1 Tesalunikawaraita 4
4
Uputari ikiaimawaa aintapia
1Ape semuita, hapurandu penye yaneruixawa Jesus rese, peiku arama puranga, pemusuuri arama Deus yuiri, kuaye peyumbuewaa yawe yaneirumu, kuaye pemunyawaa yawe, kuiri peyumukaturu turusu xinga.
2Nyãse Pekuawate maye yambeu penye arama irumu kua yaneruixawa Jesus.
3Nyãse Deus uputari peyuxari penyepawate ixupe, tiarama pemuwarixi.
4Pekuawa arama peyaweyawe peyuka arama perimiriku puranga, pesikiesawa rupi, pemanduarisawa ikiaimawaa irumu.
5Tepeyuka perimiriku pemanduarisawa puxuwerawa irumu, pemunya arama tenyuntu kuaye aintaumunyawaa yawe kuaita tiwaita judeu, tiwaitare ukuawa Deus rese.
6Tiarama amu umunya puxi imu supe uganani arama ae, nyãse Yaneruixawa kuri upagari panye kuaita umunyawaita kua puxuwerawa, kuaye yambeuwaa yawe penye arama kuxima.
7Nyãse timaa Deus usenui yande yaiku arama ikiawaa rese, maa yaiku arama ikiaimawaa yanepia irumu.
8Ape awa umburi kua yambeuwaa, timaa umburi apigawaita, maa umburi kua Deus uxariwaa penye arama iEspiritu Santu.
Uputari aintauyugustari
9Maa timaa hampinima penye arama pegustari arama kuaita peimuita, nyãse Deus umbue penye peyugustari arama amuita irumu.
10Nyãse supiwa pegustari panye kuaita yanemuita, panye Maseduniawaraita. Maa yambeu penye arama, pegustari arama ainta turusu xinga.
11Pesikari kuri timaarese penye puranga, pemukaturu peyara, pepuraki peipu irumu kuaye yambuewaa yawe penye arama.
12Puranga arama kuri aintaumaa penye kuaita tiwaitare uruyari, tiarama pesaru amuita umee peyara arama.
Maitaa umanuwaita uruyariwaita
13Maa timaa yaputari tiwaita ukuawa penye yanemuita aintarese kuaita umanuwaita pesui, yawaite sasiyara penye aintayawe kuaita amuita tiwaita uriku kua yasaruwaa yamaa.
14Nyãse yakuawa umanu kuera Jesus, asui upuamu kuera yuiri manusawa sui, asui yawete yuiri kuri Deus ururi kuri irumu Kristu resewara kuaita umanuwaita uruyariwaita.
15Nyãse yawete yambeu penye arama yaneruixawa nyenga irumu; yande upakawaita kuri uri kuri yaneruixawa, tikuri aintarunde kiti yande kuaita umanuwaita.
16Nyãse yaneruixawa kuri uwiye iwaka sui inyenga kirimbawawaa irumu, aintausendu irumu yuiri kua arkanju nyenga, asui aintaupeyu irumu Deus trumbeta, ainta kuri uyupiru upuamu, kuaita umanuwaita Kristu rese.
17Asui kuri yande uikuwaitare upakawaita, usupiri kuri yande aintairumu nuvẽ upe, ara upe, yayumuatiri arama yaneruixawa irumu, asui yawewarawate kuri yaiku yaneruixawa irumu.
18Ape peyumusuuri perumuaraita irumu, kua nyenga irumu.
Currently Selected:
1 Tesalunikawaraita 4: BBp
Highlight
Share
Compare
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
