Lukase 5
5
Yěsô tsɔ̌’ mevɔ́g mvfò ngàŋa nkwò ye
(Matio 4.18-22; Malékuse 1.16-20)
1Yěsô gwɔ́ tsɔ́ lyɛ̌’, ńtyé ngʉ̀ŋe letʉ̀ŋ sie mé tóŋo le Jenezared. Anùɔ lá’ tà ńgyɔ́ɔn tóo lejʉ́ŋ ye lé jú’u nò Ssé, ńgyɔ́ɔn gyɔ́ɔn tà mé cʉ́’ʉ sẅɛ́ɛ ye sẅɛ̌. 2Yěsô ma’ nÿɔ́g, ńgyá kanú’ sépʉ́a ngʉ̀ŋe ntse, mbà pàmà’ ssó ně fó tsoló ńkẅɛ, ńgwɔ́ ntse sɔgɔ menkÿò mɔ́b. 3Yěsô kúu tsɛ̀ɛ tsɔ́, á gwɔ́ ye Símo, ésẅíŋte yé ngie à ná’a ńdɔgɔ yé ńgʉa né tsɛ̀ɛ ntse. Á zẅíŋ, Yěsô sẅɛ́’ ńnéŋe tsɛ̀ɛ kanú’, ńzye léla’te nò Ssé mbwo lá’.
4Ńgɔɔn nò tà ńtsẅé jʉ’, ńtsẅi né Símo ngie: Lɔgɔ kanú’, ńgíŋe ńgʉa tà ńkuu nà jʉ’ʉ ntse gie á me’e ssé, gu laa pʉ̀a pú lêen ńké ḿma’ menkÿò mí ntse lélɔg ńgwoon messó. 5Símo tsɔ́’ ngie: Andè, peg lǎ’ pɔ́ légyá ngɔ́’, lémwoon ntse, ńké tè tsɔ́ lagá mmó gwoon. Tá’, pá’ kwà’ gù zɔ gɔ̌ɔn ngie mé gíŋe ḿma’ menkÿò ntse lɛ, mèŋ n ge ma’, 6ńgɔɔn pú’u, pâ pʉ̀a pé gʉa ḿma’ menkÿò tsɛ̀ɛ ntse, ńdɔg ńgwoon messó é gyɔ́ɔn gyɔ̌ɔn tà pɔ́ ne shwóŋó, menkÿò mɔ́b zye lézá’te. 7Pɔ́ gyá kékáŋ, ḿma’te pwó ńdɔg ńtóŋ yetsɔ́ ngàŋa nkwò yɔ́b gie é laa tsɛ̀ɛ yetsɔ́ kanú’, ngie pɔ́ tó ńnéŋ mbwo, pɔ́ tó, pâ pɔ̌ pú ńnéŋ messó tsɛ̀ɛ mekanú’ mémbʉ́a, mekanú’ ŋwɛ́ lúe tà ńcʉ́’ʉ ḿme’e pɔ́ ntse.
8Símo Piɛ gyá yɔɔn nò gyǎ, tà ńgʉa ńnuŋe mekwò Yěsô, ńgɔɔn né yé ngie: Cʉ̀apʉ̀a, tsétsɔ’, fó lejʉ́ŋ mèŋ ńgʉa, mèŋ n gee pá’ɔɔn ńgwɔ́ nyìŋ tepòŋ mvfò Ssé. 9À la gwaa gɔɔn pú’u, mbà cÿɔ’ pǔ ńgwoon wɔ́ba pʉ̀a pé, ńtí nzẅìŋ messó mie pɔ́ gwǒon. 10Tà mbɔɔ Jâŋ pɔ́ Jâg, é gubé Zebede, gie é laa ngàŋa yetsɔ́ kanú’ la gíŋe ḿbú ḿbɔ́g yɔ́b tɛ’. Tá Yěsô gɔɔn né Símo ngie: Tè pɔ́g pɔ̌g, tà fó lyɛ̌’ɔɔn, ɔ̀ ge nyé légwoon messó é cʉ́’ʉ cú’te pɔ́ pʉ̀a mesoŋ. 11Pɔ́ jú’ pú’u, ńdɔg mekanú’ ḿbiŋ lé ngʉ̀ŋe ntse, ńkúu wó, ḿbú ńnyé kɔ̀ɔkɔ́ɔ wɔ́, ńcʉ́me nzèm Yěsô.
Yěsô gÿǒ tà’ ngàŋ nkà’ zeŋe
(Matio 8.1-14; Malékuse 1.40-45)
12Yěsô gwɔ́ lyɛ̌’, ńgwɔ́ tsɛ̀ɛ tsɔ́ tÿǒsoŋ. Tsɔ̌ nyìŋ gwɔ́ wó, mbà nkà’ léen ḿbú ńjÿó yé tɛ’. Á gyá Yěsô, ńdeen ńtó ńnuŋe mekwò yé, ésẅíŋte yé ngie: Cʉ̀apʉ̀a, n zsě ngie ɔ̀ lɔɔn ńkwoŋ, mbà ɔ̀ ku’u légÿo n zeŋe. 13Yěsô jú’, ńtsege pwó, ńkíbe yé, ńgɔɔn ngie: Mèŋ n kwǒŋ pú’u, zeŋé. Nkà’ gwoon ḿmaga ná yé. 14Yěsô tɔ’ɔ yé ngie: Pɔ́ɔn lékím tà shwóŋó nyìŋ, gʉa ńnyɛ pɔ́ mbùm ɔ̀ mbwó *pànùŋe pwɔ́’ ḿbiŋ ńnáa mmó gie *lepʉ̌ Mǒsê ne ńzɛ́te mbwo nyìŋ gẅie nkà’ magá ná ye, pʉ̀a metsèm lêen ńké ńzsé ngie ɔ̀ zeŋé 15Yěsô la tɔ’ɔ yé pú’u, mé ké ne ńkẅi’i ńkime yé kím, tà lá’ gíŋe ńkẅi’i ńtóo lé jú’u shwóŋè yé mbɔɔ légwɔ́ gie à ge zeŋe megùɔ mɔ́b. 16Tá’, Yěsô ńnéŋe tà ńdu ssé ńgee jʉ’ gie nyìŋ tè wó wɔ́, ńgu’te Ssé.
Yěsô zeŋé ngàŋa kwʉ́’te
(Matio 9.1-8; Malékuse 2.1-12)
17Yěsô gwɔ́ lyɛ̌’, ńně ńda’te nò Ssé, pʉ̀a *farisay pâ *pàkyàgte mbʉ̌ Ssé tó ńnéŋe lejʉ́ŋ yé, éfóo ná melá’ mie ée tsɛ̀ɛ pàga ngwòŋ Galilea pɔ́ Jẅideá tà mbɔɔ tÿǒsoŋo Yerósalem. Metʉ̀ Cʉ̀apʉ̀a Ssé gwɔ́ nà Yěsô, á lɔgɔ ńzeŋe megùɔ. 18Mé ńnéŋe tà ńgyá mbàŋa lɔgɔ tsɔ̌ ngàŋa kwʉ́’te ńtó, mbà pɔ́ lɔgɔ́ páŋte ńkaa yé, éfa’ nzsé lékúu ndá ńtÿɔ́gɔ yé mvfò Yěsô. 19Alá’ sẅɛ́ɛ ncwò ndá sẅɛ́ tà pɔ́ gyá kékáŋ, ńcʉ́’ ńdɔgɔ yé ḿpfó nzsé gie e gee lê ntsɔ̀’ ndá, ńkúu wó, ńtsɔ́’te mmó gie mé la lɔg sẅe ndá, éfó jʉ’ó sẅé’e ngùɔ tsɛ̀ɛ páŋte we, ńnuŋe mvfò Yěsô. 20Yěsô gyá ntí gie pʉ̀a pɔɔn lɔ̌g ńzáb ntʉ́m ná yé, ńgɔɔn né ngùɔ ngie: Ashǔ wɔ̀ɔn, mé legé menò tepòŋ mú ńnáa mbwo ɔ̀. 21Pàkyàgte *lepʉ̌ Mǒsê lâ pà *farisay jú’, ńzye lézẅɛ́te ngie: Wɔɔn aa wɔ̌ gẅie à zoonte Ssé? E Ssé gílé yé zɔ ku’u lélege menò tepòŋ nyìŋ. 22Yěsô gwóon ńzsé mmó gie pɔ́ zẅɛ́te mǒ, ńzɛ́te wɔ́b ngie: Pi gaa ńgẅiin yɛ̂ ntí nkwaŋá ntʉ́m pi? 23Pi gyǎ gí ngie á zéŋe pɔ́ légɔɔn né nyìŋ ngie mé legé menò tepòŋ mú kà pɔ́ lé gɔɔn ngie lu ssé ńgiŋ? 24Mèŋ n ge ké nyɛɛ gẅi ngie áa ndùmo ssé tsetsá’, mbà mé la ná metʉ̀ né *Míŋ Nyìŋ lélɔg ńdege menò tepòŋ pʉ̀a mesoŋ ńnáa mbwo pɔ́b. Ńdêen ńké ńgɔɔn né ngùɔ ngie: Lu ssé, ńkaa páŋte gù ńdɔg ńgʉa lê mbʉ̀a gù. 25Á gwóon ńdu ssé tsetsɛ̀ɛ lá’, ńkaa páŋte, ńdêen ńké ńgwaa piŋ lê mbʉ̀a yé, ńgiŋe ńgu’te Ssé. 26Pʉ̀a metsèm la gyá á kʉ’ʉ wɔ́b, pɔ́ né ḿbɔ́gɔ, ńgíŋe ně ńgɔɔn ngie agù’te áa mbwo Ssé, peg gyǎ ndàa gyá lyɛ̌’ɔɔn.
Yěsô toŋó Lěvi ngie à cʉ́me nzèm yé
(Matio 9.9-13; Malékuse 2.13-17)
27Yěsô gÿo ńkẅɛ ńne ńgee, ńgyá tsɔ̌ nyìŋ gẅie mé tóŋo yé le Lěvi, á gwɔ́ *nkẅè ncùb pà Roma, ńnéŋe jʉ’e mé kẅé ncùb pà *Roma wó. Yěsô gɔɔn né yé ngie: Tóo pɔgɔ zɔ cʉ́’ʉ ńgiŋe. 28Lěvi nyé shúm ntsèm, ńdu ssé, ńcʉ́me nzèm yé, pɔ́ yé gʉa.
29Lěvi gÿo ńtóŋo máamáa línɔ́ɔn ndá yé ńtí Yěsô. Pàkẅé ncùb tó tà ńgyɔ́ɔn tà mbàa petsɔ́ pʉ̀a pie pà Yuda lɔ́ɔn ḿbú ńtóŋo wɔ́b apɔ̌ le pʉ̀a tepòŋ. Pâ Yěsô pú ne ńteme ńjÿó shúm. 30Tsɔ́ pà *farisay lâ tsɔ́ *pàkyàgte lepʉ̌ Mǒsê gyá pú’u, ńne ńzẅɛ́te, ńzɛ́te megàŋa nkwò Yěsô ngie: Mélà’a kɔ́ pi lâ pàkẅé ncùb lâ petsɔ́ pʉ̀a tepòŋ teme shúm ńjÿó? 31Yěsô saga mbwo pɔ́b ngie: Ngwɔ́ nyìŋ le gwɔ́ ntentʉ́ ńgʉa fa’a ńgÿò meffo wɔ́. Nyìŋ guɔ tá fa’a yé. 32Mèŋ n ka tè tó pɔ́ létóŋ pʉ̀a pie pɔ́ kwáŋ ngie pɔ́ ée pʉ̀a membòŋo ngie pɔ́ piŋe mbwo Ssé wɔ́. Mèŋ n ka tǒ ńtí pɔ́ megàŋ mefʉ̀a.
Lezɔ̌g nzyè ńtí nò Ssé
(Matio 9.14-17; Malékuse 2.18-22)
33Pà *farisay gíŋe ńgɔɔn mbwo Yěsô ngie: *Ngàŋa kwò Jâŋ ńnéŋe *ńkwoŋ kwoŋ ńnéŋe nzyè, ésẅíŋte Ssé. Epég pʉ̀a gíŋe ńgÿo pɔ́ pú’u. Tá’, epú ké tè pú’u gÿo. Pɔ́ zsé pɔ́ lépfɛ́ɛ mmó ḿbiŋ ńnú melù’. 34Yěsô tsɔ́’ɔ mbwo pɔ́b ngie: Tà à lɔɔn ngwɔ́ mé gʉa leluŋó nyìŋ, á nyé ńnéŋe ńnéŋe, pʉ̀a pie mé ně ńtóŋ ńnéŋe nzyè lêkɔ́? 35Tá’, mé ge lá’ fó mbwo pɔ́b tsɔ́ lyɛ̌’ sa’a yé, pɔ́ lêen ńké ńnéŋe nzyè fʉ̀’ó la. 36Yěsô gíŋe sag ngie: À lɔɔn ńgwɔ́ nyìŋ le zá’a mmó nzsǒ nà nzsǒ sẅé ńdɔg ńtsɛ́ lepÿé nà nzẅìŋe nzsǒ wɔ́. Nyìŋ gÿo pú’u, á lɔg ńcʉŋte nzsǒ sẅé, ammó nzsǒ sẅé gie à ně ńzá’ ké le pumo nà nzẅìŋe nzsǒ wɔ́. 37Mé lɔɔn ne ńgee ńde’e melù’, tsɛ̀ɛ ntú’ *ngùb#5.37 Ntú’ ngùb lɔgɔ těen ńgwɔ́ ntú’ gie áa tÿóon wɔ́, e lɔgɔ ńgwɔ́ mmó melù’ gie mé la lɔg ngùb nɔ̀ɔn ńdɔg ńnyɛte. , mbà mé té néŋ melù’ mie mé nyé ńtsɔ́’ɔ tsɛ̀ɛ nzẅìŋe ntú’ wɔ́. Mé lɔɔn ńgÿo pú’u, mbà melù’ sẅé ge fu’, éshʉ́a nzẅìŋe ntú’. Mé sɔ́ɔn melù’, ésɔ́ɔn ntú’. 38Á ne ńzɛ́te ngie mé néŋ melù’ mesẅé pɔ́ tsɛ̀ɛ ntú’ ye sẅé. 39À lɔɔn ńgwɔ́ nyìŋ le nú melù’ mie é ne ńtʉʉ tà é gwoon ncwò wé, á gíŋe ńtsɔ́ɔn lénú melù’ mie mé nyé ńtsɔ́’ɔ wɔ́. À ge cʉ́’ tsɔ́ɔn pɔ́ mie é tʉté.
Currently Selected:
Lukase 5: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.