Taruparea̧ Ma̧ȩ 40

Pumȩ judiro̧ canȩjäa̧ pio ju̧i̧ goë ni̧bärëremȩde Joche judi

1Joche judi chaärea̧ bëräpȩ japamitë ana̧ri̧ cjo̧ro̧rërea̧ ji̧, Ejitoräpȩ cjo̧ro̧mȩ ütë ja̧ mu̧i̧tjoi̧ pio judiro̧ yo̧a̧ri̧rȩ chjadëri̧ japadërëreji̧ri̧diro̧jo̧ȩ jibëa̧ ütë oa, pjarao̧ pio ju̧i̧. Jabechji̧ goaedëri̧ jo̧rȩtamȩparȩrëreji̧ri̧diro̧jo̧ȩ. Tjamo̧ davä. Pio jȩa jararea̧ oa tjamo̧ ëba jaramȩ pio judi, ado jibëa̧ chja̧pe oa tjamo̧ japamȩ pio judiborë goaedëri̧ jo̧rȩtamȩparȩa̧diro̧jo̧ȩ pjarao̧ pio ju̧i̧. 2Ado pio ju̧i̧iä ërecjiapea̧dejȩrȩ. Jibëa̧ mu̧i̧tjoi̧ yo̧a̧ri̧ oa ërecjiapea̧dejȩrȩ. 3Ado pio ju̧i̧iä chaäa̧ cjia tänȩrëremȩdejȩrȩ. Pjarao̧ ja̧ guadia ütërë cjo̧ro̧mȩ bë yuroro chaärea̧ bëräpȩ ju̧ri̧ chaärëremȩdejȩrȩ, Jocherë chaäa̧ oa cjo̧ro̧mȩräpȩ pio ju̧ri̧. 4Ado guadia ütë pio judi tänȩa̧ oaiä, jabechji̧ Joche pio judi jidamȩpea̧dejȩrȩ. Aja̧, pjarao̧ ja̧ oa ja̧bepareji̧ri̧ pio ji̧ri̧ jidamȩpea̧dejȩrȩ. Ado judiro̧ japamitë ana̧ tjamo̧ri̧ cjo̧ro̧rëreji̧ri̧dirȩ chaärea̧ bëräpȩ pio ju̧ri̧.

5Ado pjarao̧ ja̧ mu̧i̧tjoi̧rëreji̧ri̧ pio judiro̧ chaärea̧ bëräpȩ cjo̧ro̧a̧ nö̧ta, yo̧a̧ri̧borë canȩjä mo̧a̧rëreji̧ri̧dirȩ. Tjamo̧ davä. Ju̧i̧ ja̧ jararea̧ tjamo̧ ëba jararëremȩ pio judi, ado ju̧i̧ ja̧ chja̧pe tjamo̧ japarëremȩ pio judiborë gȩnȩrä canȩjä mo̧a̧rëreji̧ri̧dirȩ. Tjaoëpai̧ dari̧ canȩjäji̧ri̧rȩ mo̧a̧rëreji̧ri̧dirȩ, yo̧a̧ri̧ jo̧rȩtarea̧ chiami̧ dari̧. 6Ja̧dëa ji̧ dopea̧rä, Joche judi pio ji̧ri̧ goë daera̧pea̧rä, bücjüri̧ cjia tjamo̧ji̧ri̧ oa darëremȩdejȩrȩ. 7Ja̧di tara iëno̧ë ta̧rëa̧dejȩrȩ Joche judi:

—¿Jabo tjana̧ ju̧i̧iä bücjüri̧ cjiari̧ jo̧rȩtanȩrȩ mȩnȩro̧?

8Ado judiro̧:

—Cjäri̧ marea̧rȩ, canȩjä mo̧areji̧ri̧rea̧rȩ jabo pio ju̧i̧ chjiari goë ni̧bämȩ decjiade. Ado a̧ro̧rȩ, ‘Aja̧, na̧rȩrea̧ chia jirodida, ¿jabo tjana̧ yo̧cjivadi?, a̧ro̧rȩ canȩjäa̧ üdë, ¿tjana̧ na̧rȩcjivadi?’ quëna̧ jo̧rȩtaji̧ri̧rȩ bücjüri̧ cjiarea̧rȩ goë ni̧bämȩ decjia tara —yo̧rëreji̧ri̧diro̧jo̧ȩ Joche ju̧i̧.

Ja̧dëa ji̧ Joche judi iëno̧ë ta̧rëa̧dejȩrȩ:

—Danȩrȩ, mȩnȩro̧ canȩjäa̧ pio ju̧i̧ chjiari ¿dabadëde Ütë tjamo̧ judi? ‘Mȩnȩro̧ canȩjäa̧ üdë, pio ju̧i̧ na̧rȩpea̧dida, pio ju̧i̧ daba tänȩpea̧dida’ ¿quëna̧ dabadëde Ütë tjamo̧ judi? Dëdë, dabade. Danȩrȩ, yo̧chji̧coe. Mȩnȩro̧ canȩjäa̧ pio ju̧i̧ chjadëri̧ ni̧bä chjaochji̧coe —yo̧mȩrȩ yo̧rëremȩdejȩrȩ Joche judi.

9Pio ju̧i̧iä pjarao̧ ju̧i̧ jararea̧ oa tjamo̧ ëba jararemȩ pio judi taruparëremȩde ni̧bä chjaopea̧ ji̧. Jënȩ canȩjäa̧ pio ju̧i̧ ni̧bä chjaorëremȩdejȩ Joche ju̧i̧. Ado yo̧a̧dejȩ:

—Danȩ, uva to oa darämi̧ cjiamȩrȩ canȩjä mo̧a̧remȩrequede. 10Tjarari̧ a̧ chiamȩ oa darämi̧ cjiaremȩreconȩ uva to oa. Ado a̧ üdë chjuchju chiamȩpea̧de. Ado chjuchjuremȩ üdë uva mapea̧de. Mo̧ëpea̧mȩ oa darämi̧ cjiaremȩreconȩ uva ji̧ra̧ oa. 11Ado ja̧dëa ji̧ pjarao̧ pio ju̧i̧ ja̧ ae jararea̧ oa mitëa̧rämi̧ cjiaremȩreconȩ. Ado uva ui oa ae jararea̧räpȩmo̧ ca̧pea̧ oa cjae cha̧oërämi̧ cjiaremȩreconȩ uva oa. Ado ja̧dëa ji̧ pjarao̧ pio ju̧i̧iäpȩmo̧ goë yürüa̧rämi̧ cjiaremȩreconȩ uva ui oa. Aja̧, ja̧dicjia ja̧dicjia mo̧a̧remȩrequede cüdë. ¿Jabo tjana̧ yo̧rea̧ chiade? —yo̧a̧dejȩ Joche ju̧i̧.

12Ado Joche judi goë ni̧bämȩrȩ dëbë yo̧a̧dejȩ:

—Tjana̧ yo̧rea̧ chiadëde, yo̧rea̧ chiade. Danȩ, tjarari̧ a̧ üdë tjarari̧ do na̧rȩrea̧de. 13Tjarari̧ do chjätä ëte ado chjereno̧ ja̧bepa tänȩpadimȩ pjarao̧ judi. Mȩnȩ pearä ja̧beparërea̧mi̧ ja̧bepa tänȩpadimȩ ado chjereno̧. Ado jararea̧ tjamo̧ ëba jaramȩrȩ ja̧bepaparenȩ. Pio ju̧i̧ yo̧rea̧de mȩnȩ canȩjäa̧ üdë. 14Ado danȩ, mȩnȩ go̧düa̧rä, pjarao̧ ja̧ oa ado chjereno̧ ja̧bepamȩpea̧rä, jabechji̧ a̧dë jo̧rȩtadëcoe. Pjarao̧ pio ju̧i̧ goë tuti ni̧bäjo̧ȩ pio coa chjiari pio cüdëborë go̧dürea̧ dapea̧ oa. Jabechji̧ cjäri̧ri̧ cjia dacoe. 15Danȩ, cüdë pearä judi, jabechji̧ ebereo pumȩrȩ cjo̧ro̧mȩ chiriräpȩ cjo̧ro̧rëremȩrequede. Jabo gatë tänȩa̧diro̧coe mu̧i̧tjoi̧ mape bagari̧. Ado pio jauëräpȩmo̧ chia ma̧na̧diro̧coe Ejitoräpȩ. Ado cüdë chjai̧dëri̧ japadëa̧ ba oa chaäa̧ oa cjiamȩrȩ doparequede yaba̧. Ja̧di tara yo̧requedemȩ. Mȩnȩ go̧düa̧rä, jabechji̧ cjäri̧ri̧ cjia jo̧rȩtacoe —yo̧mȩrȩ ni̧bä chjaorëremȩdejȩ Joche judi.

16Ado ja̧dëa ji̧ cja̧rȩmo̧ üdë ta̧rë charërea̧ ji̧, pjarao̧ ja̧ oa chja̧pe oa tjamo̧ japamȩ pio judi Joche pio ju̧i̧ ta̧rë cha̧ ji̧, ‘A̧ja̧, pio coa chjiaribo chjadëri̧ goë ni̧bäpa jirodida, cüdë canȩjäa̧ üdë peaja̧di na̧rȩrea̧ chjadë oa chia jirodida, peaja̧di chjaodëri̧ go̧dürea̧ daemȩ jiroquëda’ quëna̧ jo̧rȩtamȩrȩ järimȩpea̧de ni̧bä chjaopea̧ ji̧ jënȩ canȩjäa̧ pio ju̧i̧ chjiari. Ado yo̧rëremȩdejȩ Joche ju̧i̧:

—Danȩ, pio cüdëborë canȩjä mo̧a̧remȩrequede. Tjarari̧ jëdërea̧ oa yuarämi̧ cjiaremȩrequede. 17Ado uëta̧ra̧ri cjiamȩ jëdërea̧ üdë chja̧pe ji̧ra̧ oa chiarämi̧ cjiaremȩreconȩ pjarao̧ ja̧ oa. Jabo pua no̧i̧dërë bae jurarämi̧ cjiaremȩreconȩ chja̧pe oa. Aja̧, ja̧di ja̧dicjia mo̧a̧remȩrequede cüdë. ¿Tjana̧ na̧rȩrea̧ chiade?

18Ado Joche judi dëbë yo̧rëremȩdejȩ:

—Tjana̧ na̧rȩrea̧ chiadë, na̧rȩrea̧ chiade. Danȩ, tjarari̧ jëdërea̧ üdë tjarari̧ do na̧rȩrea̧de. 19Ado tjarari̧ do chjätä ëte tori pio judiri cäpë ja̧bo tänȩpadimȩ pjarao̧ judi gürü oa. Ado pua no̧i̧dërë jurapadiro̧jo̧ȩ na̧ go̧a̧remȩ pio ju̧i̧ —yo̧mȩrȩ goë ni̧bärëremȩdejȩ Joche judi.

20Ja̧dëa̧ ji̧ tjarari̧ do chjätä ëte, jibëa̧ mu̧i̧tjoi̧ chjö̧na̧i̧därä oa a̧dopa tänȩrëremȩdejȩrȩ pjarao̧ judi. Joji̧ri̧ jini̧ pio jȩa ararërea̧ do pio ju̧i̧ jo̧rȩtamȩrȩ a̧dopa tänȩrëremȩdejȩrȩ. Airi̧ cjia airi̧ cjia a̧dopapea̧ oa, goae tarari̧ jurapea̧ oa a̧dopa tänȩa̧dejȩrȩ. Ja̧dëa ji̧ ütëborë dari̧ go̧dü tänȩa̧dejȩrȩ jibëa̧ mu̧i̧tjoi̧reji̧ri̧ pio ji̧ri̧. Chaärea̧ bëräpȩ cjo̧ro̧reji̧ri̧ pio ji̧ri̧ go̧dü tänȩa̧dejȩrȩ. 21Ado pjarao̧ ju̧i̧ jararea̧ oa tjamo̧ ëba jararëremȩ pio ju̧i̧ ado chjereno̧ ja̧bepa tänȩrëremȩdejȩ jënȩ ja̧beparërea̧mi̧. 22Jabo jibëa̧ chja̧pe oa tjamo̧ japarëremȩ pio ju̧i̧, tori judiri cäpë ja̧bo tänȩtä yo̧ chjadürëremȩde. Joche pio judi goë yo̧a̧mi̧ japea̧dejȩrȩ. 23Jabo pjarao̧ ju̧i̧ jararea̧ oa tjamo̧ ëba jaramȩ judi chjadëri̧ jo̧rȩtatärea̧ ji̧, Joche oa chjadëri̧ jo̧rȩtatärea̧ ji̧, pio ju̧i̧ chjiari chjadëri̧ goë tuti ni̧bätärea̧ ji̧, cjäri̧ madejȩ, a̧dë jo̧rȩtarëremȩdejȩ. Eami̧ oa yo̧dëa̧de.

Currently Selected:

Taruparea̧ Ma̧ȩ 40: Pume

Highlight

Compare

Copy