Loomë 6

Bëfwa mu lisumu kasi bëlë moonyi mu Kliistu

1Buni tufwenikini kuzitikë? Beeso tufwenikini kube zingilë mu lisumu bwiinji muulë wu Nzaambi wuba lunduu#6.1 3.8.? 2Moniko! Beeso twafwa mu lisumu, buni tufwenikinyooso kuzingilë mu lisumu? 3Nuzabisi ko ti beeso booso tubatizyaalu mu Kliistu Yeesu, mati mu lufwa lwaandi tubatizyaalu? 4Mu lubatizyaalu, mwaawu tutuulu mu buumbë yimunë naandi mu kubakë kubundënë mu lufwa lwaandi, bwiinji, dedë mweekë Kliistu wuvulumukë fë bëfwa mu lutumu lu bumpumu bu Taatë, beeso yiviitu tuzingilë mu luziingu lumoonë.

5Licyelikë, ningë beeso tubundënë yaandi mu lufwa, tum'ba yivaandi mu lubundunu mu luvulumuku lufwanekënë yaandi. 6Zaabaanu buboti lyaliili : cimuutu ci ntamë cyabë yiitu cifwa yimunë Kliistu fë kuluusu, bwiinji nyitwiitu yi lisumu yibungënë i tuleembu kube ba bëndongo bu lisumu. 7Cibilë wunë wafwa, wasyalulu mu lisumu. 8Ningë beeso twafwa yimunë Kliistu, beeso twasiinji ti tun'zingilë yivaandi yimunë naandi. 9Beeso tuzabisi ti Kliistu, kutoonë fanë wuvulumukë mu ngoongë bëfwa, wusë be fwa ko: lufwa lusyeelë ko yi lutumu mu naandi. 10Mu kufwa, naandi wufwiilë vyaasi mweekë ci mëkulu mu cibilë ci lisumu. Kasi fë bubwaafa, wuli moonyi, wun'zingilë mu Nzaambi. 11Bo bumweekë, bwiinji luzaabaanu yiviinu ti lwabë lufwa mu lisumu i dedë mweekë moonyi mu Nzaambi mu lubundunu yimunë Kliistu Yeesu.

12Lisumu lisye fwanëkënooso ko kutumi nyitwiinu yin'fwa, mu kuluvangisi kucinzikë binvweenvu bi nyitu. 13Nutulyaanu ko binamë biinu mu lisumu dedë mweekë cisalulu ci kuvangilë libi. Tiilyoko, yiyin'dulyaanu mu Nzaambi, dedë mweekë baatu bavulumukë i luluvandikaanu benuveekë mu cisalu ci Nzaambi dedë mweekë binamë bisulëmë. 14Boobo, lisumu lisë be lutumyooso ko, cibilë lusyeeli ko fë civikë ci n'kaakë, kasi mu muulë Nzaambi.

Mu cisalu ci busulumunu

15Kasi bunye? Beeso tufwenikini ke sumukaangë kwiitu cibilë tukeeli ko fë civikë ci n'kaakë kasi mu muulë wu Nzaambye? Boobo ko! 16Beeno luzabisi buboti: ningë lulë mu kusalilë muutu mu kun'cinzikë, beeno lum'ba bëndongo yi fumu yinë lulë mu kucinzikë. Keti lilë ba lisumu lin'natë lufwa#6.16 Za 8.34., keti luciinzu ke Nzaambi lun'natë ku luziingu lusulëmë. 17Kasi, Nzaambi we dumi: beeno lwabë bëndongo mu lisumu, lwacinzikë mu n'timiinu wooso mu kulandilë mo lwacikunë mu liloonji. 18Beeno lwasyalulwaanu mu lisumu i lwacitukë bëndongo bësulëmë. 19Miinu yin'tubilë obo mu cimuutu i mu cibilë ti beeno luvolë. Ntamë lwabë luyivandikë dedë mweekë bëndongo mu lisumu li busafu i mu libi lin'vangisi lubaayu lu Nzaambi. Bo bumweekë, buyifanwabu, lwe baanu dedë mweekë bëndongo mu kusalilë wunë wukeeli wusulëmë bwiinji luzingilë mu busaantu.

20Bunë lwabë fë civikë ci lisumu, beeno lwabë lusyalulu mu manë mabë mësulëmë. 21Beeno mbici lubakisi bunë lwavaangë maambu mën'fwiisi sonyi buyifanwabu? Mëvaangë omo mën'nataangë muutu mu lufwa! 22Kasi abu lwakobukë mu lisumu i lwacitukë bëndongo bë Nzaambi. Beeno lun'kalilë mu luziingu lu busaantu i lun'tambulë fë siitu luziingu lu sakë yi sakë. 23Cibilë lifutë lin'vaanë lisumu mati lufwa. Kasi likabu lin'vaanë Nzaambi libuunë, mati luziingu lu sakë yi sakë mu lubundunu lwiitu yimunë Kliistu Yeesu Fumwiitu.

Currently Selected:

Loomë 6: NTVIL

Highlight

Copy

Compare