Mëvaangë 28

Poolë mu citumbu ci Malëtë

1Bo twavuuci, bwaawu twakuzabile ti citumbu beenë bë citeelë Malëtë. 2Basë citumbu bisë tukwaakë yimunë luzolo lunenë: bo n'vulë yatooni kunokë i bunë bwabë cyoosi, baawu bisë tatikë mbaasu yinenë, faawu bëtutambulilë beeso booso. 3Poolë wusë noongë sin'kuni bwiinji wusituulë ku mbaasu. Kasi mu libabëlë li mbaasu, mpili yisë basikë i kun'namë mu kooko. 4Bunë basë citumbu bëmonë mpili yinamë mu kooko ku Poolë, baawu kutubë baveekë yi baveekë: « Muutu awu civoondë baatu. Licyelikë naandi wavuukë mu m'bu, kasi lufundusu lu Nzaambi luke yaandi i Nzaambi wusë kun'vaanë ko n'swa mu kuvuukë. » 5Kasi Poolë, wusë nyakunë mpili ku mbaasu, wusye monë yosuku mpasi ko. 6Baatu bëmesë bëlëciingaangë mu kumonë nkanë wun'tifë, kaambofo wum'bwa i kufwa. Kasi bunë baciingë beenë, baawu bisë monë lyosuku lyaambu libi lisye n'kwisilë ko. Mu lyaawu, baawu bisë balulë simbalulu syaawu i bëtubë ti naandi wabë nzaambi.

7Fë mbiinji beenë, fabë cibwa ci likundaalë fumu citumbu bën'telaangë Pubiluusë. Na wuuwu wutuyakë yi luzolo looso i beeso tuvyoosi bilumbu bi tatu kwaawu. 8Taatë Pubiluusë wabë wunuukë fë ciikë. Libaawu lyabë yaandi i wulëtweekë civumu. Poolë wusë kweendë mu ke m'moni, na wusambilë, wun'tendikë myooko i kum'belusi. 9Kumanoofo, basë citumbu bisë kwiisë fabë Poolë i naandi wusë bëbelusi. 10Mu lyaawu, baawu bisë bweelë kube tucinzikë, ntaangu yo tulë kwendilë, baawu bëtuvaanë biimë binë byabë yiitu n'ciinzë mu mweendo.

Poolë watuukë Ku Loomë

11Fë mbusë ngoondi tatu, beeso tusë kandëmë mu likuumbi li livulë li Alekëzandëlë, bën'teelë « Dyosukuulë » i bisë vyoosi cisifu ku liloondo li citumbu. 12Beeso tutuukë ku Silakuusë, kunë beeso tukalë bilumbu bi tatu. 13Beeso tusë botukë kuunë i beeso tuke laandaangë lisimu li m'bu, mu ke kutuukë ku Lezyo. Cilumbu cilandëkënë, mpeemo yi waandë yipukë i beeso tusë kutuukë fë bilumbu byooli ku Puzoolë. 14Kwa kunë kunaani, beeso ke zakënë baanë yiitu bë nguli bëlë tuloombaangë mu kukalë yaawu saambwali li bilumbu. Bwa boobo, bwaawu tuvyosilë mweendwiitu i tutukilë ku Loomë. 15Baanë bë nguli bë Loomë bëtambulë simpolu mu cibilë ciitu i bëyitudyengënë tee ku lizaandu ku Apiyuusë i ku « Sinzo Tatu si Beeni ». Bunë Poolë wubëmonë, naandi wutoondë Nzaambi i wusë ciindë bitu. 16Bunë twatuuci ku Loomë, bëvaanë Poolë n'swa mu kunuukë nkoonzu yin'ka, yimunë lisodaadi lilën'luungaangë.

Poolë wulë mu kuloongë ku Loomë

17Fë mbusë bilumbu bi tatu, Poolë wuvekilë ku bwaalë bwaandi sifumu si Sizwiifë si Loomë. Buni badukini, naandi wusë tubë : « A baanë bë nguli, yisye vaangë lyosuku lyaambu libi ko ke mboongwiitu, kaambofo mu nzingulu sinkaakë siitu. Miinu bëkum'bwiilë ku Yelusaleemë i bëkun'vakulë ke basë Loomë. 18Buni bamani kun'nyufulë, baawu bisë toombë kum'biikë, cibilë bësye monë ko libooti linë bëkun'tabulilë lufwa. 19Kasi Sizwiifë bisë maangë. Mu lyaawu, miinu yibe fwaanë kuloombë ke n'tinu Sezaalë mu kun'fundisi. Kasi miinu yikeeli ko yi simbalulu si kufuundë basë si. 20Mu lyaawu olyo, miinu yin'loombë mu kukumonë i mu kukukaambë. Licyelikë, miinu yilë mu kunatë simpaangë mu cibilë ci muutu wunë baatu bë Islayeelë bën'tulaangë civuufu. » 21Baawu bisë n'vutulilë : « Beeso tusye tambulë ko wosuku n'kaandë wu livulë li Zudee mu cibilë cyaaku njeeyi i wosuku mwaniitu nguli ve wufuminë kuunë mu kutukaambë maambu mëbi mu cibilë cyaaku. 22Kasi beeso tun'vwa n'ciinzë kuwu mu munwaaku, maambu mo njeeyi wulë mu kubalë, cibilë tuzabisi ti fosuku faamë baatu bëke mu kumaangë cinguuku cyo njeeyi wukeeli. »

23Baawu bisë sitikë mpanginyi yimunë Poolë i cilumbu bëzitikë, baawu biyisilë mu nkoongë yinenë, kun'zakënë fo kulëlembikilaangë. Kutoonë yimenë tee yi mësikë, Poolë wubëloongë i kubëkwalilë maambu makë mooso mën'talë lwaangu lu Nzaambi. Mu kubëkaambë maambu mëkeeli mu n'kaakë Moyiizë i mu Libuuku li mibici. Naandi wulëtoombaangë kubëvangisi kucikunë Yeesu. 24Bëmesë bisë cikunë maambu manë Poolë kulëtubaangë, kasi bën'ka bisë maangë kuwu. 25Tee baawu bisë ke yendaangë kwaawu i kuwusënë ve baveekë yi baveekë. Poolë wubëkaambë : « Ciluunzi ci Saantu wuluungë bunë naandi wulëkambilaangë sinkaakë siinu mu munu m'bici Ezayi! 26Naandi wusë tubë :

“Yendë wakaambë mboongu oyo,

beeno lun'zikulu kuwu, kasi lusë m'bakulu ko.

Beeno lum'monë buboti, kasi lusë m'monë ko.

27Mitimë yi mboongu ayi yeekë ngolo.

Baawu baduci matu

i meeso,

mu kumaangë baawu kuwu i bëleembu kumonë.

Mu lyaawu, baawu bisë be vutukënë ko ke miinu,

bwiinji yibëbelusi bën'tubë Nzaambi#28.27 Ezayi 6.9-10.”

28Poolë wusë bëtubë : Beeno lufwenikini kuzaabë ti, Nzaambi wufilë Mpolu Mboti yi luvukulu ke bo bëkeeli ko Sizwiifë#28.28 Twi 67.3; Lik 3.6.. Baawu bëkun'yuwulu. »

29Fë mbusë mëbuungu më Poolë, Sizwiifë biyeendë i bisë ke yambilaangë yi mëngolo mooso.

30Poolë wusë bëzingilë kwaawu, mivu wali mu n'zo kulëfutilaangë. Naandi wulëkwakaangë bakë booso bëlëkwisaangë mu kum'monë. 31Naandi wulëloongaangë lwaangu lu Nzaambi i wulëbëleesyaangë maambu manë mën'talë Fumu Yeesu Kliistu yi civuufu cyooso ve ci lun'kakini.

Currently Selected:

Mëvaangë 28: NTVIL

Highlight

Copy

Compare