Taruparea̧ Ma̧ȩ 49
49
Jacobo pio judiri ja̧ji̧ri̧ judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩrȩ jënȩ ja̧bobea yaboi̧
1Ja̧dëa ji̧ Jacobo judi yo̧rëremȩdejȩrȩ jibëa̧ u̧ri̧ ji̧ri̧:
—Pio jauëräpȩmo̧ jana̧chji̧vä. Jabechji̧ ni̧bä chjaotämi̧ cjiarequededibe. ‘Aja̧ ibëa̧ri ja̧ji̧ri̧ judiro̧ ja̧di dari̧ cjo̧ro̧padiro̧da, japamitë ana̧ tjamo̧ chjätä ëte ja̧di dari̧ cjo̧ro̧padiro̧da, jabechji̧ Ütë tjamo̧ pio judi tänȩa̧ oa ja̧di dari̧ cjo̧ro̧padiro̧da' quëna̧pea̧ oa ni̧bä chjaotämi̧ cjiarequededibe. 2Aja̧, jana̧chji̧vä ca̧ u̧ri̧. Danȩrȩ, Jacobo pio judirequede. Dibëa̧ ama̧i̧ pio judirequede cüdë. Aja̧, ca̧ queri̧räpȩ jana̧chji̧coe. Jabechji̧ dibëa̧ ama̧i̧ Icharai pio judirequede. Ta̧rera̧chji̧coe —yo̧mȩrȩ yo̧rëremȩdejȩrȩ jibëa̧ u̧ri̧ ji̧ri̧ pio jȩaiäpȩ jana̧tä. Ado ja̧dëa ji̧ pio jȩaiäpȩ jana̧ji̧ri̧ oa ni̧bä chjaorëremȩdejȩrȩ.
Jacobo judi pio jȩaiäpȩmo̧ idëri̧ cjia tänȩmȩ pio ju̧i̧ ma̧ȩ yürürëremȩdejȩ jibëa̧ ja yabomȩ oa, pio judiri ja̧ji̧ri̧ pio ji̧ri̧ chjadëri̧ cjo̧ro̧pea̧ ma̧ȩ oa yürüdëmȩrȩ
3Ado Jacobo judi joja yabomȩ pio ju̧i̧ tarupë ni̧bämȩrȩ ni̧bä chjaorëremȩdejȩ, ja̧di ta̧rëri̧ ni̧bämȩrȩ:
—Danȩ Rubȩ, yo̧requedemȩ —yo̧a̧dejȩ—. Ca̧ ja yabomȩ tjamo̧ pio judirenȩ. Cüdë boi̧chji̧ oa nö̧ridërërea̧ ji̧, pio mȩa nö̧rirëremȩrequedemȩ. Ado ca̧ ja yabomȩ tjamo̧ tara, jabechji̧ ba chia tjamo̧renȩ. Ju to̧barenȩ. 4Jabo cjäri̧ marenȩ, yabomȩmi̧ dadëpea̧renȩ. Tjamo̧ davä. Mȩnȩ ma̧i̧ dari̧ japea̧ oaiä, yabomȩmi̧ dadëpea̧renȩ. Jabechji̧ tüdüa̧mi̧ darä cjo̧ro̧rea̧mi̧dërenȩ jabo dëbëparea̧mi̧dëri̧ cjiamȩrenȩ oëadëmȩrȩ, uapai̧ damȩrȩ. Danȩ, bea üdë to̧bari̧ ca̧ea̧ ji̧, jabechji̧ eami̧ti̧ oa ara amȩde dëbëparea̧ decjiari̧, uapai̧ dari̧. Ado peaja̧dimi̧ dari̧ cjo̧ro̧renȩ mȩnȩ. Jabechji̧ mȩnȩ jo̧rȩta̧mi̧ japamȩrenȩ uapai̧ dari̧, ta̧rë cjiadiä tänȩrea̧mi̧dëri̧. Ado pio ju̧i̧iä mȩnȩ jo̧rȩta̧mi̧ bae ëba mo̧a̧rëremȩrenȩque ca̧ iei̧rea̧ pio ji̧, cüdë a̧de ëba̧rea̧ pio ji̧. Ado ja̧di dari̧ japamȩrȩ idëri̧ cjia tjamo̧ tänȩrëremȩrenȩque. Ado pio ju̧i̧iä jabechji̧ yabomȩmi̧ dadëpea̧renȩ —yo̧mȩrȩ ni̧bä chjaorëremȩdejȩ Rubȩ ju̧i̧.
Chimeo̧ pio judiri ja̧ji̧ri̧ pio judiro̧, Devi pio judiri ja̧ji̧ri̧ judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩrȩ Jacobo judi
5Ado pio ju̧i̧ ni̧bä chjao ëte ano̧ mire ni̧bä chjaorëremȩdejȩrȩ Chimeo̧ ju̧i̧, Devi ju̧i̧. Ja̧di ta̧rëri̧ yo̧mȩrȩ yo̧rëremȩdejȩrȩ:
—Danȩrȩ, Chimeo̧, Devi, yo̧requededibe. Ji̧mo̧ ja̧nȩrȩ. Jabo ma̧i̧ dari̧ japanȩrȩ. Coana̧rea̧ra̧ pio ju̧ri̧ra̧ goe chiari̧ jape chjaonȩrȩ o ji̧ri̧iäpȩmo̧. 6Ja̧di tara dibë nö̧ta ëba tai̧dëri̧ cjiarequede. Chjai̧dëri̧ japapea̧ ji̧ goadi ni̧bä chjaoji̧ri̧ oa ëba a̧dopadëri̧ cjiarequededibe. Jabechji̧ ërecjia tjamo̧ji̧ri̧rȩ chjai̧dëri̧ jape cjiarenȩro̧jȩrȩ pumȩ ji̧ri̧iäpȩmo̧. Ja̧bo tänȩ chjaorenȩro̧jȩrȩ. Ado chjaocjiaji̧ri̧rȩ ta chjȩ oa tuti coa̧renȩro̧jo̧ȩ bacarë tai̧rea̧ decjiari̧. Tjamo̧ davä. Chjai̧dë oa chjaocjiaji̧ri̧rȩ jape chjaonȩrȩ ma̧ri̧pea̧ji̧ri̧borë. 7Ado danȩrȩ, mȩnȩro̧ ërecjia̧ üdë a̧dë chjäte chjadëdëde. Ado mȩnȩro̧ chjai̧dëri̧ japapea̧ ji̧ jo̧rȩta̧ üdë peaja̧di chjadëdë tjamo̧de. Ado pio ju̧i̧iä pio dibëa̧ri ja̧ji̧ri̧ pio judiro̧ jibëa̧ chirirämo̧ chjadëri̧ cjo̧ro̧tärea̧ ji̧, oëra̧ti̧ oa cjo̧ro̧ tänȩparequedejȩrȩ. Cja̧rȩmȩ bubarë cjo̧ro̧tärea̧ ji̧, o ji̧ri̧ ja̧ chjarerämo̧ cjo̧ro̧ tänȩparequedejȩrȩ icharaita ja̧ chiriräpȩ ju̧ri̧ —yo̧mȩrȩ ni̧bä chjaorëremȩdejȩrȩ jibëa̧ u̧ri̧ ji̧ri̧, Chimeo̧ pio ju̧i̧, ado Devi pio ju̧i̧.
Juda pio judiri ja̧ji̧ri̧ pio judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩ joja oa Jacobo judi
8Ado ji̧ri̧iäpȩmo̧ ni̧bä chjao ëte ano̧ mire ni̧bä chjaorëremȩdejȩ Juda ju̧i̧. Ja̧di ta̧rëri̧ yo̧mȩrȩ ni̧bä chjaoa̧dejȩ:
—Ado mȩnȩ, Juda quȩmȩrenȩ. Danȩ, na̧ oti̧ pio judiri ja̧ji̧ri̧ pio judiro̧, jabechji̧ chjacjiamȩri̧ ni̧bäpadiro̧jȩrȩ na̧ea̧ri ja̧ji̧ri̧ pio ji̧ri̧iäpȩmo̧. Jabechji̧ ba chia jo̧rȩtapadiro̧jȩrȩ. Ado na̧ea̧ri ja̧ji̧ri̧ judiro̧, jabechji̧ pio ji̧bë eadëji̧ri̧ pio ji̧ri̧ goae tarari̧ boadärärea̧ dapadiro̧jȩrȩ dëbëparea̧ decjiari̧. Ado na̧ oti̧ pio judiri ja̧ji̧ri̧ pio judiro̧, jabechji̧ na̧ea̧ri ja̧ji̧ri̧ pio ji̧ri̧ ja̧ dëbëräpȩ juchatura̧ tjätjäpë china̧däräpadiro̧jȩrȩ daito üdë daburäpȩ yuro. Aja̧, ja̧di dari̧ japapadiro̧jȩrȩ. 9Aja̧ ca̧ ja, Juda, ja̧di dari̧ cjo̧ro̧padirȩ na̧ea̧ri ja̧ji̧ri̧ judiro̧. O ji̧ri̧ chjaodëri̧ boadärärea̧ dapadiro̧jȩrȩ dëbëparea̧ decjiari̧. Jabechji̧ pio jibë eadëji̧ri̧ pio judiro̧, cjäri̧ madiro̧jȩrȩ, boadärärea̧ dadëpadiro̧jȩrȩ. Jabechji̧ pa̧rȩmȩrȩ japarëmi̧ cjiari̧ cjiadiäpadirȩ na̧ea̧ri ja̧ji̧ri̧ judiro̧. Danȩ, parȩmȩ üdë eami̧ oa ja̧bo tänȩ ëte, jura ëte, jabechji̧ a̧rȩde järätä chjapapea̧ oa. Ado mo̧a̧mȩ oa, ¿chjiarë na̧rȩno̧täremȩdejȩ? Chjiarëdë, na̧rȩno̧pa ma ja̧didë chjuamȩ tjamo̧ tara. Jabechji̧ uapaji̧ri̧rȩ da madiro̧jo̧ȩ. Ado peaja̧dimi̧ dari̧ dapadiro̧jȩrȩ na̧ea̧ri ja̧ji̧ri̧ pio ji̧ri̧. 10Ado danȩ Juda, na̧ea̧ri ja̧ji̧ri̧ judiro̧ chiri ütëji̧ri̧rȩ cjo̧ro̧padirȩ. Tjamo̧ yo̧ji̧ri̧rȩ cjo̧ro̧padirȩ. Jabechji̧ ji̧dë ma ütërë cjo̧ro̧padirȩ ütëdëpe järea̧ decjiari̧. Aja̧, Ütë tjamo̧ pio judi birë ma̧na̧rä yuro ja̧di dari̧ cjo̧ro̧padirȩ. Ado ja̧dëa ji̧ Ütë judi pio judi birë ma̧na̧rä, jabechji̧ pumȩ ütëborë ta̧rëdiä mapadiro̧jo̧ȩ na̧ea̧ri ja̧mȩ pio ju̧i̧. 11Ado danȩ, na̧ea̧ri ja̧ji̧ri̧ judiro̧ cjäri̧ ja̧boji̧ri̧rȩ cjo̧ro̧dëpadirȩ, jabo tjado boi̧dë tjamo̧ oa goaji̧ri̧rȩ cjo̧ro̧padirȩ, tjado ji̧ra̧ oa. Jabechji̧ eami̧ti̧ oa jabëdiärea̧ decjiari̧ goapadirȩ. 'Tjana̧ jurapacjivaa̧ro̧, uva decjiaa̧ro̧da' quëna̧ jo̧rȩtadëpadirȩ. Jabechji̧ uva to oa a̧dë chjäte ji̧ra̧ri̧ goapa tara, jabechji̧ yurapadiro̧jo̧ȩ jibëa̧ buro oa uva toräpȩ ju̧ri̧ pjö̧da oa jurapea̧ oa. Jabechji̧ uva to ji̧ra̧ oaiä, bücjüri̧ cjiadëpadirȩ burorë jura̧ oaiä. Ado uva to ji̧ra̧ tjamo̧ oa goapa tara, jabechji̧ uva uira̧ japapadirȩ ërü ji̧ra̧ tjamo̧ oa. Ado danȩ, na̧ea̧ri ja̧ji̧ri̧ pio judiro̧ chjibo oa joa̧ domȩ ju̧i̧iä ui decjiape baga̧rä judi, jabechji̧ uva ërüra̧ pio ju̧ri̧ra̧ ano̧ mire joapai̧ dadiro̧jo̧ȩ davä jibëa̧ chjibo oa, uva ui ji̧ra̧ tjamo̧ tara. 12Jabechji̧ na̧ea̧ri ja̧ji̧ri̧ pio judiro̧ uva ui ji̧ra̧ tjamo̧ oa jarapa tara, jabechji̧ jibëa̧ dacho üdë coë coëamape bagapade uvami̧ dari̧. Ado judiro̧ baca yö̧ cö ji̧ra̧ oa jara ütëpea̧ ma oaiä, jabechji̧ jo̧dë bërebërea maearë goaji̧ri̧rȩ cjo̧ro̧padirȩ —yo̧mȩrȩ ni̧bä chjaorëremȩdejȩ Jacobo judi Juda pio ju̧i̧.
Cheburo̧ pio judiri ja̧ji̧ri̧ pio judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩ joja oa Jacobo judi
13Ado ja̧dëa̧ ji̧ ano̧ mire ni̧bä chjaorëremȩdejȩ Cheburo̧ pio ju̧i̧:
—Danȩ Chaburo̧, yo̧requedemȩ. Na̧ea̧ri ja̧ji̧ri̧ pio judiro̧ ui ana̧ yuroropȩ cjo̧ro̧padirȩ uimo̧mȩ chara ana̧ oa chjadëri̧ pjurë tänȩrea̧räpȩ. Aja̧, chara ana̧ oa chjadëri̧ jidarea̧räpȩ ju̧ri̧, goeparäpȩ yurarea̧mi̧ daräpȩ ju̧ri̧ cjo̧ro̧padirȩ ui ana̧ yuroro. Ado na̧ea̧ri ja̧ji̧ri̧ ja̧ chiri üdë, jabechji̧ cja̧remȩ codërë a̧rȩpade davä Chido̧ quȩmȩräpȩ yuro —yo̧mȩrȩ ni̧bä chjaorëremȩdejȩ Chaburo̧ ju̧i̧.
Ichaca pio judiri ja̧ji̧ri̧ pio judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩ joja oa Jacobo judi
14Ja̧dëa ji̧ Chaburo̧ pio ju̧i̧ ni̧bä chjao ëte, ano̧ mire ni̧bä chjaorëremȩdejȩ Ichaca quȩmȩ oa. Ja̧di ta̧rëri̧ yo̧mȩrȩ yo̧a̧dejȩ:
—Danȩ Ichaca, yo̧requedemȩ. Na̧ea̧ri ja̧ji̧ri̧ judiro̧ burorë cjo̧ro̧mi̧ dari̧ cjo̧ro̧padirȩ. O ji̧ri̧ ja̧ oa ja̧bepe cjiaji̧ri̧rȩ cjo̧ro̧padirȩ aradiäji̧ri̧rȩ. Ado burorë cjo̧ro̧mȩräpȩ järätä chjaparea̧ dapadirȩ. 15Ado chiri chjadë tjamo̧ oa mitërea̧ dapadiro̧jo̧ȩ. Jabo cjäri̧ madirȩ, judiro̧ na̧e chiaji̧ri̧rȩ cjo̧ro̧tärea̧ ji̧, na̧e chiadë maearë cjo̧ro̧padirȩ. Ado pio ju̧i̧iä chjaodëri̧ boadäräa̧ oa cjiapadirȩ o pio ji̧ri̧iä. Ado pio ji̧ri̧ dëbëpe chjaotärea̧ ji̧, dëbëpe chjaorea̧ dadëpadiro̧jȩrȩ. Jabechji̧ pio ji̧ri̧ ja̧ mu̧i̧tjoi̧ maearë cjiadiäpadirȩ pio jibë chjadëri̧ ja̧bepa tänȩa̧ oaiä —yo̧mȩrȩ ni̧bä chjaorëremȩdejȩ Ichaca ju̧i̧ Jacobo judi.
Da̧de pio judiri ja̧ji̧ri̧ pio judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩ joja oa Jacobo judi
16Ado pio ju̧i̧ ni̧bä chjao ëte ano̧ mire ni̧bä chjaorëremȩdejȩ Da̧de quȩmȩ ju̧i̧. Ja̧di ta̧rëri̧ yo̧mȩrȩ ni̧bä chjaoa̧dejȩ:
—Danȩ Da̧de, yo̧requedemȩ. Na̧ea̧ri ja̧ji̧ri̧ pio judiro̧, jabechji̧ jibëa̧ chja̧oerämo̧ cjo̧ro̧padirȩ, ado cja̧rȩmo̧ ja̧ chja̧oerädë. Aja̧, pio ji̧ri̧ ja̧ pumȩ judiro̧ jabechji̧ pio ji̧ri̧ ja̧ chja̧oerämo̧ cjo̧ro̧padirȩ. Aja̧, Icharai pio judiri ja̧ji̧ri̧ pumȩ pio judiro̧ jibëa̧ chja̧oerä cjo̧ro̧mi̧ dari̧ cjo̧ro̧padirȩ peaja̧di. 17Ado danȩ Da̧de, järea̧ no̧ yuroro tari chamȩ pomi̧ darë cjo̧ro̧padirȩ na̧ea̧ri ja̧ji̧ri̧ pio judiro̧. Aja̧, uapai̧ daji̧ri̧rȩ cjo̧ro̧padirȩ. Danȩ, porë yae ta ju oa idë juia̧ oaiä cjatäpai̧ dade davä uë chamȩ pio judi. Ado peaja̧dimi̧ dari̧ japapadiro̧jȩrȩ o ji̧ri̧ na̧ea̧ri ja̧ji̧ri̧ pio judiro̧ —yo̧mȩrȩ ni̧bä chjaorëremȩdejȩ Da̧de pio ju̧i̧.
18Ado ja̧dëa ji̧ Ütë tjamo̧ pio ju̧i̧ jo̧rȩtamȩrȩ ja̧di ta̧rëri̧ yo̧rëremȩdejȩ Jacobo judi:
—Jeova, jidatarequedemȩ coa chjätärea̧ yürüpea̧ ji̧ —yo̧mȩrȩ yo̧rëremȩdejȩ Ütë tjamo̧ pio ju̧i̧.
Ga pio judiri ja̧ji̧ri̧ pio judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩ joja oa Jacobo judi
19Ado ja̧dëa ji̧ ano̧ mire ni̧bä chjaorëremȩdejȩ Ga quȩmȩ pio ju̧i̧. Ja̧di ta̧rëri̧ yo̧mȩrȩ ni̧bä chjaoa̧dejȩ:
—Danȩ Ga, yo̧requedemȩ. Pumȩ chjadëdë pio judiro̧ acji jäpadiro̧jȩrȩ na̧ea̧ri ja̧ji̧ri̧ pio ji̧ri̧. Aja̧ davä, acji jäpadiro̧jȩrȩ jabo cjäri̧ madiro̧jȩrȩ, boadärärea̧ dadëpadiro̧jȩrȩ. Jabechji̧ na̧ea̧ri ja̧ji̧ri̧ pio judiro̧ goae tarari̧ dëbëpe chjaoji̧ri̧rȩ jaepe ma̧ȩpadiro̧jȩrȩ jachi oa —yo̧mȩrȩ ni̧bä chjaorëremȩdejȩ Ga pio ju̧i̧ Jacobo judi.
Ache pio judiri ja̧ji̧ri̧ pio judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩ joja oa Jacobo judi
20Ado judiri ano̧ mire ni̧bä chjaorëremȩdejȩ Ache pio ju̧i̧. Ja̧di ta̧rëri̧ yo̧mȩrȩ ni̧bä chjaoa̧dejȩ:
—Danȩ Ache, yo̧requedemȩ. Na̧ea̧ri ja̧ji̧ri̧ pio judiro̧ jabëdiädëpadirȩ jurarea̧ oa. A̧dë chjäte chjacjiamȩ tjamo̧ oa goapadiro̧jo̧ȩ jibëa̧ tjado oa. Chiri ütërë juraji̧ri̧mi̧ dari̧ jurapadirȩ jurarea̧ goae tjamo̧ oa —yo̧mȩrȩ ni̧bä chjaorëremȩdejȩ Ache pio ju̧i̧.
Netari pio judiri ja̧ji̧ri̧ pio judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩ joja oa Jacobo judi
21Ado judiri ano̧ mire ni̧bä chjaorëremȩdejȩ Netari pio ju̧i̧. Ja̧di ta̧rëri̧ yo̧mȩrȩ ni̧bä chjaoa̧dejȩ:
—Dane Netari, yo̧requedemȩ. Na̧ea̧ri ja̧ji̧ri̧ pio judiro̧, jabechji̧ böarë oëra̧ti̧ oa goae tarari̧ bagurayi̧mi̧ dari̧ cjo̧ro̧padirȩ, jare chjadüa̧ cjiaji̧ri̧mi̧ dari̧. Ado jibëa̧ bori̧ ji̧ri̧ ararä, jabechji̧ a̧dë chjätë chjacjiamȩri̧ cjia maea oa nö̧ripadiro̧jȩrȩ —yo̧mȩrȩ ni̧bä chjaorëremȩdejȩ Netari pio ju̧i̧.
Joche pio judiri ja̧ji̧ri̧ pio judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩ joja oa Jacobo judi
22Ado Netari pio ju̧i̧ ni̧bä chjao ëte ano̧ mire ni̧bä chjaorëremȩdejȩ Joche pio ju̧i̧. Ja̧di ta̧rëri̧ yo̧mȩrȩ ni̧bä chjaoa̧dejȩ:
—Danȩ Joche, yo̧requedemȩ. Na̧ea̧ri ja̧ji̧ri̧ pio judiro̧ dürü yuroro cjiamȩ uva tomi̧ dari̧ cjo̧ro̧padirȩ uva ji̧ra̧ri̧ chiamȩ tomi̧ dari̧. Jabechji̧ tutia̧ tjoromo̧ cjiadëde uva to a̧ üdë, jabo tutia̧ oëräpȩ barade. Peaja̧dimi̧ dari̧ cjo̧ro̧padirȩ na̧ea̧ri ja̧ji̧ri̧ pio judiro̧, no̧i̧dë tjamo̧pe bagarea̧mi̧ dari̧. 23,24Ado ërecjiaji̧ri̧ judiro̧ pio ji̧ri̧iäpȩmo̧ ji̧dë ma ae chjaoräbo, ma̧ cjüëtüri̧ jo̧rȩtaji̧ri̧rȩ ma̧ȩ goaedëti̧ oa yo̧ chjaoräbo, jabechji̧ na̧ea̧ri ja̧ji̧ri̧ pio judiro̧ tjamo̧i̧ cjiari̧ dëbë apadiro̧jȩrȩ. Tjamo̧ davä. Jibëa̧ ichi jura̧ tjätjäpë ami̧ dari̧ quirapadiro̧jo̧ȩ jibëa̧ tjibato cä oa goae tarari̧ apea̧ oa. Jabechji̧ Jacobo ja̧ Ütë pio judi yürüa̧ oa, a̧dë chjäte ju chiamȩ Ütë pio judi ju chiarea̧ yürüa̧ oa, ju chiaji̧ri̧mi̧ dari̧ cjo̧ro̧padirȩ na̧ea̧ri ja̧ji̧ri̧ judiro̧. Aja̧, ju chiaji̧ri̧mi̧ dari̧ cjo̧ro̧padirȩ chjadëri̧ dëbëpe chjaopea̧ oa pio jibë eadëji̧ri̧ pio ji̧ri̧. Aja̧ ca̧ ja, Icharai ja̧ Ütë pio judi ju chia tjamo̧mȩ tara, jabechji̧ chjadëri̧ jidapadejȩrȩ. Chjadëri̧ a̧dopadejȩrȩ. 25Tjamo̧ davä. Na̧ ama̧i̧ ja̧ Ütë pio judi chjadëri̧ a̧dopadimȩ Joche, na̧ea̧ri ja̧ji̧ri̧ pio ji̧ri̧bo. A̧dë chjäte ju chiamȩ Ütë pio judi chjadëri̧ yürüpadejȩrȩ jabëdiärea̧ decjiari̧. Jabechji̧ pio ji̧ri̧iäpȩmo̧ cjäri̧ri̧ cjiamȩrȩ chjadëri̧ cjü tänȩpadejȩrȩ uëri pio judiri. Ado tade puëri pio judiri cjitëmȩ uira̧, dürüromȩ uira̧ chjadëri̧ cjo̧ro̧ tänȩpadejȩrȩ, tjarämȩ uira̧ a̧de. Jabechji̧ chjadëri̧ cjo̧ro̧rea̧ yürüpadejȩrȩ. Ado bori̧ no̧i̧dë tjamo̧ oa nö̧rirea̧ yürüpadejȩrȩ. Ado jibëa̧ baca oa, jibëa̧ oveja oa peaja̧di no̧i̧dë tjamo̧ oa ararea̧ yürüpadejȩrȩ chirirä cjo̧ro̧ji̧ri̧ chjö̧na̧i̧ oa. 26Aja̧, ja̧di ta̧rëri̧ yo̧mȩrȩ goë cjo̧dërequede Ütë tjamo̧ pio ju̧i̧iä na̧ea̧ri ja̧ji̧ri̧ pio ji̧ri̧ chjadëri̧ a̧dopea̧ oa. Jabechji̧ ca̧ ama̧i̧rea̧ judi goë cjo̧dërërea̧mi̧, ca̧ jadama̧i̧rea̧ judi goë cjo̧dërërea̧mi̧ goë cjo̧dëdërequede, jabo ji̧dë u̧i̧ goë cjo̧dëmȩrȩ goë cjo̧dërequede davä na̧ea̧ri ja̧ji̧ri̧ pio ji̧ri̧ chjiari. Danȩ, ya̧mi̧ üdë boi̧dëde. Chjacjiamȩ tjamo̧de. Goarijädëmȩmi̧ dari̧ china̧mȩde. Jabo ja̧di dari̧ cjiaräbo, jabechji̧ ya̧mi̧ üdë yuropapade. Jabo danȩ ca̧ ja, Ütë tjamo̧ judi na̧ea̧ri ja̧ji̧ri̧ pio ji̧ri̧iäpȩmo̧ chjadëri̧ a̧dopea̧ üdë yuropadëpade. Danȩ, tjamo̧i̧ cjiari̧ cjiadiäpamȩ ma̧ȩ maea oa yürürequedemȩ Joche, na̧ea̧ri ja̧ji̧ri̧ pio ji̧ri̧ ja̧ maea oa. Jabechji̧ pio mȩnȩrenȩ china̧chjari̧ tutia̧ oa cjiami̧ dari̧ cjiarëremȩ judi. Ado pio ju̧i̧iä tjamo̧ yo̧mȩmi̧ dari̧ cjia tjamo̧renȩ mȩnȩ, na̧ oti̧ pio judiro̧dë —yo̧mȩrȩ ni̧bä chjaorëremȩdejȩ Jacobo judi Joche pio ju̧i̧iäpȩmo̧.
Bejami̧ pio judiri ja̧ji̧ri̧ pio judiro̧ ja̧di dari̧ cjo̧ro̧bëmi̧ ma̧ȩ yürürëremȩdejȩ joja oa Jacobo judi
27Ado judiri ano̧ mire ni̧bä chjaorëremȩdejȩ Bejami̧ pio ju̧i̧. Ja̧di ta̧rëri̧ yo̧mȩrȩ ni̧bä chjaoa̧dejȩ:
—Danȩ Bejami̧, yo̧requedemȩ. Na̧ea̧ri ja̧ji̧ri̧ pio judiro̧ aure chjuamȩ tjamo̧mi̧ darë cjo̧ro̧padirȩ lobo quȩmȩmi̧ darë. Danȩ, aure chjuamȩ üdë peadai̧rä acji bagura ëte jurade. Ado ja̧dëa ji̧ ji̧tärä cjiadiäa̧mȩ pio ju̧i̧ ëba juradejȩrȩ o ji̧ri̧. Peaja̧dimi̧ dari̧ cjo̧ro̧padirȩ na̧ea̧ri ja̧ji̧ri̧ judiro̧ —yo̧mȩrȩ ni̧bä chjaorëremȩdejȩ Jacobo judi Bejami̧ pio ju̧i̧.
28Aja̧, ja̧di ta̧rëri̧ yo̧mȩrȩ ni̧bä chjaomȩrȩ ano̧ mire ni̧bä chjaorëremȩdejȩrȩ jibëa̧ u̧ri̧ ji̧ri̧ ütëbo oa Icharai judi. Ado ju̧i̧ ja̧ u̧ri̧ judiro̧, jabechji̧ 12dirȩ. Ado pio jiro pumȩ pio judiri ja̧ji̧ri̧ judiro̧, 12 bubape bagarëreji̧ri̧dirȩ.
Jacobo judi ja̧boa̧de
29Ja̧dëa ji̧ Jacobo judi yo̧rëremȩdejȩrȩ jibëa̧ u̧ri̧ ji̧ri̧:
—‘Aja̧, cüdë ja̧bopea̧ querediä tjamo̧quëda’ quëna̧ jo̧rȩtarequede ca̧ u̧ri̧. Ja̧di tara yo̧requededibe. Danȩrȩ, cüdë ja̧boa̧rä, jabechji̧ chjadëri̧ na̧ra̧chji̧coe ca̧ ama̧i̧rea̧rȩ na̧ra̧ oa cjiamȩräpȩ, ta̧dë cjararä ju̧ri̧. Aja̧, itita quȩmȩ ja̧ chiriräpȩ yuro, Epjono̧ quȩmȩ pio ju̧i̧ ja̧ chiriräpȩ cjiamȩ ta̧dë cjararäpȩ yuro na̧ra̧chji̧coe cüdë ja̧boa̧rä. 30Aja̧, Canaa̧ chiriräpȩde. Macapera quȩmȩ chiri boi̧chji̧räpȩde Mamare quȩmȩ to chjiaräpȩmo̧. Ado pio jiro chiri oa, pio jiro ta̧dë cjara oa gatërëremȩde Abaraa̧rea̧ judi Epjono̧ quȩmȩ pio ju̧i̧iä. Pumȩrȩ na̧ra̧ oa cjiapea̧ oa gatërëremȩdejȩ. 31Ado pio ju̧i̧iä Abaraa̧ judi, ado jibëa̧ iei̧ Chara pio jini̧, jabechji̧ pio idëpȩ na̧ra̧ oa cjiadirȩ. Ado Icha judi, jibëa̧ iei̧ jini̧, Rebeca jini̧ peaja̧di pio ju̧ri̧pȩ na̧ra̧ oa cjiadirȩ. Ado pio ju̧ri̧pȩ na̧ra̧requede ca̧ iei̧rea̧ ji̧, Dea quȩyi̧rea̧ ji̧. 32Aja̧, pio jiro ta̧dë cjara chiamȩ chiri üdë gatëa̧ oa cjiarëremȩde itita quȩmȩ pumȩ pio ju̧i̧iä. Aja̧, pio ju̧ri̧pȩ na̧ra̧chji̧coe ca̧ u̧ri̧, cüdë ja̧boa̧rä —yo̧mȩrȩ yo̧rëremȩdejȩrȩ jibëa̧ u̧ri̧ ji̧ri̧ Jacobo judi.
33Ado Jacobo judi jibëa̧ u̧ri̧ ji̧ri̧ ni̧bä chjaoa̧ duri oa, ado a̧rȩrëremȩde mo̧a̧pea̧ oa. Ado chjaodëri̧ ja̧boeno̧rëremȩde.
Currently Selected:
Taruparea̧ Ma̧ȩ 49: Pume
Highlight
Share
Compare
Copy
Want to have your highlights saved across all your devices? Sign up or sign in
©2021 Global Partners, All Rights Reserved
