2 Korento 13
13
Pɔl ne ńtÿɔ́gɔ pʉ̀a, ḿbiŋ ne ńtsyɛ’te wɔ́b
1Mèŋ n ge tóo mbʉ̀a pi fʉ̀’ɔɔn e lɔgɔ ńgwɔ́ ngʉ̀a ntá, é tó mé gwɔ́ ŋág mbɔɔ yɛ̌ ntsaŋ wɔ́, é zẅí’te nò ncwò pʉ̀a mépʉ́a kà pʉ̀a métá wɔ́ pá’ ŋwà’ne Ssé ne ńgɔɔn. 2Mèŋ n ge tʉ́ njÿó fʉ̀’ɔɔn, é gíŋ gɔɔn nò mbwo pʉ̀a pie á la gwaa gwɔ́ setsɔ́ lekwò, mbà pɔ́ gÿo menò tepòŋ mbɔɔ mbwo mânyìŋ ntsèm. Áa nà lyɛ̌’ɔɔn, mèŋ n te tsetsɛ̀ɛ pi wɔ́, tá mèŋ n ge kímte gẅi nò gie n da gɔɔn né pi á fʉ̀’ gie n da tóo lá’ pi ná mbɔ́ɔntè yépʉ́a. Mèŋ n da gɔɔn ngie n ge gÿo tó, é néŋ ntsaŋ twó mânyìŋ ntsèm gẅie à fʉ̌a nò. 3Pá’ pi ké ne fa’a légyá mmó gie á nyɛɛ ngie anò gie á kẅɛɛ ncwò mèŋ á fóo mbwo Kristo la, pi ge ké gÿo gyá. Pi zsé ngie Kristo tè ne ńzɔ́bte gẅi wɔ́. À ne ńnyɛɛ metʉ̀ mé tsetsɛ̀ɛ pi. 4Áa nénʉ́ ngie à laa tsɔ́ fʉ̀’, ḿbÿɛ́ pá’ nyìŋ mesoŋ, mé kime yé nà tÿǒ nkǐ. Tá’ à ké ńgwɔ́ fʉ̀’ɔɔn ńgwɔ́ ntentʉ́, é gwɔ́ metʉ̀ Ssé. Peg yég, peg fó ná pá’ peg la nnɛ́ ná yé, ḿbÿɛ́ pá’ à la gwɔ́. Tá’ é ké gÿo lɔg yeg ntí légẅiin gẅí, é nyɛɛ gẅi ngie pega Kristo ee ntentʉ́, é gwɔ́ metʉ̀ Ssé.
5Pi lê twó gí pi líe mbùm gí ńgyá. Kà pi ne ńgiŋe ndʉŋ ndʉŋ ná nò Kristo gie pi la zẅíŋ wɔ́. Pi nyɛte ńtsa’. Pi tè ne ńgyá ngie Kristo aa tsɛ̀ɛ ntʉ́m pi wɔ́ ka? Á gwé’e pé’è á té pú’u wɔ́, mbà á lɔgɔ ńgwɔ́ ngie pi tè pʉ̀a Kristo wɔ́. 6N kwǎŋ ngie pi ge zẅíŋ ngie á gʉa ná peg, mbà peg kéen ńnyɛ kwà’ mboŋó ngie peg ee mengàŋ ntúm Kristo. 7Peg ne sẅíŋte Ssé ngie à kẅéte gẅi tà pi le gÿo sɔɔn nò tepòŋ wɔ́. N ké tě ńdɔgɔ fa’a pú’u, pɔ́ légÿo tá pi gyá ngie peg ee ngàŋ ntúm Yěsô Kristo wɔ́. Peg tsɔ́ɔn pɔ́ ndà’ ngie pi gÿo nò mbòŋo tà mbɔɔ pá’ fà’a yég ge gwɔ́ pɔ́ pá’ fà’ gie mé gwág gwǎg. 8Peg zɔɔn ńgẅiin yég pɔ́ létóon nò gie áa nénʉ̀, peg tè gẅiin létáte nò gie áa nénʉ́ wɔ́. 9Pi lɔɔn ńgwɔ́ ná mánzsè Ssé, ńgwɔ́ metʉ̀ pʉ̀a, peg gwɔ́ yég mǒ ńgwɔ́ pɔ́ mepepÿɛ́ɛ pʉ̀a, mbà nò ge poŋo wég poŋ. Áa mmó gie á gÿo peg gwɔ́ tà ne sẅíŋte Ssé, ńdúɔ ngie à gÿo pi giŋ pɔ́ ná mánzsè we tà ńcʉ́me. 10Áa mmó gie á gÿǒ, n nyé pɔ́ ngʉ̀a shʉ̀shʉ̀a ńŋwe’e yɔɔn nò ntsèm, ńne ńtsɔ́ɔn ngie n te gÿo tó tà kúu tsetsɛ̀ɛ pi é lɔg pá’ Cʉ̀apʉ̀a la tÿɔ́gɔ wɔ̀ɔn mvfò pi, é cÿɔ́gɔ gẅi cÿɔ́g wɔ́. Cʉ̀apʉ̀a la tÿɔ́gɔ wɔ̀ɔn mvfò pi pɔ́ légÿo acú’tè kẅi’i ńgʉa lê mvfò. À la tè tÿɔ́gɔ wɔ̀ɔn ngie mèŋ n tág tág wɔ́.
11Á nà fʉ̀’ɔɔn mefɛ́ pɔ́ɔn, pi ńnéŋe nê lekág. Pi ne fa’a shÿó pá’ tsɔ́ *lɔ̌’ té ge gwɔ́ tsetsɛ̀ɛ pi wɔ́. Pi ne ńkẅiŋte mennɛ́ mí. Pi ne ńgẅiin tà’ ncwò, ńnéŋe lê mbʉ́lè, à cʉa pú’u, e Ssé, yé gẅie à gẅiin nkwòŋe pɔ́ mbʉ́lè gwɔ́ tsetsɛ̀ɛ pi. 12Nyìŋ gẅi tsyɛ’te fɛ́ we, nyìŋ tsyɛ’te fɛ́ we, ńcʉ́’ʉ létsyɛ’te ńtáŋte mennɛ́ mí nà ntí yé pʉ̀a Ssé. Mecú’tè pʉ̀a Ssé métsèm pǔ ńtsyɛ’te gẅí. 13Cʉ̀apʉ̀a Yěsô Kristo ne ńgwɔ́ né pi metsèm, nkwòŋo Ssé mbɔɔ Zẅìge Ndʉalʉ̌a gie á témte wege ne ńgwɔ́ tsetsɛ̀ɛ pi metsèm.
Currently Selected:
2 Korento 13: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.