Go̧dürea̧ Ma̧ȩ 32

Baca üi̧ boi̧chji̧mi̧ da oa japarëreji̧ri̧diro̧jo̧ȩ orora̧

1Moiche judi ya̧mi̧ uëräpȩ japamitë ana̧ri̧ cjiadiäa̧ oaiä, do ji̧ra̧ri̧ cjiadiäa̧ oaiä, icharaita judiro̧ tjoro tänȩrëreji̧ri̧diro̧jo̧ȩ Aro̧ ju̧i̧. Ado yo̧a̧diro̧jo̧ȩ:

—Danȩ, Moiche pio ju̧i̧ chjiari tjamo̧ri̧ dabadërea̧rȩ. Pio jiro üi̧ oa chjadëri̧ dabadërea̧ro̧jo̧ȩ. A̧dë cjarapea̧ jirodiibe. 'Aja̧, Ejito chiriri pio judiri tjamo̧ ëba ma̧na̧rëremȩ pio judida, jabo yaba̧, ¿tjana̧räpȩcjivadi? jiro decjiapea̧dida' quëna̧ jo̧rȩtarea̧ro̧jo̧ȩ. Ja̧di tara yo̧rea̧ro̧mȩ. Chja jabechji̧ jëdane yürüibe ado cja̧rȩmo̧ ütë oa ibë chjadëri̧ yabo ëba baäpea̧ oa —yo̧ji̧ri̧rȩ yo̧rëreji̧ri̧diro̧jo̧ȩ Aro̧ ju̧i̧.

2Ado pio ju̧i̧ ta̧rëa̧ oaiä, Aro̧ judi dëbë yo̧a̧dejȩrȩ:

—Danȩrȩ, dibëa̧ ivi jini̧ro̧, dibëa̧ u̧ri̧ judiro̧ oro chiamȩ ta̧ra̧ märärea̧ oa märädirȩ. Coëno̧chji̧vä jibëa̧ märärea̧ oa, ado goa jana̧chji̧ji̧coe.

3Ado pio ju̧i̧ ta̧rëji̧ri̧rȩ coëno̧a̧diro̧jo̧ȩ jibëa̧ märärea̧ oa. Ado goa järëreji̧ri̧diro̧jo̧ȩ Aro̧ ju̧i̧. 4Ado judiro̧ goa jäa̧ pio ju̧i̧ cjüëtü tjamo̧parȩrëremȩdejȩ ui mape bagari̧. Ado ja̧dëa ji̧ baca üi̧ boi̧mi̧ da oa jëdano̧rëremȩdejȩ. Ado chjereno̧ gapea̧mȩ oa chjadëri̧ japarëremȩdejȩ chjurorea̧ gaipara̧. Ado icharaita judiro̧ pio ju̧i̧ daea̧ ji̧ järi tjamo̧ji̧ri̧pe bagarëreji̧ri̧dirȩ. Ado yo̧a̧dirȩ:

—Danȩrȩ oti̧, icharaitarea̧rȩ, ado pio yodëje ibëa̧ ütëde. Ibë Ejito chiriri pio judiri go̧dü tänȩrëremȩ pio judide —yo̧a̧dirȩ.

5Ja̧dëa ji̧ Aro̧ judi järi tjamo̧ji̧ri̧ oa daea̧ oaiä gu̧na̧rea̧ mechja oa japëno̧rëremȩde baca üi̧ boi̧mi̧ da ja̧ dëbëräpȩ ju̧ri̧, oro maeara̧ japea̧ oa cjiamȩ ja̧ dëbëräpȩ pio ju̧ri̧. Ado gu̧na̧rea̧ mechja oa jëdano̧ ëte yo̧rëremȩdejȩrȩ icharaita ji̧ri̧:

—Danȩrȩ, jaco a̧dopaparea̧rȩ jurapea̧ oa, bochegua go̧a̧pea̧ oa. Jeova pio ju̧i̧ jo̧rȩtapea̧ oa a̧dopaparea̧rȩ —yo̧a̧dejȩrȩ.

6Ado dopea̧rä icharaita judiro̧ bëdürëreji̧ri̧dirȩ peadai̧rä. Ado jënȩro̧ jo̧rȩta̧mi̧ goa järëreji̧ri̧dirȩ cäë yürüpea̧ oa. Baca oa, oveja oa, chivo oa, pua oa goa jäa̧dirȩ. O oa codë oa cäë yürüa̧diro̧jo̧ȩ. Jabo o oa, codë oa cäë yürüdëa̧, jabo piodai̧ maea oa cäë yürüa̧diro̧jo̧ȩ. O oa mitëa̧diro̧jo̧ȩ jurapea̧ oa. Ori̧ bagari̧ ëba jurapea̧ yürürea̧ tara, jabechji̧ ja̧di dari̧ japea̧dirȩ. Ado cäë yürüa̧ duri oa, chadärärëreji̧ri̧dirȩ jurapea̧ oa, bino quȩmȩ ërü oa jarapea̧ oa. Ado a̧dë chjäte jara̧ oaiä yu̧i̧pea̧dirȩ. Ado yu̧i̧ji̧ri̧rȩ bochegua chjaoa̧dirȩ. Ado jibëa̧ iei̧dë oa bae ëba mo̧a̧ji̧ri̧pea̧dirȩ ma̧i̧ da chjai̧dë oa japaji̧ri̧rȩ.

Moiche judi birarëremȩde ya̧mi̧ uëri judiri

7Ado Jeova judi yo̧a̧dejȩ Moiche ju̧i̧:

—Danȩ, jo̧ȩra̧pevä. Bireno̧vä. Na̧ pumȩ judiro̧, mȩnȩ Ejito chiriri pio judiri ëba go̧düa̧ pumȩ pio judiro̧ chjai̧dëri̧ japea̧diro̧coe. Jiada̧diro̧coe. 8Chjaodëri̧ oëra̧diäa̧dirȩ. Cüdë yo̧a̧ ma̧ȩrä tüdüa̧mi̧ dari̧ cjo̧ro̧tärea̧ ji̧, no̧ coëma oa jämi̧ dari̧ cjo̧ro̧tärea̧ ji̧, chjaodëri̧ oëra̧diäa̧dirȩ no̧dë oa jämi̧ dari̧. Danȩ, baca üi̧ boi̧mi̧ da oa japeno̧a̧dirȩ orora̧. Chjacjiamȩri̧ jo̧rȩtareji̧ri̧diro̧jo̧ȩ. Ado goe gu̧rori̧ cäë yürüa̧diro̧jo̧ȩ. 'Ibëa̧ ütëde' yo̧a̧dirȩ pio ju̧i̧ chjiari. 'Ibë Ejito chiriri pio judiri go̧dü tänȩmȩ ütë pio judide' yo̧a̧dirȩ jibëa̧ dibëti̧ra̧ chia. 9Danȩ, dabarequede davä pio jiro pumȩ pio ji̧ri̧ chjiari. Ta̧ra̧ puë cotomi̧ da tjamo̧dirȩ. Ji̧dë ma chjuari̧ jiade ta̧rë chjaodiro̧coe ano̧ mire jo̧rȩtarea̧ decjiari̧. 10Pio ju̧i̧iä chja jabechji̧, ja̧bo tänȩparequedejȩrȩ ütëbodärä oa. Ca̧ ërecjia̧ üdë pio ji̧ri̧iäpȩmo̧ acji cjatäpadejȩrȩ chjaodëri̧ yuroparea̧mi̧ dari̧. Pio mȩamo̧ ja̧bo tänȩdëparequedemȩ. Pio mȩa ano̧ mire mitëparequedemȩ na̧ea̧ri ja̧ji̧ri̧ pio ji̧ri̧bo. Ado no̧i̧dë tjamo̧parȩparequedejȩrȩ. Ado yaba̧ cüdë icharaita ji̧ri̧ japachea oa tuti yo̧dëcoe. Jabo cjiavä —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi, ana̧ri̧ jo̧rȩtamȩrȩ.

11Jabo Moiche judi cjiadiädëmȩrȩ goë tuti yo̧a̧dejȩ Jeova pio ju̧i̧iä, jibëa̧ Ütë pio ju̧i̧:

—Danȩ Jeova, ¿tjana̧ ju̧i̧iä ma̧ cjüëtüri̧ ërecjia tjamo̧pe baga̧renȩ na̧ pumȩ ji̧ri̧? Mȩnȩ Ejito chiriri pio judiri go̧dü tänȩa̧ pio judiro̧dirȩ. Na̧ jauëchja oa ana̧ri̧ na̧rȩmȩrȩ go̧dü tänȩa̧ pio judiro̧dirȩ. 12Ado ji̧ri̧ tjamo̧ri̧ ja̧bo tänȩrä judi, ¿yö̧ta dari̧ jo̧rȩtapadirȩ ejichio judiro̧? Yö̧ta dari̧dë, 'Aja̧, ibëa̧ chiriri pio judiri go̧dü tänȩa̧diji̧ri̧da, jabo ja̧bo tänȩrea̧ pio ju̧i̧mo̧i̧ jo̧rȩtamȩrȩ go̧dü tänȩa̧ jirodiji̧ri̧da, 'ya̧mi̧räpȩ pio ju̧ri̧ yuropadäräpaquiji̧ri̧da' quëna̧ jo̧rȩtamȩrȩ go̧dü tänȩa̧ jirodiji̧ri̧da' quëna̧ jo̧rȩtapai̧ dadirȩ. Danȩ Ütë, ërecjiadëvä. Cjatäcjie jo̧rȩtavä. Ano̧ mire jo̧rȩtavä. Na̧ pumȩ ji̧ri̧ yuroparea̧ jo̧rȩtadëvä. 13Ado danȩ, na̧ mu̧i̧tjoi̧ pio ji̧ri̧ a̧dë jo̧rȩtadëtäremȩrenȩjȩrȩ. Mȩnȩ Abaraa̧ ju̧i̧ yo̧rërea̧ pio ju̧i̧, Icha ju̧i̧ yo̧rërea̧ pio ju̧i̧, ado Jacobo ju̧i̧ yo̧rërea̧ pio ju̧i̧ a̧dë jo̧rȩtadëtäremȩrenȩ. Jabechji̧ mȩnȩ pio ji̧ri̧iäpȩmo̧ yo̧ë cji̧därërea̧ ma̧ȩ pio ju̧i̧ chjadëri̧ jo̧rȩtavä. Ano̧ mire jo̧rȩtarea̧ decjiari̧ yo̧ë cji̧däa̧ ma̧ȩ pio ju̧i̧, ma̧diä cjia tänȩrea̧ decjiari̧ yo̧ë cji̧därërea̧ ma̧ȩ pio ju̧i̧ chjadëri̧ jo̧rȩtavä. "Aja̧, na̧ea̧ri ja̧ji̧ri̧ judiro̧ a̧dëräpȩ büërë ji̧ra̧mi̧ dari̧ ji̧ra̧padirȩ" yo̧ë cji̧därërea̧ ma̧ȩ pio ju̧i̧ chjadëri̧ jo̧rȩtavä. "Aja̧, chiri ana̧ oa yürüparequedejȩrȩ na̧ea̧ri ja̧ji̧ri̧ pio ji̧ri̧ jënȩro̧ bucho ana̧ goapea̧ oa" yo̧ë cji̧därërea̧ ma̧ȩ pio ju̧i̧ a̧dë jo̧rȩtadëvä —yo̧mȩrȩ goë tuti yo̧rëremȩdejȩ Jeova pio ju̧i̧iäpȩmo̧ Moiche judi.

14Ado Jeova judi Moiche pio ju̧i̧iä ta̧rëa̧ oaiä, jabechji̧ ano̧ mire jo̧rȩtamȩpea̧de. Jibëa̧ pumȩ pio ji̧ri̧ ütëbo oa ja̧bo tänȩtärea̧ ji̧, ja̧bo tänȩdëa̧dejȩrȩ.

Moiche judi Jeova ja̧ ma̧ȩ oa goamȩrȩ birarëremȩde ya̧mi̧ri pio judiri

15Ado Moiche judi ya̧mi̧ri pio judiri birapea̧ ji̧ taruparëremȩde. Ütë tjamo̧ ja̧ ma̧ȩ chiamȩ ta̧dë pjatë oa ida birarëremȩde. Yo̧a̧ri̧ oa, dëbëribo go̧ȩpea̧ oa cjiamȩ oa ida bira̧de. 16Ado pio jiro ta̧dë üdë japea̧ oa cjiarëremȩde Ütë tjamo̧ pio judi jëdano̧a̧ oa. Ütë tjamo̧ pio judi go̧ȩpea̧ oa ma̧ȩ chiarëremȩde.

17Ado Moiche judi ya̧mi̧ri pio judiri biramȩrȩ dëbëdiäa̧dejȩ jȩa jidaremȩ oa, Jochue pio ju̧i̧. Ado Jochue judi yo̧a̧dejȩ:

—Danȩ, ma̧i̧ ta̧rëri̧ gürë eaji̧ri̧ oa ta̧rërequedejȩrȩ pumȩ ji̧ri̧. Ibë eadëji̧ri̧ pio judiro̧ acji jana̧ jirodiro̧ibe. Pio ju̧i̧iä goae tarari̧ ëna̧diä jirodirȩ —yo̧a̧dejȩ.

18Jabo Moiche judi dëbë yo̧a̧dejȩ:

—Cjäri̧ madiro̧ibe. O ji̧ri̧ boaji̧ri̧ judiro̧ ja̧dimi̧ ta̧rëri̧ ëna̧diädëdirȩ. Ado boadäräa̧ oa cjiaji̧ri̧ judiro̧ peaja̧di ja̧dimi̧ ta̧rëri̧ japadëdirȩ. Jabechji̧ to̧ je go̧a̧ji̧ri̧mi̧ ta̧rëri̧ ta̧rërequedejȩrȩ —dëbë yo̧a̧dejȩ.

19Ado Moiche judi jibëa̧ jadü pio ju̧i̧ nöta bira̧de. Ado icharaitarë cjo̧ro̧mȩräpȩ queri̧na̧ra̧rä, jabë ya̧mi̧ taruri pio judiri darëremȩdejȩ baca üi̧ boi̧mi̧ da oa. Ado icharaita ji̧ri̧ peaja̧di daea̧dejȩrȩ bochegua cjiaji̧ri̧ oa. Ado Moiche judi a̧dë chjäte ërecjiape bagamȩrȩ chjichji idë arëremȩdejȩ ta̧dë pjatë oa ya̧mi̧ curëräpȩmo̧. 20Ado chjaodëri̧ jäeno̧a̧dejȩ baca üi̧ boi̧mi̧ da pio ju̧i̧iäpȩ. Ado cjo̧dëräpȩ aeno̧a̧dejȩ icharaita judiro̧ orora̧ japea̧ pio ju̧i̧. Ui mape bagari̧ cäa̧dejȩ. Ado ja̧dëa ji̧ ga mapea̧rä, ado chjereno̧ chjua mapea̧rä, mo̧ȩa̧dejȩ pjo̧no̧i̧ mape bagari̧. Ja̧dëa ji̧ pio jiro pjo̧no̧i̧ oa mirea̧dejȩ uira̧. Ado ja̧dëa ji̧ jaradëri̧ cjiaji̧ri̧ oa jara tänȩrëremȩdejȩrȩ icharaita pio ji̧ri̧. 21Ado ja̧dëa ji̧ yo̧a̧dejȩ Aro̧ ju̧i̧:

—¿Jabo tjana̧ japea̧diro̧mȩ pio jiro pumȩ judiro̧ mȩnȩ pio ji̧ri̧ a̧dë chjäte chjai̧dëri̧ japa tänȩpea̧ oa? ¿Tjana̧ japea̧diro̧mȩ mȩnȩ oëra̧ jo̧rȩtapea̧ oa, mȩnȩ pio ji̧ri̧iäpȩmo̧ ma̧i̧ da chjai̧dë oa japa tänȩpea̧ oa? Danȩ, a̧dë chjäte chjai̧dëri̧ japa tänȩa̧renȩjȩrȩ —yo̧a̧dejȩ.

22Ado Aro̧ judi dëbë yo̧a̧dejȩ:

—Jabo danȩ ca̧ ütë, pio coaiäpȩmo̧ ma̧ cjüëtüri̧ ërecjiadëcoe. Pio jiro pumȩ pio ji̧ri̧ chjiari chjadëri̧ dabarenȩ. Chjai̧dëri̧ japa goaradirȩ cjiadiä tänȩrea̧mi̧dëri̧. 23Jabechji̧ yo̧a̧diro̧coe ja̧di ta̧rëri̧ yo̧ji̧ri̧rȩ: "Pio jiro üi̧ üdë, Moiche pio judi, ibë Ejito chiriri pio judiri tjamo̧ ëba go̧dürëremȩ pio judi, ¿tjana̧räpȩcjivade? A̧dë cjarapea̧ jirodiibe. Ja̧di tara ütë oa japë yürüibe ibë chjadëri̧ yaboi̧ ëba baäpea̧ oa." Aja̧, ja̧di ta̧rëri̧ yo̧ji̧ri̧rȩ yo̧a̧diro̧coe. 24Pio ju̧i̧iä goa jana̧tä yo̧a̧requedejȩrȩ jibëa̧ ta̧ra̧ märärea̧ oa, oro chiamȩ pio ju̧i̧. Ado coëno̧ ëte goa jana̧diro̧coe. Ado judiro̧ goa jana̧ chjö̧na̧i̧ oa aeno̧a̧reconȩ cjo̧dëräpȩ ui mape bagapea̧ oa. Ado ja̧dëa ji̧ chjaodëri̧ baca üi̧ boi̧mi̧ dapea̧de. Aja̧, jibëa̧ ma̧na̧ri̧ idëpea̧ oa cjiamȩrȩ go̧deno̧a̧diibe cjo̧dëri judiri —yo̧mȩrȩ dëbë yo̧rëremȩdejȩ Moiche ju̧i̧ Aro̧ judi.

25Aro̧ pio ju̧i̧ ta̧rëa̧ oaiä, jo̧rȩtamȩpea̧de Moiche judi. 'Jabo cjäri̧ madiji̧ri̧da, Aro̧ judi chjadëri̧ jidadëa̧diji̧ri̧da, no̧ tjamo̧i̧ oa jämi̧ dari̧ cjo̧ro̧ tänȩtärea̧ ji̧, tänȩdëa̧diji̧ri̧da, jabo no̧dë oa a̧dë jämi̧ dari̧ japea̧diji̧ri̧da, pio ju̧i̧iä japë taraji̧ri̧mi̧ dari̧ japea̧diro̧da, pio ju̧i̧iä idi̧ da oa jape chjaoa̧diro̧da, ado icharaita ji̧ri̧ eadëji̧ri̧ pio judiro̧ goë ta̧rëa̧ oaiä badë jo̧rȩtapadiro̧ibëda, pio ibë chjiari airi̧ cjiapadiro̧da' quëna̧ jo̧rȩtamȩpea̧de Moiche judi. 26Ja̧dëa ji̧, Moiche judi icharaitarë cjo̧ro̧mȩ bëräpȩmo̧ järea̧ no̧ro cjiamȩrȩ to̧bari̧ yo̧a̧dejȩrȩ icharaita pio ji̧ri̧iäpȩmo̧:

—Danȩrȩ, Ütë tjamo̧ ja̧ ma̧ȩrä cjo̧ro̧tämi̧ cjiaji̧ri̧ judiro̧ pio coaiäpȩmo̧ janeno̧chji̧vä —yo̧a̧dejȩrȩ.

Ado Moiche judi yo̧a̧ pio oaiä, Devi pio judiri ja̧ji̧ri̧ judiro̧ chjaodëri̧ a̧dopeno̧a̧dirȩ Moiche pio ju̧i̧iäpȩ.

27Ja̧dëa ji̧ Moiche judi yo̧a̧dejȩrȩ:

—Danȩrȩ, Jeova pio judi, Icharai ja̧ Ütë pio judi ma̧ȩ yürüdidibe. Aja̧, ja̧di ta̧rëri̧ yo̧didibe: 'Jabechji̧ mȩnȩro̧ ütëborë mitëchji̧vä dibëa̧ tjapënȩ oa, dëbëribo jo̧dë chiamȩ oa. Teracaba ütë oa quëna̧ji̧ri̧ pio ji̧ri̧ ja̧bo tänȩriä tai̧chji̧vä icharaitarë cjo̧ro̧mȩräpȩ. Danȩrȩ, na̧ pumȩ pio ji̧ri̧bo ja̧bo tänȩpea̧de. Dibëa̧ omȩbo, dibëa̧ jadübo, dibëa̧ bë queri̧räpȩ cjo̧ro̧mȩbo ja̧bo tänȩpea̧de —yo̧mȩrȩ yo̧rëremȩdejȩrȩ Devi pio judiri ja̧ji̧ri̧ pio ji̧ri̧iäpȩmo̧, Jeova pio judi pio jȩaiäpȩmo̧ yo̧a̧ duri pio ju̧i̧.

28Ado judi yo̧a̧mi̧ japarëreji̧ri̧dirȩ Devi pio judiri ja̧ji̧ri̧ judiro̧. Ado 3000 oari oa ja̧bo tänȩa̧diro̧jȩrȩ pio jiro doro.

29Ja̧dëa ji̧ Moiche judi yo̧a̧dejȩrȩ Devi pio judiri ja̧ji̧ri̧ pio ji̧ri̧iäpȩmo̧:

—Danȩrȩ, Ütë tjamo̧ judi mitëa̧didibe pio ju̧i̧ ja̧ oa ja̧bepapea̧ oa. O ji̧ri̧ chjiari goë tuti ja̧bepapea̧ oa mitëa̧didibe. Judi yo̧a̧mi̧ ta̧rëdiäa̧ oaiä china̧chjari̧ tutia̧ oa cjiami̧ dari̧ cjiadiäa̧nȩrȩ ju̧i̧ ja̧ oa ja̧bepapea̧ oa. Danȩrȩ, goae tjamo̧dëräbo ja̧bo tänȩa̧nȩro̧jȩrȩ dibëa̧ pumȩ pio ji̧ri̧, dibëa̧ u̧ri̧ pio ji̧ri̧bo. 'Ja̧bo tänȩdëpaquiji̧ri̧da' quëna̧dëji̧ri̧rȩ ja̧bo tänȩa̧renȩro̧jȩrȩ. Ja̧di tara mitëa̧didibe. Cjäri̧ri̧ cjia da tjamo̧mȩrȩ mitëa̧didibe o ji̧ri̧ chjiari goë tuti ja̧bepapea̧ oa —yo̧mȩrȩ yo̧a̧dejȩrȩ Moiche judi Devi pio judiri ja̧ji̧ri̧ pio ji̧ri̧.

Moiche judi goë tuti cjo̧dërëremȩde icharaita pio ji̧ri̧ chjiari

30Dopea̧rä Moiche judi yo̧rëremȩdejȩrȩ icharaita ji̧ri̧:

—Danȩrȩ, a̧dë chjäte chjai̧dëri̧ japea̧renȩro̧jo̧ȩ Jeova pio ju̧i̧iäpȩmo̧. Teracaba ütë oa quëna̧ oaiä chjai̧dëri̧ japea̧renȩro̧jo̧ȩ. Jabo cüdë ado chjereno̧ buaparequede ya̧mi̧ oa Jeova pio ju̧i̧iä goë tuti cjo̧dëpea̧ oa pio dibë chjiari. Tjamo̧ri̧ dabadëde, jabo cüdë goë tuti cjo̧dëa̧ oaiä duridëparȩpai̧ da jirodidibe mȩnȩro̧ ju̧i̧iäpȩmo̧ chjai̧dëri̧ japea̧ pio ju̧i̧ —yo̧a̧dejȩrȩ.

31Ado Moiche judi icharaita pio ji̧ri̧iäpȩmo̧ ja̧di ta̧rëri̧ yo̧ ëte ado bua̧dejȩ ya̧mi̧ oa Ütë tjamo̧ pio ju̧i̧iäpȩ jäpamȩrȩ. Ado Jeova pio ju̧i̧iäpȩ go̧düdäräa̧rä, yo̧a̧dejȩ:

—Danȩ, pio jiro pumȩ judiro̧ a̧dë chjäte chjai̧dëri̧ japea̧diro̧mȩ. Orora̧ pio ju̧ri̧ra̧ japea̧diro̧jo̧ȩ jibëa̧ ütë oa. Ado chjacjiamȩri̧ jo̧rȩtareji̧ri̧diro̧jo̧ȩ ji̧dëri̧. 32Jaboti̧ri̧ japaji̧ri̧ oa cjäri̧ri̧ cjia dajȩrȩ. Jabechji̧ duridëparȩjȩrȩ. Jabo mȩnȩ pio ji̧ri̧ duridëparȩdëri̧ cjiarä judi, jabechji̧ ca̧ quȩ oa ano̧ mire duridëparȩjo̧ȩ. Aja̧, ca̧ quȩ oa, na̧ joërä go̧ȩpea̧ oa cjiamȩ quȩ pio ju̧i̧ ano̧ mire duridëparȩtä eamȩrȩ cjo̧dërequedemȩ —yo̧a̧dejȩ.

33Jabo Jeova judi dëbë yo̧mȩrȩ yo̧a̧dejȩ:

—Cjäri̧ marequedemȩ. Ja̧di dari̧ japadëparequede. Na̧ quȩ oa duridëparȩdëparequede. Jabo pio coaiäpȩmo̧ chjai̧dëri̧ japaji̧ri̧ pio ji̧ri̧ ja̧ quȩ maea oa duridëparȩparequede. 34Ado yaba̧ baävä. Cüdë mȩa yo̧rërea̧ chiriräpȩ chjadëri̧ ëba baäjȩrȩ pio jiro pumȩ ji̧ri̧. Cüdë chjadüa̧ mu̧i̧tjoi̧ pio judi chjadëri̧ ëba baäpadidibe dibëa̧ yaboi̧ baämȩrȩ. Pio ju̧i̧ chjadëri̧ jo̧rȩtavä. Jabo danȩ, ütara̧ doro bape chjaoparequedejȩrȩ pumȩ ji̧ri̧ judiro̧ pio coaiäpȩmo̧ chjai̧dëri̧ japea̧ ba oa. Aja̧, judiro̧ baca boi̧mi̧ da oa chjacjiamȩri̧ jo̧rȩta̧ ba oa bape chjaoparequedejȩrȩ —yo̧mȩrȩ dëbë yo̧rëremȩdejȩ Moiche ju̧i̧.

35Ado ütara̧ doro, Jeova judi, dëdë, bape chjaorëremȩdejȩrȩ jënȩ yo̧a̧mi̧. Gito ana̧ri̧ tara tänȩmȩrȩ bape chjaoa̧dejȩrȩ icharaita ji̧ri̧. Judiro̧, Aro̧ judi japea̧ baca üi̧ boi̧mi̧ da oa chjacjiamȩri̧ jo̧rȩta̧ pio oaiä, gitora̧ bape chjaorëremȩdejȩrȩ.

Currently Selected:

Go̧dürea̧ Ma̧ȩ 32: Pume

Highlight

Compare

Copy