Taruparea̧ Ma̧ȩ 44

Joche ja̧ ae jararea̧ üdë dabadëpea̧de

1Ja̧dëa ji̧ judiro̧ jura̧ duri oa Joche judi yo̧rëremȩdejȩ jibëa̧ bë tjamo̧ jidamȩ ju̧i̧:

—Tjuriri̧ cjiari̧ cö̧a̧vä jibëa̧ chaco oa tirigo chora̧. Ado jënȩro̧ yürüa̧ chëre oa ado chjereno̧ yürüjȩrȩ. Cö̧a̧vä jibëa̧ chëre oa jibëa̧ chaco yarä ju̧ri̧. 2Ado durimȩ tjamo̧ pio ju̧i̧ ja̧ chacoro cö̧a̧tä earequedemȩ ca̧ ae jararea̧ pio ju̧i̧, parata maeara̧ japea̧ oa cjiamȩ pio ju̧i̧. Durimȩ ja̧ chëre pio ju̧i̧di, jënȩ tirigo cho gatëpea̧ oa yürüa̧ chëre pio ju̧i̧di cö̧a̧tä earequedemȩ ca̧ ae jararea̧ pio ju̧i̧. Ado Joche ja̧ mu̧i̧tjoi̧ judi japadärärëremȩde Joche pio judi yo̧a̧mi̧.

3Ado ja̧dëa ji̧ peadai̧rä Joche judi baä tänȩa̧dejȩrȩ jibëa̧ pumȩ ji̧ri̧. Ado baäa̧dirȩ jibëa̧ burora̧. 4Jabo judiro̧ jabë jachipadärädëa̧rä Joche judi yo̧rëremȩdejȩ jibëa̧ bë tjamo̧ jidamȩ ju̧i̧:

—Danȩ, cho̧rë jäjȩrȩ. Ado pio ji̧ri̧ nö̧tadiäa̧rä, ja̧di ta̧rëri̧ yo̧jȩrȩ: “Danȩrȩ, a̧ro̧rȩ dibë chjadëri̧ a̧doa̧ ba oa chjai̧dëri̧ japea̧renȩro̧ibe. 5¿Tjana̧pea̧ oa garüa̧renȩro̧jo̧ȩ ca̧ ano̧mȩ ja̧ ae jararea̧ oa? Pio jiro ae jararea̧ra̧ jarade ca̧ ano̧mȩ judi. Pio jiro ae jararea̧ ju̧i̧iä goë ni̧bärea̧ dade pumȩrȩ canȩjäa̧ pio ju̧i̧ chjiari. Jabo cjäri̧ marenȩro̧jo̧ȩ, a̧dë chjäte chjai̧dëri̧ japea̧renȩro̧jo̧ȩ” yo̧emȩrenȩjȩrȩ —yo̧mȩrȩ yo̧rëremȩdejȩ jibëa̧ bë tjamo̧ jidamȩ pio ju̧i̧.

6Ja̧di tara Joche ja̧ bë tjamo̧ jidamȩ pio judi cho̧rë järëremȩdejȩrȩ. Ado cho̧rë jädäräa̧rä Joche judi yo̧a̧mi̧ yo̧a̧dejȩrȩ. 7Ja̧dëa ji̧ judiro̧ dëbë yo̧a̧diro̧jo̧ȩ:

—¿Jabo tjana̧pea̧ oa ja̧di ta̧rëri̧ ni̧bärenȩibe. Ja̧di dari̧ japadëtäreji̧ri̧rea̧rȩ. Garüdëtäreji̧ri̧rea̧rȩ. 8Danȩ, a̧ro̧rȩ pearä tirigo cho oa gatë ëte, ibëa̧ chiriräpȩ go̧düdäräa̧rä daea̧rea̧ro̧jo̧ȩ chëre oa, a̧ro̧rȩ tirigo cho oa gatëa̧ chëre pio ju̧i̧. ¿Tjana̧ japea̧rea̧rȩ? Tjana̧ japadëa̧, jabechji̧ ado chjereno̧ goa jana̧rea̧ro̧jo̧ȩ pio dibëiäpȩmo̧ chjadëri̧ yürüpea̧ oa, nö̧tadäräri̧ ba ano̧pea̧ oa. Danȩ, na̧ ano̧mȩ ja̧ ae jararea̧ oa bae mitëdëa̧rea̧rȩ. Ju̧i̧ ja̧ oro oa, ju̧i̧ ja̧ parata oa bae mitëa̧ ma ja̧didë. Jabechji̧ garüdëji̧ri̧rea̧rȩ. 9Danȩ, a̧ro̧rȩ cja̧rȩmȩrȩ na̧ ano̧mȩ pio ju̧i̧ ja̧ oa tjamo̧ri̧ garüa̧rä judi, ju̧i̧ ja̧ ae jararea̧ oa tjamo̧ri̧ garüa̧rä judi, jabechji̧ ja̧botäde. Ado tjamo̧ri̧ garüa̧rä judi, jabechji̧ a̧ro̧rȩ ütëborë na̧ mu̧i̧tjoi̧ maearë cjo̧ro̧parea̧rȩ —yo̧ji̧ri̧rȩ dëbë yo̧a̧diro̧jo̧ȩ Joche ja̧ mu̧i̧tjoi̧ pio ju̧i̧iäpȩmo̧.

10Ado ja̧dëa ji̧ yo̧a̧dejȩrȩ:

—Mȩnȩro̧ yo̧a̧mi̧ cjiadiäpade garümȩ judi. Ca̧ mu̧i̧tjoi̧ maearë cjiadiäpade, jabo mȩnȩro̧ orë, jabechji̧ baäpai̧ danȩrȩ —yo̧a̧dejȩrȩ.

11Ja̧dëa ji̧ judiro̧ ütëborë buro putu juri pio judiri chjaodëri̧ bira tänȩa̧diro̧jo̧ȩ jibëa̧ chaco oa. Jareno̧a̧diro̧jo̧ȩ chjadëri̧ areiapea̧ oa. 12Ja̧dëa ji̧ tjamo̧ jidamȩ pio judi mu̧i̧ ië daea̧de chaco nö̧tai̧ oa. Yabomȩ ja̧ chacora̧ taruparëremȩde. Ja̧di maeari̧ japarëremȩde ae jararea̧ oa na̧mȩrȩ. Ado ja̧dëa ji̧ dadäräa̧dejȩ Bejami̧ pio ju̧i̧ ja̧ chacoro. 13Ado pio ju̧i̧ daea̧ oaiä Joche ja̧ oti̧ judiro̧ ütëborë mu̧i̧ quira̧diro̧jo̧ȩ jibëa̧ chjibo oa a̧dë chjäte gitori̧ jo̧rȩtaji̧ri̧rȩ. Ado ja̧dëa̧ ji̧ jibëa̧ chaco nö̧tai̧ oa yura ëte ado chjereno̧ jäa̧dirȩ jënȩro̧ ma̧na̧rea̧ durimo̧. 14Japamitë chjätä ëte Juda judi, jibëa̧ pumȩborë go̧düdäräa̧dirȩ Joche ja̧ bëräpȩ. Ado pio ju̧i̧ daea̧ ji̧ juchatura̧ tjätjäpë china̧däräa̧diro̧jo̧ȩ jibëa̧ daito üdë daburäpȩ yuro. 15Ado Joche judi yo̧a̧dejȩrȩ:

—¿Tjana̧ japea̧ ju̧i̧iä ja̧di dari̧ japea̧renȩro̧coe? Danȩrȩ, tjamo̧ yo̧mȩrȩ cjo̧ro̧requede. Ado pio dibë chjiari goadi dabarea̧ chiarequede. Pio ju̧i̧ ¿dabadënȩrȩ? —yo̧a̧dejȩrȩ.

16Ado Juda judi dëbë yo̧mȩrȩ yo̧a̧dejȩ:

—Danȩ, chjai̧dëri̧ japadëa̧rea̧rȩ. Dëbë yo̧rea̧ dadërea̧rȩ. Jabechji̧ pio ibë chjiari goë tuti ni̧bärea̧mi̧dërea̧rȩ. Daba dadiibe Ütë tjamo̧ judi. A̧ro̧rȩ chjai̧dëri̧ japea̧ pio ju̧i̧ dabade. Jabechji̧ pio yirea̧rȩ. Na̧ mu̧i̧tjoi̧ maearë cjiadiärea̧rȩ. A̧ro̧rȩ ütëborë na̧ mu̧i̧tjoi̧ mapea̧rea̧rȩ ae jararea̧ oa chiamȩborë —yo̧a̧dejȩ Juda judi.

17Jabo Joche judi dëbë yo̧a̧dejȩ:

—Cjäri̧ manȩrȩ, mȩnȩro̧ orë ca̧ mu̧i̧tjoi̧dëpanȩrȩ. Jabechji̧ baäpai̧ darenȩrȩ conȩdarea̧ decjiari̧. Dibëa̧ chiriräpȩ, dibëa̧ ama̧i̧ pio ju̧i̧iäpȩ baäpai̧ danȩrȩ. Jabo pio judimo̧rȩ cjiadiäpade. Ca̧ ae jararea̧ oa bae mitëa̧mȩ pio judimo̧rȩ cjiadiäpade. Pio judimo̧rȩ ca̧ mu̧i̧tjoi̧mȩrȩ cjo̧ro̧pade —yo̧a̧dejȩrȩ.

Juda judi goë tuti ni̧bärëremȩde Bejami̧ pio ju̧i̧ chjiari

18Ja̧dëa ji̧ Juda judi Joche ja̧ queri̧räpȩ chjätämȩrȩ yo̧rëremȩdejȩ:

—Danȩ, cuchu chiadëri̧ ni̧bä chjaotämi̧ cjiarequedemȩ. Jabo ërecjiadëcoe. Danȩ, ütërenȩ. Pjarao̧mi̧ darenȩ. Jabo jabechji̧, tocoi̧mi̧ ni̧bärea̧ yürücoe —yo̧a̧dejȩ—. 19Danȩ, mȩnȩ ibë iëno̧ë ta̧rëa̧ ji̧, ibëa̧ pumȩ pio ji̧ri̧ chjiari iëno̧ë ta̧rëa̧renȩibe. Ibëa̧ ama̧i̧ pio ju̧i̧ chjiari, ibëa̧ omȩ pio ju̧i̧ chjiari iëno̧ë ta̧rëa̧renȩibe. 20Ado a̧ro̧rȩ mȩa dëbë yo̧a̧ ji̧, peaja̧di yo̧a̧rea̧ro̧mȩ. “Aja̧, ibëa̧ ama̧i̧ oa, ütama̧i̧ tjamo̧pea̧mȩ oa ëbarea̧ro̧jo̧ȩ” dëbë yo̧a̧rea̧ro̧mȩ. “Ibëa̧ ayi̧ma̧i̧ oa, jabë pëi̧ chja oa ëbarea̧ro̧jo̧ȩ, ibëa̧ ama̧i̧rȩ ütama̧i̧pa ëte ëba̧ pio ju̧i̧ ëbarea̧ro̧jo̧ȩ” yo̧rea̧ro̧mȩ. “Jibëa̧ ai̧ jini̧ ara̧ pio judimo̧rȩ cjiadiäa̧de. Ju̧i̧di chuchu jararemȩ üdë a̧dë ja̧boa̧diibe. Ado ibëa̧ ama̧i̧ judi ea tjamo̧dejȩ” yo̧ji̧ri̧rȩ dëbë yo̧a̧rea̧ro̧mȩ mȩnȩ ibë iëno̧ë ta̧rëa̧ oaiä. 21Ja̧dëa ji̧ mȩnȩ ibëa̧ ayi̧ma̧i̧ oa ëba jana̧tä yo̧a̧ oaiä, ëba jana̧rea̧ro̧jo̧ȩ mȩnȩ datämi̧ cjia tara. 22Jabo yo̧tea̧rea̧ro̧mȩ jabo. “Cjäri̧ made. Jäja pio ju̧i̧ a̧dë jana̧rea̧mi̧dëde” yo̧tea̧rea̧ro̧mȩ. “Joja durimȩ pio ju̧i̧ dadëa̧ oaiä, a̧dë chjäte odai̧ tarari̧ cjiamȩrȩ ja̧bopai̧ dade” yo̧tea̧rea̧ro̧mȩ. 23Jabo cjäri marenȩ, ëba jana̧tä yo̧ chjaoa̧renȩibe. “Jabechji̧ dibëa̧ ayi̧ma̧i̧ ju̧i̧ ëba jana̧dërä judi goë daera̧dëchji̧coe” yo̧a̧renȩibe. 24Ja̧dëa ji̧ ibëa̧ ama̧i̧ pio ju̧i̧iäpȩ baädäräa̧rä, chjö̧na̧i̧ oa ni̧bä chjaoa̧rea̧ro̧jo̧ȩ mȩnȩ ibë yo̧a̧ pio ju̧i̧. 25Ja̧dëa ji̧ japamitë chjätä ëte, ibëa̧ jurarea̧ decjiapea̧rä, ibëa̧ ama̧i̧ judi yo̧a̧diibe: “Goë jaechji̧vä. Ado jächji̧vä tirigo cho jabëtari̧mi̧ oa gatëpea̧ oa” yo̧a̧diibe. 26Jabo a̧ro̧rȩ yo̧a̧rea̧ro̧jo̧ȩ: “Cjäri̧ marea̧rȩ ama̧i̧, järea̧mi̧dërea̧rȩ. Ibëa̧ ayi̧ma̧i̧ judi ëba jädërä judi, järea̧mi̧dëde. Ibëa̧ ayi̧ma̧i̧ oa ëba jädërä judi, pio jiro üi̧ judi dadëpadiibe. Gatë tänȩdëpadiibe” yo̧ji̧ri̧rȩ yo̧a̧rea̧ro̧jo̧ȩ. 27Ja̧dëa ji̧ ibëa̧ ama̧i̧ judi yo̧a̧diibe: “Danȩrȩ, dibëa̧ ai̧ duriyi̧ jini̧ yo̧a̧ri̧ oari̧ oa ëba ara̧ni̧que. 28Yabomȩ üdë dabadëpea̧de. Pio coa nö̧ta ëba cjo̧ro̧rërea̧ ji̧, dabadëpea̧de. Chirirä cjo̧ro̧mȩ chjuamȩrȩ jibëa̧ ivëra̧ pio ju̧ri̧ra̧ mu̧i̧ quira̧ jirodejȩ. Pio ju̧i̧ dadëmȩrȩ cjo̧ro̧requede yaba̧. 29Ado pio ju̧i̧iä durimȩ pio ju̧i̧mo̧i̧ damȩrȩ cjo̧ro̧requede. Ado yaba̧ mȩnȩro̧ ca̧ ja durimȩ tjamo̧ pio ju̧i̧ ëba järä judi, ado mȩnȩro̧ ado chjereno̧ chjadëri̧ ëba ma̧na̧dërä judi, cjäri̧ marequede, gito ana̧ tjamo̧ri̧ jo̧rȩtaparequede. Ado cüdë ütama̧i̧ tjamo̧pe baga̧ tara, cüdë tjübë bërebëreape baga̧ tara, jabechji̧ gito ana̧ri̧ jo̧rȩta̧ pio oaiä a̧dë ja̧bopai̧ darequededibe. Pio mȩnȩro̧ bae ëba jäa̧ pio oaiä, dëdë a̧dë ja̧bopai̧ darequededibe cüdë.” Aja̧, ja̧di ta̧rëri̧ yo̧mȩrȩ yo̧a̧diibe ibëa̧ ama̧i̧ judi. 30Ja̧di tara yo̧requedemȩ. Ibëa̧ ama̧i̧ judi joja durimȩ pio ju̧i̧ ado dadëa̧ oaiä, jabechji̧ gito ana̧ tjamo̧ri̧ jo̧rȩtapade, odëri̧ cjia tjamo̧mȩrȩ. Ado a̧ro̧rȩ ibëa̧ ayi̧ma̧i̧ ju̧i̧ chjadëri̧ ëba baädërä judi, 31cjäri̧ made, ja̧bopade ibëa̧ ama̧i̧ judi, a̧dë chjäte gitori̧ jo̧rȩtamȩrȩ. Pio a̧ro̧rȩ pio yi, Ejitoräpȩ chjadütä yo̧a̧ pio oaiä chjadüa̧dejȩ. Ado yaba̧ pio yi a̧dë cjiadiärä judi, a̧ro̧rȩ pio ju̧i̧ ëba baädërä judi, cjäri̧ made, ibëa̧ ama̧i̧ pio judi tjübë bërebërearë ja̧botäremȩde davä, a̧ro̧rȩ pio ju̧i̧iäpȩmo̧ chjai̧dëri̧ japea̧ oaiä. 32Jabo danȩ, yo̧a̧reconȩ ca̧ ama̧i̧ ju̧i̧: “Danȩ, chjadëri̧ jidapareconȩ” yo̧a̧reconȩ. “Cüdë na̧ ja oa ëba ma̧na̧dërä judi, jabechji̧ pio mȩaiä chjai̧dëri̧ cjiadiäparequede cüdë cjo̧ro̧a̧ nö̧ta” yo̧a̧reconȩ. “Jabechji̧ duridëparȩrea̧mi̧dëri̧ cjiadiäparequede” yo̧mȩrȩ yo̧a̧reconȩ. 33Ja̧di tara yo̧tarequedemȩ. Jabechji̧ pio coa ano̧ mire mitëcoe ado ca̧ ayi̧ma̧i̧ oa, jabechji̧ chjadëri̧ baärea̧ yürüjo̧ȩ. Pio cüdë ano̧ mire mu̧i̧tjoi̧pea̧ oa cjiadiätäremȩrequede cüdë. Jibëa̧ oti̧ pio ji̧ri̧ nö̧ta baä tänȩjo̧ȩ ca̧ durimȩ tjamo̧ pio ju̧i̧. 34Ca̧ ayi̧ma̧i̧ decjiamȩrȩ baärea̧mi̧dërequede ca̧ ama̧i̧ ju̧i̧iäpȩ. Jabechji̧ a̧dë chjäte gitori̧ jo̧rȩtamȩ oa dadëri̧ cjiareconȩ ca̧ ama̧i̧ ju̧i̧ —yo̧mȩrȩ ni̧bä chjaorëremȩdejȩ Joche ju̧i̧ Juda pio judi.

Currently Selected:

Taruparea̧ Ma̧ȩ 44: Pume

Highlight

Compare

Copy