Go̧dürea̧ Ma̧ȩ 31

Dëbëdiärea̧ jo̧ oa ja̧bepapaji̧ri̧ pio ji̧ri̧ chjiari ma̧ȩ yürürëremȩde Ütë tjamo̧ judi

1Ado Jeova judi ji̧dë u̧i̧ yo̧mȩrȩ a̧de yo̧rëremȩdejȩ Moiche ju̧i̧ ya̧mi̧ uëräpȩ jabëmȩ oa:

2"Danȩ, Bechare quȩmȩ pio ju̧i̧ mitëa̧reconȩ, Juda pio judiri ja̧mȩ oa. Dëbëdiärea̧ jo̧ pio ju̧i̧ japapea̧ oa mitëa̧reconȩ. Uri quȩmȩ joja pio ju̧i̧, Uru quȩmȩ jojada pio ju̧i̧ mitëa̧reconȩ. 3Ca̧ Tjo pio ju̧i̧ yürüa̧reconȩ jȩa chjadëri̧ a̧dopea̧ oa.#31:3 Tjo tjamo̧ pio ju̧i̧ yürüa̧dejȩ. A̧dë chjäte dabapea̧ oa, dami̧ti̧ oa chjacjiamȩri̧ ja̧bepapea̧ oa yürüa̧reconȩ ca̧ Tjo pio ju̧i̧. 4Oro chjipararira̧ chjacjiamȩri̧ ja̧bepapea̧ oa, parata chjipararira̧ chjacjiamȩri̧ ja̧bepapea̧ oa dabarea̧ yürüa̧reconȩ. Boro̧che quȩmȩ chjipararira̧ chjacjiamȩri̧ ja̧bepapea̧ oa peaja̧di dabarea̧ yürüa̧reconȩ. 5Ta̧dë ba chiati̧ oa chjadëri̧ jëdano̧pea̧ oa, to oa chjadëri̧ chjoropea̧ oa, dami̧ti̧ oa coëma cjiari̧ ja̧bepapea̧ oa dabarea̧ yürüa̧reconȩ. 6Ado Oriabo quȩmȩ pio ju̧i̧bo mitëa̧reconȩ Da̧de pio judiri ja̧mȩ oa, Aichama quȩmȩ pio ju̧i̧ ja̧ joja oa. Aja̧, pio ju̧i̧ a̧de mitëa̧reconȩ Bechare pio ju̧i̧ ëba ja̧bepapea̧ oa. Ado o oa, chjadëri̧ ja̧beparea̧ dabaji̧ri̧ pio ji̧ri̧bo a̧dë chjäte dabarea̧ yürüa̧requedejȩrȩ. Aja̧, cüdë dibë yo̧a̧ pio ju̧i̧, dëbëdiärea̧ jo̧ pio ju̧i̧ chjadëri̧ ja̧bepapea̧ oa dabarea̧ yürüa̧requedejȩrȩ. 7Danȩ, judiro̧ dëbëdiärea̧ jo̧ pio ju̧i̧ chjadëri̧ japapea̧ oa, yo̧ë cji̧däa̧ ma̧ȩ chiamȩ cjara pio ju̧i̧ chjadëri̧ japapea̧ oa, cjara oa cjae ina̧rea̧ ya pio ju̧i̧ chjadëri̧ japapea̧ oa, ado dëbëdiärea̧ jo̧ tjo ja̧ oa peaja̧di chjadëri̧ cji̧däpea̧ oa, dabarea̧ yürüa̧requedejȩrȩ. 8Ado danȩ, mechja oa, mechjarä ja̧ oa, tataparea̧ chiamȩ to oa, orora̧ japea̧ oa cjiapamȩ to oa, tataparea̧ ja̧beparea̧ oa, goaeri̧ pjȩa̧mȩ cäarea̧ mechja pio ju̧i̧ chjadëri̧ japapea̧ oa dabarea̧ yürüa̧requedejȩrȩ peaja̧di. 9Tjamo̧ davä. Gu̧na̧rea̧ mechja pio ju̧i̧, gu̧na̧rea̧ mechjaräpȩ ja̧bepapea̧ to pio ju̧i̧, ichi joarea̧ tachja oa, tachja oa arëchärea̧ to pio ju̧i̧ chjadëri̧ japapea̧ ji̧ dabarea̧ yürüa̧requedejȩrȩ. 10Ado chjibo chjacjiamȩ tjamo̧ oa carapea̧ ji̧ peaja̧di dabarea̧ yürüa̧requedejȩrȩ. O ji̧ri̧ chjiari goë tuti ja̧bepaji̧ri̧ pio ji̧ri̧ ja̧ oa, Aro̧ judi jibëa̧ u̧ri̧borë ina̧pea̧ chjibo pio ju̧i̧ chjadëri̧ carapea̧ oa a̧dë chjäte dabarea̧ yürüa̧requedejȩrȩ. 11Ado gu̧ro tänȩrea̧ yo̧ oa peaja̧di jëdano̧ ëte mirepadiro̧jo̧ȩ. Ado china̧chja jo̧ tjoräpȩ cäapea̧ pio ju̧i̧bo jëdano̧padiro̧jo̧ȩ goaeri̧ pjȩa̧mȩ cäarea̧ pio ju̧i̧. Chjadëri̧ japarea̧ dapadirȩ davä pio cüdë dabarea̧ yürüa̧ tara. Ado cüdë yo̧a̧mi̧ japapadirȩ a̧dë chiquirea̧ decjiari̧." Aja̧, ja̧di ta̧rëri̧ yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

Cjiadiärea̧ do üdë järätä chjaparea̧ dode

12Ado Jeova judi ji̧dë u̧i̧ yo̧mȩrȩ a̧de yo̧rëremȩdejȩ Moiche ju̧i̧ jabë biradëmȩ oa:

13"Aja̧, pio mȩnȩ yo̧tä earequedemȩ icharaita pio ji̧ri̧iäpȩmo̧. Ja̧di ta̧rëri̧ yo̧tä earequedemȩ. 'Danȩrȩ, cjiadiärea̧ do üdë järätä chjaparea̧ dode. Ado cüdë pio jiro do oa china̧chjari̧ tutia̧ oaiä, 'Aja̧, ca̧ dodica̧da, china̧chjadida' quëna̧ jo̧rȩta̧ oaiä, jabechji̧ järätä chjapapea̧ dode bucho ana̧. Jabechji̧ pio jiro do üdë na̧rȩrea̧de. Na̧rȩdiibe cüdë dibë bucho ana̧ mitëa̧ pio ju̧i̧ chjiari, mȩnȩro̧ ca̧ pumȩpe bagapea̧ pio ju̧i̧ chjiari, cüdë dibë bucho ana̧ china̧chari̧ tutia̧ pio ju̧i̧ chjiari. Tjamo̧ davä. Pio ibë, ado dibëa̧ u̧ri̧ pio ji̧ri̧, ado dibëa̧ jadama̧i̧ pio ji̧ri̧, ado dibëa̧ jadama̧i̧ taru pio ji̧ri̧ chjadëri̧ na̧rȩdiibe pio ju̧i̧ chjiari. 14Ado pio ju̧i̧iä china̧chjari̧ tutipea̧de pio jiro do üdë. Pio ju̧i̧iä ja̧bepadëpea̧de. Jabo eami̧ pumȩ üdë pio jiro doro ja̧beparä judi, jabechji̧ ja̧bo tänȩpea̧de. Aeno̧pea̧de. 15Danȩrȩ, 6 do nöta ja̧bepapea̧de, jabo cjiadiärea̧ doro ja̧bepadëpea̧de. Jabechji̧ Jeova pio judirequede, ado pio coaiäpȩmo̧ jo̧rȩtapea̧ dode. Järätä chjapapea̧ dode. Ado pio ju̧i̧iä eami̧ pumȩ üdë pio jiro doro ja̧beparä judi, ja̧bo tänȩpea̧de. 16Ado pio ju̧i̧iä mȩnȩro̧, icharaita pio judiro̧, pio jiro do oa bucho ana̧ tutitäreji̧ri̧renȩro̧jo̧ȩ, goëje ano̧ mire cjo̧ro̧paji̧ri̧ pio judiro̧borë chjadëri̧ jo̧rȩtapea̧ oa. Ado ja̧di dari̧ japea̧ üdë ji̧dë ma jo̧rȩta tänȩpadiibe cüdë dibë yo̧ë cji̧däa̧ ma̧ȩ pio ju̧i̧ chjiari. 17Danȩrȩ, järätä chjaparea̧ do üdë bucho ana̧ na̧rȩdiibe pio jiro ma̧ȩ pio ju̧i̧ chjiari. Danȩrȩ, Jeova pio judirequede. Ado chjö̧na̧i̧ oa pareaparëremȩrequede 6 do nöta. Jabo cjiadiärea̧ doro pareapa ano̧a̧requede. Aja̧, cjiadiäa̧requede. Järätä chjapamȩmi̧ dari̧ cjiadiäa̧requede. Ja̧di tara cjiadiärea̧ doro järätä chjapapea̧de' yo̧tä earequedemȩ icharaita pio ji̧ri̧iäpȩmo̧." Aja̧, ja̧di ta̧rëri̧ yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

18Ado Jeova judi Moiche pio ju̧i̧ nö̧ta ni̧bä chjaoa̧ duri oa, Chinai quȩmȩ ya̧mi̧ uëräpȩ ju̧ri̧ ni̧bä chjaoa̧ duri oa, jabechji̧ yo̧a̧ri̧ ta̧dë pjatë oa yürürëremȩdejȩ. Aja̧, jibëa̧ ma̧ȩ chiamȩ ta̧dë oa, pio jënȩ jibëa̧ ichira̧ go̧ȩpea̧ chiamȩ ta̧dë oa yürürëremȩdejȩ.

Currently Selected:

Go̧dürea̧ Ma̧ȩ 31: Pume

Highlight

Compare

Copy