́ bèle, pe- yɛrɛ náari pe tɛ́ninyɛninɛ mɛ́ bèle, nàguɔlɔ pe- náari pe nàganyɛninɛ mɛ́ bèle, cɛlilɛ pe- náari pe cenyɛninɛ mɛ́ bèle, walifiiwe yɛrɛ nɛ́ tiɛ yɛrɛ.»

3Yewe yé ki yaʔa Isirayɛli siɛnnɛ pe 'kpuʔɔrɔ taa Ezipiti siɛnnɛ yiʔɛ mɛ́ gè. Misa wire tíimɛ wè, Farawɔn siɛnkpolilo bèle nɛ́ kùlo siɛnnɛ ní bèle, pe 'puu nɛ wi kpóri.

4A Misa 'jo: «Ti n'dɛ dàa Yewe 'juu dè: ‹A pìlige ki kɛ́nì 'wúɔ gè, nyìjaliɛlɛ nɛ̄ lè, m'bé nyaari màʔa Ezipiti kùlo nī lè. 5Ezipiti kùlo jaafɔpelile pe mìɛni bé kùu, bè ki séli Farawɔn wire tíimɛ jaapeliwe nɛ̄ wè, Farawɔn ŋáà wī tɛ́niwɛ fànʔa nɛ̄ gè, fúɔ bè sa nɔ̀ sùkulocuɔ wi jaapeliwe nɛ̄ wè, wire ŋáà wiī nɛ tire tírɛ nɛ̄ gè, nɛ́ míɛni yajuuro ti pìpelile nɛ̄ bèle. 6Ki bé puu kɔnrɔ bé tɔ̀ni de wáari Ezipiti kùlo nī lè, dàa tiì fìɛ wáa nɛ̀ nyaa baa dèʔ, nɛ́ míɛni dàa tiǐ ní ga wáa baa cígini dèʔ. 7Isirayɛli siɛnnɛ tiʔɛ nī gè, puun sì cɛ́nì je wàli baa siɛn nɛ̄ʔ, bè nɛ́ ga jo yajuʔu nɛ̄ʔ, kire ga buu yeli bé ki cɛ́n mi yē Yewe nɛ wàlimɛ kpínʔini Ezipiti siɛnnɛ nɛ́ Isirayɛli siɛnnɛ nī bèle.› 8Kire kɛnmɛ nɛ̄ siɛnkpolilo bálì pe 'tɛ́ni nɛ̀ muɔ màʔa wè, pe mìɛni bé pɛn mi kúrugu bè pa tuu bè cúbulo mi yiʔɛ mɛ́, bè mi náari bé jo: ‹Te waa, muɔ nɛ́ muɔ siɛnnɛ ní bèle bàli pe 'taʔa muɔ nɛ̄ bèle !› Kire kàduʔumɛ, m'bé kɛ́.»

A Misa fungo ki tɔ̀ni nɛ̀ yɛ̀ kpuʔɔ, a wi 'núgo Farawɔn táanni wè nɛ̀ kɛ́.

9A Yewe sí Misa yɛ wè: «Farawɔn sǐ ga lúʔu muɔ mɛ́ʔ, kire ki bé ki yaʔa mi- kakpoliyo kpíʔile yi- niʔɛ Ezipiti kùlo nī lè.»

10Misa nɛ́ Arawɔn yé kakpoliyo nyáà yi mìɛni kpíʔile Farawɔn yiʔɛ mɛ́ gè, nɛ̀ ki yaʔa Yewe cé Farawɔn nàzɔn gbɛ̀n wè, wiì Isirayɛli siɛnnɛ yaʔa bèle a pe 'yiri kùlo nī lèʔ.

Currently Selected:

Yirile 11: sev

Highlight

Copy

Compare