Taruparea̧ Ma̧ȩ 45

Joche judi pio jȩa chjiari daba tänȩrëremȩdejȩrȩ jibëa̧ pumȩ ji̧ri̧

1Ado Joche judi jojadi pio ju̧i̧iä ta̧rëa̧ oaiä ana̧ tjamo̧ri̧ taramȩpea̧de ejaro cjiapea̧ ji̧. Pio ju̧i̧iämȩrȩ chjaodëri̧ yo̧rëremȩdejȩrȩ jibëa̧ mu̧i̧tjoi̧ ji̧ri̧: "A̧dë go̧düchji̧coe mȩnȩro̧ ütëborë." Jabechji̧ pio ji̧ri̧ ja̧ dachoro ejaro cjiadëri̧ cjiamȩrȩ to̧bari̧ yo̧rëremȩdejȩrȩ go̧dütä. Ado pio ju̧i̧iä ütëborë chjaodëri̧ go̧deno̧a̧dirȩ. Ado judiro̧ go̧düa̧rä, ado Joche judi jibëa̧ pumȩborë jibëa̧ma̧i̧ cjiadiäa̧rä, jabechji̧ pio jȩa chjiari na̧rȩrëremȩdejȩrȩ Joche judi. 2Ado ja̧dëa ji̧ jibëa̧ pumȩ pio ji̧ri̧iä, jabechji̧ ana̧ tjamo̧ri̧ ejaro cjiamȩpea̧de oëra̧ti̧ oa ta̧rërea̧mi̧ dari̧. Judi ejaro cjia̧ üdë ana̧ri̧ boadäräa̧ oaiä, o judiro̧, Ejitoräpȩ cjo̧ro̧ji̧ri̧ judiro̧ no̧i̧dërë ta̧rërëreji̧ri̧diro̧jo̧ȩ goae tarari̧ ejaro cjiamȩ oa. Ado pio ji̧ri̧iä goë ta̧rë marëreji̧ri̧dirȩ pjarao̧ ja̧ bëräpȩ cjo̧ro̧ji̧ri̧ pio judiro̧borë. 3Ado Joche judi pio jȩa chjiari na̧rȩmȩrȩ ja̧di ta̧rëri̧ yo̧rëremȩdejȩrȩ jibëa̧ pumȩ ji̧ri̧:

—Danȩrȩ, Joche pio judirequede. Ado ca̧ ama̧i̧ judi, ¿jabëdëde? ¿Jabëti̧ cjiadëde? —iëno̧ë ta̧rëa̧dejȩrȩ.

Jabo Joche ja̧ pumȩ judiro̧ uapaji̧ri̧rȩ darëreji̧ri̧diro̧jo̧ȩ. Dëbë ni̧bärea̧ dadëa̧diro̧jo̧ȩ. 4Jabo Joche judi yo̧a̧dejȩrȩ:

—Danȩrȩ, uapadëchji̧vä. Pio coaiäpȩ jana̧chji̧vä —yo̧a̧dejȩrȩ.

Ado pio ju̧i̧ ta̧rëa̧ oaiä, pio ju̧i̧iäpȩ jäa̧dirȩ. Ado ja̧dëa̧ ji̧ Joche judi yo̧a̧dejȩrȩ:

—Danȩrȩ ca̧ oti̧, Joche pio judi tjamo̧requede —yo̧a̧dejȩrȩ—. Dibëa̧ ayi̧ma̧i̧ pio judi tjamo̧requede. Mȩnȩro̧ no̧mȩ Ejitoräpȩ jäji̧ri̧ oa gatë tänȩrërea̧ pio judi tjamo̧requede, ado cja̧rȩmo̧dë. 5Jabo danȩrȩ ca̧ oti̧, mȩnȩro̧ pio coa japarërea̧ pio ju̧i̧iä a̧dë chjäte gitori̧ jo̧rȩtadëchji̧vä. Jabechji̧ cjatëcjie jo̧rȩtachji̧vä. Ütë tjamo̧ pio judi chjadüa̧ oa pio jauëräpȩmo̧ ma̧na̧requede pumȩ pio ji̧ri̧ chjätä tänȩpea̧ oa. Jabechji̧ dibëa̧ yaboi̧ go̧düna̧ra̧requede Ütërë tänȩa̧ oa. Ja̧di tara ana̧ri̧ jo̧rȩtadëchji̧vä. 6Danȩrȩ, pea chjätäa̧de yo̧a̧ri̧ ui üdë, jurarea̧ yürüdërea̧ ui üdë. Ado jabë pjärämȩdiibe. Jabë 5 ui pjärämȩdiibe. Tjamo̧ri̧ yo̧requededibe. Jabë 5 ui nö̧ta jurarea̧ yürüdëpadiibe chiri üdë. Jabechji̧ ponȩji̧ri̧borë jurarea̧ mitërea̧ dadëpadirȩ pumȩ judiro̧. Jabë pjärämȩ jabëdiibe. 7Jabo danȩrȩ, jabërä chjadürëremȩdique Ütë tjamo̧ judi dibëa̧ yaboi̧ go̧düna̧ra̧pea̧ oa, cüdë pio dibë chjadëri̧ a̧dopea̧ oa, mȩnȩro̧ ja̧bochea oa. Jabechji̧ dibëa̧ri ja̧ji̧ri̧ pio judiro̧ goëje ji̧ra̧pe järea̧mi̧ dari̧ jabërä chjadürëremȩdique Ütë tjamo̧ judi, chjadëri̧ ütarë jo̧rȩtamȩrȩ. 8Tjamo̧ davä. Ütë tjamo̧ pio judi tjamo̧de pio coa jauëräpȩmo̧ chjadürëremȩ judi, mȩnȩro̧dë. Ado Ütë tjamo̧ pio judi tänȩa̧ oa, jabechji̧ pjarao̧ pio ju̧i̧ chi̧dëeamȩpea̧requede. Pio ju̧i̧ ja̧ bë oa tjamo̧ jidamȩpea̧requede. Aja̧, Ütë tjamo̧ pio judi tänȩa̧ oa, Ejito chiri tjamo̧ cjo̧ro̧mȩpea̧requede cüdë. 9Ado yaba̧ jo̧ȩra̧pe jächji̧vä ca̧ ama̧i̧ ju̧i̧iäpȩ. Ado ibëa̧ ama̧i̧ ju̧i̧ da̧rä, ja̧di ta̧rëri̧ yo̧tä earequededibe: “Aja̧, ja̧di ta̧rëri̧ yo̧dimȩ na̧ ja judi, Joche quȩmȩ pio judi” yo̧eji̧ri̧renȩro̧jo̧ȩ. “Danȩ ama̧i̧, Ütë tjamo̧ pio judi tänȩa̧ oa Ejito chiri tjamo̧ jidamȩpea̧requede cüdë. Goëdaera̧coe ama̧i̧. Jo̧ȩra̧pe goëdaera̧coe. 10Ca̧ queri̧räpȩ, Goche quȩmȩräpȩ cjo̧ro̧ tänȩparequedemȩ. Aja̧, ju̧ri̧pȩ cjo̧ro̧parenȩ na̧ u̧ri̧ pio ji̧ri̧ nö̧ta, na̧ jadama̧i̧ pio ji̧ri̧ nö̧ta. Na̧ baca oa, na̧ oveja oa, na̧ yae oa goamȩrȩ cjo̧ro̧parenȩ pio ju̧ri̧pȩ. Na̧ea̧ oa chjö̧na̧i̧ oa goamȩrȩ cjo̧ro̧parenȩ pio ju̧ri̧. Ja̧di dari̧ cjo̧ro̧parenȩ ama̧i̧, ca̧ queri̧räpȩ” yo̧eji̧ri̧renȩro̧jo̧ȩ. 11Jabechji̧ mȩnȩ ma̧na̧rä, chjadëri̧ yürüparequedemȩ jurarea̧ oa. Mȩnȩ jurapea̧ oa, na̧ u̧ri̧ judiro̧ jurapea̧ oa, pio mȩa nö̧ta ma̧na̧ji̧ri̧ pio judiro̧borë jurapea̧ oa, chjadëri̧ yürüparequedemȩ jabëdiärea̧ decjiari̧. Jabëdiibe chiri üdë. Jurarea̧ yürüdëdiibe. Aja̧, 5 ui nö̧ta jurarea̧ oa yürüdëpadiibe. Jabë pjärämȩdiibe. Jurarea̧ oa yürüdëpade chiri üdë, jabo pio yoaiä jabechji̧, chjadëri̧ jurarea̧ daparenȩ pio coaiä. Ja̧di tara pio jauëräpȩmo̧ ma̧na̧tä earequedemȩ ama̧i̧” yo̧eji̧ri̧renȩro̧jo̧ȩ ibëa̧ ama̧i̧ ju̧i̧. Aja̧, pio dibëiä ma̧ȩ chjadüreconȩ —yo̧mȩrȩ yo̧rëremȩdejȩrȩ jibëa̧ pumȩ ji̧ri̧ Joche judi.

12Ado Joche judi jibëa̧ ama̧i̧ pio ju̧i̧ ma̧ȩ yürüa̧ duri oa, ado chjereno̧ ni̧bä chjaorëremȩdejȩrȩ jibëa̧ oti̧ ji̧ri̧. Ja̧di ta̧rëri̧ yo̧mȩrȩ ni̧bä chjaorëremȩdejȩrȩ:

—Danȩrȩ ca̧ oti̧, ma̧ȩ yürüa̧mȩ oa irä ta̧rëa̧renȩro̧coe. Irä daea̧renȩro̧coe. Bejami̧ pio judiborë ta̧rëri̧ ma̧ȩ yürüa̧requededibe. 'Joche judi, ja̧di ta̧rëri̧ yo̧a̧dida' quëna̧ daba marenȩro̧coe. 13Ado chjadëri̧ yo̧chji̧jo̧ȩ ca̧ ama̧i̧ ju̧i̧. 'Joche pio judide mȩa ma̧ȩ yürüa̧mȩ judi' yo̧ji̧ri̧rȩ yo̧chji̧jo̧ȩ. Cüdë Ejito chiri tjamo̧ jidamȩpea̧ pio ju̧i̧ chjiari chjadëri̧ ni̧bä chjaochji̧jo̧ȩ. Mȩnȩro̧ pio yoaiä da̧ pio ju̧i̧bo ni̧bä chjaochji̧jo̧ȩ. Jo̧ȩra̧pe jächji̧vä ca̧ ama̧i̧ ju̧i̧ chjadëri̧ ëba ma̧na̧pea̧ oa —yo̧mȩrȩ yo̧rëremȩdejȩrȩ jibëa̧ pumȩ ji̧ri̧ Joche judi.

14Ja̧dëa ji̧ Joche judi ida̧dejȩ jibëa̧ ayi̧ma̧i̧ oa, Bejami̧ pio ju̧i̧. Ejaro cjiamȩrȩ ida̧dejȩ. Ado Bejami̧ pio judiborë ejaro cjiamȩpea̧de. 15Ado Bejami̧ pio ju̧i̧ ida̧ duri oa chamachoro ya iburëremȩdejȩrȩ jibëa̧ pumȩ ji̧ri̧ ütëbodärä oa. Ejaro cjiamȩrȩ ida̧dejȩrȩ. Ado Joche judi ja̧di dari̧ japea̧ oaiä, jabechji̧ uapadëji̧ri̧pea̧diro̧jo̧ȩ jabo cjatäcjie jo̧retarea̧ darëreji̧ri̧diro̧jo̧ȩ. Ado pio ju̧i̧iä judiro̧ Joche pio ju̧i̧ ni̧bädërërea̧ ji̧, jabechji̧ taruparëreji̧ri̧dirȩ pio ju̧i̧ nö̧ta ni̧bä chjaopea̧ ji̧.

Joche ja̧ pumȩ judiro̧ Ejitoräpȩ ma̧na̧tä earëremȩde pjarao̧ judi

16Ado pjarao̧ ja̧ bëräpȩ cjo̧ro̧ji̧ri̧ pio judiro̧ goë goë ta̧rërëreji̧ri̧dirȩ Joche ja̧ pumȩ pio ji̧ri̧ chjiari. "Aja̧, Joche ja̧ oti̧ judiro̧ jana̧dirȩ" yo̧a̧ oa ta̧rëa̧ oaiä, jabechji̧ ma̧ chiadëri̧ cjiape baga marëreji̧ri̧dirȩ ütëborë, pjarao̧ pio judiborë. 17Ja̧dëa ji̧ pjarao̧ judi yo̧a̧dejȩ Joche ju̧i̧:

—Danȩ, yo̧jȩrȩ na̧ pumȩ ji̧ri̧ jibëa̧ buro oa jëdano̧tä, jurarea̧ oa chia baäpea̧ oa jëdano̧tä Canaa̧ quȩmȩ chiriräpȩmo̧ baäpea̧ oa. 18Ado ju̧ri̧pȩ go̧düdärä ëte, jibëa̧ ama̧i̧ pio ju̧i̧, jibëa̧ pumȩ pio ji̧ri̧ chjadëri̧ ëba ma̧na̧tä yo̧emȩrenȩjȩrȩ judiro̧ pio coaiäpȩ chjadëri̧ cjo̧ro̧pea̧ oa. Jabechji̧ chiri chjadë tjamo̧ oa yürüparequedejȩrȩ jënȩro̧ cjo̧ro̧pea̧ oa. Ado Ejito chirirä ja̧ jurarea̧ pio ju̧i̧bo yürüparequedejȩrȩ. Aja̧, ja̧di ta̧rëri̧ yo̧mȩrȩ yo̧jȩrȩ. 19Ado pio ju̧i̧ uëri̧ chjadëri̧ yo̧jȩrȩ. Jabechji̧ Ejitoro ja̧ yae chara ji̧ra̧ oa mitëtädirȩ. Jabechji̧ jibëa̧ ivi ji̧ri̧, jibëa̧ bori̧ pio ji̧ri̧, jibëa̧ ama̧i̧ pio ju̧i̧ chjadëri̧ ëba ma̧na̧pea̧ oa mitëtädirȩ. 20Ado danȩ, jibëa̧ oa goa ma̧na̧dëtärëreji̧ri̧dirȩ jabo a̧dë ma̧na̧täreji̧ri̧diro̧jo̧ȩ. Jabechji̧ Ejito chiriri ja̧ ba chia tjamo̧ oa yürüparequedejȩrȩ dami̧ti̧ oa jënȩro̧ chjadëri̧ cjo̧ro̧pea̧ oa. Pio ju̧i̧iä jabechji̧, jibëa̧ oa a̧dë ma̧na̧täreji̧ri̧diro̧jo̧ȩ. Aja̧ Joche, ja̧di ta̧rëri̧ yo̧jȩrȩ na̧ pumȩ ji̧ri̧ —yo̧mȩrȩ yo̧rëremȩdejȩ Joche ju̧i̧ pjarao̧ pio judi.

21Ado pjarao̧ judi yo̧a̧mi̧ japarëreji̧ri̧dirȩ Icharai ja̧ u̧ri̧ judiro̧. Ado Joche judi yürürëremȩdejȩrȩ yae chara oa jibëa̧ pumȩ pio ji̧ri̧ chjadëri̧ chia ma̧na̧pea̧ oa. Pjarao̧ judi yo̧a̧mi̧ yürürëremȩdejȩrȩ. Ado peaja̧di yürüa̧dejȩrȩ jurarea̧ oa chjadëri̧ jurariä jäpea̧ oa. 22Ado jibëa̧ oti̧ judiro̧ chjadëri̧ ano̧ mire ina̧pea̧ oa, jabechji̧ chjibo pea chja oa yürürëremȩdejȩrȩ peaja̧di cja̧rȩmȩ oa. Jabo jibëa̧ ayi̧ma̧i̧ oa, Bejami̧ pio ju̧i̧, jabechji̧ 5 chjibo oa yürürëremȩdejȩ ano̧ mire ina̧rea̧ ji̧ra̧ oa goapea̧ oa. Ado 300 chëre a̧de yürüa̧dejȩ peaja̧di, parata chëre oa. 23Ado jibëa̧ ama̧i̧ ja̧ oa peaja̧di chjadürëremȩdejȩ. Aja̧, 10 buro oa chjadüa̧dejȩ Ejitori ja̧ oa chia jäpea̧ oa. Ba chiati̧ oa, dami̧ti̧ oa chia jäpea̧ oa chjadüa̧dejȩ. Ado ju̧i̧ uëri a̧de chjadüa̧dejȩ 10 buro ivi oa peaja̧di, dami̧ti̧ jurarea̧ oa chia jäpea̧ oa. Ado tirigo cho chia oa, chja̧pe chia oa, dami̧ti̧ jurarea̧ chia oa chjadüa̧dejȩ peaja̧di. Jabechji̧ jibëa̧ ama̧i̧ judi chjadëri̧ jurariä ma̧na̧pea̧ oa, jurarea̧ ji̧ra̧ oa chjadürëremȩdejȩ. Aja̧, ja̧di dari̧ japamȩrȩ chjadürëremȩde Joche judi jibëa̧ ama̧i̧ ja̧ oa, jibëa̧ pumȩ ja̧ oa. 24Ado ja̧dëa ji̧ Joche judi jibëa̧ oti̧ ji̧ri̧ yo̧rëremȩdejȩrȩ:

—Danȩrȩ, chjadëri̧ baächji̧vä. Jabechji̧ dëbë ni̧bätarea̧ decjiari̧ baächji̧vä. Dibëa̧ dëbëti̧ra̧ chia aechide yo̧rea̧ decjiari̧ baächji̧vä chjadëri̧ —yo̧mȩrȩ chi̧dëearëremȩdejȩrȩ jibëa̧ pumȩ ji̧ri̧ järea̧ no̧rä ju̧ri̧ chjadëri̧ ni̧bä chjaopea̧ oa.

Jacobo judi ta̧rërëremȩde Joche pio ju̧i̧ chjiari.

25Ado baärëreji̧ri̧dirȩ. Ejito quȩmȩ chiriri pio judiri go̧düji̧ri̧rȩ go̧düdärärëreji̧ri̧dirȩ Canaa̧ quȩmȩ chiriräpȩ. Ado japamitë chjätä ëte, go̧düdäräa̧dirȩ jibëa̧ ama̧i̧ ju̧i̧iäpȩ. 26Ado ni̧bä chjaorëreji̧ri̧diro̧jo̧ȩ jibëa̧ ama̧i̧ ju̧i̧ Joche pio ju̧i̧ chjiari.

—Danȩ ama̧i̧, Joche judi jabëde. Cjo̧ro̧de. Ejito chiri oa tjamo̧ cjo̧ro̧mȩrȩ cjo̧ro̧de —yo̧ji̧ri̧rȩ yo̧rëreji̧ri̧diro̧jo̧ȩ.

Ado Jacobo judi ju̧i̧ ta̧rëa̧ oaiä, jabechji̧ ni̧bärea̧ dadërëremȩde. 'Jabo cjäri̧ madiro̧coada, jo̧rȩtarea̧mi̧dë maea oa ni̧bä chjaodiro̧coada’ quëna̧ jo̧rȩtamȩrȩ mau maearë cjiadiärëremȩde, ana̧ri̧ jo̧rȩtamȩrȩ. 27Jabo Joche judi ma̧ȩ chjadüa̧ ma̧ȩ pio ju̧i̧ ni̧bä chjaoa̧ oaiä, ado Joche judi yae chara oa chjadüa̧ pio ju̧i̧ irä daea̧ oaiä, jënȩ ma̧na̧pea̧ yae chara oa daea̧ oaiä, 'jabechji̧ tjamo̧pamȩ jirodida, teracabari̧ ni̧bä chjaodë jirodiro̧coada’ quëna̧ jo̧rȩtamȩrȩ järi tjamo̧pe bagarëremȩde. 28Ja̧dëa ji̧ yo̧rëremȩde Icharai judi:

—Aja̧, tjamo̧ri̧ yo̧ jirorenȩro̧coe. Jabechji̧ quëna̧requededibe. 'Aja̧, ca̧ ja judi, Joche pio judi jabë cjo̧ro̧ jirodida' quëna̧ jo̧rȩtarequede yaba̧. Ado cüdë ja̧bobea yaboi̧ goë daepareconȩ —yo̧mȩrȩ yo̧rëremȩdejȩrȩ jibëa̧ u̧ri̧ ji̧ri̧ Jacobo judi.

Currently Selected:

Taruparea̧ Ma̧ȩ 45: Pume

Highlight

Compare

Copy