Jeremia 6
6
Juda quȩmȩ chiriräpȩ cjo̧ro̧ji̧ri̧ icharaita pio judiro̧ chjai̧dëri̧ jape chjaorëreji̧ri̧dirȩ
13Ja̧di ta̧rëri̧ yo̧de Ütë tjamo̧ judi: “Judaräpȩ cjo̧ro̧ji̧ri̧ pio judiro̧ ütëbodärärë jibëa̧ chji̧rämo̧ jo̧rȩtaji̧ri̧rȩ cjo̧ro̧dirȩ, chjai̧dëri̧ japaji̧ri̧rȩ. Danȩrȩ, ado cja̧rȩmo̧ ja̧ oa baë mitërea̧ pio ju̧i̧mo̧i̧ jo̧rȩtadirȩ. Ja̧di maeari̧ cjo̧ro̧dirȩ judiro̧ ütëborë, tjamo̧ yo̧ji̧ri̧ judiro̧, ado mu̧i̧tjoi̧ pio judiro̧borë. Aja̧, ji̧dë ma baë mitërea̧ pio ju̧i̧mo̧i̧ jo̧rȩtaji̧ri̧rȩ cjo̧ro̧dirȩ, 'jabechji̧ nötadida yaba̧' quëna̧rea̧ jo̧rȩtarea̧ decjiari̧. Ado Ütërë ea jana̧ chjadüa̧ oa ni̧bäji̧ri̧ pio judiro̧ chjadëri̧ cjo̧ro̧tärea̧ ji̧, peaja̧di dari̧ cjo̧ro̧dirȩ. Peaja̧di chjai̧dëri̧ cjo̧ro̧dirȩ. Ado o ji̧ri̧ chjiari goë tuti ja̧bepaji̧ri̧ pio judiro̧borë chjadëri̧ cjo̧ro̧tärea̧ ji̧, peaja̧di chjai̧dëri̧ jape cjiadirȩ. Peaja̧di u̧i̧paji̧ri̧rȩ baë mitëdiro̧jo̧ȩ jibëa̧dë oa o ji̧ri̧iä. Aja̧, a̧dë chjäte ji̧ra̧ri̧ goapea̧ oa baë mitërea̧ pio ju̧i̧mo̧i̧ jo̧rȩtaji̧ri̧rȩ cjo̧ro̧dirȩ. 14Danȩrȩ, pio jiro pumȩ judiro̧ ca̧ mu̧i̧tjoi̧ maeadirȩ. Jabo cjäri̧ madirȩ, judiro̧ ca̧ea̧ pio ju̧i̧ chjadëri̧ ja̧bepatärea̧ ji̧, jibëa̧ pumȩ pio ji̧ri̧ chjadëri̧ a̧dotärea̧ ji̧, chjai̧dëri̧ japaji̧ri̧ pio ji̧ri̧ chjadëri̧ chi̧dëeatärea̧ ji̧, a̧dodë madiro̧jȩrȩ. Bücjüri̧ cjiaji̧ri̧rȩ dadë madiro̧jȩrȩ. Jabechji̧ chjaparȩmȩ chjadëdëmi̧ dari̧ japaji̧ri̧rȩ cjo̧ro̧dirȩ. Danȩrȩ, judiro̧ mai̧ da yabë a̧rȩmȩ co chiamȩmi̧ da pio ju̧i̧ darä, jere oaiä ja̧bopai̧ dari̧ cjiamȩmi̧ da pio ju̧i̧ darä, “Aja̧, jabechji̧renȩ” yo̧diro̧jo̧ȩ gito ja̧bomȩ oa. “Jabomo̧ uëmo̧i̧ coaria̧ oa cjiarenȩ. Chjaodëri̧ cjatäcjiarea̧ daparenȩ” yo̧diro̧jo̧ȩ. Aja̧, ja̧dimi̧ dari̧ japaji̧ri̧rȩ cjo̧ro̧dirȩ ca̧ mu̧i̧tjoi̧ judiro̧. Tjamo̧ davä. Goë tuti ja̧bepaji̧ri̧ judiro̧, ado Ütërë ea jana̧ chjadüa̧ oa ni̧bäji̧ri̧ pio judiro̧ ja̧di dari̧ japaji̧ri̧rȩ cjo̧ro̧dirȩ, jibëa̧ pumȩ ji̧ri̧ chjadëri̧ a̧dodëji̧ri̧rȩ. Jabechji̧ pume judiro̧ chjai̧dëri̧ japea̧ pio ju̧i̧ chjiari coëma cjiari̧ chi̧dëeatärea̧ ji̧, “Aja̧, jabechji̧de, chjadëde” yo̧dirȩ. “Aja̧, a̧ro̧rȩ ütëborë chjadëri̧ cjo̧ro̧rea̧rȩ” yo̧dirȩ. “Goaeri̧ cjo̧ro̧rea̧ chiaji̧ri̧rȩ cjo̧ro̧rea̧rȩ. Uapai̧ daräpȩ cjo̧ro̧dërea̧rȩ, jabo chjadë tjamo̧räpȩ cjo̧ro̧ marea̧rȩ bücjüri̧ cjiarea̧mi̧dëräpȩ” yo̧dirȩ. Jabo cjäri̧ madiro̧jȩrȩ, ma̧ȩ chjádë yürü chjaodiro̧jȩrȩ jibëa̧ pumȩ ji̧ri̧.#6:14 Icharairäpȩ cjo̧ro̧ji̧ri̧ pio judiro̧mo̧rȩ chjai̧dëri̧ cjo̧ro̧dërëreji̧ri̧dirȩ. Peaja̧di dari̧ cjo̧ro̧rëreji̧ri̧dirȩ Judaräpȩ cjo̧ro̧ji̧ri̧ judiro̧. Putu jura̧ a̧dë chami̧ dari̧ japarëreji̧ri̧diro̧jo̧ȩ Ütë tjamo̧ ju̧i̧. Pio ju̧i̧iä ma̧ȩ yürürëremȩdejȩrȩ Ütë tjamo̧ judi Jeremia quȩmȩ pio ju̧i̧iä, Ütërë ea jana̧ chjadüa̧ oa ni̧bämȩ pio ju̧i̧iä. Pio ji̧ri̧iäpȩmo̧ chi̧dëeatä eamȩrȩ ma̧ȩ yürürëremȩdejȩ judiro̧ chjai̧dëri̧ japea̧ pio ju̧i̧ chjiari. Jabo cjäri̧ madiro̧jo̧ȩ, ta̧rë ja̧bodëa̧diro̧jo̧ȩ. Jeremia judi goae tarari̧ chi̧dëeataräbo, ta̧rë ja̧bodëa̧diro̧jo̧ȩ. Jabechji̧ ano̧ mire jo̧rȩtadëri̧ cjiarëreji̧ri̧dirȩ. Ado pio ju̧i̧iä Ütë tjamo̧ judi bide bape chjaorëremȩdejȩrȩ. Jabechji̧ judaräpȩ cjo̧ro̧ji̧ri̧ pio ji̧ri̧ eadëji̧ri̧ pio ji̧ri̧ acji järea̧ yürürëremȩdejȩrȩ. Aja̧, Judaräpȩ cjo̧ro̧ji̧ri̧ pio ji̧ri̧ goae tarari̧ boadäräpea̧ oa acji järea̧ yürürëremȩdejȩrȩ.
Currently Selected:
Jeremia 6: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
