2 Tesalonika 2
2
Anò fùɔ menò tepòŋ
1Mefɛ́ mefɛ́, á gʉa ná nò gie á ne ńdíe lyɛ’ɛ́ lá’ gie Cʉ̀apʉ̀a wege Yěsô ge lá’ gíŋe tó, pege cú’te mvfò yé la, peg ne sẅíŋte gẅi ngie: 2Tà pi jú’ pá’ etsɔ́ pʉ̀a ne ńgɔɔn ngie lyɛ’ɛ́ lá’ Cʉ̀apʉ̀a tǒ, ḿvege vege. Tà pi pɔ́g. Tà mbɔɔ pá’ nyìŋ gẅie à neŋé ńtsẅi nkʉ̀ gẅie é fóo mbwo Ssé zɔ lɔɔn ńgɔɔn, tà fó ńgwɔ́ gie pi jǔ’ pɔ́ mbwo nyìŋ gẅie à ne shwóŋó nò Ssé, kà mé fó shwóŋó gẅi pɔ́ ngie mèŋ n zɔ ŋwe’é pú’u wɔ́, tà pi zẅíŋ. 3Tà pi zẅíŋ nyìŋ fʉte gẅí, kà pɔ́ nê yɛ̌ ntí wɔ́. Yɛ̌ lyɛ’ɛ́ lá’ té lá’ tó té gwɔ́ gie etsɔ̌ ntí menò vɔ̌g ńcʉate wɔ́. Á lɔgɔ ńgwɔ́ pá’ pʉ̀a tá ńgyɔɔn ge lá’ lʉ’ʉ lé jú’ ncwò Ssé. Fùɔ menò tepòŋ kẅɛ ńtyé tá yɛ̌ lyɛ’ɛ́ lá’ lêen ńké ńtó. Á yé wá gẅie mé ge lá’ ma’a yé tsɛ̀ɛ mmɔ̌g la. 4À ge lá’ kẅɛ tyé, é lêen ké zye létɔ’ pʉ̀a ngie tà pɔ́ gíŋe ńgu’te tsɔ́ mmó tà mbɔɔ Ssé, é ne gɔɔn ngie yé pú ńcʉa wɔ́b métsèm, é kú mbɔɔ tsɛ̀ɛ jʉ’e Ssé ńnéŋe, é gɔɔn ngie yé zɔɔ Ssé.
5Tà pi tè ne ńkímte ngie afʉ̀’ gie n daa tsetsɛ̀ɛ pi, n da shwóŋó gẅi menó mɔɔn wɔ́? 6Pi ne ńzsé mmó gie á táte fùɔ menò tepòŋ tá à těen ńkẅɛɛ ńtyé fʉ̀’ɔɔn wɔ́. Yɛ̌ fʉ̀’ ge gÿo ku’, tá à kẅɛ. 7Menò mie fùɔ menò tepòŋ ge lá’ gÿo, é kěen ńzɔɔn ńzyéte, tá ńké ńnyé shúu shú, é cʉ́’ pɔ́ ndà’ pá’ mé ge pe’e nyìŋ gẅie à táte yé. 8Yé fùɔ menò tepòŋ lêen ńké ńkẅɛ. Á yé gẅie Cʉ̀apʉ̀a Yěsô ge lá’ fÿɔ́gɔ zẅɛ̌ ncwò yé ná yé à kwé, ńtí gie Yěsô lɔ̌g ńtó, e gÿo à mag. 9Fùɔ menò tepòŋ ge lá’ gwaa tó, Sátà néŋ metʉ̀ mé ná yé, à lɔg ńgÿo menò mmɔɔn mmɔɔn laa ndàa gyá menò mentí mentí, é lɔg fʉte pʉ̀a. 10À ge lá’ lɔg menò mie é té nò wɔ́ mentí mentí, éfʉte pʉ̀a pie é ge lá’ pyé. Pɔ́ pyé pú’u, mélà’mie pɔ́ lʉ’ʉ lékwoŋo nò gie áa nénʉ́ gie á kě gÿo pɔ́ tsẅɛ́. 11Áa mmó gie á gÿo, e Ssé zẅíŋ atsɔ́ mmó tó ńgÿo pɔ́ cʉ́’ʉ ḿbúu pǔ, légwɔ́ gie nkwaŋá wɔ́b ge cʉ́’ tyé pɔ́ nà menò mie é té nò wɔ́. 12À cʉa pú’u, pʉ̀a pie pɔ́ kaa zẅíŋe nò gie áa nénʉ́ wɔ́, á nò gie á té nò wɔ́ zɔ cʉ́’ʉ ḿboŋo wɔ́b, pɔ́ lêen ńké ńgwe ntsaŋ.
E Ssé la tsɔ́’ɔ gẅi pá’ pi ge lá’ tsẅɛ́
13Mefɛ́ mefɛ́, pie e Ssé kwoŋo wɔ́b, á gʉa ná peg, mbà peg gẅiin lésíe Ssé fʉ̀’ ntsèm ńtí gẅí, mélà’mie à la tsɔ́’ɔ gẅi tà fó nzyète légwɔ́ gie pi ge tsẅɛ́. Pi tsẅɛ́ɛ ńtí pá’ a Zẅìge Ndʉalʉ̌a ne ńgÿo pi gwɔ́ pʉ̀a Ssé, mbɔɔ pá’ pi záb ntʉ̀m nà nò gie áa nénʉ́. 14Mɔɔn ée menò mie é la gÿo e Ssé lɔg Nkʉ̀ Mbòŋo gẅie peg la tsẅii mbwo pi, ńtóŋo gẅí, légwɔ́ gie pi ge kúu tsɛ̀ɛ legú’ Cʉ̀apʉ̀a wege Yěsô Kristo. 15Pú’u la, mbà mefɛ́ mefɛ́, tà pi kʉ́a. Ammó gie peg ka zí’i gẅí, kà lê ncwò wɔ́, kà ńŋwe’e pɔ́ tsɛ̀ɛ ŋwà’ne wɔ́, pi kú’te mboŋó. 16Tá wege Ssé la kwoŋo wégè, ńdɔgɔ lécÿó gʉm yégè, pege cʉ́’ pʉ̀a pé, ńkẅiŋte wégè ná ntí gie e těen ńdá’a ḿmaga wɔ́, ḿbiŋ ńgÿo pege ńnéŋe ne ńzẅí’te mmó mbòŋo gie à la ka’a mbwo pʉ̀a pé. Pú’u, peg ne ńdúɔ mbwo yé mbɔɔ mbwo Cʉ̀apʉ̀a wege Yěsô Kristo ngie: 17Pɔ́ kẅiŋte gẅí, ńnáa gẅi tʉ̀ pi lɔg ńgÿo pɔ́ menò mbòŋo, ḿbiŋ ńgẅiin pɔ́ shwóŋè mbòŋo.
Currently Selected:
2 Tesalonika 2: NGBM
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.
