Taruparea̧ Ma̧ȩ 43

Bejami̧ pio ju̧i̧ järea̧ yürütä yo̧rëreji̧ri̧diro̧jo̧ȩ jäja pio ju̧i̧.

1Ado chiri üdë jurarea̧ yürüdë ma oaiä, jabechji̧ Canaa̧ quȩmȩ chiriräpȩ cjo̧ro̧ji̧ri̧ pio judiro̧ ji̧dë u̧i̧ taraji̧ri̧pea̧dirȩ ta̧mȩcho̧ pio ju̧i̧. 2Ado judiro̧ chjö̧na̧i̧ oa jurë yuropea̧rä, Jacobo judi jibëa̧ u̧ri̧ pio ji̧ri̧ nö̧ta cjiadiäa̧mȩ jurarea̧ pio ju̧i̧ chjö̧na̧i̧ oa jurë yuropea̧rä, Ejitori pio judiri goa ma̧na̧rea̧ tirigo cho chjö̧na̧i̧ oa jurë yuropea̧rä, jabechji̧ yo̧rëremȩdejȩrȩ jibëa̧ u̧ri̧ ji̧ri̧ jäja judi:

—Danȩrȩ, ado jächji̧vä —yo̧a̧dejȩrȩ—. Ejitoräpȩ ado jächji̧vä jurarea̧ jabëtari̧mi̧ oa gatëpea̧ oa —yo̧a̧dejȩrȩ.

3Jabo Juda judi dëbë yo̧a̧dejȩ jäja ju̧i̧:

—Danȩ ama̧i̧, pio idëpȩ tjamo̧ cjo̧ro̧mȩ pio judi cuchu chiadëri̧ yo̧rëremȩdiibe to̧bari̧: "Aja̧, dibëa̧ ayi̧ma̧i̧bea ju̧i̧ ëba jana̧dërä judi, jabechji̧ goëdaera̧dëchji̧coe" yo̧mȩrȩ yo̧a̧rea̧diibe. 4Jabo mȩnȩ ibëa̧ ayi̧ma̧i̧ pio ju̧i̧ ëba järea̧ yürürä judi, dëdë jäparea̧rȩ tirigo cho oa gatë yürüpea̧ oa. 5Jabo mȩnȩ pio ju̧i̧ chjadüdërä judi, jabechji̧ jädëparea̧rȩ aro̧rȩ. Jabechji̧ yo̧a̧diibe davä, "Mȩnȩro̧ dibëa̧ ayi̧ma̧i̧bea ju̧i̧ ëba jana̧dërä judi, goëdaera̧dëchji̧coe" yo̧a̧diibe. Ja̧di tara yo̧requedemȩ ama̧i̧.

6Ado ju̧i̧ ta̧rëa̧ oaiä yo̧a̧dejȩ Icharai judi:

—¿Tjana̧ ju̧i̧iä chjai̧dëri̧ japea̧renȩro̧coe ca̧ u̧ri̧? ¿Tjana̧ ju̧i̧iä dibëa̧ ayi̧ma̧i̧ pio ju̧i̧ chjiari ni̧bäa̧renȩro̧jo̧ȩ ju̧ri̧pȩ tjamo̧ cjo̧ro̧mȩ ju̧i̧? —iëno̧ë ta̧rëa̧dejȩrȩ.

7Ado Icharai ja̧ u̧ri̧ judiro̧ ütëborë dëbë yo̧a̧diro̧jo̧ȩ:

—Danȩ ama̧i̧, a̧ro̧rȩ ibëa̧ pumȩ pio ji̧ri̧ chjiari yo̧ chjaodëa̧rea̧rȩ. Jabo jiro pumȩ judi, tjamo̧ cjo̧ro̧mȩ pio judi, ji̧dë ma iëno̧ iëno̧ ta̧rërëremȩdiibe ibëa̧ pumȩ pio ji̧ri̧ chjiari, pio ibë chjiari. “Dibëa̧ ama̧i̧ judi, ¿jabëde? Ado cja̧rȩmo̧ ayi̧ma̧i̧ ju̧i̧ ¿ëbadënȩrȩ?” yo̧mȩrȩ iëno̧ iëno̧ ta̧rëa̧diibe. Ado judi ibë iëno̧ë ta̧rëa̧ pio ju̧i̧iä, jabechji̧ dëbë yo̧a̧rea̧ro̧jo̧ȩ, jabo pio ju̧i̧mo̧i̧. A̧de yo̧dëa̧rea̧ro̧jo̧ȩ. Ado a̧ro̧rȩ, 'Aja̧, ja̧di ta̧rëri̧ yo̧padiibëda, dibëa̧ ayi̧ma̧i̧bea oa ëba jana̧tä yo̧padiibëda' quëna̧dëji̧ri̧rȩ dëbë yo̧a̧rea̧ro̧jo̧ȩ —yo̧ji̧ri̧rȩ yo̧rëreji̧ri̧diro̧jo̧ȩ jäja oa.

8Ja̧dëa ji̧ Juda pio judi ano̧ mire yo̧a̧dejȩ jäja oa:

—Danȩ ama̧i̧, a̧ro̧rȩ ja̧bodëtä earä judi, jabechji̧ chjadëri̧ chjadüjo̧ȩ na̧ ja oa. Chjadëri̧ jidapareconȩ cüdë jäa̧ nö̧ta. Ado mȩnȩ chjadürä judi, pio yaba̧ jäparea̧rȩ jo̧ȩra̧pe. Mȩnȩ na̧ ja oa chjadëri̧ chjadürä judi jurarea̧ daparea̧rȩ a̧ro̧rȩ ja̧bochea oa, mȩnȩ ja̧bochea oa, ibëa̧ bori̧ pio judiro̧ ja̧bochea oa. 9Jabo danȩ ama̧i̧, pio cüdë chjadëri̧ jidapareconȩ na̧ ja oa. Ma̧diä cjia tänȩdëparequedemȩ. Tjamo̧ri̧ yo̧requedemȩ ama̧i̧. Jabechji̧ ado chjereno̧ yürüparequedemȩ na̧ ja oa a̧ro̧rȩ pio yoaiä ma̧na̧rä. Ado cüdë na̧ ja durimȩ tjamo̧ pio ju̧i̧ ëba ma̧na̧dërä judi, jabechji̧ bucho ana̧ chjai̧dëri̧ cjiadiäparequede pio mȩaiä cüdë chjai̧dëri̧ japea̧ ba oa. 10Jabo danȩ ama̧i̧, a̧ro̧rȩ cjiadiä chjaodëa̧rä, jabechji̧ yo̧a̧ri̧ co järea̧ daea̧täreji̧ri̧rea̧rȩ. Ado pio ju̧i̧iä yo̧requedemȩ, jabechji̧ na̧ ja durimȩ tjamo̧ pio ju̧i̧ ëba järea̧ yürüibe a̧ro̧rȩ chjaodëri̧ jäpea̧ oa —yo̧mȩrȩ yo̧rëremȩdejȩ jäja oa Juda judi.

11Ja̧dëa ji̧ jäja judi dëbë yo̧mȩrȩ yo̧a̧dejȩ:

—Japarea̧ decjiarequede. Jabechji̧ ca̧ ja durimȩ tjamo̧ oa chjadüdëri̧ cjiamȩrȩ chjadüpareconȩ. Jabo danȩrȩ ca̧ u̧ri̧, ja̧di dari̧ japatä earequededibe. Jurarea̧ goae tjamo̧ oa chjadütämi̧ cjiareconȩ pio ju̧ri̧pȩ cjo̧ro̧mȩ ju̧i̧, chiri tjamo̧ cjo̧ro̧mȩ pio ju̧i̧. Jabechji̧ pio yoa chirirä cjo̧ro̧mȩ jurarea̧ goae tjamo̧ oa chjadëri̧ yürü chjadütämi̧ cjiareconȩ. Peaja̧di bachamo̧ quȩmȩ chjaparȩrea̧ oa, ȩ jabëtari̧mi̧ oa, goaeri̧ pjȩa̧ joarea̧ oa, mira quȩmȩ i gi̧därea̧ oa, aremȩdara quȩmȩ jurarea̧ cho oa peaja̧di yürü chjadütämi̧ cjiareconȩ. Aja̧, dibëa̧ chacoro cö̧a̧ oa goa jätä earequededibe. 12Ado chëre ji̧ra̧ri̧ goa jächji̧vä peaja̧di. Mȩnȩro̧ chacoro goa ma̧na̧rea̧ chëre pio ju̧i̧ ado chjereno̧ goa jäpea̧de. Ado pio ju̧i̧ uëri a̧de goa jächji̧vä peaja̧di tirigo cho gatëpea̧ oa. Irä yürüchji̧jo̧ȩ dibë gatë tänȩmȩ pio ju̧i̧. Oëra̧ jo̧rȩtaji̧ri̧rȩ yürüa̧ jirodiro̧dibe. Ja̧di tara chëre ji̧ra̧ri̧ goa jätä yo̧requededibe. 13Ado pio yoaje ëba jächji̧jo̧ȩ Bejami̧ oa. Jächji̧vä. Goëdechji̧vä Ejitoräpȩ cjo̧ro̧mȩ ju̧i̧. 14Ado a̧dë chjäte jauëchjamȩ Ütë pio judi chjadëri̧ a̧dotädidibe pio jiro üi̧ üdë pio dibëiäpȩmo̧ cjäri̧ri̧ cjia dapea̧ oa. Aja̧, cjäri̧ri̧ cjia da tjamo̧tädidibe Chimeo̧ pio judi chjadëri̧ ma̧na̧rea̧mi̧ dari̧, Bejami̧ judi chjadëri̧ ma̧na̧rea̧mi̧ dari̧. Jabo ca̧ u̧ri̧ ji̧ri̧ ëbadëmȩrȩ cjiadiärä judi, jabechji̧ ëbadëmȩrȩ cjiadiäparequede japarea̧ decjiari̧ —yo̧mȩrȩ yo̧rëremȩdejȩrȩ jibëa̧ u̧ri̧ ji̧ri̧ Jacobo judi, jënȩro̧ jäbea yaboi̧.

Jacobo ja̧ u̧ri̧ judiro̧ järëreji̧ri̧dirȩ Ejitoräpȩ Bejami̧borë

15Ja̧dëa ji̧ Jacobo ja̧ u̧ri̧ judiro̧ järëreji̧ri̧dirȩ Ejitoräpȩ. Jënȩro̧ pearä goa jäa̧rea̧ chëre oa ado chjereno̧ goa järëreji̧ri̧diro̧jo̧ȩ, ado pio ju̧i̧ uëri a̧de goa jäa̧diro̧jo̧ȩ chëre oa. Chëre ji̧ra̧ri̧ goaji̧ri̧rȩ, dami̧ti̧ ba chia oa goaji̧ri̧rȩ jäa̧dirȩ Bejami̧ pio ju̧i̧ nö̧ta. Ju̧ri̧pȩ cjo̧ro̧mȩ üi̧ pio ju̧i̧iäpȩmo̧ chjadëri̧ yürüpea̧ oa goa jäa̧dirȩ jibëa̧ ayi̧ma̧i̧ pio ju̧i̧ nö̧ta. Ado do ji̧ra̧ri̧ chjätä ëte chjadëri̧ jädärärëreji̧ri̧dirȩ Ejitoräpȩ. Ado Joche ja̧ dëbëräpȩ cjiadärärëreji̧ri̧dirȩ ado. 16Ja̧dëa̧ ji̧ Joche judi jibëa̧ ayi̧ma̧i̧ ju̧i̧ daea̧ ji̧, Bejami̧ pio ju̧i̧ daea̧ ji̧, yo̧a̧dejȩ jibëa̧ bë tjamo̧ jidamȩ pio ju̧i̧:

—Pio jiro oari pio ji̧ri̧ ëba jächji̧jȩrȩ ca̧ bëräpȩ. Baca oa gu̧neno̧vä. Chjadëri̧ jëdano̧vä go̧a̧ oa a̧ro̧rȩ jurapea̧ oa. Dorë tjomo̧ro ëba juraparequedejȩrȩ —yo̧mȩrȩ yo̧rëremȩdejȩ Joche judi jibëa̧ bë tjamo̧ jidamȩ pio ju̧i̧.

17Ado Joche judi yo̧a̧mi̧ japarëremȩde jibëa̧ bë tjamo̧ jidamȩ judi. Chjadëri̧ ëba jäa̧dejȩrȩ Joche ja̧ pumȩ ji̧ri̧ jibëa̧ bëräpȩ. Irä ëba jäa̧dejȩrȩ. 18Ado pio ju̧ri̧pȩ ëba jäa̧ oaiä, jabechji̧ uapaji̧ri̧pea̧dirȩ, ana̧ri̧ jo̧rȩtaji̧ri̧rȩ. ‘Aja̧, pio ibëiäpȩmo̧ chjai̧dëri̧ japapea̧ ji̧ jo̧rȩtamȩrȩ japa jirodiibëda, jabechji̧ a̧ro̧rȩ yürüa̧ chëre üdë chacoro cjiadiäa̧ pio ju̧i̧iä aechide yo̧pa jirodiibëda, garüji̧ri̧mi̧ da maea oa da jirodiibëda, ado pio ju̧i̧iä acji mitëpa jirodiibëda, jibëa̧ mu̧i̧tjoi̧ mape bagari̧ japapadiibëda, ado ibëa̧ burobo bae mitëpa jirodiibëda, pio ju̧i̧iä jauëräpȩmo̧ ëba jana̧ jirodiibëda’ quëna̧ jo̧rȩtaji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia, uapa tjamo̧ji̧ri̧rȩ.

19Ado pio ju̧i̧iä judiro̧ Joche ja̧ bëräpȩ go̧düdäräa̧rä, jabechji̧ irä yo̧a̧diro̧jo̧ȩ bë tjamo̧ jidamȩ pio ju̧i̧. 20Joë yaräpȩmȩ oa irä yo̧a̧diro̧jo̧ȩ bücjüri̧ cjia tjamo̧ji̧ri̧rȩ:

—Danȩ, ni̧bätämi̧ cjiarea̧ro̧mȩ —yo̧a̧diro̧jo̧ȩ—. A̧ro̧rȩ no̧mȩ jana̧rërea̧ ji̧ tirigo cho pio ju̧i̧ gatera̧pea̧rea̧rȩ. 21Jabo ja̧dëa ji̧ a̧ro̧rȩ baäa̧rä, no̧räpȩ ju̧ri̧ mo̧a̧pea̧ oa cjiadiäa̧rä, ibëa̧ chaco oa areia̧rä, jabechji̧ a̧ro̧rȩ ütëborë yürüa̧ chëre oa daea̧ marea̧ro̧jo̧ȩ chaco yarä ju̧ri̧. A̧ro̧rȩ yürüa̧ chëre chjö̧na̧i̧ oa daea̧rea̧rȩ. Jabo danȩ, ado chjereno̧ goa jana̧rea̧ro̧jo̧ȩ dibë chjadëri yürüpea̧ oa. 22Ado pio jiro chëre pio ju̧i̧ uëri goa jana̧rea̧rȩ peaja̧di tirigo cho oa ado gatëpea̧ oa. Jabechji̧ a̧ro̧rȩ yürüa̧ chëre oa daea̧rä, ‘¿chjiarë cö̧a̧cjivadiji̧?, ibëa̧ chacoro ¿chjiarë cö̧a̧cjivadiji̧?’ quëna̧ jo̧rȩtaji̧ri̧pea̧rea̧rȩ. Pio ju̧i̧iä ado chjereno̧ goa jana̧rea̧ro̧jo̧ȩ chëre oa —yo̧a̧diro̧jo̧ȩ bë tjamo̧ jidamȩ ju̧i̧ Joche ja̧ pumȩ judiro̧.

23Jabo bë tjamo̧ jidamȩ pio judi dëbë yo̧mȩrȩ yo̧a̧dejȩrȩ:

—Jabechji̧de, bücjüri̧ cjiadëchji̧vä. Uapadëchji̧vä. Jabechji̧ dibëa̧ Ütë judi, dibëa̧ ama̧i̧ ja̧ Ütë pio judi yürüa̧ jirodidibe dibëa̧ chacoro chëre oa. Jabechji̧ mȩnȩro̧ no̧mȩ yürürërea̧ chëre pio ju̧i̧ goarequede. Nö̧tadäräri̧ ba ano̧a̧renȩrocoe —yo̧mȩrȩ dëbë yo̧rëremȩdejȩrȩ bë tjamo̧ jidamȩ judi.

Ado ja̧dëa ji̧ bë tjamo̧ jidamȩ judi go̧dü tänȩrëremȩdejȩ Chimeo̧ ju̧i̧, jibë a̧dë cjiadiäremȩ pio ju̧i̧. Ado ëba jäa̧dejȩ jibëa̧ pumȩiäpȩ. 24Ado ja̧dëa ji̧ ëba yu̧a̧rëremȩdejȩrȩ ütëbo oa Joche ja̧ jo̧räpȩ. Ado ui yürüa̧dejȩrȩ jibëa̧ ta oa chjadëri̧ joapea̧ oa. Ado jibëa̧ buro oa yürüa̧dejȩrȩ jurarea̧ oa. 25Ado ja̧dëa ji̧ Joche ja̧ pumȩ judiro̧, jënȩro̧ goa jana̧ pio ju̧i̧ chjadëri̧ jëdano̧rëreji̧ri̧diro̧jo̧ȩ Joche pio ju̧i̧iäpȩmo̧ yürüpea̧ oa. "Dorë tjomo̧ro ëba jurapadidibe" yo̧a̧ oa ta̧rëa̧ oaiä, jabërä jëdano̧a̧dirȩ ba chiati̧ oa chjadëri̧ yürüpea̧ oa.

Joche judi ëba jurarëremȩdejȩrȩ jibëa̧ pumȩ ji̧ri̧

26Ado ja̧dëa ji̧ Joche judi jibëa̧ bëräpȩ ma̧na̧mȩ oa, yürürëreji̧ri̧diro̧jo̧ȩ jënȩro̧ goa jana̧ pio ju̧i̧. Ado juchatura̧ tjätjäpë china̧därärëreji̧ri̧dirȩ ju̧i̧ ja̧ dëbëräpȩ jibëa̧ daito üdë daburäpȩ yuro. 27Ado ja̧dëa ji̧ Joche judi iëno̧ë ta̧rëa̧dejȩrȩ:

—¿Yö̧ta dari̧ dopanȩrȩ? Ado dibëa̧ ama̧i̧ judi, ütama̧i̧ judi, mȩnȩro̧ coa yo̧a̧rea̧ judi, ¿yö̧ta dari̧ dopade? ¿Jabë cjo̧ro̧de? —yo̧mȩrȩ iëno̧ë ta̧rërëremȩdejȩrȩ. 28Ado judiro̧ Joche ja̧ dëbëräpȩ juchatura̧ cjiaji̧ri̧rȩ dëbë yo̧a̧diro̧jo̧ȩ:

—Aja̧, ibëa̧ ama̧i̧ judi jabëde. Chjadëri̧ cjo̧ro̧de —dëbë yo̧a̧diro̧jo̧ȩ.

29Ado Joche judi oëra̧ti̧ oa gatë damȩrȩ daea̧dejȩ jibëa̧ ayi̧ma̧i̧ oa, pio jȩa nö̧ta chuchu jaramȩ pio ju̧i̧. Ado ju̧i̧ damȩrȩ yo̧a̧dejȩrȩ jibëa̧ oti̧ ji̧ri̧:

—Aja̧, pio judi jirode dibëa̧ ayi̧ma̧i̧ judi, mȩnȩro̧ no̧mȩrȩ coa yo̧a̧ pio judi.

Ado ja̧dëa ji̧ jibëa̧ omȩ pio ju̧i̧ damȩrȩ yo̧a̧dejȩ:

—Ütë tjamo̧ pio judi cjäri̧ri̧ cjia datädimȩ ca̧ ja.

30Jabo cjäri̧ madejȩ, Joche judi ju̧i̧di ja̧mȩ pio ju̧i̧ irä daea̧ oaiä ejaro cjiarea̧ jo̧rȩtamȩrȩ jäeno̧a̧de ado cja̧rȩmo̧ jo̧ tjoräpȩ. Ado ju̧ri̧pȩ goae tarari̧ ejaro cjiamȩpea̧de. 31Ja̧dëa ji̧ japamitë chjätä ëte cjatä baäa̧rä, jibëa̧ da ui pio ju̧i̧ chjadëri̧ joa ëte, ado chjereno̧ jäa̧dejȩrȩ jibëa̧ pumȩ pio ji̧ri̧iäpȩ. Ado yo̧a̧dejȩrȩ jibëa̧ mu̧i̧tjoi̧ ji̧ri̧: "Jurarea̧ yürüchji̧ibe". Ado yürüa̧diro̧jȩrȩ.

32Ado Joche ju̧i̧, jibëa̧ mechjarä jibëa̧ ma̧na̧ri̧ chamȩ oa jurarea̧ oa yürürëreji̧ri̧diro̧jo̧ȩ. Ado Joche ja̧ pumȩ ji̧ri̧, ado cja̧rȩmo̧ mechjarä chaji̧ri̧ oa peaja̧di yürüa̧diro̧jȩrȩ. Ado Joche ja̧ mu̧i̧tjoi̧ ji̧ri̧, ado cja̧rȩmo̧ mechjarä chaji̧ri̧ oa peaja̧di yürüa̧diro̧jȩrȩ. Jabechji̧ Ejitoräpȩ cjo̧ro̧ji̧ri̧ judiro̧ ebereo pio ji̧ri̧ nö̧ta cja̧rȩmȩ mechjarä ëba jura cha̧ üdë china̧chja tara, ebereo pio ji̧ri̧iäpȩmo̧ badë da tara, jabechji̧ ado cja̧rȩmo̧ mechjaräpȩ chaji̧ri̧ oa yürürëreji̧ri̧diro̧jȩrȩ jibëa̧ jurarea̧ oa, cja̧rȩmȩ mechjarämo̧ ji̧mo̧ juratärea̧ ji̧. 33Ado Joche ja̧ oti̧ judiro̧ pio ju̧i̧ ja̧ dëbëräpȩ ju̧ri̧ jura charëreji̧ri̧dirȩ jibëa̧ mechjaräpȩ. Ado Joche pio judi ütara̧mi̧ cha tänȩa̧ oa jura charëreji̧ri̧dirȩ. Cotoi̧rämȩ pio ju̧i̧ ja̧ yuroro charëreji̧ri̧dirȩ. Yabomȩ tjamo̧ pio judi mechja yaboräpȩ charëremȩde. Ado ju̧i̧ ja̧ durimȩ tjamo̧ judi ju̧i̧ ja̧ cotoro charemȩde. Ado ju̧i̧ ja̧ durimȩ tjamo̧ judi, peaja̧di ju̧i̧ ja̧ cotoro charemȩde. Ja̧di maeari̧ cha tänȩa̧dejȩrȩ Joche judi. Ado Joche ja̧ oti̧ judiro̧ pio ju̧i̧ daea̧ oaiä ana̧ tjamo̧ri̧ jo̧rȩtaji̧ri̧pea̧dirȩ. '¿Jabo yö̧ta dari̧ dabacjivadi, pio ibë chjiari dabamȩmi̧ dari̧ cha tänȩa̧diibëda, yaboji̧ri̧ pio judiro̧diro̧da, duriji̧ri̧ pio judiro̧diro̧da quëna̧ dabamȩmi̧ dari̧ japea̧diibëda, ¿yö̧ta dari̧ dabacjivadida’ quëna̧ jo̧rȩtarëreji̧ri̧dirȩ ana̧ri̧ jo̧rȩtaji̧ri̧rȩ. 34Ado mu̧i̧tjoi̧ judiro̧ Jocherë chamȩ mechjari pio judiri goa jäa̧diro̧jo̧ȩ jurarea̧ oa Joche ja̧ pumȩiäpȩ. Cja̧rȩmȩ jurarea̧ maea oa yürüa̧diro̧jȩrȩ pumȩ nö̧ta oa, jabo Bejami̧ pio ju̧i̧, cjäri̧ madiro̧jo̧ȩ, cja̧rȩmȩ jurarea̧ maea oa yürüdëa̧diro̧jo̧ȩ jabo 5 jurarea̧ oa yürüa̧diro̧jo̧ȩ. Ado Joche judi, jibëa̧ pumȩborë, jabechji̧ goae tarari̧ jurarëreji̧ri̧dirȩ. Ado ërümi̧ da oa jara̧ oaiä ai̧ri̧ cjia tjamo̧pe bagarëreji̧ri̧dirȩ peaja̧di.

Currently Selected:

Taruparea̧ Ma̧ȩ 43: Pume

Highlight

Compare

Copy