2 Korento 12
12
Eshúm mmɔɔn mmɔɔn sie e Ssé la nyɛ́’ nÿɔ́g Pɔl á gyá
1Mèŋ n gíŋe ńkẅi’i ńka’te ńdɔg ńgʉa lê mvfò la? Á tè kẅéte légÿo pú’u wɔ́. Tá’ n ge ké shwóŋó gẅi nò fʉ̀’ɔɔn ná shúm sie Cʉ̀apʉ̀a la nyɛ́’ nÿɔ́g mɔ́ɔn, mèŋ n gyá mbɔɔ sie n da gyá pá’ fʉ̀’ gie n dyé njÿòon la. 2Mèŋ n ne ńzsé tsɔ̌ nyìŋ gẅie à la la nnɛ́ ná Kristo, ée fʉ̀’ɔɔn ńgwɔ́ ngù’ ntsɔ̀b lekùɔ nê legém pá’ e Ssé la kaa yé ńdɔg ńkwɔ́’ kwɔ́’ tà ńkúu tàa tÿǒ lépwó#12.2 e lɔgɔ ngwɔ́ lefaŋ mbɔɔnte yetá. Pa Yuda lɔ́ɔn nkwaŋa ngie lefaŋ ee ngub tá: melɔ́ɔn, shúm sie ee lefaŋ ta ŋwʉ́ŋe ka ntʉ́a tʉa wɔ́ ngÿo jʉ’ gie e Ssé neŋe wó. Me pi wɔɔn nkaŋa ndʉŋte na nkaŋ 3, ńgyá ngie lefaŋ ḿbɔ́ɔnte yetá lɔgɔ ngwɔ́ jʉ’ gie e Ssé ee wó. Kà á laa pú’u, kwà’ yé zɔ̌ gʉa wó wɔ́, mbà mèŋ n kaa zsé, kà à la lyé pɔ́ njÿòon wɔ́, mbà mèŋ n kaa zsé. E Ssé zɔ ne ńzsé. 3-4Mèŋ n ne ńzsé ngie mé la kaa ngàŋ ńdɔg ńkwɔ́’ tà ńkúu jʉ’ gie e Ssé ee wó, à tóo wó ńjú’u nò á gwɔ́ gie à lɔɔn ńgwɔ́ nyìŋ mesoŋ á le fʉ̀’ʉ légɔɔn wɔ́, nyìŋ mesoŋ piŋ ńzɔɔn tè gẅiin légɔɔn wɔ́. Kà á laa pú’u, kwà’ ngàŋ zɔ̌ gʉa wó wɔ́, ka à la lyé pɔ́ njÿòon wɔ́, mbà mèŋ n kaa zsé. E Ssé zɔ ne ńzsé, 5ńgwɔ́ n dɔgɔ nyìŋ áwɛ̌ ńka’te. Tá ńgʉa nà lelɔgɔ twó mbùm yɔ́ɔn ńka’te, mbà ńgwɔ́ n gwɔ lɔg ka’te, éfó pɔ́ ná pá’ mèŋ m bÿɛ́ pÿɛ̌. 6N gwé’e ńge lɔgɔ twó mbùm yɔ́ɔn ka’te, mbà mèŋ n tě ńdɔgɔ ḿbʉ́a pʉ̌a wɔ́, á nue n ge gɔɔn pɔ́ nò nénʉ́. Tá’ n tě ńgee ńka’te wɔ́, ḿbɔgɔ mé légyá wɔ̀ɔn ńcʉa mmó gie mé ne ńgyá n gÿo, tà mbɔɔ gie mèŋ n ne ńgɔɔn.
7Pá’ n da gyá menò mmɔɔn mmɔɔn la, e Ssé gyá ngie ńgwaa ńgwɔ́ n dɔg ńŋá’te, ńzẅíŋ mântúm Sátà ńnéŋe ńcúa wɔ̀ɔn, é gwɔ́ ngɔ́’ gie e la kúu ná mèŋ pá’ nzóŋ gie e lé’e ná mèŋ ńne ńnéŋe ńgége wɔ̀ɔn la, pú’u, légwɔ́ gie n te ka’te wɔ́, 8ée ngʉ̀a ntá pá’ mèŋ sẅiŋté Cʉ̀apʉ̀a ngie à fó ná mèŋ ńkẅile yɛ̌ ngɔ́’, 9é sẅíŋte yé pú’u, á tsɔ́’ ngie, mèŋ n ne ńdíe gú, ńkẅéte gú, ajú ku’ pú’u, á nue ɔ̀ gwɔ̌ tà ne ḿbÿɛ́ɛ pÿɛ̌ tá ńdɔg ńná shÿó pá’ mɔ́ɔn metʉ̀ ge cwoŋo fa’. Áa yɛ̌ tá mèŋ n kwoŋo lévɔg ńdɔg pá’ ḿbÿɛ́ pÿɛ̌ ńka’te, pú’u, ńzsé ngie metʉ̀ Kristo ge tó é gwɔ́ ná mèŋ. 10Áa mmó gie á gÿo n gwɔ́ tà ne ńgyá ngɔ́’, mélà’mie mèŋ n gee nyìŋ Kristo, anò poŋo wɔ̀ɔn, ńgwɔ́ tà ne ńzága mmó, kà mé ne ńkʉ́e wɔ̀ɔn kʉ́e wɔ́, kà mèŋ ne sáŋa pɔ́ tsɔ́ menò kékáŋ wɔ́, anò poŋo wɔ̀ɔn poŋ, á nue n gwɔ́ tá ne ḿbÿɛ́ɛ pÿɛ̌ tá ńdeen ńké ńjú’ ńgẅiin tʉ̀.
Pɔl ne sáŋa nò kékáŋ ńtí pʉ̀a Kristo pie ée Korento
11Pi gyá pá’ ń cʉ’ʉ shwóŋó pɔ́ pá’ pʉ̀a la, á ke fóo pɔ́ né pi, á nue pi zɔ ka gẅiin légÿo mé zsé yɔɔn ntí lefa’. Tà mbɔɔ pá’ mèŋ n gee tsetsɛ̀ɛ pi n te ná tsɔ́ mmó ku’. Epʉ̀a pie ée tsetsɛ̀ɛ pi mé tóŋo lê kwà’ ngàŋ ntúm lɛ, pɔ́ kaa gÿo tsɔ́ mmó tà ńdɔg ńcʉa wɔ̀ɔn mɔ́ 12Á kaa fʉ̀’ gie n kaa tsetsɛ̀ɛ pi, pi kwa’ ńgyá meliŋé mie é la’te ngie mèŋ n gee kwà’ ngàŋ ntúm Yěsô Kristo. Á gwɔ́ pá’ yɛ̌ ngɔ́’ wɔ́ kɔ̌ɔn ńkúu wɔ̀ɔn mèŋ shÿɔgɔ shÿɔg, á gwɔ́ pá’ pi kɔ̌ɔn ńgyá meliŋé menò mmɔɔn mmɔɔn, ńgíŋe ńgyá ndàa gyá menò. 13Àpì yɔ́ɔn mie metsɔ́ mecú’tè pʉ̀a Kristo la jÿó ńcʉa gẅi áa kɔ́? Kà á fó ńgwɔ́ pɔ́ pá’ n da tè nkáb gí kẅé. Pi gyá wɛ̌ légwɔ́ tě ńdɔgɔ ńgiŋe wɔ́. Pi ké ńdege ńná né mèŋ la.
14À yɔɔn gie mèŋ n ne ńkwaŋa létóo lá’ pi ná mbɔ́ɔntè yétá lɔɔn. Tá mèŋ n ge tó, pi ké le tsɔ̌ pyé twó mèŋ táŋ, á nue mèŋ n tě ńtóo fa’ shúm sí wɔ́, mèŋ n tóo pɔ́ fǎ’ pi. Á zɔɔn ńgwɔ́ pá’a, gígyé penkʉ́ zɔ tè gẅiin lélab nkáb ńná né metá pɔ́b wɔ́, metá zɔ̌ gẅiin lélab nkáb ńná né penkʉ́ pɔ́b. 15Á gʉa ná mèŋ, mbà à lɔɔn ńgwɔ́ á poŋo wɔ̀ɔn poŋ lénáa kɔ̀ɔkɔ́ɔ gie mèŋ n gẅiin né pi. Ngwɔ́ n gíŋe ńná mbɔɔ twó yɔ́ɔn ńtí gẅí. N dɔɔn ne ńkẅi’i ńkwoŋo gẅi pɔ́ nzẅìŋó, egì kwoŋo nzèm mèŋ ne ńtsẅɛ́te tsẅɛté lá? 16Tá’, ndyɛ̌’ á fó ná pá’ n da tè zẅíŋ pi táŋa pyé twó mèŋ wɔ́, etsɔ́ pʉ̀a tsetsɛ̀ɛ pi ne ńgɔɔn ngie legyè sɔ́ɔn ée wó tɛ’, mèŋ n ne ńdɔgɔ legyè tá ńkẅé nkáb mbwo pi. 17Áa yɛ̌ tá mèŋ n ne ńzɛ́te gẅi ngie n da túm pʉ̀a mbwo pi pé’è pɔ́ ke ńtó ńkẅé tsɔ́ mmó gí ka? 18N da sẅíŋte Titus ngie à gʉa tà ńgyá gẅí, ńtúmo wɔ́b wetsɔ́ fɛ́ wege gẅie pi ne ńzsé yé la. Tsye Titus la tó fʉte gẅi ńkẅé tsɔ́ mmó mbwo pi ka? À la tè giŋ pɔ́ nà mekwò mɔ́ɔn maa? Peg yé ké tè gẅiin pɔ́ tà’ nkwaŋá waa?
19Ndyɛ̌’ tsɔ́, mbà pi ně ńdá’ ńzye lékwaŋ ngie peg ne fa’a lézoŋo twó yég mbwo pi. Ngǎŋ á té pú’u wɔ́. Peg gwɔ́ gɔɔn nò, á gwɔ́ pɔ́ nà ntí gie Kristo ne ńkwoŋo, peg piŋ ńtyé pɔ́ mvfò Ssé tá ńgɔɔn. Mefɛ́ pɔ́ɔn pe ntʉ̀ nzẅìŋ, peg gwɔ́ gɔɔn pú’u, á gwɔ́ pɔ́ lélɔg ńgÿo, pi kẅi’i ńzáb ntʉ́m gẅi nà Ssé. 20N zɔɔn ne ḿbɔ́gɔ légwɔ́ gie à lɔɔn ńgwɔ́ n gÿo tóo lá’ pi, ńgyá pi le gwɔ́ nà ntí gie mèŋ n ne ńkwoŋo wɔ́. Mèŋ yɔ́ɔn n ké le gwɔ́ nà ntí gie pi ne ńkwoŋo wɔ́. Mèŋ n ne ḿbɔ́gɔ ngie ńgwɔ́ n gwɔ́ tó mencwò mencwò gwɔ́ tsetsɛ̀ɛ pi, kègɔ́’ gwɔ́ wó, acÿɔ́g gwɔ́ wó, lézoŋ jʉ’ gwɔ́ wó, lekimé nyìŋ tepòŋ gwɔ́ wó, shwóŋte gwɔ́ wó, aŋá’te nɛ́ gwɔ́ wó, atág gwɔ́ wó. 21Mèŋ n giŋé ńne ḿbɔ́gɔ légÿo ńgíŋe ńtó tà ńkúu lá’ pi, e Ssé yɔ̀ɔn gíŋe sẅí’i nzẅìŋ wɔ̀ɔn mvfò pi tà ndyɛ̌’ tsɔ́ n gẅiin lélʉa ńtí pʉ̀a tà ńgyɔɔn pie ée tsetsɛ̀ɛ pi, mbà pɔ́ lɔ́ɔn ńgÿo menò tepòŋ, pɔ́ laa mà wɔ́b kúbe, pɔ́ laa kẅɛɛ nà menò ncÿǒ mɔ́b wɔ́, ńké tè nò mpfwɔ́’ yɔ́b gwá’, ńké ne ńkẅi’i ńgÿo pɔ́ menò tepòŋ ntí ntí té gwoonte mbùm yɔb.
Currently Selected:
2 Korento 12: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.