Malékuse 7

Mbʉ̌ pʉ̀a mesoŋ lâ mbʉ̌ Ssé

(Matio 15.1-20)

1Á gwɔ́ tsɔ́ lyɛ̌’, etsɔ́ pʉ̀a pie é fóo Yerósalem tó ńcú’te lejʉ́ŋ Yěsô, ńgwɔ́ pà *farisay pâ *pàkyàgte lepʉ̌ Mǒsê, 2ńgyá *ngàŋa kwò Yěsô ne ńjÿó mmó nê *lɔ̌’ nà mbwó mɔ́b, é mbwó mie pɔ́ kaa tsabte.

3Pà *farisay pâ pà Yuda metsèm té pfɛ́ɛ mmó té vɔg ńzate ntse nà mbwó mɔ́b tà ńkúu nà ntsìŋe pwó yɔ́b, pá’ nùŋe pà mvfò wɔb ne ńzɛ́te wɔ́, 4ńgʉa sɔ̌ɔn tà ḿbiŋ, ḿvɔg ńkẅile *lɔ̌’ ná pɔ́b, tá ńjÿó mmó. Pɔ́ gíŋ ńkú’te tsɔ́ mbʉ̌ tà é gyɔ́ɔn, é mie nùŋe ngwòŋ la záb, ńdɔg ńnyɛɛ wɔ́b ntí lesɔgɔ *lɔ̌’ nà mentú’ mbɔɔ nà mekʉ̀ŋ, mbɔɔ ná mekáŋ, (tà mbɔɔ nà mekǔ).

5Á cʉa pú’u, tá pà *farisay pâ pàkyàgte *lepʉ̌ Mǒsê ŋwɛ́ zɛ́te Yěsô ngie: *Ngàŋa kwò jú jÿó mmó nê *lɔ̌’ nà mbwó mɔ́b. Pɔ́ té giŋe ná nùŋe pà mvfò wɔ́ ńdɔgɔ ngǎ? 6Yěsô tsɔ́’ɔ mbwo pɔ́b ngie: Pi ee pà nkwòŋ menÿɔ́g. Esǎya, *ntsẅì nkʉ̀ Ssé lɔ̌ɔn fóon ńgɔɔn pá’a shwóŋó nò, pá’ à la ŋwe’e ńtí mà gẅi ńgɔɔn ngie:

Epʉ̀a pɛ̂ lɔgɔ pɔ́ ndà’ ncwò wɔ́b ńgu’te wɔ̀ɔn,

ntʉ́m wɔ́b té ná mèŋ wɔ́. 7Pɔ́ ne ńgu’te wɔ̀ɔn, tá nò té mǒ wɔ́,

ńtí nò gie pɔ́ ne ńzí’i menò pʉ̀a mesoŋ

mbwo pʉ̀a ngie áa nò yɔ́ɔn#7.7 Es 29.13

8Yěsô leen ńké ńgɔɔn mbwo pɔ́b ngie: À yɛ̂ gie pi pe’e *lepʉ̌ Ssé ńnáa nzèm, ńcʉ́’ʉ ńkú’te pɔ́ se pʉ̀a mesoŋ lɛ. 9Pi zsé légwá’ *lepʉ̌ Ssé, ńcwoŋo ńkú’te pɔ́ nùŋe lá’ gẅi mboŋó. 10Mèŋ n gɔɔn nue Mǒsê la gɔ́ɔn ngie: «Gÿo mekù’ tá gù pɔ́ má gù, ńgíŋe ńgɔɔn ngie nyìŋ lɔɔn ńzoonte tá we kà pɔ́ má we wɔ́, mé zẅé ngàŋ#7.10 Ex 21.17 ». 11Tà á gʉa ná pi, pi gɔɔn gí ngie: Nyìŋ lɔɔn ńgɔɔn mbwo tá we kà má we wɔ́ ngie: Akɔ́ɔkɔ́ɔ gie à lɔɔn ńgwɔ́ á lɔg ńkẅéte yé cʉ́’ ńgwɔ́ pɔ́ “Korban”, ńdɔgɔ ńgɔɔn ngie: Á cʉ́’ʉ ye Ssé, 12mbà pi ge zẅíŋ ngie à té gíŋe ńgẅiin lékẅéte tá we pɔ́ má we wɔ́. 13Pi zí’i nùŋe lá’ gẅi pú’u, ńdɔgɔ ńgwá’a shwóŋè Ssé. Pi giŋé ńne ńgÿo lìi menò ámɛ̌ tà é gyɔ́ɔn gyɔ̌ɔn.

Akwà’ mmó gie á cʉŋte nyìŋ mvfò Ssé

(Matio 15.10-20)

14Yěsô gíŋe ńtóŋo lá’ ńgɔɔn né pɔ́b ngie: Pi metsèm téŋe tuŋó, ńcwoŋo ńjú’u nò gie mèŋ n gee ngɔ̌ɔn. 15Atsɔ́ mmó gie ńgwɔ́ á fó nzème pǐ, ńkúu ná nyìŋ tà ńnéŋe *lɔ̌’ ná yé á té wó wɔ́, a gie á fó tsɛ̀ɛ ntʉ́m yé zɔ̌ ńnéŋe *lɔ̌’ ná ye. 16[Nyìŋ lɔɔn ńgẅiin metuŋó lélɔg ńjú’u nò, á jú’]

17Yěsô gÿo nyé lá’, ńgʉa tà ńkúu ndá, *ngàŋa kwò yé zɛ́te yé ngie à kyagte nò gie à foo légɔɔn, éshwóŋó wɔ́b. 18Á gɔɔn né pɔ́b ngie, ńzsé ngie sí legyè nyé ḿvɔ́g vɔ́g pá’ se petsɔ́ pʉ̀a gwâ? Ammó gie á fó nzème pǐ ńkúu ná nyìŋ, á té *lɔ̌’ ná ye néŋ. 19Á té kúu tsɛ̀ɛ ntʉ́m ngàŋ wɔ́, á kú pɔ́ tsɛ̀ɛ lepfòm sé, ńkẅɛ ńkúu tsɛ̀ɛ kwɛ. Yěsô lɔgɔ ńgɔɔn ngie: ammó gie mé jÿó jÿǒ zɔ̌ té gie áa mvfò Ssé ńgwɔ́ gie á ńnéŋe *lɔ̌’ ná nyìŋ wɔ́, 20ńgíŋe ńgɔɔn ngie, ammó gie á kẅɛɛ ntʉ́m nyìŋ zɔ̌ ńnéŋe *lɔ̌’ ná ye. 21Menkwaŋá tepòŋ zɔɔn fó pɔ́ tsɛ̀ɛ ntʉ́m nyìŋ mesoŋ, tá ńtsóte mbàŋa pɔ́ fa’a panzwě, epanzwě fa’a mbàŋa, ńtsóte nyìŋ á gwáa ńjʉ, ńtsóte nyìŋ á zẅé wetsɔ̌, 22ńne ńgÿo gÿɛ́, ńne ńgẅiin kegɔ̀’, ńgẅiin ssé ntʉ́m, ńgẅiin fʉ̀te, ńkúu zɔgɔ́ tepòŋ, ńkwɔ́’ɔ lóŋ, ńtÿɔ́gɔ sóon twó nyìŋ, ńŋá’te nnɛ́, ńdʉ’ʉ ntÿɔgɔ́ ntsèm. 23Ngwòŋ menò tepòŋ mɔɔn kẅɛɛ pɔ́ tsɛ̀ɛ ntʉ́m nyìŋ mesoŋ, tá ńnéŋe *lɔ̌’ ná ye.

Nzwě we túm zǎb ntʉ́m ná Yěsô

(Matio 15.21-28)

24Yěsô gÿo fóo jʉ’ó ńgee nà tsɔ́ pàga ngwòŋ, á shÿó tÿǒsoŋo Tir pɔ́ Sidoŋ, ńkúu tsɛ̀ɛ tsɔ́ ndá, ńké tè ne ńkwoŋo ngie mé zsé ngie aa jʉ’ó wɔ́. Tá’ mé ké ńzsé zsé. 25Atsɔ̌ manzwě gwɔ́ yé wó, mbà *ssé tepòŋ ka gwoon míŋ we we manzwě, ńne ḿbue yé. Á jú’ yé mé gɔɔn ngie Yěsô tǒ, á nɔ́ɔnte yé, ńnuŋe mekwò yé, 26ésẅíŋte yé ngie à jwoŋ *ssé tepòŋ ŋwɛ́, e kyɛɛ míŋ we ńnyé. Manzwě awɛ̌ la piŋ tè mûɔ Yuda wɔ́. A laa mûɔ Fénisi, á tsɛ̀ɛ ngwòŋ Siria. 27Yěsô tsɔ́’ɔ mbwo yé ngie: Zɔɔn ńcʉ́’ pènkʉ́ jÿó mmó tà ńzẅɛ́, á té poŋo lékẅé shúm léjÿó pènkʉ́ ḿma’a mbwo ngwé wɔ́. 28Manzwě ŋwɛ́ tsɔ́’ ngie: Andè, ɔ̀ gɔɔn shwóŋó nò, tá’ ngwé ké ńdagte mesɔ́ɔn shúm sie pènkʉ́ ne ḿpfɛ́ɛ mmó, é gwete ssé. 29Yěsô gɔɔn né ye ngie: Mèŋ n jǔ’ ntí gie ɔ̀ lɔ̌g ńtsɔ́’, lo ńgʉa, à cʉa nà shwóŋè jú, *essé tepòŋ fó ná míŋ gù ńkẅɛ. 30Á leen ńké ḿbiŋe mbʉ̀a ye, ńgwaa gyá, múɔ pʉ́le ńnuŋe ndùm kǔ mbà *ssé tepòŋ fǒ ná ye ńkẅɛ.

Yěsô gÿǒ ntsà’ mbǔ’ zeŋe

31Yěsô fó Tir, ńne ḿbiŋe né ngʉ̀ŋe letʉ̀ŋ Galilea, ńdɔg ye tÿǒsoŋ Sidoŋ, ńne ńcʉa tsɛ̀ɛ pàga lá’ Metÿǒsoŋ Legém. 32Mé lɔgɔ tsɔ̌ nyìŋ ńtóo mvfò yé, á gwɔ́ mbǔ’ metuŋó, ńgíŋe tè zsé léshwóŋe tà á kẅɛ wɔ́, megàŋ sẅíŋte Yěsô ngie à záb mbwó mé ná yé à zeŋe, 33Yěsô lɔgɔ yé fó tsɛ̀ɛ nùɔ pʉ̀a ńkẅɛ, ńnéŋ púɔ tepwó pé tsɛ̀ɛ metuŋó mé, ńtsaba tepwó we lê metyé, ńzába nà lʉ́m yé, 34ńdeen ńké ḿbʉ’ʉ menÿɔ́g mé ńdíe tÿǒ, ńzẅi, ńgɔɔn ngie: “Effata”! Ńdɔgɔ ńgɔɔn ngie: Tsɔ́’ɔ! 35Metuŋó mé gwóon ńtsɔ́’ɔ, alʉ́m yé kyɛ́’ɛ, á zye légɔɔn nò té mʉ́’te. 36Yěsô gɔɔn né pʉ̀a pie pɔ́ ně ńdɔgɔ yé ńtó ngie: Tà pi gɔɔn tà nyìŋ jú’. Tá ńké ne ńtɔ’ɔ wɔ́b lêkɔ́ wɔ́, pɔ́ ké ne sá’a yɔɔn nò sǎ’. 37Pʉ̀a metsèm ne ńjú’u, ḿbú ḿmɔɔn tà ńgɔɔn ngie à gÿo yé kɔ̀ɔkɔ́ɔ, á gwɔ́ pɔ́ mbòŋ. À gÿo pà mbǔ’ metuŋó jú’u nò, mbɔɔ pa támbǎ’ gíŋe shwóŋe.

Currently Selected:

Malékuse 7: NGBM

Highlight

Copy

Compare