Taruparea̧ Ma̧ȩ 42

Joche ja̧ oti̧ pio judiro̧ järëreji̧ri̧dirȩ Ejitoräpȩ

1Ado Jacobo judi Ejitoräpȩ cjo̧ro̧ji̧ri̧ pio ji̧ri̧ chjiari goë goë ta̧rëa̧rä, tirigo cho ji̧ra̧ oa gatë tänȩpea̧ oa goadirȩ yo̧a̧ oa ta̧rëa̧rä, jabechji̧ iëno̧ë ta̧rërëremȩdejȩrȩ jibëa̧ u̧ri̧ ji̧ri̧:

—Danȩrȩ, ¿tjana̧pea̧ ji̧ yo̧dë maeari̧ dëbë dae chanȩrȩ? 2Danȩrȩ, Ejito quȩmȩ chiriräpȩ ju̧ri̧ jurarea̧ ji̧ra̧de. “Tirigo cho üdë ji̧ra̧de" yo̧a̧ oa ta̧rërequede cüdë. Ja̧di tara jabechji̧ ja̧dira̧ jächji̧vä tirigo cho oa gatëpea̧ oa a̧ro̧rȩ ja̧bochea oa, a̧ro̧rȩ pumȩdiëno̧rea̧ dapea̧ oa —yo̧a̧dejȩrȩ.

3Ado pio ju̧i̧iä Joche ja̧ oti̧ judiro̧, ichi chjö̧na̧i̧rȩ järëreji̧ri̧dirȩ Ejitoräpȩ tirigo cho oa gatëpea̧ oa. 4Jabo durimȩ tjamo̧ pio ju̧i̧, Bejami̧ quȩmȩ pio ju̧i̧, Joche ja̧ durimȩ pio ju̧i̧, cjäri̧ madejȩ, jä tänȩdërëremȩdejȩ jäja judi. ‘Jabechji̧ chjai̧dëri̧ chjätäpai̧ dadida’ quëna̧ jo̧rȩtamȩrȩ jä tänȩdëa̧dejȩ. 5Ado japamitë chjätä ëte, Icharai pio ju̧i̧ ja̧ u̧ri̧ pio judiro̧ go̧düdärärëreji̧ri̧dirȩ Ejitoräpȩ. Jabechji̧ Canaa̧ quȩmȩ chiri üdë peaja̧di jurarea̧ yürüdëmȩpea̧ oaiä, jabechji̧ pio jiro chiriräpȩ cjo̧ro̧ji̧ri̧ pio ji̧ri̧ nö̧ta go̧düdärärëreji̧ri̧dirȩ jurarea̧ oa gatëpea̧ oa.

Joche judi ërecjiamȩmi̧ darë iëno̧ë ta̧rërëremȩdejȩrȩ jibëa̧ pumȩ ji̧ri̧

6Ado Joche judi, jabechji̧ Ejito chiri tjamo̧ jidamȩrȩ cjo̧ro̧rëremȩde no̧mȩ tjamo̧ri ja̧. Peaja̧di tirigo cho oa tjamo̧ gatë tänȩmȩrȩ cjo̧ro̧rëremȩde. Jachiri jana̧ji̧ri̧ pio ji̧ri̧ gatë tänȩrëremȩdejȩrȩ. Ado Joche ja̧ pumȩ judiro̧ go̧düdärärërea̧ ji̧, jabechji̧ ju chatura̧ tjätjäpë china̧därärëreji̧ri̧dirȩ Joche ja̧ dëbëräpȩ jibëa̧ daito üdë daburopȩ yuro. 7Ado Joche judi jibëa̧ oti̧ pio ji̧ri̧ daea̧ ji̧, jabechji̧ dabadëcji̧ quëna̧ japarëremȩdejȩrȩ. Ado ërecjiami̧ dari̧ iëno̧ë ta̧rëa̧dejȩrȩ:

—¿Yudiri jana̧nȩrȩ mȩnȩro̧?

Ado judiro̧ dëbë yo̧a̧diro̧jo̧ȩ:

—Yudiridë, jabechji̧ Canaa̧ quȩmȩ chiriri pio judiri jana̧rea̧rȩ. Jabechji̧ tirigo cho oa gatera̧pea̧rea̧rȩ —yo̧a̧diro̧jo̧ȩ.

8Ado Joche judi, dëdë, ‘Ca̧ pumȩ pio judiro̧ tjamo̧diro̧da’ quëna̧ dabamȩrȩ darëremȩdejȩrȩ, jabo judiro̧ cjäri̧ madiro̧jo̧ȩ, ‘Joche pio judidida’ quëna̧ dadëa̧diro̧jo̧ȩ. 9Ado Joche judi jibëa̧ oti̧ pio ji̧ri̧ daea̧ oaiä, jabechji̧ jënȩ jibëa̧ pumȩ pio ji̧ri̧ chjiari canȩjärërea̧ pio ju̧i̧ jo̧rȩtamȩpea̧de. Ado ja̧dëa̧ ji̧ to̧bari̧ yo̧rëremȩdejȩrȩ:

—Cjäri̧ manȩrȩ, jurarea̧ gatera̧pea̧ ma ja̧didë jabo dibëa̧ chiriräpȩ cjo̧ro̧mȩ ütërë chjadüa̧ oa acji jana̧renȩro̧ibe ibëa̧ chiri oa ütarë dapea̧ oa. 'Aja̧, pio jiro chiri üdë ja̧di dari̧ cjiadida, ado ja̧di dari̧ japaji̧ri̧rȩ boadärärea̧ dapai̧ daa̧ro̧ji̧ri̧da' quëna̧pea̧ oa jana̧renȩro̧ibe goadi tai̧pea̧ oa, ibë chjai̧dëri̧ japapea̧ oa —yo̧mȩrȩ yo̧a̧dejȩrȩ Joche judi.

10Jabo judiro̧ dëbë yo̧a̧diro̧jo̧ȩ:

—Cjäri̧ marea̧rȩ ibëa̧ ano̧mȩ, ja̧di dari̧ japera̧pea̧ ma ja̧didë. Jabechji̧ jurarea̧ gatëpea̧ pio ju̧i̧mo̧i̧ jo̧rȩtaji̧ri̧rȩ jana̧rea̧rȩ. 11Danȩ, ibëa̧ ama̧i̧ oa ëbarea̧ro̧jo̧ȩ cja̧rȩmȩ oa. Ji̧mo̧ ja̧ marea̧rȩ. Pumȩ chjadërë cjo̧ro̧rea̧rȩ. Chjadëri̧ japaji̧ri̧rȩ cjo̧ro̧rea̧rȩ. Ibëa̧ chiriräpȩ cjo̧ro̧mȩ ütërë chjadüa̧ oa jana̧ ma̧ ja̧didë. Ado na̧ chiri oa boarea̧ jo̧rȩtaji̧ri̧rȩ jana̧dëa̧rea̧rȩ —dëbë yo̧a̧diro̧jo̧ȩ.

12Jabo Joche judi dëbë yo̧a̧dejȩrȩ:

—Jabo cjäri̧ manȩrȩ, ma̧ȩ chjádë maea yürürenȩro̧coe. Ibëa̧ chiri oa boarea̧ pio ju̧i̧mo̧i̧ jo̧rȩtaji̧ri̧rȩ acji jana̧renȩro̧ibe —yo̧a̧dejȩrȩ.

13Jabo judiro̧ ado dëbë yo̧a̧diro̧jo̧ȩ Joche ju̧i̧:

—Danȩ, 12 pumȩrea̧rȩ —yo̧a̧diro̧jo̧ȩ—. Ji̧mo̧ ja̧ marea̧rȩ. Cja̧rȩmȩrȩ nö̧ria̧ oa cjo̧ro̧rea̧rȩ. Canaa̧ quȩmȩ chiriräpȩ cjo̧ro̧rea̧rȩ. Ibëa̧ ayi̧ma̧i̧ judi, durimȩ tjamo̧ pio judi jäja pio ju̧i̧ nö̧ta cjiadiäa̧de. Ado cja̧rȩmo̧rëremȩrȩ dabadëpea̧ jirode ibëa̧ ayi̧ma̧i̧ judi. Aja̧, tjamo̧ri̧ yo̧rea̧ro̧mȩ —yo̧ji̧ri̧rȩ dëbë yo̧a̧diro̧jo̧ȩ.

14Jabo Joche judi ta̧rë cjiadiädëmȩrȩ yo̧a̧dejȩrȩ:

—Cjäri̧ manȩrȩ, chjai̧dëri̧ japera̧pea̧renȩro̧ibe —yo̧a̧dejȩrȩ—. Ibëa̧ chiri oa bae mitëtämi̧ cjiaji̧ri̧rȩ jana̧renȩrȩ. Dibëa̧ ütërë chjadüa̧ oa jana̧nȩrȩ. 15Jabo cüdë dibë chjiari chjadëri̧ dabapea̧ oa, jabechji̧ dibëa̧ ayi̧ma̧i̧bea pio ju̧i̧ ëba jana̧tä earequededibe. Pjarao̧ pio judi tänȩa̧ oa ütërë cjiarequede cüdë. Ja̧di tara yo̧requededibe. Cüdë dibëa̧ ayi̧ma̧i̧bea ju̧i̧ dadërä judi, pio yudirije baärea̧ dadëpanȩrȩ. Cüdë pio ju̧i̧ daea̧rämo̧ baärea̧ yürüparequededibe. Tjamo̧ davä. Cüdë pio ju̧i̧ irä daea̧rämo̧ baärea̧ dapanȩrȩ. 16Danȩrȩ, cja̧rȩmȩrȩ jätä earequededibe dibëa̧ ayi̧ma̧i̧bea oa chjadëri̧ ëba jana̧pea̧ oa. O judiro̧, jabechji̧ pio yi cjiadiäpadirȩ. Pio judimo̧rȩ jäpadejȩ cja̧rȩmȩrȩ. Ado chjadëri̧ ëba jana̧dërä judi, jabechji̧ chjadëri̧ dabaparequede pio dibë chjiari. 'Aja̧, jabomo̧ ma̧ȩ chjádë yürüdiro̧da, jibëa̧ ayi̧ma̧i̧ oa tjamo̧ri̧ ëbadëdiro̧ju̧i̧da, jabo jibëa̧ ütërë chjadüa̧ oa acji jana̧diro̧da, ibëa̧ chiri oa boapea̧ oa acji jana̧diro̧da' quëna̧ jo̧rȩtaparequededibe davä cüdë dibëa̧ ayi̧ma̧i̧bea oa dadërä judi —yo̧mȩrȩ yo̧rëremȩdejȩrȩ jibëa̧ pumȩ ji̧ri̧ Joche judi.

Joche judi chaärëremȩdejȩrȩ jibëa̧ pumȩ ji̧ri̧

17Ja̧dëa ji̧ chaärëremȩdejȩrȩ jibëa̧ pumȩ ji̧ri̧ Joche judi. Tjarari̧ do nö̧ta chaäa̧ oa cjiadiärëreji̧ri̧dirȩ. 18Ado tjarari̧ do chjätä ëte yo̧a̧dejȩrȩ:

—Danȩrȩ, cüdë Ütë tjamo̧ pio ju̧i̧ uapamȩrȩ doparequede. Ja̧di tara yo̧requededibe. Mȩnȩro̧ tjamo̧ri̧ ja̧bodëri̧ cjiarä judi, jabechji̧ ja̧di dari̧ japatäreji̧ri̧nȩrȩ. 19Chjadëri̧ na̧rȩtäreji̧ri̧renȩro̧coe. Mȩnȩro̧ coëma cjiari̧ cjo̧ro̧rä judi, jabechji̧ chjadëri̧ na̧rȩchji̧coe. Danȩrȩ, dibëa̧ omȩ üdë cja̧rȩmȩrȩ chaäa̧ oa cjiamȩrȩ a̧dë cjiadiäpadidibe chaärea̧ bëräpȩ, jabo mȩnȩro̧ orë, jabechji̧ baäpai̧ danȩrȩ dibëa̧ chiriräpȩ. Aja̧, tirigo cho oa ara baäpea̧ oa, dibëa̧ pumȩ pio judiro̧ chjadëri̧ jurapea̧ oa, baäpai̧ danȩrȩ. 20Ado ja̧dëa̧ ji̧ ji̧dë duri oa mȩnȩro̧ ado chjereno̧ jana̧rä, jabechji̧ ëba jana̧chji̧jo̧ȩ dibëa̧ ayi̧ma̧i̧bea ju̧i̧. Ado cüdë pio ju̧i̧ irä daea̧ oaiä, 'Jabechji̧ coëma cjiari̧ yo̧a̧diro̧coada' quëna̧ jo̧rȩtaparequededibe. Jabo pio ju̧i̧ ëba jana̧dërä judi, jabechji̧ ütëbodärärë ja̧bopanȩrȩ mȩnȩro̧ —yo̧mȩrȩ yo̧rëremȩdejȩrȩ Joche judi.

Ado Joche ja̧ oti̧ judiro̧ dëbë yo̧a̧diro̧jo̧ȩ:

—Aja̧, chja jabechji̧de pio ibëiä. Pio mȩnȩ yo̧a̧mi̧ japaparea̧rȩ —dëbë yo̧ji̧ri̧rȩ yo̧a̧diro̧jo̧ȩ.

21Jabo cjäri̧ madirȩ, ana̧ tjamo̧ri̧ jo̧rȩtaji̧ri̧rȩ ni̧bä chjaoji̧ri̧pea̧dirȩ jibëa̧ dëbëti̧ra̧ chia:

—Tjamo̧ davä, a̧dë chjäte chjai̧dëri̧ japea̧rea̧ro̧jo̧ȩ ibëa̧ ayi̧ma̧i̧ ju̧i̧, Joche pio ju̧i̧. Ado pio ju̧i̧iäpȩmo̧ chjai̧dëri̧ japea̧ ba oa chjai̧dëri̧ chjätärea̧rȩ yaba̧. Danȩrȩ, ta̧rë ja̧bodëa̧rea̧ro̧jo̧ȩ. Aja̧, “Cjäri̧ri̧ cjia dachji̧coe” yo̧tea̧diibe. Jabo cjäri̧ marea̧ro̧jo̧ȩ, ta̧rë ja̧bodëa̧rea̧ro̧jo̧ȩ. Ado ibëa̧ omȩ pio ju̧i̧iäpȩmo̧ chjai̧dëri̧ japea̧ oaiä, jabechji̧ chjai̧dëri̧ chjätärea̧rȩ yaba̧ —yo̧ji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia.

22Ado ja̧dëa ji̧ Rubȩ judi yo̧a̧dejȩrȩ:

—Danȩrȩ, yo̧tea̧requededibe ibëa̧ ayi̧ma̧i̧ oa chjai̧dëri̧ japadëtä, jabo cjäri̧ marenȩro̧coe, ta̧rë ja̧bodëa̧renȩro̧coe. Ado yaba̧ chjai̧dëri̧ chjätärea̧rȩ pio judi ja̧boa̧ pio ju̧i̧iä —yo̧mȩrȩ yo̧rëremȩdejȩrȩ jibëa̧ jadü ji̧ri̧ Rubȩ judi.

23Ado Joche ja̧ oti̧ judiro̧ ni̧bä chjaoa̧ ji̧, jabechji̧ bapë ta̧rë marëremȩdejȩrȩ. Jabo Joche judi pio ji̧ri̧ nö̧ta jabërä ni̧bäa̧rä, goë ni̧bämȩ pio ju̧i̧iämo̧i̧ ni̧bäa̧ tara, ‘jabechji̧ pio ibë bapë ta̧rëdë madiibëda’ quëna̧ jo̧rȩtaji̧ri̧rȩ darëreji̧ri̧diro̧jo̧ȩ. Jabo cjäri̧ madejȩrȩ, bapë ta̧rë marëremȩdejȩrȩ Joche judi. 24Ado pio ju̧i̧iä chjaodëri̧ mȩmȩrȩpe cjiadiä ëte a̧dë jäeno̧rëremȩdejȩrȩ. Jabechji̧ jënȩ ejaro cjiamȩpea̧ oaiä, a̧dë jäeno̧a̧dejȩrȩ goadi ejaro cjiapea̧ oa. Jabo ja̧dëa ji̧ ji̧dë duri oa jënȩ cjatä baäe jo̧rȩta̧rä, jënȩ chjapea̧rä, ado chjereno̧ ni̧bärëremȩdejȩrȩ. Ado mitërëremȩdejȩ Chimeo̧ ju̧i̧ cjiadiäpea̧ oa, chaäpea̧ oa. O judiro̧ irä dari̧ tabüa̧dejȩ.

25Ado ja̧di dari̧ japea̧ duri oa Joche judi yo̧a̧dejȩrȩ jibëa̧ mu̧i̧tjoi̧ ji̧ri̧:

—Tjuri cjiari̧ cö̧ȩ yürüchji̧jȩrȩ jibëa̧ chaco chjö̧na̧i̧ oa. Ado judiro̧ yürüa̧ chëre oa, jabechji̧ ado chjereno̧ gatë ca̧e yürüchji̧jȩrȩ jibëa̧ chacoro. Ado judiro̧ baärea̧ no̧ro jurapea̧ oa peaja̧di chjadëri̧ yürüchji̧jȩrȩ jurarea̧ oa —yo̧mȩrȩ yo̧rëremȩdejȩrȩ jibëa̧ mu̧i̧tjoi̧ ji̧ri̧.

Ado Joche judi yo̧a̧mi̧ japarëreji̧ri̧dirȩ. 26Ja̧dëa̧ ji̧ Joche ja̧ oti̧ judiro̧ mitëa̧diro̧jo̧ȩ jibëa̧ chaco oa, tirigo cho chia maea oa. Ado buroro chjadëri̧ yurë cji̧dä ëte chia baärëreji̧ri̧diro̧jo̧ȩ jibëa̧ jurarea̧ oa.

Cja̧rȩmȩrȩ ado chjereno̧ darëremȩdejȩ jënȩ yürüa̧ chëre oa

27Ado gȩnȩpea̧rä cjiadiärëreji̧ri̧dirȩ no̧ropȩ mo̧a̧pea̧ oa. Ado ja̧dëa ji̧ cja̧rȩmȩrȩ jibëa̧ buro oa jura tänȩpea̧ oa jarea̧dejȩ jibëa̧ chaco oa. Ado ja̧dëa ji̧ chaco oa areia̧ ji̧, daea̧dejȩ jibëa̧ chëre oa chaco yaräpȩ ju̧ri̧, jurarea̧ uëmo̧i̧ cö̧a̧mȩ oa. 28Ja̧dëa ji̧ yo̧a̧dejȩrȩ jibëa̧ oti̧ ji̧ri̧:

—Danȩrȩ, cüdë yürüa̧ chëre üdë, tirigo cho oa gatëpea̧ oa yürüa̧ chëre üdë cö̧a̧de ca̧ chacoro. Ado chjereno̧ yürüa̧diro̧coe.

Ado pio ju̧i̧iä ütëborë uapa tjamo̧pea̧dirȩ i ma̧na̧ gura cjiaji̧ri̧rȩ. Ado jibëa̧ dëbëti̧ra̧ chia yo̧a̧dirȩ:

—¿Tjana̧ japatadiibe Ütë tjamo̧ judi? 'Garüa̧diro̧da' quena̧pai̧ dadiro̧ibe. —Ja̧di ta̧rëri̧ yo̧rëreji̧ri̧dirȩ.

Jacobo pio ju̧i̧iäpȩ go̧düdärärëreji̧ri̧dirȩ

29Do ji̧ra̧ri̧ chjätä ëte go̧düdärärëreji̧ri̧dirȩ Canaa̧räpȩ, jibëa̧ ama̧i̧ pio ju̧i̧iäpȩ, Jacobo pio ju̧i̧iäpȩ. Ado jënȩro̧ chjätäa̧ chjö̧na̧i̧ oa ni̧bä chjaorëreji̧ri̧diro̧jo̧ȩ jibëa̧ ama̧i̧ ju̧i̧. Jënȩro̧ ta̧rëa̧bo ni̧bä chjaoa̧diro̧jo̧ȩ. Ja̧di ta̧rëri̧ yo̧rëreji̧ri̧diro̧jo̧ȩ:

30—Danȩ ama̧i̧, pio idëpȩ cjo̧ro̧mȩ judi, chiri tjamo̧ cjo̧ro̧mȩ pio judi ërecjiamȩmi̧ dari̧ ni̧bäa̧diibe —yo̧a̧diro̧jo̧ȩ—. Chjadëri̧ ni̧bädëa̧diibe. 'Aja̧, jibëa̧ ütërë chjadüa̧ oa chiri oa goadi ütarë daba daera̧pea̧diro̧da, chiri oa bae mitëpea̧ oa jana̧diro̧da' quëna̧ jo̧rȩtamȩrȩ ni̧bä chjaoa̧diibe. 31Jabo yo̧a̧rea̧ro̧jo̧ȩ. “Cjäri̧ marea̧rȩ, chiri oa goadi ütarë daba daera̧padëa̧rea̧rȩ. Jabechji̧ a̧ro̧rȩ ja̧di dari̧ japarea̧ dabadërea̧rȩ” yo̧a̧rea̧ro̧jo̧ȩ. “Jabechji̧ pumȩ chjadërë cjo̧ro̧rea̧rȩ. 32Ichi chjö̧na̧i̧ yo̧a̧ri̧ pumȩrea̧rȩ. Ji̧mo̧ ja̧ marerȩ” yo̧a̧rea̧ro̧jo̧ȩ. “Durimȩ tjamo̧ judi jäja pio ju̧i̧ nö̧ta cjiadiäa̧de Canaa̧ quȩmȩ chiriräpȩ. Ado cja̧rȩmo̧rëremȩ judi dabadëpea̧de” yo̧a̧rea̧ro̧jo̧ȩ. “Ado danȩ, ibëa̧ ama̧i̧ judi cja̧rȩmȩde. Pio judi nö̧ria̧diibe ibë ütëbo oa” yo̧a̧rea̧ro̧jo̧ȩ. 33Ado a̧ro̧rȩ chiri tjamo̧ cjo̧ro̧mȩ pio ju̧i̧iäpȩmo̧ ja̧di ta̧rëri̧ yo̧ ëte dëbë yo̧a̧diibe pio ibëiäpȩmo̧: “Jabo danȩrȩ, chjadëri̧ na̧rȩchji̧coe ado ja̧di. Mȩnȩro̧ pumȩ chjadërä judi, mȩnȩro̧ dibëa̧ ayi̧ma̧i̧bea pio ju̧i̧ chjiari coëma cjiari̧ yo̧a̧rä judi, jabechji̧ chjadëri̧ na̧rȩchji̧coe” yo̧a̧diibe. “Jabechji̧ dibëa̧ omȩ oa, cja̧rȩmȩ oa pio yi a̧dë baächji̧jo̧ȩ. Ado ja̧di dari̧ japea̧ oaiä, jabechji̧ chjadëri̧ dabarea̧ daparequede pio dibë chjiari. Jabechji̧ goa baächji̧vä tirigo cho oa dibëa̧ pumȩiäpȩ mȩnȩro̧ jurapea̧ oa” yo̧a̧diibe. 34“Ado ja̧dëa ji̧ japamitë chjätä ëte mȩnȩro̧ ado chjereno̧ jana̧rä, jabechji̧ chjadëri̧ ëba jana̧chji̧coe dibëa̧ ayi̧ma̧i̧bea oa cüdë chjadëri̧ daba dapea̧ oa” yo̧a̧diibe. “Pio ju̧i̧ daea̧ oaiä, ‘jabechji̧ chjadëri̧ yo̧a̧diro̧coada, pumȩ chjadëdiro̧da, chjadëri̧ na̧rȩa̧diro̧coada yaba̧, chiri oa ütarapea̧ oa tjamo̧ri̧ goadi tai̧dërëreji̧ri̧diro̧da’ quëna̧ jo̧rȩtaparequededibe cüdë. Ado ja̧dëa̧ ji̧ dibëa̧ ayi̧ma̧i̧bea oa da̧rä go̧dü tänȩpareconȩ dibëa̧ omȩ ju̧i̧, a̧dë cjiadiäa̧mȩ pio ju̧i̧. Ado judirä, jabechji̧ mȩnȩro̧ jo̧rȩta̧mi̧ tai̧pai̧ danȩrȩ pio yoa chiri oa dibëa̧ pio ju̧i̧ chjadëri̧ ano̧ mirepea̧ oa” yo̧a̧diibe —yo̧ji̧ri̧rȩ yo̧rëreji̧ri̧diro̧jo̧ȩ jibëa̧ ama̧i̧ ju̧i̧ Joche ja̧ pumȩ judiro̧.

Gito ana̧ri̧ jo̧rȩtarëremȩde Jacobo judi

35Ado ja̧di dari̧ ni̧bä chjao ëte Joche ja̧ pumȩ judiro̧ areiarëreji̧ri̧diro̧jo̧ȩ jibëa̧ chaco oa. Puri cjaräa̧diro̧jo̧ȩ tirigo cho oa. Ado pumȩ nö̧tarë daea̧diro̧jo̧ȩ jibëa̧ chëre oa. Jënȩro̧ yürüa̧rea̧ chëre pio ju̧i̧, tirigo cho oa gatëpea̧ pio ju̧i̧ daea̧diro̧jo̧ȩ. Ado pio ju̧i̧ daea̧ oaiä uapa tjamo̧pe bagarëreji̧ri̧dirȩ. Jibëa̧ chji̧ üdë ododëmi̧ tarari̧ jo̧rȩtape bagura̧dirȩ. Jäja pio judiborë uapa tjamo̧mȩpea̧de. 36Ja̧dëa̧ ji̧ Jacobo judi yo̧rëremȩdejȩrȩ:

—Cjäri̧ marenȩro̧coe. Cjiadiädëri̧ gito ana̧ri̧ jo̧rȩta tänȩrenȩro̧coe —yo̧a̧dejȩrȩ—. Danȩrȩ, ca̧ jarea̧ üdë, Joche quȩmȩrea̧ pio judi jiro decjiapea̧de. Ado Chimeo̧ judi ja̧boa̧mi̧ dari̧ cjiadiäa̧de yaba̧. Ado yaba̧ ca̧ ja durimȩ tjamo̧ pio ju̧i̧ ëba jätämi̧ cjiarenȩro̧jo̧ȩ, Bejami̧ pio ju̧i̧. Cjäri̧ marenȩro̧coe. Gito ana̧ri̧ jo̧rȩta tänȩrenȩro̧coe. Ma̧i̧ da chjai̧dë oa chjätä tänȩrenȩro̧coe —yo̧a̧dejȩrȩ.

37Ja̧dëa ji̧ Rubȩ judi, yabomȩ pio judi yo̧rëremȩdejȩ jäja oa:

—Danȩ ama̧i̧, chjadëri̧ jidapareconȩ Bejami̧ ju̧i̧. Ado chjereno̧ ëba ma̧na̧pareconȩ mȩnȩ na̧ ja durimȩ pio ju̧i̧ chjadëri̧ ëba cjo̧ro̧pea̧ oa. Ado cüdë ju̧i̧ ëba ma̧na̧dërä judi, jabechji̧ ja̧bo tänȩtäremȩrenȩjȩrȩ ca̧ u̧ri̧ pio ji̧ri̧, yo̧ari̧ oa.

38Jabo Jacobo judi dëbë yo̧mȩrȩ yo̧a̧dejȩ:

—Cjäri̧ mareconȩ —dëbë yo̧a̧dejȩ—. Ca̧ ja oa chjadüdëpareconȩ. Dibë nö̧ta jädëpade. Raque jini̧ yo̧a̧ri̧mo̧i̧ oa ararëreyi̧nȩjȩrȩ. Ado Jocherea̧ judi jiro decjiapea̧de. Bejami̧ pio ju̧i̧mo̧i̧ ëbarequede yaba̧. Tjamo̧ davä. Mȩnȩro̧ ca̧ ja durimȩ tjamo̧ oa ëba järä judi, ado judi ado chjereno̧ ma̧na̧rea̧ dadërä judi, cjäri̧ marequede, gito ana̧ri̧ jo̧rȩta̧ oaiä a̧dë ja̧bopai̧ darequededibe. Pio mȩnȩro̧ bae ëba jäa̧ oaiä, cjäri̧ marequede, ja̧bopai̧ darequede cüdë. Ado pio ju̧i̧iä jabechji̧, chjadüdëpareconȩ —yo̧mȩrȩ dëbë yo̧rëremȩdejȩ joja oa Jacobo judi.

Currently Selected:

Taruparea̧ Ma̧ȩ 42: Pume

Highlight

Compare

Copy