Loomë Nsunjikulu
Nsunjikulu
M'pooku mivu yivyookë fë mbusë lufwa i luvulumuku lu Kliistu, yim'balë ti Sizwiifë banë bëta maanë, buke Akilaasë i Pilisiilë (Mëv 18.2) bëtoonë kutendulë Mpolu Mboti ku Loomë, livulë li n'tinu. Bunë Poolë wulëlongilë ku Sili, Aziiya licyeeci (bubwayi aci Tulëki li Azi) i ku Ngeleesë, Cingangë cin'tetë cyabë kwaawu. Nzaambi wusë filë Poolë «tee yi fanë fë sitikilë buloongo». Mu bwaawu naandi wusë tiisi mu kweendë tokë ku Loomë kuve kasi yivaandi ku Espaanë. Tusye zaabë ko ningë naandi wudukisi makë mooso kwabë yi tesu mu kuvaangë, kasi mu kubelikëlë mweendwaandi, wusë sonikë n'kaandë «ke beeno luke ku Loomë». Ke bitamaanë bë livulë ali, mwa nkoongë bëlëzutunaangë ke Akilaasë i Pilisiilë (16.3-5).
Poolë mu n'kaandë awu ke mu kuzimunë ke bitamaanë bëke lweeko be loolo buni baawu bëlë mu kubakulë cisalu cyaandi fëke bo bëkeeli ko Sizwiifë. N'kaandaandi wuzimunë buboti saangwaandi, kuzicikë mu bikumë abi : Mpolu Mboti yike luleendo yin'salilë Nzaambi mu kuvuuci bakë booso bën'ta maanë, ntetë Sizwiifë kasi yi banë bëkeeli ko Sizwiifë (1.16).
Lyaambu lin'talë Sizwiifë i banë bëkeeli ko Sizwiifë (buni bufwenikini kusiilë mu n'kaakë Sizwiifë aba bata maanë i bëkeeli ko Sizwiifë) lyaawu litudë beenë mu banë bata maanë i beeso tulë mu kuyimonë mu mikaandë yimesë yo m'bunzi wusonikë, tumonë mu n'kaandë Ngalaatë. Afa Poolë ke mu kusisiminë ti Mpolu Mboti yo ke nataangë naandi wufilisi ke bakë booso, wumweekë ve wun'tandëkënë (1.16). Naandi ke mu kuzimunë yivaandi buni Nzaambi kuvuucilë muutu wuzimbilë, bosuku wubeeli, kwe ba civuufu ke naandi (1.18 – 8.39).
Naandi wulëtubilë maambu mën'talë mwa nkoongë Islayeelë yilëmaangë Kliistu. Naandi wusë tubë ti lyaawu kupodi ve kuvangisi cikaku mu manë Nzaambi kwatiisi kuvaangë, muulaandi waawu cikumë ci siitu (9-11). Buyifanwabu, buboti bo Nzaambi wulë mu kuleesi fëke banë bëkeeli ko Sizwiifë, bum'monikë dedë mweekë mbilë mu kuzingilë mu naandi, mu luziingu lucyelikë lumoonë (12.1 – 15.13).
Mu kuzitikë, Poolë wulë mu kutubilë mu mweendwaandi ku Loomë i wusë manisi n'kaandaandi mu sibweekë (15.1 – 16.27).
Banë bën'toombë maambu mëfwenikini mu manë mën'talë luvukulu lunë Nzaambi wun'vanaangë ke baatu mu Yeesu Kliistu, mu n'tangulu n'kaandë be wuuwu, baawu bëm'ba mu liyaanji linenë mu mpangulu Nzaambi (11.33-36). Baawu yivaawu bën'ciindë kusambilë Nzaambi mu bucyelikë bo beeso tulë mu kuvaangë.
Currently Selected:
Loomë Nsunjikulu: NTVIL
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. and © Alliance Biblique du Congo. All rights reserved.