Taruparea̧ Ma̧ȩ 46

Jacobo judi baärëremȩde Ejitoräpȩ

1Ado pio ju̧i̧iä Icharai pio judi jibëa̧ bëri pio judiri go̧dürëremȩde jibëa̧ oa chjö̧na̧i̧ oa goa baämȩrȩ. Ado Becheba quȩmȩ bë ma̧ri̧räpȩ go̧düdäräa̧ ji̧, jabechji̧ cjo̧dëra̧ cäë yürürëremȩdejȩ Ütë tjamo̧ ju̧i̧. Jibëa̧ ama̧i̧ ja̧ Ütë pio ju̧i̧iäpȩmo̧, Icha quȩmȩ ja̧ Ütë pio ju̧i̧iäpȩmo̧ goe gu̧rori̧ cäë yürürëremȩdejȩ. 2Ado gȩnȩpea̧rä Ütë tjamo̧ judi ma̧ȩ yürürëremȩdejȩ Icharai pio ju̧i̧. Aja̧, ta̧rërämi̧ cjia tänȩmȩrȩ ëna̧diärëremȩdejȩ Jacobo ju̧i̧:

—Danȩ Jacobo —yo̧mȩrȩ ëna̧diäa̧dejȩ.

Ado Jacobo judi:

—Aja̧, pio yirequede —yo̧a̧.

3Ja̧dëa ji̧ Ütë tjamo̧ judi yo̧a̧dejȩ:

—Ütë tjamo̧ pio judirequede. Na̧ ama̧i̧ judi, Icha quȩmȩ pio ju̧i̧ ja̧ Ütërequede cüdë. Ado pio ju̧i̧iä uapadëvä. Ejito chiriräpȩ baäpea̧ ji̧ uapadëvä. Pio ju̧ri̧pȩ goëje ji̧ra̧ tjamo̧parȩparequedejȩrȩ na̧ea̧ri ja̧ji̧ri̧ pio ji̧ri̧. Jabechji̧ baävä uapadëmȩrȩ. 4Jabechji̧ chjadëri̧ ëba baäparequedemȩ Ejitoräpȩ. Ado japamitë chjätä ëte Ejito chiriri pio judiri go̧dü tänȩparequedejȩrȩ na̧ea̧ri ja̧ji̧ri̧ pio ji̧ri̧. Ado ji̧dë uëri yo̧requedemȩ peaja̧di. Danȩ, na̧ ja pio ju̧i̧ daparenȩjo̧ȩ Joche pio ju̧i̧. Pio mȩadi cjiapade mȩnȩ ja̧boa̧rä —yo̧mȩrȩ yo̧rëremȩdejȩ Jacobo ju̧i̧ Ütë tjamo̧ judi, ta̧rërämi̧ cjia tänȩmȩrȩ.

5Ja̧dëa ji̧ Jacobo judi Becheba quȩmȩ bë ma̧ri̧ri pio judiri godüpamȩ oa, jibëa̧ u̧ri̧ judiro̧ yae chararä bua tänȩrëreji̧ri̧diro̧jo̧ȩ. Jibëa̧ bori̧ ji̧ri̧, jibëa̧ ivi ji̧ri̧ peaja̧di bua tänȩa̧diro̧jȩrȩ Icharai ja̧ u̧ri̧ pio judiro̧. Pjarao̧rȩ chjadüa̧ yae chararä bua tänȩa̧diro̧jȩrȩ. 6Ado ja̧dëa ji̧ go̧dümȩrȩ baärëremȩde Jacobo judi Ejitoräpȩ. Jibëa̧ pumȩ ütëborë baärëreji̧ri̧dirȩ peaja̧di. Ado jibëa̧ baca oa, jibëa̧ oveja oa, jënȩ Canaa̧räpȩ cjo̧ro̧ oa nö̧ta goa̧ chjö̧na̧i̧därä oa ma̧ȩ baärëreji̧ri̧diro̧jo̧ȩ. 7Ado jibëa̧ ja judiro̧, jibëa̧ jabi jini̧ro̧, jibëa̧ jadama̧i̧ judiro̧, jibëa̧ jada bori̧ jini̧ro̧, jibëa̧ jiama̧i̧ judiro̧, jibëa̧ jia bori̧ jini̧ro̧, ütëbodärärë baärëreji̧ri̧dirȩ Jacobo pio ju̧i̧ nö̧ta, cja̧rȩmȩrȩ a̧dë cjiadiädëri̧.

Dea jini̧ ëba ara̧ u̧ri̧ judiro̧ ja̧di quȩji̧ri̧rëreji̧ri̧dirȩ.

8Ejito chiriräpȩ baärëreji̧ri̧ pumȩ judiro̧, jabechji̧ Jacobo ja̧ pumȩ maeadirȩ, Icharai ja̧ pumȩ maeadirȩ. Ado ja̧di quȩji̧ri̧dirȩ judiro̧: Jacobo joja yabomȩ judi Rubȩ quȩmȩde. 9Ado ju̧i̧ ja̧ u̧ri̧ judiro̧ ja̧di quȩji̧ri̧dirȩ: Anoco, Pjaru, Echaro̧, ado Carami̧. Aja̧, ja̧di quȩji̧ri̧rëreji̧ri̧dirȩ Rubȩ ja̧ u̧ri̧ judiro̧.

10Ado Chimeo̧ ja̧ u̧ri̧ judiro̧ ja̧di quȩji̧ri̧rëreji̧ri̧dirȩ: Jemu̧e, Jami̧, Ojada, Jaquino̧, Choja, ado Chau. Aja̧, ja̧di quȩji̧ri̧dirȩ Chimeo̧ ja̧ u̧ri̧ judiro̧. Jabo Chau judi, Canaa̧ chiririyi̧ pio jini̧ ara̧ oa cjiarëremȩde.

11Ado Devi ja̧ u̧ri̧ judiro̧ ja̧di quȩji̧ri̧rëreji̧ri̧dirȩ: Gerocho̧, Coate, Merari. Aja̧, ja̧di quȩji̧ri̧dirȩ Devi ja̧ u̧ri̧ judiro̧.

12Ado Juda ja̧ u̧ri̧ judiro̧ ja̧di quȩji̧ri̧rëreji̧ri̧dirȩ: Ere, Ona̧, Chera, Pjare, ado Charo. Aja̧, ja̧di quȩji̧ri̧dirȩ Juda ja̧ u̧ri̧ judiro̧. Jabo Ere judi, Onaborë Canaa̧räpȩ ja̧borëreji̧ri̧dirȩ. Ado Pjare judi peaja̧di nö̧rirëremȩdejȩrȩ jibëa̧ u̧ri̧ ji̧ri̧. Echero quȩmȩ oa, Amu̧ quȩmȩ oa nö̧rirëremȩdejȩrȩ, Juda ja̧ jadama̧i̧ pio ji̧ri̧.

13Ado Ichaca̧ ja̧ u̧ri̧ judiro̧ ja̧di quȩji̧ri̧rëreji̧ri̧dirȩ: Tora, Pjua, Jobo, ado Chimirono̧. Aja̧, ja̧di quȩji̧ri̧dirȩ Ichaca̧ ja̧ u̧ri̧ judiro̧.

14Ado Chaburo̧ ja̧ u̧ri̧ judiro̧ ja̧di quȩji̧ri̧rëreji̧ri̧dirȩ: Cherede, Ero̧, ado Jarere. Aja̧, ja̧di quȩji̧ri̧dirȩ Chaburo̧ ja̧ u̧ri̧ judiro̧.

15Aja̧, pio judiro̧dirȩ Dea jini̧ ëba ararërea̧ u̧ri̧ judiro̧. Jacobo pio ju̧i̧ nö̧ta cjo̧ro̧rëreji̧ri̧dirȩ Padanarama quȩmȩräpȩ cjo̧ro̧rërea̧ ji̧. Ado ji̧ri̧ uëri ëbarëreji̧ri̧diro̧jȩ jibëa̧ jabi ji̧ peaja̧di, Dina quȩyi̧ ji̧. Ado Jacobo judi Dea pio ji̧ nö̧ta ëba ara̧ oaiä, ¿na̧pai̧ pumȩpea̧dirȩ? Na̧pai̧ pumȩpadëa̧dirȩ, jabechji̧ 33 pumȩpea̧dirȩ, ivi bori̧ jini̧ro̧, oari bori̧bo.

Chipa jini̧ ëba ara̧ u̧ri̧ judiro̧ ja̧di quȩji̧ri̧rëreji̧ri̧dirȩ

16Ado Ga ja̧ u̧ri̧ judiro̧ ja̧di quȩji̧ri̧rëreji̧ri̧dirȩ: Chjipio̧, Agi, Echebo, Chuni̧, Eri, Arodi, ado Aredi. Aja̧, ja̧di quȩji̧ri̧dirȩ Ga ja̧ u̧ri̧ judiro̧.

17Ado Ache ja̧ u̧ri̧ judiro̧ ja̧di quȩji̧ri̧rëreji̧ri̧dirȩ judiro̧: Ima̧, Ichua, Ichui, ado Beria. Aja̧, ja̧di quȩji̧ri̧dirȩ. Ado jojabi jini̧ Chera quȩyi̧nȩ. Ado Beria judi peaja̧di nö̧rirëremȩdejȩrȩ jibëa̧ u̧ri̧ ji̧ri̧. Ebe quȩmȩ oa, Maquiera quȩmȩ oa ëbarëremȩdejȩrȩ, Ache ja̧ jadama̧i̧ pio ji̧ri̧.

18Aja̧, pio judiro̧dirȩ Chipa jini̧ ëba ararërea̧ u̧ri̧ judiro̧ Jacobo pio ju̧i̧ nö̧ta. Ado Chipa jini̧ Dea ja̧ mu̧i̧tjoi̧ pio jini̧nȩ. Aja̧, Jacobo judi Dea ji̧ ëbarërea̧ ji̧, jojaȩte judi, Aba̧ pio judi yürürëremȩdejȩ jibëa̧ mu̧i̧tjoi̧ pio ji̧ Dea ji̧iäpȩmo̧. Chipa pio ji̧ yürürëremȩdejȩ. Ado Chipa jini̧ Jacobo pio ju̧i̧ nö̧ta ëba ara̧ oaiä, ¿na̧pai̧ pumȩpea̧dirȩ? Na̧pai̧ pumȩpadëa̧dirȩ, jabechji̧ 16 pumȩpea̧dirȩ.

Raque jini̧ ëba ara̧ u̧ri̧ judiro̧, ja̧di quȩji̧ri̧rëreji̧ri̧dirȩ

19Ado Raque jini̧ Jacobo pio ju̧i̧ nö̧ta ëba ararërea̧ judiro̧, yo̧a̧ri̧dirȩ. Joche, ado Bejami̧. Aja̧, ja̧di quȩji̧ri̧dirȩ. 20Ado Joche judi Achenata quȩyi̧ ji̧ ëbamȩrȩ nö̧rirëremȩdejȩrȩ jibëa̧ u̧ri̧ yo̧a̧ri̧ oa. Aja̧, Manache quȩmȩ oa, Epjarai̧ quȩmȩ oa nö̧ria̧dejȩrȩ Ejito quȩmȩ chiriräpȩ. Ado Joche ja̧ iei̧ jini̧, Achenata jini̧, Potipjera pio ju̧i̧ ja̧ jojabinȩ. Ado Potipjera judi Ono̧ quȩmȩ bë ma̧ri̧räpȩ cjo̧ro̧rëremȩde. Ado ju̧ri̧pȩ cjo̧ro̧ji̧ri̧ pio ji̧ri̧ chjiari goë tuti cjo̧dëmȩrȩ ja̧beparëremȩde jibëa̧ ütëti̧ pio ji̧ri̧iä.

21Ado Bejami̧ ja̧ u̧ri̧ judiro̧ ja̧di quȩji̧ri̧rëreji̧ri̧dirȩ: Bera, Beque, Achebe, Gera, Nama̧, Eji, Docho, Mupi, Upi, ado Arada. Aja̧, ja̧di quȩji̧ri̧dirȩ Bejami̧ ja̧ u̧ri̧ judiro̧. 22Ado Raque jini̧ Jacobo pio ju̧i̧ nö̧ta ëba ara̧ oaiä, ¿na̧pai̧ pumȩpea̧dirȩ? Na̧pai̧ pumȩpadëa̧dirȩ, 14 pumȩpea̧dirȩ.

Bija jini̧ ëba ara̧ u̧ri̧ judiro̧ ja̧di quȩji̧ri̧rëreji̧ri̧dirȩ

23-25Ado Bija jini̧ Jacobo pio ju̧i̧ nö̧ta ëba ararërea̧ judiro̧, yo̧a̧ri̧dirȩ. Da̧de, ado Netari. Aja̧, ja̧di quȩji̧ri̧dirȩ. Ado Da̧de ja̧ joja judi Uchimi̧ quȩmȩde. Pio ju̧i̧mo̧i̧ ëbarëremȩde. Ado Netari ja̧ u̧ri̧ judiro̧ ja̧di quȩji̧ri̧rëreji̧ri̧dirȩ: Jache, Guni̧, Jeche, ado Chiremȩ. Aja̧, ja̧di quȩji̧ri̧dirȩ Netari ja̧ u̧ri̧ judiro̧. Ado Bija jini̧, jabechji̧ Aba̧ ja̧ mu̧i̧tjoi̧rëreyi̧nȩ pearä judi. Jabo ja̧dëa ji̧ Jacobo judi Raque pio ji̧ ëbarërea̧ ji̧, Aba̧ judi yürürëremȩdejȩ jibëa̧ mu̧i̧tjoi̧ pio ji̧ Raque pio ji̧iäpȩmo̧. Ado Bija jini̧ Jacobo pio ju̧i̧ nö̧ta ëba ara̧ oaiä, ¿na̧pai̧ pumȩpea̧dirȩ? Na̧pai̧ pumȩpadëa̧dirȩ, 7 pumȩpea̧dirȩ.

26Ado pio ju̧i̧iä yo̧requededibe. Danȩrȩ, 66 pumȩ marëreji̧ri̧dirȩ Ejitoräpȩ go̧düdärärëreji̧ri̧dirȩ. Tjamo̧ davä. Jacobo pio ju̧i̧ nö̧ta go̧düdärärëreji̧ri̧ judiro̧, pio judiri ja̧ji̧ri̧ pio judiro̧, pio ju̧i̧ ja̧ goe pio judiri ja̧ji̧ri̧ pio judiro̧, jabechji̧ 66 pumȩ marëreji̧ri̧dirȩ. Jabo Jacobo ja̧ u̧ri̧ ja̧ ivi pio ji̧ri̧mo̧i̧ ütara̧ oa cjiadërëreji̧ri̧dirȩ Jacobo pio judiri ja̧dë tara. 27Ado Joche ja̧ u̧ri̧ judiro̧ yo̧a̧ri̧dirȩ. Ejitoräpȩ ara̧ oa cjiarëreji̧ri̧dirȩ. Jacobo pio ju̧i̧ nö̧ta go̧düdärädëa̧dirȩ. Ja̧di tara Jacobo ja̧ pumȩ judiro̧ Ejitoräpȩ go̧düdäräa̧ ji̧, jabechji̧ 70rë go̧düdärärëreji̧ri̧dirȩ.

Jacobo judi jibëa̧ pumȩborë go̧düdärärëreji̧ri̧dirȩ Ejitoräpȩ

28Ado judiro̧ baädäräpea̧ ji̧ queri̧diäa̧rä, Jacobo judi chjadürëremȩdejȩ Juda ju̧i̧ Joche pio ju̧i̧iäpȩmo̧ ma̧ȩ yürüpea̧ oa, Goche quȩmȩ chiriräpȩ chjadëri̧ dëbëdiäpea̧ oa. Ja̧dëa ji̧ Jacobo judi jibëa̧ pumȩborë Gocheräpȩ go̧düdäräa̧ ji̧, 29Joche judi jibëa̧ yae chara oa jëdano̧tä yo̧rëremȩdejȩrȩ jibëa̧ mu̧i̧tjoi̧ ji̧ri̧. Ado ja̧dëa ji̧ jëdano̧a̧ oa cjiarä jäeno̧a̧de jibëa̧ ama̧i̧ pio ju̧i̧ chjadëri̧ dëbëdiäpea̧ oa. Ado jibëa̧ ama̧i̧ pio ju̧i̧ damȩrȩ idarëremȩdejȩ. Ejaro cjiamȩrȩ idarëremȩdejȩ japamitë ana̧ri̧. 30Ja̧dëa ji̧ Icharai judi yo̧a̧dejȩ Joche ju̧i̧:

—Irä darequedemȩ ca̧ ja. Jabë pumȩmȩ oa darequedemȩ. Ado cüdë, yaba̧ ja̧borä judi, jabechji̧d, cüdë mȩa irä daea̧ tara —yo̧mȩrȩ yo̧rëremȩdejȩ Icharai judi Joche pio ju̧i̧iäpȩmo̧.

31Ja̧dëa ji̧ Joche judi yo̧a̧dejȩrȩ jibëa̧ oti̧ ji̧ri̧, jibëa̧ pumȩ ji̧ri̧, jibëa̧ ama̧i̧ pio ju̧i̧:

—Danȩrȩ ca̧ oti̧, goë daepareconȩ pjarao̧ ju̧i̧ pio dibë chjiari ma̧ȩ yürüpea̧ oa. Ja̧di ta̧rëri̧ yo̧pareconȩ. “Aja̧, ca̧ oti̧ judiro̧, ca̧ ama̧i̧ ja̧ pumȩ pio judiro̧, Canaa̧ quȩmȩ chiriräpȩ cjo̧ro̧rëreji̧ri̧ pio judiro̧, jabechji̧ ma̧na̧na̧ra̧dirȩ pio coadi cjo̧ro̧pea̧ oa” yo̧mȩrȩ yo̧pareconȩ. 32“Aja̧, jibëa̧ baca oa, jibëa̧ oveja oa, jibëa̧ oa chjö̧na̧i̧ oa ma̧ȩ ma̧na̧dirȩ” yo̧pareconȩ. “Jabechji̧ oveja jidaji̧ri̧rȩ cjo̧ro̧dirȩ. Baca ja̧bepaji̧ri̧rȩ cjo̧ro̧dirȩ” yo̧pareconȩ. Aja̧, ja̧di ta̧rëri̧ yo̧pareconȩ pjarao̧ pio ju̧i̧ pio dibë chjiari. 33Ado danȩrȩ ca̧ pumȩ, pjarao̧ judi dibë ëna̧diäa̧rä, ado pio dibëiä iëno̧ë ta̧rërä judi, “¿Tjana̧ oa ja̧bepe cjiaji̧ri̧rȩ cjo̧ro̧nȩrȩ?” yo̧mȩrȩ iëno̧ë ta̧rërä judi, 34jabechji̧ ja̧di ta̧rëri̧ dëbë yo̧pea̧ chiarenȩro̧jo̧ȩ: “Aja̧, a̧ro̧rȩ, na̧ mu̧i̧tjoi̧ pio judiro̧, jabechji̧ tocoi̧mi̧ri ja̧ oveja oa jidaji̧ri̧rȩ cjo̧ro̧ marea̧rȩ ibëa̧ ütëti̧ judiro̧ ja̧beparërea̧mi̧.” Aja̧, ja̧di ta̧rëri̧ dëbë yo̧chji̧jo̧ȩ. Ado ja̧di ta̧rëri̧ dëbë yo̧a̧ oaiä, jabechji̧ Goche quȩmȩ chiriräpȩ cjo̧ro̧rea̧ yürüpadidibe. Danȩrȩ ca̧ oti̧, Ejitoräpȩ cjo̧ro̧ji̧ri̧ judiro̧ ëba cjo̧ro̧dë madiro̧jȩrȩ oveja jidaji̧ri̧ pio ji̧ri̧. Cjarari̧ cjia dadiro̧jȩrȩ. Ja̧di tara Gocheräpȩ cjo̧ro̧rea̧ yürüpadidibe —yo̧mȩrȩ chi̧dëearëremȩdejȩrȩ jibëa̧ pumȩ ji̧ri̧ Joche judi judiro̧ pjarao̧ pio ju̧i̧ chjadëri̧ dëbë ni̧bäpea̧ oa.

Currently Selected:

Taruparea̧ Ma̧ȩ 46: Pume

Highlight

Compare

Copy