Atu 16
16
Paulu urasu Timuteu irumu
1Asui usu yuiri Derbe kiti Listra kiti yuiri. Apete uwasemu yepe aintaumbuewaa serawaa Timuteu, imembira kua yepe kunya uruyariwaa judeu ae maa ipaya gregu.
2Aintaumbeu sese purangawaa kuaita uruyariwaita Listra kiti Ikuniu kiti yuiri.
3Asui Paulu uputari urasu irumu kua Timuteu, asui usirkunsidari ae aintaresewara kuaita judewita uikuwaita ape, nyãse panye aintaukuawa gregu ipaya.
4Asui aintausuwaa upe aintaumaa muiri tetama aintaumbeu ainta supe kua nyenga aintaumbeuwaa kuaita apustuluita kuaita serakuenawaita yuiri Jeruzalẽ kiti.
5Asui aintauxari kirimbawa aintauruyari panye kuaita ingreja puraita, asui muiri ara amuita yuiri aintauxari aintapia Kristu rese.
Paulu ikerupi Truadi kiti
6Asui aintausu panye Frijia kiti panye Galasia kiti yuiri nyãse kua Espiritu Santu usaisure aintaumbue kua nyenga Azia kiti.
7Asui Mizia ruaxara kiti aintauiku aintauputari aintausu Bitinia kiti maa Jesus Espiritu usaisure aintausu akiti.
8Asui aintausasawa Mizia sui aintauwiye Truadi kiti.
9Asui nyã pituna Paulu umaa yepe apigawa Masedunia suiwara ikerupiwaa upe, upuamu suaki upurandu ae umbeu ixupe:
—Reyuiriana Masedunia kiti reajudari arama yande.
10Asui umaa rire kua apigawa ikerupiwaa upe aramete kutara yaputari yasu yamaa Masedunia kiti nyãse yamanduari Deus usenuiwana yande yambue arama ainta sese kua nyenga purangawaa.
11Asui yasu Truadi sui naviu upe, yasu satambika Samutrasia kiti, asui wirande kiti yasika Neapuli kiti.
12Asui yasu Filipu kiti yepe Rumawaraita retama ae turusu ae panye tetama sui Masedunia upe. Asui yaiku aintairumu yepeyepe ara aintaretama upe.
13Asui sauru upe yasu igarapa kiti yambeu arama Deus akiti, asui yasika yapurungita aintairumu kuaita kunyaita uyumuatiriwaita yanerunde ape.
14Apete yepe kunya serawaa Lidia Tiatira suiwara ae, uvenderiwaa fazenda pirangawaa umanduariana Deus, asui Deus uxari suuri ipia usendu arama kua Paulu umbeuwaa ainta supe.
15Asui yabatizari rire ae panye suka puraita yuiri upurandu yande umbeu:
—Pemanduari rame haruyari puranga Yaneruixawa nyenga ape haputari pewike seruka kiti peiku arama akiti, asui kirimbawa uputari yande yaiku arama suka upe.
Umburi demuniu yepe kunya sui
16Asui yasuwaa upe yambeu Deus yayumuatiriwerawaa upe yawasemu yepe kunyamuku urikuwaa yepe demuniu ipia upe uganyariwaa turusu suixawaita supe dinyeru utitika resewara demuniu ukuawasawa irumu.
17Asui uri Paulu rakakuera yanerakakuera yuiri usasemu:
—Kuaita apigawaita aintaupuraki ixupe kua Deus kirimbawa piriwaa panye sui aintaumbeu penye arama sese kua pee peyumukaturu aramawaa.
18Asui yawe umunya uiku siya ara asui Paulu ikuere usendu ixupe asui uyereu ibanda kiti umbeu ixupe kua demuniu:
—Kuiri hamundu inde sera rese kua Jesus Kristu, resemu isui. Asui nyã urate usemu isui.
Aintaumprezu Paulu Sila yuiri
19Asui suixawaita aintaumaa upituana uganyari ainta supe, asui aintaupisika Paulu Sila yuiri aintausiki ainta ukara kiti aintaumaa ainta kuaita serakuenawaita.
20Asui aintaurasu ainta aintapiri kuaita serakuenawaita aintaumbeu ainta supe:
—Kuaita apigawaita judewita ainta, aintaumuapatuka panye yaneretama.
21Aintaumbue yepe nyenga tiwa yapuderi yasuanti tiyuiri yapuderi yaruyari ae nyãse Rumawaraita yande.
22Asui kuaita miraita siyawaita aintauri aintawajudari ainta aintauputari aintaunupa ainta, asui kuaita serakuenawaita aintaumusuruka aintarupa, asui aintauxari aintaunupa ainta mirai irumu.
23Asui aintaunupa rire ainta turusu aintaumburi ainta kadeya kiti, asui aintaumundu usaru ainta puranga kua usaruwaa prezu.
24Asui urasu ainta kadeya piterupi asui upukuari aintaipi mirá rese nyãse kirimbawa aintaumundu usaru kuaita prezuwaita.
25Asui pituna piterupi aintaumbeu Deus aintaunyengari yuiri ixupe kua Paulu Sila yuiri, asui kuaita amuita prezuwaita aintausendu ainta supe arama.
26Asui kutara uriri iwi, asui uriri panye kua kadeya asui aintauyupirari panye ukena, asui aintauyuyurawa panye kuaita aintaupukuariwaita.
Usaruwaa prezu uxari ipia Kristu rese
27Asui umbaka kua usaruwaa prezu, asui umaa uyupirariana panye kadeya rukena, asui upisika iespada uputari uyuyuká simutara nyãse umanduari aintauyawawa panye kuaita prezuwaita.
28Maa Paulu usasemu tiapu unyee:
—Teremunya puxuwera inde arama nyãse ike pawate panye yande.
29Asui usenui aintaururi ixupe yepe turi, asui uyana kadeya kiti uriri usikie asui uyawika Paulu runde sui Sila yuiri.
30Asui urasu rire ainta kadeya sui umbeu ainta supe:
—Apigawaita, maataa kuri hamunya hayumukaturu arama ixe?
31Asui aintausuaxara ae:
—Rexari nepia Yaneruixawa Jesus rese asui umukaturu inde panye neruka puraita yuiri.
32Asui aintaumbue ae Deus nyenga rese panye kuaita suka puraita yuiri.
33Asui nyã ura ramete pituna rame uajudari ainta, umpusanga ainta supe aintaperewa. Asui uxari aintaubatizari ae, panye suka puraita yuiri.
34Asui urasu ainta suka kiti asui umee aintaumbau arama, asui uyumusuuri aintairumu panye suka puraita nyãse aintauxariana aintapia Deus rese.
Aintauyurawa Paulu Sila yuiri
35Asui kuemana ainta kuaita serakuenawaita aintaumundu kuaita suraraita aintaumbeu arama:
—Reyuraware kuaita apigawaita.
36Asui kua usaruwaa prezu umbeu Paulu supe kua aintaumbeuwaa:
—Kuaita serakuenawaita aintaumundu kuekatu ixe arama haxari arama pesu, ape peyuiriana pesuana puranga.
37Maa Paulu umbeu ainta supe:
—Aintaunupa yande aintaumaawaa upe panye tire aintausendu yande arama asui aintaumprezu yande Rumawaraita, ape kuiri maitaa aintauputari uyurawa yande uyumimisawa upe? Tipuranga yawe, maa pexari aintauri aintauyurawa yande aintapawate.
38Asui kuaita suraraita aintaumbeu ae ainta supe kuaita serakuenawaita, asui aintausikie aintausendu irumu Rumawaraita ainta.
39Asui aintauri aintapiri asui aintaupurandu aintauperduari arama aintairumu ainta, asui aintauyurawa ainta, asui aintaupurandu aintauyuiri arama tetama sui.
40Asui aintausu kadeya sui, aintausu aintaumaa ipiri kua Lidia, asui aintaumaa rire siya kuaita uruyariwaita aintaumusuuri ainta. Asui aintausu aintasui.
Currently Selected:
Atu 16: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
