2 Tesalonika 3
3
Pi sẅíŋte Ssé nà twó ség
1Mefɛ́ mefɛ́, anò gie peg ge lɔg cʉ́me, á gwɔ́ pɔ́ ngie pi sẅíŋte Ssé nà twó ség, tá shwóŋè Cʉ̀apʉ̀a kẅi’i sa jʉ’, ńgwɔ́ mmó mekù’ pá’ áa mbʉ̀a pi ńgwɔ́ lɛ. 2Pi gíŋe sẅíŋte Ssé ngie tà peg gwe mbwo pʉ̀a tepòŋ, pie ée pàfa’ mentsaŋ. Pú’u, á nue pʉ̀a metsèm zɔ̌ té ne ńzẅíŋe lézáb ntʉ̀m nà Ssé wɔ́.
3Cʉ̀apʉ̀a aa ńké těen ńkúbe wɔ́. À ge gÿo pi le kʉ́a, é piŋ le zẅíŋ Sátà zába pwó ná pi wɔ́. 4Á gʉa ná pi, mbà Cʉ̀apʉ̀a ne ńgÿo peg zsé ngie pi ne ńgÿo mmó gie peg ne ńtsẅii ngie pi gÿo. Ńgwɔ́ gie peg lɔɔn ńgíŋ ńtsẅi ngie pi gÿo lêkɔ́ wɔ́, mbà pi ge gÿo pɔ́ pú’u. 5Peg ne ńdúɔ ngie Cʉ̀apʉ̀a zí’i gẅi lékẅi’i ńkwoŋ Ssé, mbɔɔ léshÿɔg ngɔ́’ pá’ ye Kristo.
Epʉ̀a Ssé gẅiin léfa’ tá ńjÿó
6Mefɛ́ mefɛ́, peg lɔ̌g lezíŋ Cʉ̀apʉ̀a Yěsô Kristo, ńtsẅii mbwo pi ngie pi lÿɔ́’ mbɔɔ wɛ̌ fɛ́ gẅi wɔ́ gẅie à pɔ́gɔ fà’ pɔ́g, ḿbiŋ ńké tè ne ńgiŋe ná ntí gie peg la zí’i gẅi laa pɔ̌ wɔ́. 7Kwà’ pi gí ne ńzsé pá’ á ne ńzɛ́te ngie pi gÿo pú’u, ńdɔgɔ ńgiŋe ná mekwò még, á nue peg laa tsetsɛ̀ɛ pi, peg tě ḿbɔ́gɔ fà’ wɔ́. 8Peg la tè jÿó mmó léjÿó nyìŋ sẅɛ̀ɛ sẅɛ̀ɛ wɔ́, peg la fa’ tá ńtéŋe zì’i tá ńjÿó mmó, éfa’ tsẅɛ́’ mbɔɔ zsǒ ḿbɔ́gɔ lécʉ́’ pʉ̀a pie pi ge zɔ́gɔ jÿɔ́gɔ wɔ́b jÿɔ́g. 9Peg la zɔɔn ńkwa’ ńgẅiin légɔɔn ngie pi jÿɔ́gɔ wég, tá ńgwɔ́ gÿo pú’u, ńne ńtsɔ́ɔn pɔ́ ngie pi pí fʉ̀’ ná peg. 10Á laa fʉ̀’ gie peg la zɔɔn ńgwɔ́ tsetsɛ̀ɛ pi, peg ne ńgɔɔn né pi ngie: Nyìŋ lɔɔn ńgwɔ́ gie à tè fa’a fà’ wɔ́, tà á ké ńjÿó mmó léjÿó. 11Peg piŋ ne ńjú’u, mé gɔɔn ngie é tsɔ́ pʉ̀a ée tsetsɛ̀ɛ pi ḿbɔ́gɔ fà’ pɔ̌g, ńgwá shwóŋó pɔ́ menò mie é té ne ńdíe wɔ́b gwɔ́. 12Peg lɔ̌g lezíŋ Cʉ̀apʉ̀a Yěsô Kristo ńgɔɔn né pɛ̌ pʉ̀a tà ńdɔgɔ ńtÿɔ́gɔ wɔ́b tÿɔ́g ngie pɔ́ pʉ́le nnɛ́ éfa’a fà’, ńjÿó shúm léjÿó sie pɔ́ zɔ̌ fǎ’.
13Ńgʉa ná pi, mefɛ́ mefɛ́, tà pi kʉ́a légÿo pɔ́ menò mie ée mbòŋ. 14Nyìŋ lʉ’ʉ lé jú’u nò gie peg gɔ̌ɔn tsɛ̀ɛ yɔɔn ŋwà’ne lɔɔn, pi líe yé mboŋó. Tà pia pɔ̌ gíŋe ńtéme nò, ńzsé ngie eshʉ́ ge kúu yé. 15Tá’, ḿbɔ́ɔn gẅi lélɔgɔ yé ńgÿo ngàŋ mbù gẅi. Pi kaga yé pɔ́ pá’ à lɔɔn ńgwɔ́ nyìŋ kaga fɛ́ we.
Mbʉ́lè pɔ́ tsyɛ̀’te lɔg ńcʉ́me
16Cʉ̀apʉ̀a gẅie à ńnéŋe sẅétè ntʉ́m pʉ̀a, yé lê twó yé zɔ ne ńnéŋe sẅétè ntʉ́m pi fʉ̀’ ntsèm, á nà meshÿó ntsèm. Cʉ̀apʉ̀a ne ńgwɔ́ né pi metsèm. 17Kwà’ mèŋ Pɔl, mèŋ n tsyɛ’té gẅí. Mèŋ n dɔ̌g pɔ́ kwà’ pwó yɔ́ɔn, ńŋwe’e yɔɔn tsyɛ̀’te. Áa pá’ mèŋ n gee ńzɔɔn ńŋwe’e ná yɛ̌ ŋwà’ne wɔ́ gie mèŋ n tǔm. Pi ge liŋe pwó léŋwe’e mmó yɔ́ɔn. 18Cʉ̀apʉ̀a wege Yěsǒ Kristo ne ńgwɔ́ né pi metsèm.
Currently Selected:
2 Tesalonika 3: NGBM
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.
