Taruparea̧ Ma̧ȩ 41

Joche judi goë ni̧bärëremȩdejȩ pjarao̧ ju̧i̧, jënȩ canȩjäa̧ pio ju̧i̧ chjiari

1Ado yo̧a̧ri̧ ui chjätä ëte pjarao̧ judi canȩjä mo̧a̧rëremȩde. Niro quȩmȩ bea yuroro cjiarämi̧ cjiarëremȩde. 2Ado beari pio judiri go̧düji̧ri̧ oa da̧rämi̧ cjiarëremȩdejȩrȩ baca oa, 7 oa. Yo̧ cjiaji̧ri̧ oa, chjadë oa darämi̧ cjiaremȩdejȩrȩ cäräräpȩ tai̧ji̧ri̧ oa, juraji̧ri̧ oa. 3Ado ji̧dë duri oa, ado cja̧rȩmo̧ buba oa darämi̧ cjiaremȩdejȩrȩ baca oa. Peaja̧di beari pio judiri go̧düji̧ri̧ oa darämi̧ cjiaremȩdejȩrȩ 7 oa. Putu ju gari maea oa darämi̧ cjiaremȩdejȩrȩ, cjari̧da maea oa. Ado baca yo̧ cjiamȩ ji̧ri̧iäpȩ jäa̧ji̧ri̧ oa darämi̧ cjiaremȩdejȩrȩ baca cjari̧da pio ji̧ri̧. 4Ado ja̧dëa ji̧ baca conȩgati̧ pio judiro̧ codë oa jura̧diro̧jȩrȩ baca yo̧ cjiaji̧ri̧ pio ji̧ri̧. Go̧a̧rȩ cjiadiädëri̧ jura̧diro̧jȩrȩ ütëbo oa. Aja̧, ja̧dicjia ja̧dicjia mo̧a̧rëremȩde pjarao̧ judi.

Ado ja̧di dari̧ canȩjä mo̧a̧ ëte bëdürëremȩde pjarao̧ judi. 5Jabo ado chjereno̧ mo̧a̧mȩpea̧de. Ado chjereno̧ mo̧a̧ ëte ado canȩjä mo̧a̧mȩpea̧de. Tirigo to oa darämi̧ cjiarëremȩdejȩ. Chiamȩ oa darämi̧ cjiaremȩdejȩ 7 joë oa. Go̧a̧ti̧ oa, joechja tjamo̧pe baga̧ maea oa dacji ja̧di cjiaremȩdejȩ, tirigo cho ji̧ra̧ri̧ chiamȩ joë oa. 6Ado ji̧dë duri oa, pio jiro tirigo to cotori judiri, ado chiamȩ oa darämi̧ cjiaremȩdejȩ, ado cja̧rȩmo̧ joë oa. Aja̧, ado cja̧rȩmo̧ 7 joë oa chiamȩ oa darämi̧ cjiaremȩdejȩ. Joechjadë maea oa, bori̧ maea oa darämi̧ cjiaremȩdejȩ gapea̧ maea oa. Ma̧i̧ dari̧ pjaepa oaiä, cjüdë ma oaiä, jabechji̧ chjadëri̧ chiadëmȩmi̧ da oa darämi̧ cjiarëremȩdejȩ ga mapea̧mȩ oa. 7Ado ja̧dëa ji̧ joë gapea̧mȩ pio judi, joë bori̧ pio judi jura̧dejȩ joë chjadë pio ju̧i̧, joechjapea̧mȩ pio ju̧i̧. Duri oa chiaremȩ pio judi ütëbo oa jura̧dejȩ yabo chiaremȩ pio ju̧i̧. Aja̧, ja̧di cjia ja̧di cjia mo̧a̧rëremȩde pjarao̧ judi. Ado pjarao̧ judi ja̧di dari̧ canȩjä mo̧a̧ ëte, japamitë boi̧chji̧ bëdü ëte, ‘Aja̧, jabomo̧ canȩjäremȩquëda’ quëna̧ jo̧rȩtamȩrȩ a̧rȩrëremȩde.

8Jabo ja̧dëa ji̧ dopea̧rä ana̧ tjamo̧ri̧ jo̧rȩtamȩpea̧de pjarao̧ judi. ‘¿Tjana̧ yo̧rea̧cjivadi? Cüdë canȩjäa̧ üdë ¿tjana̧ na̧rȩrea̧cjivadi?’ quëna̧ jo̧rȩtamȩpea̧de. Ado ana̧ri̧ jo̧rȩtamȩrȩ ma̧ȩ chjadürëremȩdejȩrȩ dabaji̧ri̧ chjö̧na̧i̧ oa Ejitoräpȩ cjo̧ro̧ji̧ri̧ pio ji̧ri̧. Jauëchja cjiari̧ japaji̧ri̧ pio ji̧ri̧bo ma̧ȩ chjadürëremȩdejȩrȩ pio jȩa a̧doera̧tä. Ja̧dëa ji̧ judiro̧ a̧dopea̧rä pjarao̧ judi yo̧rëremȩdejȩrȩ jënȩ canȩjäa̧ pio ju̧i̧. Goë ni̧bätä yo̧tea̧dejȩrȩ jabo cjäri̧ madiro̧jo̧ȩ, goë ni̧bärea̧ dadërëreji̧ri̧dirȩ.

Pjarao̧ ju̧i̧ tjamo̧ ëba jaramȩ pio judi jo̧rȩtarëremȩdejȩ Joche ju̧i̧ jo̧rȩtadërërea̧ ji̧

9Ja̧dëa̧ ji̧ pjarao̧ ja̧ mu̧i̧tjoi̧ judi, ju̧i̧ ja̧ jararea̧ oa tjamo̧ ëba jaramȩ pio judi jo̧rȩtamȩpe bagarëremȩde. Ado yo̧a̧dejȩ pjarao̧ ju̧i̧:

—Danȩ ca̧ ütë, jo̧rȩtamȩpe baga̧requede yaba̧ cüdë chjai̧dëri̧ japea̧ pio ju̧i̧. Jabechji̧ cüdë a̧dë jo̧rȩtadëtärea̧ ji̧, cjäri̧ mareconȩ, a̧dë jo̧rȩtareconȩ coa chjadëri̧ a̧dorëremȩ pio ju̧i̧. 10Danȩ ca̧ ütë, mȩnȩ no̧mȩ na̧ mu̧i̧tjoi̧ ji̧ri̧ ërecjiape bagarërea̧ ji̧, na̧ chja̧pe oa tjamo̧ japarëremȩrea̧ pio ju̧i̧ ërecjiape bagarërea̧ ji̧, ado pio coabo, na̧ mu̧i̧tjoi̧ oa ërecjiape bagarërea̧ ji̧, jabechji̧ chaäa̧ oa cjo̧ro̧ tänȩrëremȩrenȩibe guadia ütërë cjo̧ro̧mȩ bë yuroro chaärea̧ bëräpȩ ju̧ri̧. 11Ja̧dëa ji̧ japamitë chjätä ëte gȩnȩrä, a̧ro̧rȩ yo̧a̧ri̧borë canȩjärëreji̧ri̧rea̧rȩ. Na̧ chja̧pe oa tjamo̧ japarëremȩrea̧ pio judi canȩjärëremȩde pio cüdëborë. Tjaoëpai̧ dari̧ canȩjäa̧rea̧rȩ. Ado ja̧dëa ji̧ a̧ro̧rȩ bëdüa̧ ji̧, 'Chia chia, ¿tjana̧ na̧rȩrea̧ chiadida?, ¿tjana̧ yo̧rea̧ chiadida?' quëna̧ jo̧rȩtaji̧ri̧pea̧rea̧rȩ. 12Jabo danȩ, pio ju̧ri̧pȩ, pio ibë nö̧ta chaäa̧ oa cjo̧ro̧rëremȩde ebereo pumȩ judi, pëi̧ chjarë. Guadia ja̧ ütë pio ju̧i̧ ja̧ mu̧i̧tjoi̧mȩrȩ cjo̧ro̧rëremȩde. Ado a̧ro̧rȩ canȩjäa̧ pio ju̧i̧ yo̧a̧rea̧ro̧jo̧ȩ. Ado judi chjadëri̧ goë ni̧bärëremȩdiibe. 13Judi ibë goë ni̧bäa̧mi̧ tjamo̧ri̧ yo̧a̧diibe. Chjadëri̧ ütarë yo̧a̧diibe. Judi goë ni̧bäa̧mi̧ ado chjereno̧ ja̧bepamȩpea̧requede na̧ea̧ pio ju̧i̧. Ado na̧ chja̧pe oa tjamo̧ japarëremȩrea̧ pio judi, jabechji̧ tori pio judiri gürüro cäpë ja̧bo tänȩa̧diro̧jo̧ȩ. Aja̧, ebereo pio judi goë ni̧bäa̧mi̧ ja̧bo tänȩa̧diro̧jo̧ȩ. Aja̧, pio judi chjadëri̧ goë ni̧be yürüpai̧ da jirodimȩ —yo̧rëremȩdejȩ pjarao̧ ju̧i̧ jararea̧ oa tjamo̧ ëba jaramȩ pio judi.

Pjarao̧ judi chaärea̧ bëri pio judiri go̧dü tänȩrëremȩdejȩ Joche ju̧i̧

14Ado pjarao̧ judi pio ju̧i̧ ta̧rëa̧ oaia ma̧ȩ chjadürëremȩdejȩ Joche judi pio jȩaiäpȩ jana̧tä. Ado pio ju̧i̧iä chjaodëri̧ go̧dü tänȩrëreji̧ri̧diro̧jo̧ȩ chaärea̧ bëri pio judiri. Ado yu̧ra̧ cö̧ oa chjadëri̧ täa ëte, chjibo chjadë oa ano̧ mire ina̧ ëte, jäeno̧rëremȩdejȩ pjarao̧ pio ju̧i̧iäpȩ. 15Ado pjarao̧ judi yo̧rëremȩdejȩ:

—Danȩ, canȩjäa̧requede cüdë, jabo chjadëri̧ goë ni̧bämȩ ju̧i̧ dadërequede. Jabo pumȩrȩ yo̧a̧ oa, “Aja̧, canȩjärea̧ pio ju̧i̧ chjadëri̧ goë ni̧bämȩde” yo̧a̧ oa, jabechji̧ ta̧rëa̧requede pio mȩa chjiari —yo̧a̧dejȩ pjarao̧ judi Joche pio ju̧i̧iäpȩmo̧.

16Ado Joche judi dëbë yo̧mȩrȩ yo̧rëremȩdejȩ:

—Danȩ, cüdëdërequede ca̧ ütë, jabo Ütë tjamo̧ pio judide goë ni̧bärea̧ yürümȩ judi. Pio judi yürüa̧ oa goë ni̧bäparequede mȩnȩ chjadëri̧ dabapea̧ oa.

17Ado ja̧dëa ji̧ pjarao̧ judi jënȩ canȩjäa̧ pio ju̧i̧ ni̧bä chjaorëremȩdejȩ Joche ju̧i̧. Ja̧di ta̧rëri̧ yo̧mȩrȩ yo̧a̧dejȩ:

—Danȩ, cüdë Niro quȩmȩ bea yuroro cjiarämi̧ cjiaremȩrequede. 18Ado beari pio judiri go̧düji̧ri̧ oa da̧rämi̧ cjiaremȩrequedejȩrȩ baca oa, 7 oa. Yo̧ cjia oa, chjadë oa darämi̧ cjiaremȩrequedejȩrȩ cäräräpȩ tai̧ji̧ri̧ oa, juraji̧ri̧ oa. 19Ado ja̧dëa ji̧ japamitë boi̧chji̧ chjätä ëte, jabechji̧ ado cja̧rȩmo̧ buba oa darämi̧ cjiaremȩrequedejȩrȩ baca oa. Peaja̧di beari pio judiri go̧düji̧ri̧ oa, darämi̧ cjiaremȩrequedejȩrȩ 7 oa. Putu ju gari maea oa darämi̧ cjiaremȩrequedejȩrȩ cjari̧da maea oa. Ja̧di da oa, cjari̧dati̧ oa, Ejitoräpȩ cja̧rȩmȩ co darëremȩdërë darämi̧ cjiaremȩreconȩ. Ado yo̧ cjiaji̧ri̧ pio ji̧ri̧iäpȩ jäa̧ji̧ri̧ oa darämi̧ cjiaremȩrequedejȩrȩ. 20Ado ja̧dëa ji̧ baca conȩgati̧ pio judiro̧ codë oa jura̧diro̧jȩrȩ baca yo̧ cjiaji̧ri̧ pio ji̧ri̧. Go̧a̧rȩ cjiadiädëri̧ jura̧diro̧jȩrȩ ütëbo oa. Ja̧dicjia ja̧dicjia mo̧a̧remȩrequede. 21Jabo ji̧ri̧ jura ëte yo̧pe bagatärea̧ ji̧, yo̧pe bagadëa̧dirȩ jabo jabechji̧, conȩgati̧rȩ cjiadiäa̧dirȩ. Aja̧, ja̧dicjia ja̧dicjia mo̧a̧remȩrȩ bëdüa̧requede japamitë boi̧chji̧. 22Jabo ja̧dëa ji̧ ado chereno̧ mo̧a̧mȩpea̧requede. Ado chjereno̧ canȩjämȩpea̧requede. Ado tirigo to oa darämi̧ cjiaremȩrequede. Ado chiamȩ oa darämi̧ cjiaremȩrequede 7 joë oa. Go̧a̧ti̧ oa, joechja tjamo̧pe baga̧ maea oa darämi̧ cjiaremȩrequede, tirigo cho ji̧ra̧ri̧ chiamȩ joë oa. 23Ado ji̧dë duri oa, pio jiro tirigo to cotori pio judiri ado chiamȩ oa darämi̧ cjiaremȩrequede ado cja̧rȩmo̧ joë oa. Aja̧, 7 joë oa chiamȩ oa ado darämi̧ cjiaremȩrequede to cotori pio judiri. Chjadëri chiadëmȩ oa, joechjadë maea oa, bori̧ maea oa darämi̧ cjiaremȩrequede gapea̧ maea oa. Ma̧i̧ dari̧ pjaepa oaiä, cjüdëpea̧ oaiä chjadëri̧ chiadëmȩmi̧ da oa darämi̧ cjiaremȩrequede. 24Ado ja̧dëa ji̧ joë gapea̧mȩ pio judi, joë bori̧ pio judi jura̧dejȩ joë chjadë pio ju̧i̧, joechjapea̧mȩ pio ju̧i̧. Duri oa chiaremȩ pio judi ütëbo oa jura̧dejȩ yabo chiaremȩ pio ju̧i̧. Ja̧dicjia ja̧dicjia mo̧a̧remȩrequede. Ado danȩ, peaja̧di ta̧rëri̧ yo̧a̧requedejȩrȩ jauëchja cjiari̧ japaji̧ri̧ pio ji̧ri̧, jabo cjäri̧ madiro̧coe, goë ni̧bärea̧ dadëa̧diro̧coe. Jabo ¿yö̧ta yo̧renȩ mȩnȩ? —yo̧mȩrȩ yo̧rëremȩdejȩ Joche ju̧i̧ pjarao̧ pio judi.

25Ja̧dëa ji̧ Joche judi dëbë yo̧mȩrȩ yo̧rëremȩdejȩ pjarao̧ ju̧i̧:

—Danȩ ca̧ ütë, mȩnȩ yo̧a̧ri̧ co canȩjäa̧ üdë ji̧mo̧ baäde —yo̧a̧dejȩ—. Jabechji̧ cja̧rȩmȩ canȩjärea̧de. Cja̧rȩmȩ na̧rȩrea̧ chiade. Jabechji̧ Ütë tjamo̧ pio judi, jënȩ japapea̧ pio ju̧i̧ chjadëri̧ na̧rȩa̧dimȩ mȩnȩ canȩjäa̧ pio ju̧i̧iä. 26Danȩ, pio jiro baca üdë, chjadë tjamo̧ üdë, 7rë, jabechji̧ 7 ui na̧rȩrea̧de. Ado tirigo joë üdë, joechja tjamo̧ üdë, 7rë, peaja̧di 7 ui na̧rȩrea̧de. Aja̧, yo̧a̧ri̧ canȩjärea̧ üde cja̧rȩmȩde. 27Ado baca cjari̧dati̧rȩ, conȩgai̧ti̧rȩ, 7rë, peaja̧di 7 ui na̧rȩrea̧de. Ado tirigo joë üdë, 7rë, ma̧i̧ dari̧ pjaepa oaiä, cjüdë ma oaiä gapea̧mȩ üdë, peaja̧di 7 ui na̧rȩrea̧de. Chiri üdë jurarea̧ oa yürüdërea̧ ui maeade. 28Danȩ, cüdë mȩa yo̧a̧mi̧ na̧rȩa̧dimȩ Ütë tjamo̧ pio judi. Jabechji̧ jënȩ japapea̧ pio ju̧i̧ chjiari na̧rȩa̧dimȩ jabërä. 29Danȩ, ma̧na̧padiibe davä jurarea̧ ji̧ra̧ri̧ yürümȩ ui üdë. Tjamo̧ davä. Ejito chiri üdë 7 ui nö̧ta a̧dë chjäte ji̧ra̧ri̧ yürüpade jurarea̧ oa jabëdiärea̧ decjiari̧, goarijärea̧ decjiari̧. 30-31Jabo ja̧dëa ji̧ 7 ui chjätä ëte, jabechji̧ yürüdëpade chiri üdë. Jabechji̧ 7 ui nö̧ta jurarea̧ oa yürüdëpade. Tjamo̧ davä. Pio jiro 7 ui nö̧ta, Ejitoräpȩ cjo̧ro̧ji̧ri̧ pio judiro̧ ana̧ri̧ tarapadirȩ a̧dë chjäte ta̧mȩcho̧ ja̧boji̧ri̧rȩ. Eami̧ jurarea̧ oa dadëpadirȩ. Chjai̧dëri̧ cjo̧ro̧padirȩ. Chiri üdë jurarea̧ ji̧ra̧ri̧ yürürërea̧ pio ju̧i̧ a̧dë jo̧rȩta mapadiro̧jo̧ȩ davä, a̧dë chjäte ta̧mȩcho̧ ja̧boji̧ri̧rȩ cjo̧ro̧a̧ oaiä. 32Aja̧, yo̧a̧ri̧ canȩjärea̧ oa, ji̧mo̧ baä maea oa, cja̧rȩmȩ na̧rȩrea̧ chia maea oa canȩjä tänȩa̧dimȩ Ütë tjamo̧ judi. Judi chjaodëri̧ japabëmi̧ jabërä chjadëri̧ na̧rȩa̧dimȩ canȩjäa̧ pio ju̧i̧iä. 'Aja̧, tjamo̧ri̧ japapaquëda, ano̧ mire jo̧rȩtarea̧ decjiari̧ japapaquëda' quëna̧ jo̧rȩtamȩrȩ na̧rȩa̧dimȩ Ütë tjamo̧ judi yo̧a̧ri̧ co canȩjärea̧ra̧ pio ju̧ri̧ra̧. 33Ja̧di tara yo̧requedemȩ ca̧ ütë. Danȩ, chjadëtäremȩde davä, mȩnȩ cja̧rȩmȩ üi̧ oa mitëpea̧ ji̧ Ejito chiri oa chjadëri̧ jidapea̧ ji̧. Chjadëri̧ ütararea̧ chiamȩ pio ju̧i̧, dabarea̧ chiamȩ pio ju̧i̧, urëdi oa jo̧rȩtarea̧ chiamȩ üi̧ pio ju̧i̧ mitëtäremȩrenȩ chiri tjamo̧ jidamȩpea̧ oa. 34Ado pio ju̧i̧ uëri tjamo̧ a̧doji̧ri̧ mu̧i̧tjo̧i̧ pio ji̧ri̧bo mitëtäremȩrenȩjȩrȩ jurarea̧ oa chjadëri̧ boeapea̧ oa. Jabechji̧ chiri üdë jurarea̧ ji̧ra̧ri̧ yürüa̧ nö̧ta, 7 ui nö̧ta, jabechji̧ o oa china̧chjari̧ boeapea̧ oa chjadëri̧ tutitäreji̧ri̧diro̧jo̧ȩ jurarea̧ oa. Danȩ, 5 chaco mitërä judi, cja̧rȩmȩrȩ china̧chjari̧ boeapea̧de. Aja̧, ja̧di maeari̧ japapea̧de. Ejito chiri nö̧ta oa jurarea̧ oa chjadëri̧ boeapea̧de. 35Tjamo̧ davä. Chiri üdë jurarea̧ ji̧ra̧ tjamo̧ oa yürüpea̧ nö̧ta, 7 ui nö̧ta, jabechji̧ pio jiro jurarea̧ chjö̧na̧i̧ oa chjadëri̧ a̧dopatäreji̧ri̧diro̧jo̧ȩ chjadëri̧ boeapea̧ oa, jurarea̧ boearea̧ bëräpȩ chjadëri̧ boeapea̧ oa. Jabechji̧ pjarao̧ ja̧ bë ma̧ri̧rä boearea̧ bërä, bë ma̧ri̧ nö̧tai̧ oa cjiamȩ boearea̧ bërä, jabechji̧ chjadëri̧ boeatäreji̧ri̧diro̧jo̧ȩ chjadëri̧ jidapea̧ oa, bë ma̧ri̧rä cjo̧ro̧ji̧ri̧ pio judiro̧ ütëborë chjadëri̧ jurarea̧ dapea̧ oa. Aja̧, pio mȩnȩ tänȩa̧ oa chjadëri̧ jidatäreji̧ri̧diro̧jo̧ȩ pio jiro jurarea̧ oa. 36Tjamo̧ davä. Pio jiro jurarea̧ üdë china̧chjari̧ tutipea̧de. Chjadëri̧ boeapea̧de pumȩ ja̧ jurarea̧ decjiapea̧rä yuro. Ado ja̧dëa̧ ji̧ jurarea̧ decjiapea̧rä, 7 ui nöta chiri üdë jurarea̧ yürüdëmȩpea̧rä, jabechji̧ pio jiro jurarea̧ oa jura̧ oaiä chjätärea̧ dapadirȩ Ejitoräpȩ cjo̧ro̧ji̧ri̧ judiro̧. Jabechji̧ judiro̧ ta̧mȩcho̧ ja̧boji̧ri̧rȩ ja̧botärea̧ ji̧, jurarea̧ boearea̧ bë pio ju̧i̧iä chjadëri̧ jurarea̧ dapadirȩ —yo̧mȩrȩ ni̧bä chjaorëremȩdejȩ pjarao̧ ju̧i̧ Joche judi.

Chiri tjamo̧ jidamȩ tänȩrëremȩdejȩ Joche ju̧i̧ pjarao̧ judi

37Ado Joche judi ni̧bä chjaoa̧ ji̧, ta̧rë ja̧borëremȩdejȩ pjarao̧ judi. ‘Chjadëri̧ yo̧diibëda, peaja̧di dari̧ japatäreji̧ri̧a̧ro̧da, pio yodë yo̧a̧mi̧ japatäreji̧ri̧a̧ro̧da’ quëna̧ jo̧rȩtamȩrȩ ta̧rë ja̧borëremȩdejȩ. Ado judimo̧rȩdë jabo pio jȩa a̧doji̧ri̧ pio judiro̧borë ta̧rë ja̧boji̧ri̧pea̧diro̧jo̧ȩ Joche ju̧i̧. 38Ado ja̧dëa ji̧ pjarao̧ judi yo̧rëremȩdejȩrȩ pio jȩa a̧doji̧ri̧ pio ji̧ri̧:

—Danȩrȩ, Ütë tjamo̧ pio judi dabarea̧ yürüa̧ oa ni̧bä chjaoa̧diibe pio yodëje. Ütë tjamo̧ ja̧ Tjo pio ju̧i̧ chiade. Pio yoa üi̧ oa mitëtäreji̧ri̧rea̧ro̧jo̧ȩ Joche pio ju̧i̧. Judimi̧ dadëdirȩ o judiro̧. Jabechji̧ pio yodëje dabarea̧ chiade —yo̧a̧dejȩrȩ.

39Ado ja̧dëa ji̧ pjarao̧ judi pio jȩa a̧doji̧ri̧ pio ji̧ri̧ yo̧a̧ duri oa, yo̧rëremȩdejȩ Joche ju̧i̧:

—Danȩ, Ütë tjamo̧ judi pio yoa chjö̧na̧i̧ oa pio mȩaiäpȩmo̧ chjadëri̧ na̧rȩa̧ tara, cüdë canȩjäa̧ pio ju̧i̧ chjiari pio mȩaiäpȩmo̧ daba tänȩa̧ tara, jabechji̧ pio mȩa mitëtäreji̧ri̧rea̧ro̧mȩ. Jabechji̧ a̧dë chjäte dabarea̧ chiamȩrenȩ. Ja̧didëdirȩ o judiro̧. 40Pio ju̧i̧iä ca̧ bë oa tjamo̧ jidamȩ tänȩrequedemȩ. Ado Ejitoräpȩ cjo̧ro̧ji̧ri̧ pio judiro̧ ütëbodärärë ta̧rë ta̧rë japa mapadiro̧mȩ. Jabechji̧ pio cüdëmo̧rȩ pio mȩaiä ji̧dë u̧i̧ ütëmȩrȩ cjo̧ro̧requede cüdë.

41Ado ja̧dëa ji̧ pjarao̧ judi ji̧dë u̧i̧ yo̧mȩrȩ a̧dë yo̧rëremȩdejȩ Joche ju̧i̧:

—Danȩ, Ejito chiri tjamo̧ jidamȩ tänȩparequedemȩ yaba̧.

42Ado ja̧di ta̧rëri̧ yo̧rëremȩrȩ coëno̧a̧dejȩ jibëa̧ ichi chaärea̧ oa, go̧ȩ chiamȩ ichi chaärea̧ oa. Ado jibëa̧ ichiräremȩ oa ano̧ mire chaärëremȩdejȩ Joche ja̧ ichirä. Ado chjibo ba chiati̧ oa yürürëremȩdejȩ peaja̧di. Ado ju̧i̧ uëri i̧a̧rea̧ ba chiati̧ oa yürüa̧dejȩ peaja̧di, oro chiamȩ oa. 43Ja̧dëa ji̧ pjarao̧ judi cha tänȩrëremȩdejȩ jibëa̧ yae chararä, pio jȩa tjamo̧ a̧domȩ pio ju̧i̧ ja̧ yae chararä. Ado jënȩ yae charara̧ jäa̧mi̧ nö̧ta goae tarari̧ ëna̧diärëreji̧ri̧dirȩ: "Juchatura̧ tjätjäpë china̧därächji̧vä dibëa̧ daito üdë daburäpȩ yuro". Aja̧, ja̧di ta̧rëri̧ ëna̧diä ëna̧diä cjiarëreji̧ri̧dirȩ Joche ja̧ dëbëräpȩ. Ja̧di dari̧ japamȩrȩ japarëremȩdejȩ Joche ju̧i̧ pjarao̧ judi chiri tjamo̧ jidamȩ tänȩrërea̧ ji̧.

44Ado a̧de yo̧mȩrȩ yo̧rëremȩdejȩ Joche ju̧i̧ pjarao̧ judi:

—Danȩ, pjarao̧ pio judirequede cüdë. Ado pio cüdë a̧dë chjäte ütë tara, jabechji̧ yo̧requedemȩ: Danȩ, Ejito chiriräpȩ cjo̧ro̧ji̧ri̧ pio judiro̧ ütëbodärärë ta̧rë ta̧rë japa mapadiro̧mȩ pio cüdë tänȩa̧ oaiä. Jiadarea̧ decjiari̧, a̧dë chiquirea̧ decjiari̧ ta̧rë ta̧rë japa mapadiro̧mȩ, uapaji̧ri̧rȩ. Aja̧, pio ju̧i̧ ma̧ȩ oa yürürequedemȩ —yo̧mȩrȩ yo̧rëremȩdejȩ pjarao̧ judi Joche pio ju̧i̧iäpȩmo̧.

45Ja̧dëa ji̧ judi ano̧ mire quȩparëremȩdejȩ Joche ju̧i̧. Jabechji̧ Ejitoräpȩ cjo̧ro̧mȩ ja̧ quȩra̧ pio ju̧ri̧ra̧ ano̧ mire quȩpea̧dejȩ. Chanapanȩa quȩra̧ pio ju̧ri̧ra̧ ano̧ mire quȩpea̧dejȩ. Ado ja̧dëa ji̧ ëba tänȩrëremȩdejȩ Achenata quȩyi̧ pio ji̧, Potipjera quȩmȩ pio ju̧i̧ ja̧ jojabi ji̧. Ado Joche ja̧ joja̧ȩtȩ judi teracaba ütë pio ju̧i̧iä goë tuti cjo̧dëmȩrȩ cjo̧ro̧rëremȩde jibëa̧ pumȩ pio ji̧ri̧ chjiari. Ono̧ quȩmȩ bë ma̧ri̧räpȩ cjo̧ro̧rëremȩde. Pio ju̧i̧ ja̧ jojabi ji̧ ëba tänȩrëremȩdejȩ Joche ju̧i̧ pjarao̧ judi. Aja̧, ja̧di dari̧ japamȩrȩ japarëremȩde pjarao̧ judi. Jabechji̧ Joche pio ju̧i̧ mitërërea̧ ji̧, Joche pio ju̧i̧ Ejito chiri tjamo̧ jidamȩ tänȩrërea̧ ji̧ ja̧di dari̧ japarëremȩde. 46Ado Joche judi pjarao̧ ja̧ dëbëräpȩ pearä cjiarërea̧ ji̧, jabechji̧ 30 ui goarëremȩde.

Ja̧dëa ji̧ Joche judi a̧dë tai̧rëremȩdejȩ pjarao̧ ju̧i̧. Jabechji̧ Ejito chiri nö̧tai̧ oa tai̧pea̧ oa, pio jiro chiri oa chjadëri̧ ütarë dapea̧ oa, a̧dë tai̧rëremȩdejȩ. 47Ado chiri üdë, jabechji̧ a̧dë chjäte ji̧ra̧ri̧ yürürëremȩde davä jurarea̧ oa. Aja̧, 7 ui nö̧ta a̧dë chjäte ji̧ra̧ri̧ yürürëremȩde. 48Ado Joche judi tänȩa̧ oa, jabechji̧ chjadëri̧ a̧doparëreji̧ri̧diro̧jo̧ȩ jurarea̧ oa chjadëri̧ boeapea̧ oa. Tjado quȩri̧räpȩ cjiamȩ bë ma̧ri̧rä boea̧diro̧jo̧ȩ. Ja̧di maea oa japarëreji̧ri̧dirȩ bë ma̧ri̧ nö̧ta oa. Ado ja̧dëa ji̧ bë ma̧ri̧ yuroro cjiamȩ tjadori pio judiri ara jäa̧diro̧jo̧ȩ jurarea̧ oa pio jiro bë ma̧ri̧räpȩmo̧ chjadëri̧ boeapea̧ oa. 49Aja̧, a̧dë chjäte ji̧ra̧ oa boearëremȩdejȩ Joche judi. Dabu nȩgȩ cho üdë, ui ana̧ yuro a̧rȩmȩ dabu cho pio judi ji̧ra̧ tjamo̧rëmi̧ cjiari̧ cjiarëremȩde jurarea̧ üdë. Jabechji̧ ütararea̧mi̧dëri̧ cjiarëremȩde.

Joche judi nö̧rirëremȩdejȩrȩ jibëa̧ ja yo̧a̧ri̧ oa

50Ado chiri üdë jabë jurarea̧ ji̧ra̧ tjamo̧ oa yürüa̧rä Joche judi nö̧rirëremȩdejȩrȩ jibëa̧ bori̧ ji̧ri̧, yo̧a̧ri̧ oa. Jibëa̧ iei̧ jini̧, Potipjera quȩmȩ ja̧ jojabi pio jini, Achenata quȩyi̧ pio jini̧ arë yürüa̧nȩjȩ. 51Ado yabomȩ pio ju̧i̧ quȩparërea̧ ji̧, jabechji̧ Manache quȩra̧ pio ju̧ri̧ra̧ quȩpea̧dejȩ. Ado yo̧rëremȩde Joche judi: "Aja̧, cüdë conȩda̧ oa cjo̧ro̧rërea̧ ji̧, ca̧ pumȩ judiro̧ pio coaiäpȩmo̧ chjai̧dëri̧ japarërea̧ ji̧, jabechji̧ chjadëri̧ a̧dë jo̧rȩta tänȩa̧dique Ütë tjamo̧ judi". Aja̧, ja̧di dari̧ jo̧rȩtamȩrȩ quȩparëremȩdejȩ jibëa̧ ja oa. Ado pio ju̧i̧iä pio jiro quȩra̧ pio ju̧ri̧ra̧ quȩparëremȩdejȩ. Aja̧, "A̧dë jo̧rȩta tänȩa̧dique" yo̧mȩ quȩra̧ pio ju̧ri̧ra̧ quȩpea̧dejȩ. 52Ado ja̧dëa ji̧ japamitë chjätä ëte, ado cja̧rȩmo̧ ja oa nö̧ria̧ ji̧, Epjarai̧ quȩra̧ pio ju̧ri̧ra̧ quȩparëremȩdejȩ. Ado yo̧rëremȩde Joche judi: "Aja̧, cüdë chjai̧dëri̧ cjo̧ro̧rërea̧ chiriräpȩ ju̧ri̧ nö̧ria̧requedejȩrȩ ca̧ bori̧ ji̧ri̧ Ütë tjamo̧ pio judi tänȩa̧ oa". Ado ja̧di tara Joche judi pio jiro quȩra̧ quȩpea̧dejȩ jibëa̧ ja oa. Aja̧, "ca̧ bori̧ yürüa̧dique" yo̧mȩ quȩra̧ pio ju̧ri̧ra̧ quȩparëremȩdejȩ.

Chiri üdë jurarea̧ oa yürüdëmȩpea̧de

53Ado Ejito quȩmȩ chiri üdë 7 ui nö̧ta a̧dë chjäte ji̧ra̧ri̧ yürürëremȩde jurarea̧ oa. 54Jabo pio jiro 7 ui chjätä ëte cjäri̧ made, jurarea̧ oa yürüdëmȩpea̧de. Jabechji̧ Joche judi pjarao̧ pio ju̧i̧ jabërä goë ni̧bärërea̧mi̧ jurarea̧ oa yürüdëmȩpea̧de chiri üdë. Ado pio ju̧i̧iä chiriräpȩti̧ oa cjo̧ro̧ji̧ri̧ pio judiro̧ ta̧mȩcho̧ ja̧boji̧ri̧rȩ cjo̧ro̧ marëreji̧ri̧dirȩ. Tjamo̧ davä. Ejito dairäpȩ cjo̧ro̧ji̧ri̧ pio judiro̧, ma̧ jürümi̧ cjiaji̧ri̧rȩ cjo̧ro̧rëreji̧ri̧dirȩ. Jabo Ejitoräpȩ ju̧ri̧, jabechji̧ jurarea̧ ji̧ra̧ tjamo̧rëremȩde. Jabechji̧ chjadëri̧ boea̧ oa goarëreji̧ri̧diro̧jo̧ȩ. Tutia̧rä boea̧ oa goarëreji̧ri̧diro̧jo̧ȩ mitërea̧mi̧dëri̧. 55Ado japamitë chjätä ëte Ejitoräpȩ cjo̧ro̧ji̧ri̧ judiro̧ ta̧mȩcho̧ pio ju̧i̧ ana̧ri̧ taraji̧ri̧pea̧rä, jabechji̧ pjarao̧ pio ju̧i̧iäpȩmo̧ järëreji̧ri̧dirȩ tirigo cho oa cjo̧dëpea̧ oa. Ado pjarao̧ judi yo̧rëremȩdejȩrȩ:

—Danȩrȩ, goëdechji̧jo̧ȩ Joche pio ju̧i̧. Pio ju̧i̧iä cjo̧dëpea̧de. Pio judi dibë yo̧a̧mi̧ japachji̧vä —yo̧a̧dejȩrȩ.

56Ado pio ju̧i̧iä chiri nö̧tai̧ oa cjo̧ro̧ji̧ri̧ pumȩ pio judiro̧ ta̧mȩcho̧ pio ju̧i̧ ana̧ri̧ taraji̧ri̧pea̧rä, jabechji̧ Joche pio judi are goërëremȩdejȩ jurarea̧ boearea̧ jo̧ chjö̧na̧i̧ oa. Aja̧, Ejitoräpȩ cjo̧ro̧ji̧ri̧ pio ji̧ri̧iäpȩmo̧ gatë tänȩpea̧ oa are goëa̧dejȩ. 57Ado Ejito chiri dairäpȩ cjo̧ro̧ji̧ri̧ pio judiro̧, ado chiri oëra̧ti̧ oa cjo̧ro̧ji̧ri̧ pio judiro̧borë go̧düdärärëreji̧ri̧dirȩ peaja̧di gatëpea̧ oa. Ado pio ji̧ri̧iäpȩmo̧bo gatë tänȩrëremȩdejȩrȩ Joche judi. Tirigo cho oa gatë tänȩa̧dejȩrȩ. Jabechji̧ cja̧rȩmo̧räpȩ järea̧mi̧dëri̧ ja̧dira̧mo̧ ma järëreji̧ri̧dirȩ pumȩ judiro̧, jurarea̧ ji̧ra̧ tjamo̧räpȩ ju̧ri̧.

Currently Selected:

Taruparea̧ Ma̧ȩ 41: Pume

Highlight

Compare

Copy