Malékuse 8

Yěsô ne ńjÿɔ́gɔ pʉ̀a ntsá’ lekùa

(Matio 15.32-39)

1Á gíŋe ńgwɔ́ pɔ́ nà melyɛ̌’ amɛ̌, epʉ̀a tó, ḿbú ńgyɔ́ɔn tɛ’, ńgíŋe ńcú’te lejʉ́ŋ Yěsô, pâ pɔ̌ zye ńnéŋe. Pá’ pɔ́ la piŋ ńké tè mmó mpfɛ́ gẅiin la, Yěsô tóŋ *ngàŋa kwò yé, ńgɔɔn né pɔ́b ngie: 2Mezìŋe lá’ɔɔn pǔ ńkúu wɔ̀ɔn tɛ’, mélà’mie ée fʉ̀’ɔɔn ńgwɔ́ lyɛ̌’ sétá pá’ pɔ́ ké ńgwɔ́ pɔ́ lejʉ́ŋ mèŋ, ńké tè nyé ńgẅiin tsɔ́ mmó gie à lɔɔn ńgwɔ́ pɔ́ pfɛ́ wɔ́, 3ńgwɔ́ gie n dɔɔn ńnyé wɔ́b nzyè, pɔ́ piŋ nzèm né membʉ̀a, mbà pɔ́ té ge gẅiin metʉ̀ lélɔg ńgʉa tà ńkú wɔ́. Etsɔ́ pʉ̀a ée tsetsɛ̀ɛ pɔ́b pɛ̂ fóo tàa ngʉ̀a shʉ̀shʉ̀a. 4*Ngàŋa kwò yé tsɔ́’ɔ mbwo yé ngie: À lɔɔn ńgwɔ́ mé lɔg shúm léjÿó nzɔ̌ á nkwòŋo tsẅɛ, tà pɔ́ pfɛ́ tà ńzẅɛ́ɛ? 5Yěsô zɛ́te wɔ́b ngie: Pi zɔɔn ńgẅiin mbelég mbu’ú shÿɔ́’ɔ? Pɔ́ shwóŋó yé ngie pɔ́ gẅiin mbelég mbu’ú sɔ̀ɔn mbʉ́a.

6Yěsô tsẅi ngie lá’ ńnéŋe ssé, ńdeen ńké ńkẅé mbelég ŋwɛ́ mbu’ú sɔ̀ɔn mbʉ́a, ńná ndǎg mbwo Ssé, ḿbwɔ́’te ńnáa mbwo *ngàŋa kwò yé, pɔ́ gabte mbwo lá’. 7Á gwaa gwɔ́ pɔ́ gíŋe ńgẅiin tsɔ́ mbɔ́ púɔ messó, tá’ é té gyɔ́ɔn. Yěsô gíŋe ńkẅé ńná ndǎg mbwo Ssé mǒ, ńná ngie pɔ́ gabte mbwo lá’. 8Alá’ pú ḿpfɛ́ɛ mmó tà ńzẅɛ́. Mé piŋ ńdag mekèm mie é vwɔ’ɔ́, é lúe metúŋ sɔ̀ɔn mbʉ́a. 9Alá’ gie á pǐŋ ḿpfɛ́ gwɔ́ nyìŋ mesoŋ ntsá’ lekùa. Yěsô leen ńké ńtsẅi pɔ́ gʉa. 10Á leen ńgwóon ńkúu tsɛ̀ɛ kanú’, pâ *ngàŋa kwò yé gʉa nê shÿó pàga ngwòŋ Ndálmanuta.

Yěsô lʉ’ʉ́ légÿo nkʉ̀’ʉ nò

(Matio 16.1-4)

11Epʉ̀a nà nùɔ pà *farisay tó ńne fa’a nò ná ye, ńtsóte yé ngie à gÿo nò mmɔɔn mmɔɔn gie á nyɛɛ ngie Ssé zɔ kà túmo yé, ńgie à nyɛɛ wɔ́b liŋé gie á la’te ngie Ssé zɔ tumó yé. 12Yěsô jú’ tà ńzẅi, ḿbiŋ ńgɔɔn né pɔ́b ngie: epʉ̀a pie ée tsɛ̀ɛ njyó fʉ̀’ɔɔn ne ńzɛ́te ngie mèŋ n gÿo nò mmɔɔn mmɔɔn, éfa’a légǎ? Tá’, pi cʉ́’ mèŋ shwóŋó gẅi kwà’ nò nénʉ́, mé té ne nge nyɛɛ wɔ́b tsɔ́ mmó wɔ́. 13Yěsô gɔɔn pú’u, ńdeen ńnyé pʉ̀a *farisay jʉ’ó, ńkúu tsɛ̀ɛ kanú’, ńtúm ntse ńgee yetsɔ̌ nzǐŋ.

Pi pɔ́ɔn mà pà nkwòŋ menÿɔ́g

(Matio 16.5-12)

14Yěsô pâ *ngàŋa kwò yé la gwaa túm ntse gee yetsɔ̌ nzǐŋ, pɔ́ gwɔ́ tsɛ̀ɛ kanú’, ńgẅiin pɔ́ ndà’ lepu’ú mbelég sélemɔ’ɔ́, mbà pɔ́ ně ńdege té pí tsɔ̌ tà é gyɔ́ɔn. 15Pâ pɔ̌ ne ńgee pú’u, Yěsô gɔɔn né pɔ́b ngie: Pi laga twó gí, ḿbɔ́ɔn *mvòŋ pà *farisay mbɔɔ ye fùɔ *Herôd. 16Pɔ́ jú’ pá’ à kǐm *mvòŋ pú’u, ńdeen ńké ńzye légɔɔn tsetsɛ̀ɛ pɔ́b ngie: Tà à tě ńgɔɔn pɔ́ pá’ pege tè mbelég gẅiin wɔ́#8.16 Mvòŋ áa mmó gie pà Yuda lɔ́ɔn ńnéŋe nà faline ntsàb á kwɔ́’ɔ pɔ́ tuɔ, á kẅɛɛ mbelég. ? 17Yěsô zsé pá’ pɔ́ ne ńkwaŋa pú’u, ńzɛ́te wɔ́b ngie: Pi kwaŋa nò pɔ́ nà mbelég gie pi tè gẅiin mélà’a kɔ́? Pi lɔgɔ ḿbú ńnyé pɔ́ tè zsě nò wâ? Pi fɔ̌ɔn ńnyé pɔ́ tè jǔ’ tà ńjú’ lá? Legyè sí gáa ḿbú ńjÿɔ́’ɔ pɛ́’ɛ̀? 18«Pi gẅiin menÿɔ́g, ḿbiŋ tè zsé lélɔg ńgyá jʉ’ wɔ́ la? Ńgẅiin metuŋó ḿbiŋ tè nò jú’ la#8.18 Jr 5.21 »? Ńzsé ngie pi tè nò kímte la? 19Mèŋ, n da pwɔ́’te mbelég yɛ̌ mbu’ú ntʉ̀a pi lɔg ńjÿɔ́g pʉ̀a ntsá’ tʉ̀a, ḿbiŋ ńdagte mekèm é lúe metúŋ méshÿɔ́’ɔ pi kaa? Pɔ́ tsɔ́’ ngie: É la lúe metúŋ ntsɔ̀b pʉ́a nê legém. 20Mèŋ m biŋ ḿbwɔ́’te yetsɔ̌ ntá’ sɔ̀ɔn mbʉ́a, mé lɔg ńjÿɔ́g pʉ̀a ntsá’ lekùa, apfwɔ́’ lúe metǔŋ méshÿɔ́’ɔ, pɔ́ gɔɔn ngie, á la lúe metúŋ sɔ̀ɔn mbʉ́a. 21Á leen ńké ńzɛ́te wɔ́b ngie: Tà pi giŋé ńnyé pɔ́ tè jú’?

Yěsô gÿǒ fʉ̀ menÿɔ́g gyá jʉ’

22Yěsô pâ *ngàŋa kwò yé la kúu Mbetsayida, mé lɔgɔ tsɔ̌ fʉ̀ menÿɔ́g ńtó, ésẅíŋte yé ngie à záb mbwó mé ná yé à zeŋe. 23Á kú’te pwó fʉ̀ menÿɔ́g, ńdɔgɔ yé fóo tsɛ̀ɛ nùɔ lá’ ńkẅɛ, ńdɔg metyé ńtsab nÿɔ́g mé, ńzáb mbwó mé ná yé, ńzɛ́te yé ngie: Tà ɔ̀ ne ńgyá mmó? 24Á náŋte, ńne ńgɔɔn ngie: Mèŋ n ne ńgyá pʉ̀a mesoŋ, pɔ́ ne ńgiŋe, tá ńké ńgwɔ́ pɔ́ pá’ metÿǒ la. 25Yěsô gíŋe ńzáb mbwó nà menÿɔ́g nyìŋ ŋwɛ́, á cwoŋo ńdíe jʉ’, mbà à sẅeté, tà ne ńcÿó nnɛ́ ńgyá kɔ̀ɔkɔ́ɔ. 26Yěsô gɔɔn ngie à piŋ né mbʉ̀a yé, tá’, tà á ke ḿpfó ye tsɛ̀ɛ lá’ yɛ̂.

Piɛ zsě ngie Yěsô aa Nzà’nkÿo

(Matio 16.13-23; Lukase 9.18-22)

27Yěsô fóo jʉ’ó ńkẅɛ, pâ *ngàŋa kwò yé ne ńgee né melá’ mie ée shÿó tÿǒsoŋo Sezare we Filib, pâ pɔ́ ne ńgee, á zɛ́te wɔ́b ngie: Epʉ̀a ée pá’ɔɔn ńne ńgɔɔn ngie mèŋ n gee wɔ̌? 28Pɔ́ tsɔ́’ ngie: Etsɔ́ pʉ̀a ne ńgɔɔn ngie ɔɔ Jâŋ Mbabtis, Petsɔ́ ne ńgɔɔn ngie ɔɔ *Elîɛ, petsɔ́ pʉ̀a ne ńgɔɔn yɔ́b ngie ɔɔ tsɔ̌ tà’ ná *pantsẅì nkʉ̀ Ssé pe fʉ̀’ʉ mvfò. 29Á zɛ́te wɔ́b ngie: Kwà’ pi gí gɔɔn ngie mèŋ n gee wɔ̌? Piɛ tsɔ́’ ngie: Ɔɔ *Nzà’nkÿo gẅie Ssé la ka’. 30Yěsô tɔ’ɔ wɔ́b tɛ’, ńgɔɔn ngie tà pɔ́ kím tà nyìŋ ndyɛ̀’ɛ zsé nyìŋ gẅie aa wɛ̌.

Yěsô ne shwóŋó ntí legwé gie à ge gÿo kwé

31Éfó mǒ, ńzye lézí’i wɔ́b mmó, ńgɔɔn ngie: Á ne ńzɛ́te ngie: *Míŋ Nyìŋ gyá ngɔ́’ tɛ’, mekěme lá’ pú ńgwá’a yé, mbɔɔ *metándá pànùŋe pwɔ́’ pâ *pàkyàgte lepʉ̌ Mǒsê, é gÿo pú’u, mé zẅé yé. À piŋ ńzíme nà legwé nà mbɔ́ɔntè lyɛ̌’ tá. 32Yěsô shʉ̀ashʉ̀a ńgɔɔn mɔɔn menò pá’ɔɔn, Piɛ leen ńná’a ńtóŋo yé ntsèm, ńzye lékaga yé. 33Tá Yěsô sele nnɛ́, ńdíe *ngàŋa kwò yé, ńcÿɔ́gɔ Piɛ, ńgɔɔn le yé ngie: Fó nzèm mèŋ ńtsíŋte nnɛ́ me Sátà, ɔ̀ tě ńkwaŋa pɛ́’ɛ̀, á gwɔ́ pá’ Ssé ne ńkwaŋa wɔ́, wɛ̂ gwɔ́ pɔ́ nkwaŋá pʉ̀a mesoŋ.

34Ńdeen ńké ńtóŋo lá’ mbɔɔ *ngàŋa kwò yé, ńgɔɔn né pɔ́b ngie: Nyìŋ lɔɔn ńge gwɔ́ wɔ̀ɔn nyìŋ, á gwága twó mbùm yé, ńkaa yé tÿǒ nkǐ ńdɔg ńzẅíŋe lékwé, tá ńcʉ́me nzèm mèŋ. 35Nyìŋ gẅie à ge zɔɔn fa’a lépɔ́ɔn we le gwɔ́ zɔɔ nyìŋ gẅie à ge pyé we le gwɔ́ ŋwɛ́. Tá’ nyìŋ gẅie à kě ḿbyé we le gwɔ́ mélà’ mɔ́ɔn mbɔɔ mélà’ nkʉ̀ mbòŋo gẅie à gʉ̌a ntsẅǐ, mbà à ge lá’ gwɔ́ wó. 36Mé lɔɔn ńzɔɔn ḿbú ńkaa njÿó yɔɔn ntsèm ńná né nyìŋ, tá á ké ńgwɔ́ gie e ge lɔg pɔ́ twó yé, mbà e ge kẅéte yé nà kɔ́? 37À lɔɔn ńgwɔ́ nyìŋ lɔgɔ kɔ́ ńdɔg ńkúbe twó yé? 38Nyìŋ lɔɔn ńkú shʉ́ légwɔ́ wɔ̀ɔn nyìŋ, mbɔɔ léshwóŋó nò yɔ́ɔn mbwo pʉ̀a pɔɔn pie ée tsɛ̀ɛ njyó fʉ̀’ɔɔn, ńgwɔ́ ngẅɛ̀ pʉ̀a tepòŋ lɔɔn, ńgwɔ́ pàtè zsě Ssé, mbà *Míŋ Nyìŋ ge lá’ gíŋe kú ye shʉ́ lélɔgɔ yé ńgÿo we nyìŋ, afʉ̀’ gie à ge lá’ piŋ nzèm tsɛ̀ɛ legú’ we Tá we, pâ *mecÿɔ́’ Ssé gwɔ́.

Currently Selected:

Malékuse 8: NGBM

Highlight

Copy

Compare