Jeremia 17
17
'Aja̧, pumȩ pio judiro̧diro̧da, coa tjamo̧ri̧ a̧doji̧ri̧ pio judiro̧diro̧da, pio coa chjiari tuti japaji̧ri̧ pio judiro̧ tjamo̧diro̧da' quëna̧ jo̧rȩtamȩ pio judi, oëra̧ jo̧rȩtade
5Ja̧di ta̧rëri̧ ni̧bädiibe Jeova judi: Eami̧ pumȩ üdë, pumȩ pio ju̧i̧iäpȩmo̧ quëna̧mȩ judi, 'Aja̧, pumȩ ja̧ ju chiarea̧ pio ju̧i̧iä a̧dorea̧ dapaquëda' quëna̧mȩ pio judi, chjai̧dëri̧ cjo̧ro̧de. Jabechji̧ judi Jeova pio ju̧i̧iäpȩmo̧ chjuari̧ quëna̧tärea̧ ji̧, putu jura̧ a̧dë chami̧ dari̧ japadejȩ pio ju̧i̧iäpȩmo̧ quëna̧dëpe bagari̧. Ado pio ju̧i̧iä yo̧requede, chjai̧dëri̧ cjo̧ro̧de. 6Jabechji̧ chiri tjo maräpȩ cjiamȩ tomi̧ dade, dabu nȩgȩ maräpȩ ju̧ri̧. Goaeri̧ cjo̧ro̧rea̧ dadëde. Chjadëri̧ cjo̧ro̧rea̧ dadëde. Jabechji̧ pumȩ decjiami̧ daräpȩ cjo̧ro̧de, yagoemȩ chiamȩ dabumi̧ daräpȩ, dabu chjadëdëmi̧ da daburäpȩ, dabu pape chiamȩ dabumi̧ daräpȩ.
Chjadëri̧ cjiade Ütë tjamo̧ ju̧i̧iäpȩmo̧ quëna̧mȩ judi
7Jabo Jeova pio ju̧i̧iäpȩmo̧ quëna̧mȩ judi, 'Aja̧, Jeova pio ju̧i̧iämo̧i̧ a̧dorea̧ dapaquëda' quëna̧mȩ pio judi, chjadëri̧ cjo̧ro̧de. Ma̧ chiadëri̧ cjiade. 8Jabechji̧ dürü yuroro ponȩa̧ oa cjiamȩ tomi̧ dade. Ado urëdi tacö̧pe bagami̧ dari̧ cjiade uiräpȩmo̧. Ado mai̧ da mo̧ërä judi, uapadëde. Jabechji̧ ma̧i̧ da cjüëtüräbo to pjö̧da gägäari̧ cjiade chja̧chja̧ maearë. Ado cjütärea̧ ji̧ cjüdërä judi, jabechji̧ cjüdëräbo bücjüri̧ cjiadëde. Jabechji̧ ji̧dë ma jurarea̧ chiamȩrȩ cjiade. Aja̧, ja̧dimi̧ dari̧ cjo̧ro̧de pio coaiäpȩmo̧ quëna̧mȩ judi.
Ibëa̧ chji̧ üdë a̧dë chjäte u̧i̧pamȩde
9Ja̧di ta̧rëri̧ yo̧rëremȩde Jeova judi:
—Danȩrȩ, dibëa̧ chji̧ üdë a̧dë chjäte mai̧ dari̧ u̧i̧pamȩde. A̧dë chjätë chjai̧dë oa ji̧dë ma jo̧rȩtamȩde. Ado danȩrȩ, chjaparȩrea̧mi̧dëde jabo jabechji̧ ji̧dë ma u̧i̧pamȩde. Jabo mȩnȩro̧ pio ju̧i̧ chjiari tjamo̧ri̧ dabarea̧mi̧dëde. 'Aja̧, ca̧ chji̧ üdë ja̧di dari̧ u̧i̧pamȩ jirodida, ja̧di dari̧ oëra̧ jo̧rȩta tänȩpai̧ da jirodicoada, ja̧di dari̧ teracaba oa jo̧rȩta tänȩpai̧ da jirodicoada' quëna̧rea̧mi̧dënȩrȩ. 10Jabo danȩrȩ, Jeova pio judirequede. Pio pio cüdë dabarequede dibëa̧ chji̧ pio ju̧i̧ chjiari cüdë cjacjarë damȩ tara. Ado pio cüdërequede dibëa̧ chji̧ oa ütaramȩ judi, mȩnȩro̧ jo̧rȩta̧ pio ju̧i̧ ütarë damȩ judi. Ado pio ju̧i̧iä jabechji̧, cüdë dabami̧ ba ano̧parequededibe mȩnȩro̧ ja̧bepea̧ ba oa, mȩnȩro̧ jo̧rȩta̧ ba oa. Dibëa̧ chji̧ pio ju̧i̧ chjiari tjamo̧ri̧ daba oaiä, jabechji̧ oëra̧ ba ano̧rea̧ decjiari̧ ba ano̧parequededibe.
Jeremia judi ni̧bärëremȩdejȩ Jeova ju̧i̧, goae tarari̧ ca̧mȩ dürümi̧ damȩ ju̧i̧
13—Danȩ Jeova, pio mȩaiämo̧i̧ jidatarea̧ chiadirȩ icharaita judiro̧. Ado pio ju̧i̧iä eami̧ pumȩ üdë pio mȩa a̧dë jo̧rȩtarä judi, pio mȩa a̧dë jachipadärämi̧ dari̧ japarä judi, cjäri̧ made, a̧dë chjäte idëri̧ cjiamȩrȩ cjiadiäpade. Tjamo̧ davä. Pio mȩa putu jura̧ a̧dë chami̧ dari̧ japaji̧ri̧ pio judiro̧, jabechji̧ pumȩ ta duri üdë pjaepa oaiä na̧ra̧ oa cjiami̧ dari̧ cjiapade, duridëpe bagari̧. ¿Tjana̧ ju̧i̧iä ja̧di dari̧ cjiadiäpadirȩ? Tjana̧ ju̧i̧iädë, jabechji̧ judiro̧ Jeova pio ju̧i̧ jiada̧ oaiä, cjo̧ro̧rea̧ yürümȩ uimi̧ damȩ pio ju̧i̧ jiada̧ oaiä, goae tarari̧ ca̧mȩ dürümi̧ damȩ pio ju̧i̧ jiada̧ oaiä, jabechji̧ ja̧di dari̧ cjiadiäpadirȩ. 14Jabo cjäri̧ ma Jeova, ja̧di dari̧ cjiadiädëri̧ cjiarequede. Jabechji̧, chjaparȩmi̧ dari̧ japacoe. Chjätärea̧ yürücoe. Ado chjätärea̧ daea̧mȩrȩ chjacjiamȩri̧ ni̧bäparequedemȩ, pio mȩaiäpȩmo̧ ma —yo̧mȩrȩ ni̧bärëremȩdejȩ Jeova pio ju̧i̧iäpȩmo̧ Jeremia judi.
Currently Selected:
Jeremia 17: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
