Go̧dürea̧ Ma̧ȩ 34

Yo̧a̧ri̧ ta̧dë pjatë oa jëdano̧tä yo̧rëremȩdejȩ Moiche ju̧i̧ Jeova judi

1Ado Jeova judi yo̧rëremȩdejȩ Moiche ju̧i̧:

—Danȩ, yo̧a̧ri̧ ta̧dë pjatë oa chjorotä earequedemȩ cüdë mȩa̧ yürüa̧mi̧ da oa, mȩnȩ chjichji idë cürëa̧ ta̧dëmi̧ da oa. Ado cüdë ado chjereno̧ go̧ȩpaparequede ca̧ ma̧ȩ oa, cüdë pearä go̧ȩparërea̧ ma̧ȩ pio ju̧i̧. 2Chjadëri̧ jëdano̧vä. Pio yaba̧ dopea̧rä Chinai quȩmȩ ya̧mi̧ oa buapea̧ ji̧ chjadëri̧ jëdano̧vä. Ado ya̧mi̧ uë tjamo̧räpȩ ju̧ri̧ dëbëdiäparequedemȩ ado. 3Jabo na̧ea̧ma̧i̧ buatä earequedemȩ jadü chiadërë. Eami̧ pumȩ üdë ya̧mi̧räpȩ cjiadë matäde. Jabechji̧ china̧chjade. Ado chirirä cjo̧ro̧ji̧ri̧ pio judiro̧ ya̧mi̧ curë yuroro juradëtädiro̧jo̧ȩ cärä oa. Baca üdë, oveja üdë, chivo üdë, jabechji̧ ya̧mi̧ curë yuroro cärä juradëtädirȩ —yo̧mȩrȩ yo̧rëremȩdejȩ Moiche ju̧i̧ Jeova judi.

4Pio ju̧i̧iä Moiche judi chjororëremȩdejȩ yo̧a̧ri̧ ta̧dë pjatë oa. Ado dopea̧rä pio jiro ta̧dë yo̧a̧ri̧ oa ida buarëremȩdejȩ Chinai quȩmȩ ya̧mi̧räpȩ Jeova judi pio jȩaiäpȩmo̧ yo̧a̧mi̧.

Ütë tjamo̧ judi ado ni̧bä chjaorëremȩdejȩ Moiche ju̧i̧

5Ja̧dëa ji̧ Moiche judi ya̧mi̧ uë tjamo̧räpȩ buadäräa̧rä, Jeova judi go̧a̧ra̧ ërä cjiamȩrȩ birarëremȩde. Ado Moiche pio ju̧i̧ ja̧ dëbëräpȩ cjiamȩrȩ jibëa̧ quȩ ba chia oa yo̧rëremȩdejȩ. Aja̧, 'Jeova' yo̧mȩrȩ yo̧rëremȩde. 6Ja̧dëa ji̧ Moiche ja̧ dëbëräpȩ chjätämȩrȩ yo̧a̧dejȩ:

—Danȩ, Jeova pio judirequede cüdë. Cjäri̧ri̧ cjia damȩ Ütë pio judirequede. Ma̧ chjua jo̧rȩtamȩre damȩrequede. Chjaodëri̧ ërecjiape bagadëmȩrequede, jabo ütararea̧mi̧dëri̧ eamȩrequede ca̧ earea̧ pio ju̧i̧ ana̧ri̧ na̧rȩmȩrȩ. Cüdë yo̧a̧mi̧ japamȩrequede ji̧dëdiä ni̧bärea̧ decjiari̧, ma̧diä cjia tänȩrea̧ decjiari̧. 7Ado goarijädëmȩ earea̧ra̧ pio ju̧ri̧ra̧ ji̧dë ma eamȩrȩ ea tjamo̧requedejȩrȩ pumȩ ji̧ri̧, eadëpe bagarea̧ decjiari̧. Aja̧, pumȩ ji̧ra̧ tjamo̧ oa, a̧dë chjäte ji̧ra̧ tjamo̧ oa, goëje ano̧ mire cjo̧ro̧paji̧ri̧ oa ji̧dë ma earequedejȩrȩ, judiro̧ chjai̧dëri̧ japea̧ pio ju̧i̧ duridëparȩmȩrȩ. Aja̧, judiro̧ oëra̧diäa̧ pio ju̧i̧, judiro̧ jiada̧ pio ju̧i̧ duridëparȩmȩrerequede, pio ji̧ri̧ cjäri̧ri̧ cjiamȩrȩ. Jabo cüdë ja̧di dari̧ japamȩborë, jabechji̧ o ji̧ri̧ bape chjaoparequedejȩrȩ judiro̧ chjai̧dëri̧ japea̧ ba oa. Tjamo̧ davä. Jibëa̧ u̧ri̧ pio ji̧ri̧, jibëa̧ jadama̧i̧ pio ji̧ri̧, jibëa̧ taru pio ji̧ri̧ bape chjaoparequedejȩrȩ —yo̧mȩrȩ yo̧a̧dejȩ Moiche ju̧i̧ Jeova judi.

8Ado Moiche judi pio ju̧i̧ ta̧rëa̧ oaiä chjaodëri̧ juchatura̧ tjätjäpë china̧därärëremȩde jibëa̧ daito üdë daburäpȩ yuro, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa. 9Ado chjacjiamȩri̧ jo̧rȩtamȩrȩ yo̧a̧dejȩ:

—Danȩ, mȩnȩ pio coa tjamo̧ri̧ ma̧ chiadëri̧ cjiamȩrȩ darä judi, jabechji̧ chjadëri̧ ëba baäibe. Jabechji̧ pio jiro pumȩ judiro̧ mȩa chjuari̧ jiadaräbo, judiro̧ ta̧ra̧ puë cotomi̧ dari̧ cjo̧ro̧räbo, jabechji̧ cjäri̧ri̧ cjia daibe. Duridëparȩibe a̧ro̧rȩ pio mȩaiäpȩmo̧ chjai̧dëri̧ japea̧ pio ju̧i̧. 'Aja̧, ca̧ pumȩdiro̧ca̧da' quëna̧ jo̧rȩtamȩrȩ daibe —yo̧mȩrȩ yo̧a̧dejȩ Ütë tjamo̧ ju̧i̧ Moiche judi.

10Ado Jeova judi dëbë yo̧mȩrȩ yo̧a̧dejȩ:

—Danȩ, yo̧ë cji̧dämȩrȩ ma̧ȩ yürürequedejȩrȩ icharaita pio ji̧ri̧. Jabechji̧ jibëa̧ dachoro jauëchjari̧ jape chjaoparequede. Chiri nöta oa cjo̧ro̧ji̧ri̧ pumȩ judiro̧ cja̧rȩmȩ co dadërërea̧ pio ju̧i̧ jape chjaoparequede. Ado dibëa̧ queri̧ cjo̧ro̧ji̧ri̧ judiro̧, icharaitadë pio judiro̧ dapadiro̧jo̧ȩ davä ca̧ jauëchja uapai̧ da tjamo̧ oa. Jabechji̧ Jeova pio judirequede, ado uapai̧ dari̧ na̧rȩmȩrȩ na̧rȩparequedejȩrȩ davä pio dibëa̧ ja̧ oa. 11Jabo mȩnȩro̧ chjadëri̧ ta̧rëdiäpea̧ chiarenȩrȩ jabo. Cüdë yaba̧ domȩ oa yürüpea̧ ma̧ȩ pio ju̧i̧ chjadëri̧ ta̧rëdiäpea̧ chiarenȩrȩ. Ado mȩnȩro̧ ja̧di dari̧ japarä judi, jabechji̧ chjadëri̧ baä tänȩparequedejȩrȩ amoreo ji̧ri̧, cananeo ji̧ri̧, itita ji̧ri̧, pjerecheo ji̧ri̧, eveo ji̧ri̧, jebucheo ji̧ri̧. Aja̧, mȩnȩro̧ dibëa̧ chiri oa chjadëri̧ mitërea̧ dapea̧ oa baä tänȩparequedejȩrȩ. 12Jabo na̧e chiachji̧vä. Mȩnȩro̧ baäpea̧ chiriräpȩ cjo̧ro̧ji̧ri̧ pio ji̧ri̧ nöta chjadëri̧ ëba cjo̧ro̧pea̧ pio ju̧i̧ jo̧rȩtaji̧ri̧rȩ yo̧ë cji̧dädë machji̧jȩrȩ. 'Aja̧, ja̧di dari̧ japatäreji̧ri̧a̧ro̧da, a̧ro̧rȩ chjadëri̧ ëba cjo̧ro̧pea̧ oa ja̧di dari̧ japatäreji̧ri̧a̧ro̧da' quëna̧ jo̧rȩtaji̧ri̧rȩ ma̧ȩ yürüdë matäreji̧ri̧renero̧jȩrȩ. Jabechji̧ mȩnȩro̧ ja̧di dari̧ japarä judi, cjäri̧ manȩrȩ, ina̧ oa cjiamȩ puërä choë cjatämi̧ dari̧ cjiadiäpanȩrȩ. U̧i̧pea̧ oa cjiapanȩrȩ. 13Pio ju̧i̧iä ja̧di dari̧ japadë machji̧vä jabo jabechji̧, ji̧ri̧ ja̧ ütë teracaba oa yürürea̧ mechja chjö̧na̧i̧ oa aeno̧chji̧vä. Jënȩro̧ quëna̧ ta̧dë teracaba oa bae chjichji japachji̧jȩrȩ. Ado ji̧ri̧ ja̧ ütë oa, Achera quȩyi̧ pio ji̧ chjiari na̧rȩrea̧ to pio ju̧i̧ tuti dechji̧vä. 14Jabechji̧ ado cja̧rȩmo̧ ütë teracaba oa ano̧ mire chjacjiamȩri̧ jo̧rȩtadë machji̧vä. Jabechji̧ quëbamȩrȩ jo̧rȩtamȩ Ütë pio judirequede cüdë. Jeova pio judirequede, ado mȩnȩro̧ ado cja̧rȩmo̧ oa ano̧ mire jo̧rȩtarä judi, 'chja jabechji̧dida' quëna̧ jo̧rȩtadëparequede. 15Ado pio ju̧i̧iä jabechji̧ yo̧requededibe. Mȩnȩro̧ baäpea̧ chiriräpȩ baädäräa̧rä, jabechji̧ pio ju̧ri̧pȩ cjo̧ro̧ji̧ri̧ pio ji̧ri̧ nöta chjadëri̧ ëba cjo̧ro̧pea̧ pio ju̧i̧ jo̧rȩtaji̧ri̧rȩ yo̧ë cji̧dädë machji̧jȩrȩ. 'Aja̧, a̧ro̧rȩ ibëa̧ dëbëti̧ra̧ chia ba chia dapea̧ oa, a̧ro̧rȩ chjadëri̧ ëba cjo̧ro̧pea̧ oa ja̧di dari̧ japatäreji̧ri̧a̧ro̧da' quëna̧ jo̧rȩtaji̧ri̧rȩ ni̧bä chjaodë machji̧jȩrȩ. Jabechji̧ mȩnȩro̧ ja̧di dari̧ japarä judi u̧i̧pea̧ oa cjiapai̧ danȩrȩ. Ado ja̧dëa ji̧ judiro̧ jibëa̧ ütë teracaba oa chjacjiamȩri̧ jo̧rȩtaji̧ri̧rȩ goe gu̧rori̧ cäë yürüa̧ domȩ ju̧i̧iä, jabechji̧ ëba a̧dopapai̧ darenȩro̧jȩrȩ. Tjamo̧ davä. Judiro̧ yabëa̧ oaiä, "Aja̧, ëba a̧dopera̧chji̧ibe" yo̧a̧ oaiä, dëdë, ëba a̧dopapai̧ darenȩro̧jȩrȩ. Ado judiro̧ dibë ëba jurapea̧ oa goë yürüa̧ oaiä peaja̧di jurapai̧ danȩrȩ. Ado ja̧dëa ji̧ judiro̧ jibëa̧ ütë teracaba oa yürüa̧ cjiadiäa̧mȩ jurarea̧ pio ju̧i̧ jura̧ oaiä, dëdë, u̧i̧pea̧ oa cjiapai̧ danȩrȩ. 16Aja̧, mȩnȩro̧ pio jiro pumȩ ji̧ri̧ dibë nöta ëba cjo̧ro̧rea̧ yürürä judi, danȩrȩ, dibëa̧ u̧ri̧ pio judiro̧ ëbapai̧ dadiro̧jȩrȩ davä pio ji̧ri̧ ja̧ jabi pio ji̧ri̧. Ado pio ji̧ri̧ ëba̧ oaiä, ado pio jini̧ro̧ dibëa̧ u̧ri̧ u̧i̧pea̧ oaiä, cjäri̧ madirȩ, pio coa a̧dë jo̧rȩtapai̧ dadiro̧coe. Ado ji̧ri̧ ja̧ ütë teracaba pio ju̧i̧iäpȩmo̧ ano̧ mi̧rȩ jo̧rȩtapai̧ dadiro̧jo̧ȩ. Ja̧di tara yo̧requededibe. Na̧e chia tjamo̧chji̧vä —yo̧mȩrȩ ni̧bä chjaorëremȩdejȩ Moiche ju̧i̧ Jeova judi icharaita ütëbo oa ni̧bä chjaomȩmi̧ dari̧.

Jeova judi yo̧a̧ ma̧ȩ chjö̧na̧i̧ oa go̧ȩparëremȩde Moiche judi

27Ado ju̧i̧ uëri̧ yo̧mȩrȩ a̧de yo̧rëremȩdejȩ Jeova judi Moiche ju̧i̧iäpȩmo̧:

—Danȩ Moiche, go̧ȩpavä cüdë mȩa ni̧bä chjaoa̧ ma̧ȩ pio ju̧i̧. Jabechji̧ cüdë pio yoa ma̧ȩ oa ni̧bä chjaoa̧ oaiä, jabechji̧ yo̧ë cji̧dämȩrȩ ma̧ȩ yürürequedemȩ, icharaita pio ji̧ri̧bo. Aja̧, mȩnȩro̧ dabapea̧ oa, mȩnȩro̧ tüdüa̧mi̧ darä cjo̧ro̧pea̧ oa pio jiro ma̧ȩ oa yürürequededibe, pio dibë chjadëri̧ ütarë dapea̧ oa —yo̧mȩrȩ yo̧rëremȩdejȩ Moiche ju̧i̧ Jeova judi.

28Ado Moiche judi japamitë ana̧ri̧ cjiadiärëremȩde ya̧mi̧ uëräpȩ ju̧ri̧ Jeova pio ju̧i̧ nöta. Aja̧, 40 do nöta, 40 gȩnȩ nöta cjiadiäa̧de. Ado pio jiro japamitë nö̧ta, jabechji̧ cja̧rȩmȩ co juradëa̧de. Ado cja̧rȩmȩ co jaradëa̧de. Ado Ütërë yo̧ë cji̧därërea̧ ma̧ȩ pio judi go̧ȩpea̧ oa cjiarëremȩde ta̧dë pjatërä, ichi chjö̧na̧i̧ ma̧ȩ pio judi.

Moiche judi birarëremȩde Chinai quȩmȩ ya̧mi̧ri pio judiri

29Ado Moiche judi Chinai quȩmȩ ya̧mi̧ri pio judiri birarërea̧ ji̧, ichi chjö̧na̧i̧ ma̧ȩ oa idamȩrȩ birarëremȩde. Ado Jeova pio ju̧i̧ nöta ni̧bä chjaoa̧ oaiä, jabechji̧ tatamȩpea̧de jibëa̧ chama̧cho üdë. 'Jabo ca̧ chama̧cho üdë tatadida' quëna̧dëmȩrȩ birarëremȩde. 30Ado ja̧dëa ji̧ pumȩ judiro̧ pio ju̧i̧ daea̧ ji̧, Aro̧ judi, ado icharaita ütëborë Moiche pio ju̧i̧ daea̧ ji̧, chama̧cho oa tatamȩ oa darëreji̧ri̧diro̧jo̧ȩ. Ado pio ju̧i̧iä jädëa̧diro̧jo̧ȩ. Jabechji̧ uapaji̧ri̧rȩ darëreji̧ri̧diro̧jo̧ȩ. 31Jabo Moiche judi ëna̧diäa̧dejȩ Aro̧ pio ju̧i̧ pio jȩaiäpȩ jätä, tjamo̧ cjo̧ro̧ji̧ri̧ pio ji̧ri̧bo. Pio ju̧i̧iä goëdepea̧diro̧jo̧ȩ. Ado ja̧dëa ji̧ Moiche judi ni̧bärëremȩde pio ji̧ri̧ nö̧ta. 32Ado ja̧dëa ji̧ icharaita pio judiro̧ ütëborë peaja̧di jäa̧diro̧jo̧ȩ pio ju̧i̧iäpȩ. Ado pio jȩaiäpȩ a̧dopaji̧ri̧ oa ana̧ri̧ ni̧bä chjaorëremȩdejȩrȩ Jeova judi pio jȩaiäpȩmo̧ ya̧mi̧ uëräpȩ ju̧ri̧ ni̧bä chjaoa̧ pio ju̧i̧, tüdüa̧mi̧ darä cjo̧ro̧pea̧ ma̧ȩ pio ju̧i̧. 33Ado ji̧ri̧ nöta ni̧bä chjaoa̧ duri oa, Moiche judi inarëremȩdejȩ jibëa̧ chama̧cho oa. Jabechji̧ chjibo cotora̧ ina̧dejȩ. 34Jabo judi dëbëdiärea̧ jo̧räpȩ jäa̧ ji̧, Jeova pio ju̧i̧ nöta ni̧bäpea̧ oa jäa̧ ji̧, jabechji̧ coëno̧a̧dejȩ ina̧rea̧ oa. Aja̧, judi dëbëdiärea̧ jo̧räpȩ jäa̧mi̧ nö̧ta coëno̧a̧dejȩ. Ado ja̧dëa ji̧ judi jo̧ tjori go̧düa̧ ji̧, jabechji̧ ni̧bä chjaorëremȩdejȩrȩ icharaita ji̧ri̧. Aja̧, Jeova judi pio jȩaiäpȩmo̧ yo̧a̧ chjö̧na̧i̧ oa ni̧bä chjaoa̧dejȩrȩ. 35Ado pio jibëiäpȩmo̧ ni̧bä chjaomȩ oa daea̧ ji̧, jabechji̧ jibëa̧ chama̧cho tatamȩ oa darëreji̧ri̧diro̧jo̧ȩ. Jabo ja̧dëa ji̧, pio ji̧ri̧iäpȩmo̧ ni̧bä chjaoa̧ duri oa, jabechji̧ ado chjereno̧ ina̧dejȩ. Jabechji̧ ina̧ oa cjiarëremȩde. Aja̧, ina̧ oa cjiarëremȩde jënȩ Jeova pio ju̧i̧ ni̧bäpea̧ oa ado jäa̧rä yuro.

Currently Selected:

Go̧dürea̧ Ma̧ȩ 34: Pume

Highlight

Compare

Copy