Go̧dürea̧ Ma̧ȩ 33

Ütë judi Chinai quȩmȩ ya̧mi̧ri pio judiri baätä yo̧rëremȩdejȩrȩ icharaita ji̧ri̧

1Ado Jeova judi yo̧rëremȩdejȩ Moiche ju̧i̧:

—Danȩ, pio yudiri baächji̧vä yaba̧. Mȩnȩ Ejito chiriri pio judiri ëba go̧düa̧ pumȩ pio ji̧ri̧ chjadëri̧ ëba baäjȩrȩ cüdë dibëa̧ ütëti̧ pio ji̧ri̧ yo̧rërea̧ chiriräpȩ. Aja̧, chiri pio ju̧i̧ chjiari yo̧ë cjiadärëremȩrequedejȩrȩ ma̧ȩ chjádë yürürea̧ decjiari̧, ji̧dëdiä ni̧bärea̧ decjiari̧. Abaraa̧ pio ju̧i̧, Icha pio ju̧i̧, ado Jacobo pio ju̧i̧ yo̧ë cji̧däa̧requedejȩrȩ. Ado pio ju̧i̧iä pio judiri ja̧ji̧ri̧ pio ji̧ri̧iäpȩmo̧ yürüpea̧ chiriräpȩ ëba baätä earequedemȩ. 2Ado ca̧ mu̧i̧tjoi̧ oa, a̧dërimȩ mu̧i̧tjoi̧ pio ju̧i̧ chjadëri̧ ëba baäpea̧ oa chjadüpareconȩ pio dibë chjadëri̧ na̧rȩriä ëba baäpea̧ oa. Ado Canaa̧ quȩmȩ chiriräpȩ cjo̧ro̧ji̧ri̧ pio ji̧ri̧ baä tänȩparequedejȩrȩ. Aja̧, cananeo pio ji̧ri̧, amoreo pio ji̧ri̧, itita pio ji̧ri̧, pjerecheo pio ji̧ri̧, eveo pio ji̧ri̧, jebucheo pio ji̧ri̧bo baä tänȩparequedejȩrȩ. 3Ado mȩnȩro̧ chiri chjadë tjamo̧räpȩ baänȩrȩ. Jurarea̧ ji̧ra̧ri̧ yürümȩräpȩ baänȩrȩ. Jabo pio cüdë pio dibë nö̧ta ëba baätärea̧ ji̧, ëba baädëparequededibe. Jabechji̧ chjuari̧ jiadaji̧ri̧nȩrȩ. Ta̧ra̧ puë cotomi̧ daji̧ri̧nȩrȩ. Jaboti̧ri̧ji̧ri̧nȩrȩ. Jabechji̧ pio cüdë dibë nöta ëba baärä judi chjaodëri̧ yuropapai̧ darequededibe baärea̧ no̧rä ju̧ri̧. Ja̧di ta̧ra ëba baädëparequededibe —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi, icharaita ütëbo oa yo̧mȩmi̧ dari̧.

4-5Ado Ütë tjamo̧ judi ji̧dë u̧i̧ yo̧mȩrȩ a̧de yo̧a̧dejȩ Moiche ju̧i̧:

—Aja̧, ja̧di ta̧rëri̧ yo̧tä earequedemȩ icharaita pio ji̧ri̧iäpȩmo̧ peaja̧di. "Danȩrȩ, pio mȩnȩro̧ chjuari̧ jiadaji̧ri̧nȩrȩ. Ta̧ra̧ puë cotomi̧ daji̧ri̧nȩrȩ. Cüdë dibë nöta ëba baärä judi, jachidai̧ oa ëba baärä judi, cjäri̧ marequededibe, chjaodëri̧ yuropapai̧ darequededibe mȩnȩro̧ ma̧i̧ dari̧ jiade ta̧rë chjaoa̧ oaiä. Ado yaba̧ coëno̧chji̧vä dibëa̧ märärea̧ oa, dibëa̧ i̧a̧rea̧ oa, dibëa̧ ichi chaärea̧ oa. Ado cüdë jo̧rȩta̧mi̧ japaparequededibe" yo̧tä earequedemȩ icharaita pio ji̧ri̧iäpȩmo̧ —yo̧mȩrȩ a̧de yo̧rëremȩdejȩ Moiche ju̧i̧ Jeova judi.

Ado icharaita judiro̧ Ütërë yo̧a̧ pio ju̧i̧ ta̧rëa̧ oaiä ana̧ri̧ ejaro cjiaji̧ri̧pea̧dirȩ, gito ana̧ri̧ jo̧rȩtaji̧ri̧rȩ. Ado i̧a̧rea̧ oa i̧a̧rërea̧ ji̧, i̧a̧dëji̧ri̧pea̧dirȩ. Ado ta̧ra̧ märärea̧ oa märärërea̧ ji̧, märädëji̧ri̧pea̧dirȩ. Ado ichi chaärea̧ oa chaärërea̧ ji̧, peaja̧di chaädëji̧ri̧pea̧dirȩ.

6Ado icharaita judiro̧ ütëborë baärëreji̧ri̧dirȩ. Chinai quȩmȩ ya̧mi̧ri pio judiri go̧düji̧ri̧rȩ baärëreji̧ri̧dirȩ i̧a̧dëji̧ri̧rȩ, märädëji̧ri̧rȩ, chaädëji̧ri̧rȩ.

Ütë tjamo̧ pio ju̧i̧ dëbëdiäpea̧ oa jo̧ boi̧chji̧ oa yu̧a̧ chjaorëremȩde Moiche judi

7Ado icharaita judiro̧ cjiadiäa̧rä, judiro̧ baäji̧ri̧rȩ cjiadiäa̧rä, jabechji̧ jibëa̧ jo̧ bori̧ oa cji̧deno̧rëreji̧ri̧diro̧jo̧ȩ. Ado judiro̧ ja̧di dari̧ japea̧mi̧ nö̧ta, Moiche judi cji̧därëremȩdejȩ jo̧ boi̧chji̧ oa Jevoa pio ju̧i̧ dëbëdiäpea̧ oa. Aja̧, icharaita judiro̧ bëpea̧ dairäpȩ cji̧därëremȩdejȩ jachi cjiari̧. Ado pio jiro jo̧ boi̧chji̧ oa, jabechji̧ “Jeova pio ju̧i̧ nöta dëbëdiärea̧ jo̧” yo̧a̧dejȩ Moiche judi#33:7 Dëbëdiärea̧ jo̧ oa jabë japadëa̧rä pio jiro jo̧ boi̧chji̧rä järëremȩde Moiche judi Jeova pio ju̧i̧ dëbëdiäpea̧ oa. I maeara̧ japea̧ oa cjiarëremȩde. Ji̧dë duri oarä, dëbëdiärea̧ jo̧ ana̧chjai̧ oa japea̧ oa goa̧rä, pio jiro jo̧ boi̧chji̧ oa cji̧dädëji̧ri̧pea̧diro̧jo̧ȩ. . Ado eami̧ pumȩ üdë, Jeova pio ju̧i̧iä ma̧ȩ ta̧rëtämi̧ cjiamȩ pio judi, jabechji̧ pio jiro jo̧ boi̧chji̧räpȩ järëremȩde jachi chjaräpȩ Ütë tjamo̧ pio ju̧i̧iä ta̧rëpea̧ oa. Ado Ütë tjamo̧ judi ni̧bärëremȩdejȩ.

8Ado Moiche judi dëbëdiärea̧ jo̧räpȩ jäa̧mi̧ nöta, jabechji̧ icharaita judiro̧ cho̧rë darëreji̧ri̧diro̧jo̧ȩ judi yu̧a̧däräa̧rä yuro. Aja̧, jibëa̧ bë joë yari pio judiri dae cjiaji̧ri̧rȩ cho̧rë daea̧diro̧jo̧ȩ. 9Ado Moiche judi dëbëdiärea̧ jo̧räpȩ yu̧a̧mi̧ nöta, go̧a̧ra̧ ë üdë, uë oa cjiaremȩ pio judi birë cjiana̧ra̧rëremȩde joë yarä. Ado Jeova judi, go̧a̧ra̧ ë tjoräpȩ cjiamȩrȩ ni̧bä chjaorëremȩdejȩ Moiche pio ju̧i̧ nöta. 10Ado icharaita judiro̧ go̧a̧ra̧ ë oa joë yaräpȩ birë cjiana̧ra̧mȩ oa daea̧mi̧ nöta, jibëa̧ bë joë yarä cjiaji̧ri̧rȩ, juchatura̧ tjätjäpë china̧därärëreji̧ri̧dirȩ daito üdë daburäpȩ yuro. 11Ado Jeova judi, jabechji̧ pumȩrȩ jibëa̧ jadü oa ni̧bä chjaomi̧ dari̧ ni̧bä chjaorëremȩdejȩ Moiche ju̧i̧, irä ni̧bä chjaomi̧ dari̧. Ado Ütë tjamo̧ pio ju̧i̧ nöta ni̧bä chjaoa̧ duri oa, ado chjereno̧ baärëremȩde Moiche judi icharaitarë cjo̧ro̧mȩ bëräpȩ, jibëa̧ bëräpȩ. Jabo Moiche ju̧i̧ a̧domȩ pio judi, jabechji̧ jo̧ dëbëdiärea̧ jo̧ tjoräpȩ cjiadiärëremȩde. Aja̧, Jochue quȩmȩ üdë, üi̧ pëi̧ chja üdë, Nu quȩmȩ joja pio judi, jabechji̧ jibëa̧ bëräpȩ baädërëremȩde, jabo jo̧ boi̧chji̧räpȩ ju̧ri̧ a̧dë cjiadiärëremȩdejȩ Moiche ju̧i̧.

Moiche judi Ütë tjamo̧ ja̧ chjacjiamȩrea̧ oa darëremȩdejȩ

12Ado cja̧rȩmo̧ doremȩrä Moiche judi yo̧rëremȩdejȩ Jeova pio ju̧i̧, ja̧di ta̧rëri̧ yo̧mȩrȩ:

—Danȩ, mȩnȩ coa yo̧a̧ ji̧, jabechji̧ "Mȩnȩ pio jiro pumȩ pio ji̧ri̧ Ejito chiriri pio judiri ëba go̧dütä earequedemȩ" yo̧a̧renȩque. "Aja̧, cüdë yo̧ë cji̧därërea̧ chiriräpȩ yuro ëba baätä earequedemȩ" yo̧a̧renȩque. Jabo danȩ Ütë, pio ju̧i̧mo̧i̧ jabë yo̧dëa̧renȩque. Ado pio ju̧i̧iä iäno̧ë ta̧rërequedemȩ. ¿Chjia tjamo̧de pio coadi tjamo̧ ëba baäpamȩ judi? Chjadëri̧ daba tänȩcoe. Ado danȩ, mȩnȩ coa yo̧a̧ ji̧, "Aja̧, cüdë pio mȩa chjiari chjö̧na̧i̧ oa dabamȩborë, jabechji̧ ma̧ chiadëri̧ cjiamȩrȩ darequedemȩ" yo̧a̧renȩque. 13Ja̧di tara mȩnȩ coa ma̧ chiadëri̧ cjia da tjamo̧rä judi, chja jabechji̧ chjadëri̧ yo̧coe mȩnȩ jo̧rȩta̧ pio ju̧i̧. Chjadëri̧ na̧rȩcoe cüdë chjadëri̧ ta̧rëdiäpea̧ oa, cüdë na̧ea̧ pio ju̧i̧ chjadëri̧ ja̧bepapea̧ oa, cüdë pio mȩa ma̧ chiadëri̧ cjiari̧ jo̧rȩta tänȩpea̧ oa. Ado danȩ, pio yoa ma̧ȩbo a̧de yo̧tämi̧ cjiarequedemȩ. Jabechji̧ mȩnȩ mitëa̧ pumȩ pio ji̧ri̧ a̧dë jo̧rȩtadëjȩrȩ. Jabechji̧ na̧ pumȩpe jäpea̧ oa mitërëremȩrenȩjȩrȩ —yo̧mȩrȩ yo̧rëremȩdejȩ Jeova ju̧i̧ Moiche judi.

14Ado Jeova judi dëbë yo̧mȩrȩ yo̧a̧dejȩ:

—Danȩ, pio cüdë ëba baäparequedemȩ. Pio cüdë tänȩa̧ oa boadärärea̧ daparenȩjȩrȩ mȩa eadëji̧ri̧ pio ji̧ri̧ —yo̧a̧dejȩ.

15Ja̧dëa ji̧ Moiche judi dëbë yo̧mȩrȩ yo̧a̧dejȩ Ütë tjamo̧ ju̧i̧:

—Jabo mȩnȩ pio ibë nöta tjamo̧ri̧ ëba baädërä judi, jabechji̧ pio yudirije baä tänȩdëtäremerenȩibe. 16Mȩnȩ pio ibë nöta tjamo̧ri̧ ëba baädërä judi, o judiro̧ jo̧rȩtapai̧ dadirȩ. 'Aja̧, Ütë tjamo̧ judi jibëa̧ pumȩ pio ji̧ri̧ ma̧ chiadëri̧ cjiamȩrȩ dadëdiji̧ri̧da, ea tjamo̧dëdiji̧ri̧da, cjäri̧ri̧ cjia dadë jirodiji̧ri̧da, ado Moiche pio ju̧i̧ eadë jirodiji̧da' quëna̧ jo̧rȩtapai̧ dadirȩ davä. Ado pio ju̧i̧iä yo̧requedemȩ, mȩnȩ ibë ëba baärä judimo̧ chjadëde. Jabechji̧ mȩnȩ ëba baäa̧ oaiämo̧i̧ chjadëri̧ tutia̧ oa cjiami̧ dari̧ cjiadiäparea̧rȩ. Pio mȩaiämo̧i̧ tjaoëpai̧ dari̧ cjiadiäparea̧rȩ. Tjamo̧ davä. Pio mȩnȩ ibë ëba baäa̧rämo̧ tjaoëpai̧ dari̧ cjiadiäparea̧rȩ chiriräpȩti̧ oa cjo̧ro̧ji̧ri̧ pumȩ pio judiro̧mi̧ dadëri̧ —yo̧mȩrȩ dëbë yo̧rëremȩdejȩ Moiche judi.

17Ado Jeova judi dëbë yo̧a̧dejȩ:

—Mȩnȩ coa yo̧a̧mi̧ japaparequede. Danȩ, pio mȩa chjiari chjö̧na̧i̧ oa dabamȩrequede. Ado chjö̧na̧i̧ oa dabamȩrȩ ma̧ chiadëri̧ cjiamȩrȩ darequedemȩ. Ja̧di tara mȩnȩ yo̧a̧mi̧ japaparequede. Jabechji̧ ëba baäparequededibe —dëbë yo̧a̧dejȩ.

18Ja̧dëa ji̧ Moiche judi yo̧a̧dejȩ:

—Ja̧dirä judi, jabechji̧ pio coaiäpȩmo̧ cjäri̧ri̧ cjiamȩrȩ chjadëri̧ na̧rȩcoe na̧ chjacjiamȩrea̧ oa. A̧dë chjäte tatari̧ cjiamȩ oa datämi̧ cjiarequedemȩ. Chjadëri̧ da tänȩcoe —yo̧a̧dejȩ.

19Ado Jeova judi dëbë yo̧a̧dejȩ:

—Aja̧, ca̧ chjacjiamȩrea̧ pio ju̧i̧ na̧rȩparequedemȩ. Na̧ dëbëräpȩ chjätäparequede mȩa chjadëri̧ na̧rȩpea̧ oa. Ado cüdë chjätärä, jabechji̧ mȩnȩ ta̧rërea̧mi̧ dari̧ yo̧parequedemȩ ca̧ quȩ ba chia oa. Danȩ, Jeova pio judirequede. Ado cüdë mitëa̧ pio ji̧ri̧iäpȩmo̧ cjäri̧ri̧ cjia daparequedejȩrȩ, Jeova yo̧mȩ quȩ pio ju̧i̧. Jabechji̧ cüdë mitëa̧ pio ji̧ri̧ cjäri̧ri̧ cjia daparequedejȩrȩ. Ado cüdë mitëa̧ pio ji̧ri̧ cjäri̧ri̧ cjia jo̧rȩtaparequedejȩrȩ peaja̧di. 20Jabo danȩ, ca̧ dacho oa, ca̧ chamacho oa darea̧mi̧dërenȩ. Jabechji̧ eami̧ pumȩ üdë ca̧ chama̧cho oa darä judi, ja̧bopade. Dadëpea̧de. Ado pio ju̧i̧iä ca̧ chamacho oa da tänȩdëparequedemȩ. 21Jabo danȩ, pio yi cjiavä ca̧ yuroro, pio yoa ta̧dë ana̧rä. 22Ado ca̧ chjacjiamȩrea̧ üdë chjätärä, a̧dë chjäte tatamȩ pio judi chjätärä, jabechji̧ chjadëri̧ yu̧a̧ tänȩparequedemȩ ta̧dë cjararä ju̧ri̧. Ado ca̧ ichira̧ tutiparequedemȩ na̧ dacho oa cüdë jachipea̧rä yuro. 23Ja̧dirämo̧, cüdë jachipea̧rämo̧ da tänȩparequedemȩ. Jabo ca̧ dacho oa dadëparenȩ jabo ca putu ju go̧a̧ maea oa oa daparenȩ —yo̧mȩrȩ yo̧a̧dejȩ Moiche ju̧i̧ Ütë tjamo̧ judi.

Currently Selected:

Go̧dürea̧ Ma̧ȩ 33: Pume

Highlight

Compare

Copy