Atu 15
15
Aintauyupurungita sirkunsizão rese
1Maa yepeyepe apigawaita uriwaita Judeya sui aintaumbue kuaita aintaimuita tiaintaupuderi aintauyumukaturu tirame aintauyusirkunsidari ainta kuaye Muize Kustumi umbuewa yawe.
2Asui Paulu Barnabe yuiri aintauyupurungita nyenga irumu aintairumu, asui aintaumundu Paulu Barnabe yuiri aintairumute yepeyepe aintasuiwara kuaita amuita aintausu Jeruzalẽ kiti aintaupurandu arama aintausendu kuaita apustuluita serakuenawaita yuiri sese kua nyenga.
3Ape Kuaita ingreja puraita aintaumundu aintausu, asui aintausasawa Fenisia piterupi Samaria piterupi yuiri aintaumbeu ainta supe aintautrukariana aintapia kuaita tiwaita judewita, ape suuri aintausendu ae panye kuaita aintaimuita.
4Asui aintausika Jeruzalẽ kiti asui puranga aintausuanti ainta kuaita ingreja puraita kuaita apustuluita serakuenawaita yuiri, asui aintaumbeu aintausendu maye Deus umunya ainta supe.
5Maa yepeyepe uruyariwaita aintasuiwara kuaita farizewita aintaupuamu aintaumbeu:
—Yarikute yaxari aintausirkunsidari ainta, yarikute yambeu ainta supe aintaumunya arama kuaye Muize nyenga umbeuwaa yawe.
Apustuluita aintauyumuatiri
6Asui aintauyumuatiri kuaita apustuluita kuaita serakuenawaita yuiri aintaumpurungita arama sese kua nyenga.
7Asui aintauyumuatiri rire turusu Pedru upuamu umbeu ainta supe:
—Semuita pekuawate kuxima Deus uparawaka ixe pepitera sui, aintausendu arama seyuru sui kua nyenga purangawa kuaita tiwaita judeu aintauxari arama aintapia sese.
8Asui kua Deus ukuawawaa panye yanepia upe uxari aintaukuawa sese uxari resewara ainta supe kua Espiritu Santu kuaye uxariwaa yawe yande arama ae.
9Ape yepewasu umaa yande aintairumu asui umuyasuka aintaumanduariwaa aintauxari resewara aintapia sese.
10Ape kuiri marantaa pesaã putari Deus pexari resewara aintaumunya iwasuwaa kuaita umbuewaita kua tiwa aintaupuderi aintaumunya kuaita yaneramunyaita nẽ yande yuiri?
11Maa yaruyari umukaturu yande igrasa irumu kua yaneruixawa Jesus kuaye umukaturuwaa yawe ainta.
Tiagu umanduarisawa
12Asui aintaukiriri kuaita siyawaita asui aintausendu Barnabe supe Paulu supe yuiri, aintaumbeu ainta supe muiritaa aintaumunya milagri tiwaitare yamaa yuiri Deus uxariwaa aintaumunya aintapiterupi kuaita tiwaita judeu.
13Asui aintaupurungita rire Tiagu umbeu ainta supe:
—Semuita pesendu senyenga.
14Simão umbeuwana penye arama maye Deus uyupiru umaa aintapiri kuaita tiwaita judeu usikari arama aintapitera sui miraita arama sera rese.
15Nyãse yawe yuiri aintaumbeu kuaita utitikawaita, yawe aintaumpinima:
16"Yawewaa rakakuera hayuiri kuri mukuĩsawa hasupiri Davi uikuwaa rendawa uwariwaa, simirera irumute kuri hasupiri yuiri ae asui hampuamu kuri ae.
17Aintausikari arama Yaneruixawa muiri kuaita amuita apigawaita panye kuaita tiwaita judeu yuiri kuaita aintaumuserukawaita serera rese.
18Yawe umbeu Yaneruixawa kua uxariwaa yakuawa yawewaa kuximare."
19Ape Tiagu unyee:
—Hamanduari purangate tiarama yamuapatuka ainta kuaita utrukariwaita aintapia Deus rese aintapitera sui kuaita tiwaita judeu.
20Maa yampinima kuri ainta supe tiarama aintaumbau kua aintauxariwaa idulu supe, tiarama yuiri aintaumunya puxuwera aintapira irumu, tiarama yuiri aintaumbau suu rukuera tiwa aintauyuka isui tuwi, tiarama yuiri aintaumbau tuwi.
21Nyãse kuximare Muize uxari aintaumbue inyenga muiri tetama upe, ape aintauleri ae muiri sauru aintasinaguga upe.
Aintaumundu kuekatu Antiukia kiti
22Asui kuaita apustuluita kuaita serakuenawaita yuiri panye ingreja puraita aintaumanduari puranga aintaumundu yepeyepe aintauparawakawaita aintasuiwara aintausu arama Antiukia kiti Paulu irumu Barnabe irumu yuiri, asui aintaumundu Juda serawaa Barsaba asui Sila yuiri kuaita apigawaita aintaumanduariwaa purangawaita aintarese kuaita aintaimuita.
23Aintaurasu arama kua aintaumpinimawaa:
—Kuiri yamundu penye arama kuekatu, yande peimuita apustuluita yuiri serakuenawaita yuiri penye yanemuita aintasuiwaraita kuaita tiwaita judeu Antiukia upe Siria upe yuiri Silisia upe yuiri.
24Nyãse yasendu yepeyepe yanesuiwara aintauputari aintaumuapatuka penye aintanyenga irumu, aintauxari mukuĩ pemanduariwaa, tiyamunduwaita ainta.
25Asui yayumuatiriwaa upe yamanduari puranga yaparawaka yepeyepe apigawaita yamundu arama pepiri ainta aintairumu kuaita yagustariwaita Barnabe Paulu yuiri.
26Kuaita apigawaita suuri aintaupurara sera resewara kua yaneruixawa Jesus Kristu.
27Ape yamundu yuiri pepiri Juda Sila yuiri aintaumbeu arama penye arama aintayuru irumu kua yampinimawaa papera upe.
28Asui kua Espiritu Santu, yande yuiri yamanduari tipuranga yaxari nyenga iwasupiriwaa pemunya arama ae isui kua yambeuwaa penye arama kuiri.
29Tiarama pembau kua aintauxariwaa idulu supe, tiarama pembau tuwi, tiarama pembau suu tiwa aintauyuka tuwi isui, tiarama pemunya puxuwera pepira irumu, puranga kuri pemunya pemaa rame pesui ainta. Puranga kuri peiku.
Aintauleri kua aintaumpinimawaa
30Asui kuaita aintaumunduwaita aintausu Antiukia kiti, asui aintauyumuatiri rire kuaita miraita aintauxari ainta supe kua papera.
31Asui suuri aintauleri irumu kua papera nyãse umusuuri ainta.
32Asui kua Juda Sila yuiri umbuewaita aintayuiri, aintaumbue siya nyenga irumu asui aintaumukirimbawa ainta.
33Asui aintauiku rire aintairumu uikupuku kuaita aintaimuita aintauxari aintauyuiri puranga aintapiri kuaita umunduwaita ainta.
34Maa Sila umanduari puranga uikure aintairumu.
35Maa Paulu Barnabe yuiri aintauikure Antiukia kiti aintaumbue ainta kua yaneruixawa nyenga siya yuiri aintairumu amuita.
Paulu uxari Barnabe
36Asui yepeyepe ara rire Paulu umbeu Barnabe supe:
—Yasu yamaa aintapiri kuaita yanemuita aintaretama yaweyawe yambuewaa akiti yaneruixawa nyenga yamaa arama maye aintauiku.
37Asui Barnabe uputari urasu yuiri kua Juão sera rakapirawaa Marku.
38Maa Paulu umanduari tipuranga aintaurasu ae aintairumu kua uxariwaa ainta Panfilia kiti kua tiwa usu aintairumu upuraki arama.
39Asui aintauyusuaxara aintanyenga irumu, asui aintauyumutirika, asui Barnabe usu Xipri kiti urasu irumu kua Marku.
40Maa Paulu uparawaka ixupe kua Sila, asui usuana imuita aintaupurandu rire yaneruixawa irumu usaru arama ainta igrasa irumu.
41Asui usu panye Siria kiti panye Silisia kiti umukirimbawa kuaita ingreja puraita.
Currently Selected:
Atu 15: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
