Yirile 10
10
Wuʔɔgbuʔɔ kataanriwuʔu gè: kàbaridɛ dè
1A Yewe ń'nɛ̀ ki juu Misa mɛ́ nɛ́ jo: «Te waa Farawɔn kúrugu wè, nɛ́ ki cɛ́n mi nyɛ́nì wi nàzɔn gbɛ̀n wè, nɛ́ wi siɛnkpolilo nàzɔnnɔ ní bèle, kire ga buu pe- mi fìɛlɛ nyaa bèle pe sunʔɔmɔ nī bè, 2kire ga buu muɔ bé ki juu muɔ jaa mɛ́ wè, bé ní ki juu muɔ jaa wi jaa mɛ́ wè, kɛnmɛ bíì nɛ̄ mi 'Ezipiti siɛnnɛ nàʔa bèle nɛ̀ síɛ wè, nɛ́ fìɛlɛ bílì mi 'tɛ́ngɛ pe sunʔɔmɔ nī bè. Bà yeli bé ki cɛ́n mi yē Yewe#10.2 Kulocɛliɛ wi 'ki juu nɛ̀ taʔala nɛ́ jo peri pe siimɛ tɛnmɛ bè kɛnmɛ bíì nɛ̄ wire nyɛ́nì wi siɛnnɛ suɔ bèle nɛ̀ síɛ Ezipiti kùlo nī lè. Wéli baa 12.26-27; 13.8,14-15; Fàn 4.9; Ŋún 77.12-21; 78.4-7,42-51; 105.26-36; 106.7-12; 114.1-8; 135.8-9; 136.10-15..»
3A Misa 'kɛ́ Farawɔn kúrugu wè, wire nɛ́ Arawɔn ní, a pe sɛ́nì wi yɛ: «Ti n'dɛ dàa Yewe wè, Eburulo Kulocɛliɛ, wi 'juu dè: ‹Lɛ̀lɛ jori nī muɔ bé ní cíi bè mìɛ cɛ́rigɛ mi yiʔɛ mɛ́ gè ? -Mi siɛnnɛ yaʔa bèle pe- kɛ́ bè sa mi gbùʔɔrɔ ! 4A muɔ sí cíi cígini wè, muɔ̌ pe yaʔa a pe kɛ́ bèleʔ, mìɛ cò díɛʔ ! Mbànʔa gè, mi bé kàbaridɛ tìrige dè muɔ kùlo ni mìɛni nī ! 5Ti bé tiɛrɛ ti mìɛni tɔ́n dàala nɛ̄ lè fúɔ siɛn sì ní gbɛ̀ dàala nyaa lèʔ. Ti bé yɛrɛ ti mìɛni káa dàa ti 'suɔ kàsasindari mɛ́ dè, nɛ́ tiire ti mìɛni dàa ti 'fìin nyàʔa nī gè. 6Ti bé muɔ saaya nyì yè, nɛ́ muɔ siɛnkpolilo saaya ní yè, nɛ́ Ezipiti siɛnnɛ saaya ní yè. Ki bé puu gàa muɔ tuu wiì fìɛ nyaa gèʔ, nɛ́ muɔ tuuliɛyɛ yiì fìɛ nyaa nɛ̀ nyaa yèʔ, nɛ̀ líɛ pe 'pe sii bile dàala nɛ̄ lè.› » A Misa kàduʔu wáa Farawɔn mɛ́ wè nɛ̀ kɛ́.
7A Farawɔn siɛnkpolilo pe 'wi yɛ: «Lɛ̀lɛ jori nàguɔ ŋáà wi bé ní kúɔ náʔa gè nɛ́ weli ní bɛ̀ wi 'kò we mɛ́ gárigɛ gè ? -Siɛnnɛ yaʔa bèle pe- kɛ́ pe sa Yewe pe Kulocɛliɛ gbùʔɔrɔ wè ! Muɔ sì ki cɛ́nʔ lé, Ezipiti kùlo ni nyɛ́nì cúʔɔ wī !»
8A pe sɛ́nì Misa nɛ́ Arawɔn kɔ́ri wè nɛ̀ pɛn Farawɔn yiʔɛ mɛ́ gè, a wi 'pe yɛ: «Yeri waa ye sa yeli Yewe Kulocɛliɛ gbùʔɔrɔ wè !» Nɛ́ ń'nɛ̀ jo: «Ŋáa nɛ́ ŋáa wi bé kɛ́ ?»
9A Misa sí wi yɛ: «Weli bé kɛ́ nɛ́ weli pìile ní bèle, nɛ́ weli nàgaliɛlɛ ní bèle, nɛ́ weli jaala ní bèle nɛ́ weli sinborilo ní bèle, nɛ́ weli yajuuro ti mìɛni ní ! Ki bé puu weli mɛ́ fundaanra tánʔagbuɔlɔ#10.9 Eburu siɛnrɛ nī dè, nyasiɛnkɛnigɛ ki 'jo: hagi. Ki kɔri wire wī: fundaanra tánʔagbuɔlɔ. bè Yewe gbùʔɔrɔ wè.»
10A Farawɔn wi sí ń'nɛ̀ jo: «Kányiʔɛ nɛ̄, ki 'yɛli Yewe- puu nɛ́ yeli ní a mi yeli yaʔa a yeli 'kɛ́ wè, yeli nɛ́ yeli cɛlilɛ nɛ́ yeli pìile ní bèle, ye- yìye cò díɛʔ ! Kapiʔi gī gàa yeli nɛ caa gè ! 11ʔúnʔun, kiì yɛli ki- puu bɛ̀ʔ ! Nàguɔlɔ bèle, peli pe 'yɛli pe- kɛ́ bè sa Yewe gbùʔɔrɔ wè; kire bɛ̀ʔ lé gàa yeli nɛ náari gè ?»
A pe 'Misa nɛ́ Arawɔn cìra nɛ̀ yige Farawɔn yiʔɛ mɛ́ gè.
12A Yewe 'ki juu Misa mɛ́ nɛ́ jo: «-Muɔ kɔli sáʔa gè ma taʔa Ezipiti kùlo nɛ̄ lè, ma kàbaridɛ yeri dè ti- pɛn. Ti bé pa yɛrɛ ti mìɛni káa dàa ti 'fìin dè dàala nɛ̄ lè, dàa kàsasindari ti 'yaʔa dè.»
13A Misa wi 'kàgbiile yɛ̀gɛ lè Ezipiti kùlo nɛ̄ lè. A Yewe 'káfaligbuʔɔ fiɛ gè gàa ki 'kɔ́n cɛngɛnyɛnifoligɔli mɛ́ gè, a káfaligɛ ki 'wáa kùlo nī lè cɛnguɔmɔ, nɛ́ pìlige ki mìɛni nī. Kpìɛnduu gè, a pe 'ki nyaa káfaligɛ ki yé pɛn nɛ́ kàbaridɛ ní dè. 14A ti 'yɛ́ligɛ nɛ̀ tɛ́ni nɛ̀ màʔa Ezipiti kùlo nī lè tiɛrɛ ti mìɛni nī dàala nɛ̄ lè, bɛ̀ ti yé niʔɛ nɛ̀ tóri dè ti felige sì yé fìɛ nyaaʔ, ti felige míɛni sǐ ní ga nyaa cíginiʔ. 15A ti 'Ezipiti kùlo ni mìɛni 'tɔ́n tiɛrɛ ti mìɛni nī dàala nɛ̄ lè, fúɔ a dàala ni 'wúɔ. A ti 'yɛrɛ ti mìɛni káa dàa ti 'fìin dàala nɛ̄ lè, nɛ́ tiire yasɛnrɛ ní dè, dàa ti yé kò dè kàsasindari pɛnnɛ kàduʔumɛ gè. Nyàʔa nɛ́ wɛrɛ ní dè, yafiɛn sì ń'nɛ̀ kò Ezipiti kùlo nī lèʔ.
16A Farawɔn 'fali nɛ̀ ŋàʔana nɛ̀ Misa nɛ́ Arawɔn yeri wè nɛ̀ pe yɛ: «Mi nyɛ́nì finɛ nɛ̀ kapiile kpíʔile Yewe yeli Kulocɛliɛ nɛ̄ wè nɛ́ yeli nɛ̄ bèle. 17Píra ŋáà nī wè, ye- mi kapiile ni kàsulugo suɔ gè cégboli náà nɛ̄ lè ! Ye- sa Yewe yeli Kulocɛliɛ náari wè wi- fɔ̀li ki nɛ̄ wi kùu ŋáà líili wè mi nɛ̄.»
18A Misa sí núgo Farawɔn táanni wè nɛ̀ sɛ́nì Yewe náari.
19A Yewe wi 'káfaligɛ yérige gè nɛ́ ki kárigɔli yiʔɛ gè, á ki 'kàbaridɛ líɛ dè nɛ́ sɛ́nì ti wáa Nyàʔanivɛgɛ Tiire kuʔɔjii nī wè. Kàbaripile nigbe sì yé kò Ezipiti kùlo nī lèʔ nɛ́ ni láʔagɛlɛ tiʔɛ káà nīʔ. 20A Yewe ń'nɛ̀ Farawɔn nàzɔn gbɛ̀n wè, wiì yéri ki nɛ̄ nɛ̀ Isirayɛli siɛnnɛ yaʔa bèle a pe 'kɛ́ʔ.
Wuʔɔgbuʔɔ kacɛriwuʔu gè: yebiliwuɔlɔ lè
21A Yewe 'ki juu Misa mɛ́ nɛ́ jo: «-Muɔ kɔli yɛ̀gɛ gè nyìʔɛnɛ nī lè, kire ga buu yebiliwuɔlɔ ni- Ezipiti kùlo tɔ́n lè. Yebiliwuɔlɔ náà ni bé kpúʔɔ fúɔ siɛn bé gbɛ̀ ni cò bè taa.»
22A Misa sí kɔli yɛ̀gɛ gè nyìʔɛnɛ nī lè, a yebiliwuɔlɔ dɛ́ndɛn ni 'tìgi nɛ̀ Ezipiti kùlo tɔ́n lè fúɔ nɛ̀ taa cɛnyɛ taanri. 23Cɛnyɛ taanri nyáà sunʔɔmɔ nī bè, siɛn sì cî ní gbɛ̀ wi siɛnnyɛni nyaaʔ, siɛn míɛni sì cî ní gbɛ̀ yɛ̀ wi tɛ́nidiʔɛ nīʔ. Nɛ̀ ki yaʔa Isirayɛli siɛnnɛ mɛ́ bèle, kpìɛnmɛ yé puu baa peli kòridiʔɛ nī gè.
24A Farawɔn sí Misa yeri wè nɛ́ jo: «Yeri waa ye sa Yewe gbùʔɔrɔ wè ! Yeli cɛlilɛ yo, yeli pìile yo, pe mìɛni bé gbɛ̀ kɛ́ nɛ́ yeli ní. Gìi sí gī baa gè, yeli yajuuro tire ti bé kò bile.»
25A Misa sí jo: «Muɔ wī lé ma bé sa yajuuro táà kɛn weli mɛ́ weli- ti kpúu bè yanyige kaara suʔɔ dè bè Yewe weli Kulocɛliɛ gbùʔɔrɔ wè, nɛ́ kakuɔrɔ kaasuʔuro ní dè ? 26Weli yajuuro ti 'yɛli bè kɛ́ nɛ́ weli ní; làa nigbe sǐ ga tíi kò bileʔ. Nɛ́ ki cɛ́n tire táà weli bé sa cò bè Yewe weli Kulocɛliɛ gbùʔɔrɔ wè. Weli tíimɛ weli fìɛ ki cɛ́nʔ sɛ́ni weli nɔ̀ baa wè, gàa weli 'yɛli bè sa kɛn Yewe mɛ́ wèʔ.»
27A Yewe sí Farawɔn nàzɔn gbɛ̀n wè; wiì fɔ̀li nɛ̀ Isirayɛli siɛnnɛ yaʔa bèle a pe 'kɛ́ʔ.
28A Farawɔn sí Misa cìra wè nɛ́ jo: «Te yigi náʔa gè ! Mìɛ cò díɛʔ, fǎga ní tí mi muɔ nyaa cígini mi yiʔɛ mɛ́ gè ! Á kire laa cɛngɛ gíì muɔ ń'nɛ̀ pɛn mi yiʔɛ mɛ́ gè, muɔ bé kùu wī !»
29A Misa sí wi yɛ: «-Ki kpíʔile bɛ̀ ! Miǐ ní ga tíi pɛn náʔa muɔ yiʔɛ mɛ́ gè cíginiʔ !»
Currently Selected:
Yirile 10: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
