Taruparea̧ Ma̧ȩ 48

Jacobo judi chjadëri̧ cjo̧ro̧pea̧ ma̧ȩ oa yürürëremȩdejȩrȩ ja̧ u̧ri̧ pio ji̧ri̧

1Ado japamitë ana̧dë chjätä ëte, Joche judi jäja pio ju̧i̧ chjiari ta̧rërëremȩde. "Gito ja̧bode na̧ ama̧i̧ judi" yo̧a̧ oa ta̧rërëremȩde. Pio ju̧i̧ ta̧rëa̧ oaiä goë daepea̧dejȩ jibëa̧ ama̧i̧ ju̧i̧. Ado ëba järëremȩdejȩrȩ jibëa̧ u̧ri̧ ji̧ri̧, Manache quȩmȩ oa, Epjarai̧ quȩmȩ oa. 2Ado judiro̧ Jacobo ju̧i̧iäpȩ go̧düdäräa̧rä, cja̧rȩmȩrȩ yo̧a̧dejȩ Jacobo ju̧i̧:

—Danȩ, na̧ ja judi, Joche pio judi jana̧de —yo̧a̧dejȩ.

Pio ju̧i̧ ta̧rëa̧ oaiä Jacobo judi tjätjäpë cjitë ëte charëremȩde jibëa̧ mo̧a̧rea̧räpȩ. 3Ado ja̧dëa ji̧ yo̧a̧dejȩ Joche ju̧i̧:

—Danȩ, a̧dë chjäte ju chiamȩ Ütë pio judi na̧rȩrëremȩdique. Aja̧, Uche quȩmȩ bë ma̧ri̧räpȩmȩ oa, Canaa̧räpȩmȩ oa na̧rȩrëremȩdique. Ado chjadëri̧ cjo̧ro̧pea̧ ma̧ȩ oa yürümȩrȩ yo̧rëremȩdique ju̧ri̧pȩmȩ oa. 4Ado ja̧di ta̧rëri̧ yo̧rëremȩdique irä yo̧mȩrȩ: “Danȩ, na̧ea̧ri ja̧ji̧ri̧ pio ji̧ri̧ goëje ji̧ra̧pe baga tänȩparequedejȩrȩ. No̧i̧dë tjamo̧padirȩ” yo̧a̧dique. “Chiriräpȩti̧ oa cjo̧ro̧padirȩ. Ado cja̧rȩmo̧ pumȩpe bagaji̧ri̧rȩ cjo̧ro̧padirȩ ado cja̧rȩmo̧ ma̧ȩ oa ni̧bäji̧ri̧rȩ. Ado danȩ, pio yoa chiri oa yürüparequedejȩrȩ” yo̧a̧dique. “Jabechji̧ na̧ea̧ri ja̧ji̧ri̧ pio judiro̧ pio yoa chiri oa bucho ana̧ goapadirȩ. Aja̧, goadëji̧ri̧pe bagarea̧ decjiari̧ goapadiro̧jo̧ȩ” yo̧a̧dique. Aja̧, ja̧di ta̧rëri̧ yo̧mȩrȩ yo̧rëremȩdique Ütë tjamo̧ judi —yo̧mȩrȩ ni̧bä chjaorëremȩdejȩ Joche ju̧i̧ Jacobo judi, ja̧bopea̧ querediämȩrȩ.

5Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩ Joche ju̧i̧iäpȩmo̧ jäja judi:

—Ado danȩ, mȩnȩ na̧ u̧ri̧ yo̧a̧ri̧ oa ëbarenȩ —yo̧a̧dejȩ—. Manache quȩmȩ pio ju̧i̧, ado Epjarai̧ quȩmȩ pio ju̧i̧ ëbarenȩ. Pio yi Ejito chiriräpȩ ara̧dirȩ cüdë jabë ma̧na̧dëa̧rä. Jabo yaba̧ ca̧ u̧ri̧pe bagari̧ mitërequedejȩrȩ. Jabechji̧ cüdë Rubȩ pio ju̧i̧ ëbami̧ ëbaparequedejȩrȩ pio ji̧ri̧ peaja̧di. Cüdë Chimeo̧ pio ju̧i̧ ëbami̧ ëbaparequedejȩrȩ peaja̧di ca̧ u̧ri̧ tjamo̧mi̧ daji̧ri̧ oa. Ado ji̧ri̧iäpȩmo̧bo yürüparequedejȩrȩ ca̧ea̧remȩ pio ju̧i̧, cüdë goa̧ pio ju̧i̧. Aja̧ ca̧ u̧ri̧ tjamo̧mi̧ da ji̧ri̧ oa yürüparequedejȩrȩ Mana̧che pio ju̧i̧, ado Epjarai̧ pio ju̧i̧. 6Ado mȩnȩ ji̧dë duri oa na̧ u̧ri̧ pio ji̧ri̧ a̧de nö̧rirä judi, jabechji̧ mitëdëparequedejȩrȩ. Jabechji̧ na̧ea̧ mapadirȩ jabo ji̧ri̧ ja̧ yaboji̧ri̧ pio ji̧ri̧mo̧i̧ mitërequedejȩrȩ yo̧a̧ri̧mo̧i̧ oa. Pio judiro̧mo̧rȩ ca̧ea̧remȩ pio ju̧i̧ mitërea̧ dapadirȩ —yo̧mȩrȩ ni̧bä chjaorëremȩdejȩ Joche ju̧i̧ Icharai pio judi.

7Ado ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bä chjaorëremȩdejȩ:

—Ado danȩ ca̧ ja, no̧mȩ judi cüdë Padanarama quȩmȩ chiriri pio judiri cuchupë ma̧na̧rërea̧ ji̧, a̧dë ja̧borëreyi̧ni̧que na̧ ai̧rea̧ jini̧, Raque pio jini̧. Canaa̧räpȩ ju̧ri̧ ja̧borëreyi̧nȩ. Epjarata bë ma̧ri̧räpȩ jabë go̧düdärädëa̧rä a̧dë ja̧boa̧ni̧que. Ado pio ju̧ri̧ na̧ra̧requedejȩ Epjarata järea̧ no̧ yuroräpȩ. Jabo Epjarata yo̧dë madiro̧jo̧ȩ jabo. Jabechji̧ Berȩ yo̧mȩ quȩ oa yo̧diro̧jo̧ȩ yaba̧ —yo̧mȩrȩ a̧de yo̧rëremȩdejȩ Joche ju̧i̧iäpȩmo̧ Jacobo judi.

8Ado ja̧dëa ji̧ Icharai judi Joche ja̧ u̧ri̧ pio ji̧ri̧ gatë damȩrȩ iëno̧ë ta̧rërëremȩdejȩ Joche ju̧i̧:

—Ado pio yodëro̧je, ¿chjiadirȩ?

9Ado Joche judi:

—Chjiadëdirȩ, ca̧ u̧ri̧ pio judiro̧dirȩ. Cüdë pio yi Ejitoräpȩ cjo̧ro̧mȩ oa yürürëremȩdique Ütë tjamo̧ judi ca̧ u̧ri̧ pio ji̧ri̧ —dëbë yo̧mȩrȩ yo̧rëremȩdejȩ jibëa̧ ama̧i̧ ju̧i̧.

Ado pio ju̧i̧ ta̧rëa̧ oaiä Joche ja̧ ama̧i̧ judi yo̧a̧dejȩ:

—Danȩ, chjadëri̧ japacoe. Jabechji̧ na̧ u̧ri̧ pio ji̧ri̧ coaiäpȩmo̧ jana̧ tänȩjȩrȩ. Cüdë pio ji̧ri̧iäpȩmo̧ chjadëri̧ cjo̧ro̧pea̧ ma̧ȩ oa yürüpea̧ oa, ëba jana̧jȩrȩ —yo̧a̧dejȩ.

10Ado Icharai judi ütama̧i̧ tjamo̧pe baga̧ oaiä, jabechji̧ da pjurumȩpea̧de. Chjadëri̧ dadëmȩpea̧de. Jabo chjadëri̧ dadëmȩborë ya i̧bua̧dejȩrȩ pio jȩaiäpȩ jana̧ji̧ri̧ oa. Ado ida̧dejȩrȩ. 11Ado ja̧dëa ji̧ yo̧a̧dejȩ Joche ju̧i̧:

—Jabo cjäri̧ marequedemȩ ca̧ ja. 'Aja̧, ca̧ ja oa ado chjereno̧ dapacuni̧da' quëna̧dëa̧requedemȩ. Jabo ja̧di dari̧ quëna̧rëremȩ oa chjadëri̧ darea̧ yürüa̧dique Ütë tjamo̧ judi, na̧ u̧ri̧ pio ji̧ri̧bo —yo̧mȩrȩ yo̧rëremȩdejȩ Joche ju̧i̧ jäja judi.

12Ja̧dëa ji̧ Joche judi ida birarëremȩdejȩrȩ jibëa̧ bori̧ ji̧ri̧, jojada ja̧ yairä chareji̧ri̧ oa. Ado ja̧di dari̧ japa ëte juchatura̧ tjätjäpë china̧därärëremȩde daito üdë daburäpȩ yuro. 13Ado ja̧di dari̧ japa ëte, cjia tänȩrëremȩdejȩrȩ jibëa̧ bori̧ ji̧ri̧ jibëa̧ ama̧i̧ ja̧ dëbëräpȩ. Manache pio ju̧i̧ cjia tänȩa̧dejȩ jibëa̧ ama̧i̧ ja̧ mu̧i̧ chjua cotoro. Ado Epjarai̧ pio ju̧i̧, durimȩ pio ju̧i̧ cjia tänȩa̧dejȩ ca̧i̧ta̧ra̧ ichiri. Aja̧, ja̧di dari̧ japamȩrȩ cjia tänȩrëremȩdejȩrȩ jibëa̧ u̧ri̧ ji̧ri̧ jibëa̧ ama̧i̧ ja̧ dëbëräpȩ. 14Ado ja̧dëa ji̧ Icharai judi dëbëribo ichipë cjiamȩrȩ ida̧dejȩrȩ bori̧ ji̧ri̧. Jabo chjadëri̧ ichipë cjiatärea̧ ji̧, dëbë chjara cjiari̧ ichipë cjiarëremȩdejȩrȩ. Jabechji̧ mu̧i̧ chjuari pio judiri Manache pio ju̧i̧ ja̧ tjübë oa idatärea̧ ji̧, durimȩ pio ju̧i̧ ano̧ mire ida̧dejȩ. Ado oëri ja̧ra̧ durimȩ pio ju̧i̧ ja̧ tjübë oa idatärea̧ ji̧, yabomȩ pio ju̧i̧ ano̧ mire ida̧dejȩ. 15Ado ja̧di dari̧ japamȩrȩ chjadëri̧ cjo̧ro̧pea̧ ma̧ȩ oa yürürëremȩdejȩ Joche ju̧i̧, Ütë tjamo̧ pio ju̧i̧iäpȩmo̧ chjadëri̧ japabëmi̧. Aja̧, Ütë tjamo̧ pio ju̧i̧iä goë cjo̧dëmȩrȩ ja̧di ta̧rëri̧ ma̧ȩ yürürëremȩdejȩ:

—Ado yaba̧ goë cjo̧dërequede Ütë tjamo̧ pio ju̧i̧iä. Aja̧, ca̧ jadama̧i̧rea̧ Abaraa̧ pio judi quëna̧rërea̧ Ütë pio ju̧i̧iä, ca̧ ama̧i̧rea̧ Icha pio judi quëna̧rërea̧ Ütë pio ju̧i̧iä goë cjo̧dërequedemȩ. Aja̧, ca̧ ai̧rea̧ jini̧ coa ararërea̧ri ja̧ jidamȩ pio ju̧i̧iä, oveja jidamȩmi̧ dari̧ japamȩ pio ju̧i̧iä goë cjo̧dërequede pio jiro bori̧ pio ji̧ri̧ chjiari. 16Danȩ, cüdë chjai̧dë oa chjätämȩ oa chjadëri̧ a̧doa̧renȩque. Chjadëri̧ jida̧renȩque. Ado pio mȩaiä goë cjo̧dërequede pio jiro bori̧ pio ji̧ri̧ chjiari. Chjadëri̧ cjiadiärea̧mi̧ dari̧ cjo̧ro̧tä eamȩrȩ goë cjo̧dërequedemȩ pio ji̧ri̧ chjiari. Pio jiro bori̧ pio ji̧ri̧iä oëra̧ti̧ oa cjo̧ro̧ji̧ri̧ judiro̧ goë goë ta̧rëtädirȩ pio coa chjiari. ‘Aja̧, Jacobo pio ju̧i̧ ja̧ joja maeadiro̧da’ quëna̧rea̧mi̧ dari̧ ta̧rëtädirȩ. Ca̧ ama̧i̧rea̧ Icha pio ju̧i̧ chjiari, ca̧ jadama̧i̧rea̧ Abaraa̧ pio ju̧i̧ chjiari goë goë ta̧rëtädirȩ pumȩ no̧i̧dërë. Ado Epjarai̧ pio judiri ja̧ji̧ri̧ judiro̧, Manache pio judiri ja̧ji̧ri̧ pio judiro̧borë goëje ji̧ra̧ tjamo̧pe jätädirȩ chiriräpȩti̧ oa cjo̧ro̧paji̧ri̧rȩ —yo̧mȩrȩ ma̧ȩ yürürëremȩde Jacobo judi.

17Jabo Joche judi, ‘Cjäri̧ madida, ca̧ ama̧i̧ judi chjadëri̧ japadëdida, oëra̧ japadida, ca̧ ja yabomȩ pio ju̧i̧ mu̧i̧ chjuari idatäremȩdiji̧da, Manache pio ju̧i̧ ga̧re taratäremȩdiji̧da’ quëna̧ jo̧rȩtamȩrȩ ano̧ mire ida tänȩtea̧dejȩ Jacobo ja̧ ichi oa Manache ja̧ tjübëräpȩmo̧. 18Ado ja̧di dari̧ japamȩrȩ yo̧tea̧dejȩ jäja ju̧i̧iäpȩmo̧:

—Jabo cjäri̧ marenȩ ama̧i̧, oëra̧ japamȩrenȩ. Pio yodëde ca̧ ja yabomȩ judi. Na̧ mu̧i̧ chjuari pio judiri chjadëri̧ idajo̧ȩ pio ju̧i̧ —yo̧tea̧.

19Jabo jibëa̧ ama̧i̧ judi ta̧rë ja̧bodëa̧dejȩ. Ado yo̧a̧dejȩ joja oa:

—Danȩ ca̧ ja, 'na̧ ja yabomȩ pio judidida' quëna̧ dabareconȩ. Ado pio judiri ja̧ji̧ri̧ judiro̧, jabechji̧ no̧i̧dë tjamo̧padirȩ. O judiro̧ dëbëpe chjaorea̧mi̧dëri̧ cjiadiäpadirȩ. Jabo danȩ, na̧ ja durimȩ pio judiri ja̧ji̧ri̧ judiro̧ ji̧dë u̧i̧ ji̧ra̧padirȩ. Ji̧dë u̧i̧ ju chiami̧ dari̧ cjo̧ro̧padirȩ. Jabechji̧ pio judiri ja̧ji̧ri̧ judiro̧ ji̧dë u̧i̧ goae tarari̧ dëbëpe chjaorea̧ chiapadirȩ. Ado na̧ ja yabomȩ pio ju̧i̧, dëdë, ba chia dapadiro̧jo̧ȩ. Jabo danȩ, na̧ ja durimȩ pio ju̧i̧ ji̧dë u̧i̧ ba chia dapadiro̧jo̧ȩ —yo̧mȩrȩ chjadëri̧ cjo̧ro̧pea̧ ma̧ȩ oa yürürëremȩdejȩrȩ Joche ja̧ bori̧ ji̧ri̧ Icharai judi.

20Ado pio jiro domȩ ju̧i̧iä Jacobo judi ji̧dë uëri yo̧mȩrȩ chjadëri̧ cjo̧ro̧pea̧ ma̧ȩ oa a̧de yo̧rëremȩdejȩrȩ Joche ja̧ bori̧ pio ji̧ri̧:

—Ado Icharaita judiro̧, 'jabechji̧ Ütë tjamo̧ judi pio jiro bori̧ ji̧ri̧ chjadëri̧ a̧doa̧diji̧ri̧da' quëna̧ mapadirȩ. Ado pio ju̧i̧iä eami̧rȩ icharaita judi ado cja̧rȩmo̧ oa chjadëri̧ cjo̧ro̧pea̧ ma̧ȩ oa yürürä, jabechji̧ Joche ja̧ u̧ri̧ pio ji̧ri̧ jo̧rȩtamȩrȩ yo̧padejȩ. “Aja̧, Ütë tjamo̧ judi Epjarai̧ pio ju̧i̧ chjadëri̧ a̧dorërea̧mi̧ a̧dotädimȩ” yo̧padejȩ. “Ütë tjamo̧ judi Manache pio ju̧i̧ chjadëri̧ a̧dorërea̧mi̧ a̧dotädimȩ” yo̧padejȩ. Aja̧, ja̧di ta̧rëri̧ yo̧ mapadirȩ icharaita judiro̧ ado cja̧rȩmo̧ oa chjadëri̧ cjo̧ro̧pea̧ ma̧ȩ oa yürürä. Jabechji̧ ji̧dë ma jo̧rȩtapadiro̧jo̧ȩ Epjarai̧ pio ju̧i̧, Manache pio ju̧i̧ —yo̧mȩrȩ a̧de yo̧rëremȩde Icharai judi.

Ado ja̧di ta̧rëri̧ yo̧mȩrȩ yabomȩ tjamo̧mi̧ da oa mitërëremȩdejȩ Epjarai̧ pio ju̧i̧, durimȩ pio ju̧i̧. 21Ado ji̧dë duri oa Jacobo judi ado yo̧a̧dejȩ Joche ju̧i̧:

—Danȩ ca̧ ja, cüdë ja̧bopea̧ ji̧ queri̧diärequede. Jabo Ütë tjamo̧ judi pio dibë nö̧ta cjiade. Pio judi tuti japea̧ oaiä, jabechji̧ ado chjereno̧ baärea̧ dapanȩrȩ dibëa̧ tarurë cjo̧ro̧rërea̧ chiriräpȩ. 22Ado cüdë, jabechji̧ pio mȩa yürürequedemȩ Chiquema̧ quȩmȩ chiri oa. Pio jiro chiri oa boadärärëremȩrequede amoreo quȩji̧ri̧ pumȩ pio ji̧ri̧iä. Aja̧, ca̧ pumȩ pio ji̧ri̧ nöta acji tai̧ji̧ri̧rȩ boadäräa̧rea̧ro̧jo̧ȩ ibëa̧ chjito̧ra̧. Ado pio jiro chiri oa, jabechji̧ na̧ oti̧ ji̧ri̧ yürüdërequedejȩrȩ jabo pio mȩamo̧ yürürequedemȩ —yo̧mȩrȩ yo̧rëremȩdejȩ Joche ju̧i̧ Jacobo judi.

Currently Selected:

Taruparea̧ Ma̧ȩ 48: Pume

Highlight

Compare

Copy