Go̧dürea̧ Ma̧ȩ 20

Jeova judi yürürëremȩdejȩrȩ ichi chjö̧na̧i̧ ma̧ȩ oa, tüdüa̧mi̧ darä cjo̧ro̧pea̧ ma̧ȩ oa

1Ja̧dëa ji̧ Ütë tjamo̧ judi ni̧bärëremȩdejȩrȩ icharaita ji̧ri̧. Ja̧di ta̧rëri̧ yo̧mȩrȩ yo̧a̧dejȩrȩ:

2"Jeova pio judirequede. Dibëa̧ Ütë pio judirequede. Dibë Ejito chiriri pio judiri go̧dü tänȩrëremȩ pio judirequede. Aja̧, mȩnȩro̧ mu̧i̧tjoi̧ maearë cjo̧ro̧rërea̧ chiriri pio judiri go̧dü tänȩrëremȩ pio judirequede.

3"Pio coaiäpȩmo̧ ma chjacjiamȩri̧ jo̧rȩtachji̧coe. Ado cja̧rȩmo̧ ütë oa chjacjiamȩri̧ jo̧rȩtadë machji̧vä.

4"Ado dibëa̧ ütëmi̧ da oa jëdano̧dë machji̧vä. A̧dëräpȩmȩmi̧ da oa, uiräpȩmȩmi̧ da oa, chiriräpȩmȩmi̧ da oa, jabechji̧ jëdano̧dë machji̧vä. 5Jabechji̧ pumȩrȩ jëdano̧a̧ ütë oa chjacjiamȩri̧ jo̧rȩtadë machji̧vä. Ado teracaba ütë ja̧ oa ja̧bepë yürüdë machji̧vä. 'Aja̧, ütëdida' quëna̧dë machji̧vä. Danȩrȩ, Jeova pio judirequede cüdë. Dibëa̧ Ütë pio judirequede. Ado mȩnȩro̧ ado cja̧rȩmo̧ ütë oa chjacjiamȩri̧ jo̧rȩtarä judi, 'chja ja̧bechji̧dida' quëna̧ jo̧rȩtadëparequede. Jabechji̧ quëbamȩmi̧ dari̧ jo̧rȩtamȩ Ütërequede cüdë. Tjamo̧ davä. 'Ca̧ pumȩ judiro̧ ado cja̧rȩmo̧rȩ ütëdida’ quëna̧ jo̧rȩtarä judi, jabechji̧ ërecjiape bagapai̧ darequedejȩrȩ. Ado danȩrȩ, coa eadëji̧ri̧ pio ji̧ri̧, coa jiadaji̧ri̧ pio ji̧ri̧, jabechji̧ bape chjaoparequedejȩrȩ. Tjamo̧ davä, gitori̧ bape chjaoparequedejȩrȩ jibëa̧ bori̧bo, jibëa̧ jadama̧i̧bo, jibëa̧ taru pio ji̧ri̧bo. 6Jabo coa eaji̧ri̧ pio ji̧ri̧ cjäri̧ri̧ cjia darequedejȩrȩ, ca̧ ma̧ȩ oa ta̧rë ta̧rë japaji̧ri̧ pio ji̧ri̧. Tjamo̧ davä. Jabo coa eaji̧ri̧ pio ji̧ri̧, pio ta̧rëdiäji̧ri̧ pio ji̧ri̧ ji̧dë ma cjäri̧ri̧ cjiamȩrȩ ea tjamo̧parequedejȩrȩ pio judiri ja̧ji̧ri̧bo. Tjamo̧ davä, goarijädëmȩ earea̧ra̧ ji̧dë ma eamȩrȩ eaparequedejȩrȩ goëje ano̧ mire cjo̧ro̧paji̧ri̧ ütëbodäräti̧ oa.

7"Danȩrȩ, Jeova pio judirequede. Dibëa̧ Ütë pio judirequede. Ado ca̧ quȩ üdë, jabechji̧ chjaoriä yo̧dëpea̧de. Ca̧ quȩ oa badë jo̧rȩtamȩrȩ yo̧dëpea̧de. Jabechji̧ ca̧ quȩrä ni̧bämȩ pio judi chjai̧dëri̧ ni̧bärä judi, o judiro̧ pio jȩaiäpȩmo̧ ba chia dapea̧ oa ca̧ quȩrä chjaocjiami̧ dari̧ ni̧bärä judi, jabechji̧ bape chjaopareconȩ.

8"Cjiadiärea̧ do pio ju̧i̧, järätä chjaparea̧ do pio ju̧i̧ china̧chjari̧ tutichji̧jo̧ȩ. Pio coaiäpȩmo̧ jo̧rȩtaji̧ri̧rȩ china̧chjari̧ tutichji̧jo̧ȩ. 9Danȩrȩ, 6 do nöta dibëa̧ ja̧beparea̧ chjö̧na̧i̧ oa ja̧bepapanȩrȩ. 10Jabo cjiadiärea̧ do üdë, jabechji̧ järätä chjaparea̧ dode. Pio coaiäpȩmo̧ jo̧rȩtapea̧ dode. Pio jiro doro ja̧bepadëpea̧de. Ado pio ju̧i̧iä pio mȩnȩro̧, dibëa̧ u̧ri̧ judiro̧, dibëa̧ mu̧i̧tjoi̧ judiro̧ ja̧bepadë matänȩrȩ. Ado dibëa̧ yaera̧, dibëa̧ burora̧, jabechji̧ tai̧dë mapea̧de. Ado tjaoëri jana̧ji̧ri̧ judiro̧, dibëa̧ chiriräpȩ cjo̧rera̧pea̧ji̧ri̧ pio judiro̧, peaja̧di ja̧bepadëtäreji̧ri̧dirȩ. Aja̧, pio jiro doro dibëa̧ chiriräpȩ cjo̧ro̧ji̧ri̧ judiro̧ ütëbodärärë ja̧bepadë matäreji̧ri̧dirȩ, cja̧rȩmȩrȩ a̧dë chiquirea̧ decjiari̧. 11Danȩrȩ, Jeova pio judirequede. Ado cüdë, 6 do nöta chjö̧na̧i̧ oa pareaparëremȩreconȩ. Dabu oa, a̧dë oa, ui ana̧ oa pareaparëremȩreconȩ. Dabu oa cjaeäji̧ri̧ pio ji̧ri̧, uirä cjo̧ro̧ji̧ri̧ pio ji̧ri̧ pareapea̧requedejȩrȩ, a̧dëräpȩmo̧ pjo̧a̧ji̧ri̧ pio ji̧ri̧bo. Ado pareapea̧ duri oa cjiadiärea̧ doro, jabechji̧ järätä chjapami̧ dari̧ cjiadiäa̧requede cüdë. Pio ju̧i̧iä china̧chjari̧ tutia̧reconȩ pio jiro do oa. Ja̧di tara jabechji̧, järätä chjapatä earequededibe cjiadiärea̧ doro cja̧rȩmȩrȩ ja̧beparea̧ decjiari̧.

12"Ado pio dibë nö̧riji̧ri̧ pio ji̧ri̧ ba chia da tjamo̧chji̧jȩrȩ. Mȩnȩro̧ ja̧di dari̧ cjo̧ro̧rä judi, japamitë ana̧ri̧ cjo̧ro̧rea̧ yürüparequededibe cüdë dibë yürüpea̧ chiriräpȩ ju̧ri̧. Aja̧, Jeova pio judirequede. Ado pio cüdë ma̧ȩ yürürequededibe, dibëa̧ Ütë pio judi.

13"Ado danȩrȩ, ado cja̧rȩmo̧ pumȩ oa ja̧bo tänȩdë machji̧vä.

14"Ado cja̧rȩmo̧ ja̧ iei̧ ji̧ bae ëba mo̧a̧dë machji̧vä.

15"Ado garadë machji̧vä.

16“Ado teracabari̧ aechide yo̧dë machji̧vä chjai̧dëri̧ japadëmȩ pio ju̧i̧iäpȩmo̧.

17“Ado cja̧rȩmo̧ ja̧ oa dae ja̧bo dae ja̧bo dadë machji̧vä. Ju̧i̧ ja̧ jo̧ oa, ju̧i̧ ja̧ iei̧ oa, ju̧i̧ ja̧ mu̧i̧tjoi̧ pio ji̧ri̧ dae ja̧bo dadë machji̧vä. Ju̧i̧ ja̧ baca oa, ju̧i̧ ja̧ yae oa, ju̧i̧ ja̧ buro oa dae ja̧bo dadë machji̧vä. Jabechji̧ jibëa̧ pio ju̧i̧ dae ja̧bo dadëpea̧de. Ja̧di ta̧rëri̧ yo̧mȩrȩ yürürëremȩdejȩrȩ ichi chjö̧na̧i̧ ma̧ȩ oa icharaita ji̧ri̧ Ütë tjamo̧ judi.

Icharaita judiro̧ uapa tjamo̧pe bagarëreji̧ri̧dirȩ

18Jabo cjäri̧ madirȩ, icharaita judiro̧ ma̧i̧ da oa ta̧rëa̧ oaiä, uapai̧ da oa daea̧ oaiä, jabechji̧ uapa tjamo̧ji̧ri̧pea̧dirȩ. Tjamo̧ davä. Ti̧ ma baäa̧ oaiä, ma̧i̧ dari̧ bërepe chjaoa̧ oaiä, pjurarea̧ üdë ma̧i̧ ta̧rëri̧ ea cjia̧ oaiä, chjä üdë ya̧mi̧ri pio judiri ma̧i̧ dari̧ cjitëmȩ oa daea̧ oaiä uapa tjamo̧pe bagarëreji̧ri̧dirȩ, i ma̧na̧gura cjiaji̧ri̧rȩ. Pio ju̧i̧iä duriräpȩmo̧diäa̧dirȩ queri̧räpȩ cjiadëri̧ cjiaji̧ri̧rȩ. 19Ja̧dëa ji̧ yo̧a̧diro̧jo̧ȩ Moiche ju̧i̧:

—Danȩ, pio mȩnȩ ano̧ mire ni̧bätäremȩrenȩibe. Jabechji̧ pio mȩnȩ ibëiäpȩmo̧ ni̧bärä judi ta̧rë ja̧boparea̧ro̧mȩ. Jabo Ütë tjamo̧ pio judi ibë ni̧bärä judi, cjäri̧ madiibe, uapai̧ da tjamo̧diibe. Pio judi ibë ni̧bärä judi 'ja̧bopai̧ daa̧ro̧da' quëna̧ jo̧rȩtarea̧rȩ. Ado pio ju̧i̧iä jabechji̧, ni̧bädëtädiibe —yo̧rëreji̧ri̧diro̧jo̧ȩ Moiche ju̧i̧.

20Jabo Moiche judi dëbë yo̧mȩrȩ yo̧a̧dejȩrȩ:

—Jabechji̧ uapadëchji̧vä mȩnȩro̧. Jabomo̧ ütarera̧pea̧didibe Ütë tjamo̧ judi. Pio ju̧i̧iäpȩmo̧ uape uape jo̧rȩtatä eadidibe mȩnȩro̧ chjai̧dëri̧ japachea oa. Pio ju̧i̧iä jibëa̧ jauëchja oa ana̧ri̧ na̧rȩdidibe —dëbë yo̧a̧dejȩrȩ Moiche judi.

21Ado Moiche judi go̧a̧ra̧ ë ca̧ra̧räpȩ jäa̧ nö̧ta, Ütërë cjiamȩräpȩ jäa̧ nö̧ta, icharaita judiro̧ jachi tjamo̧ oa cjiaji̧ri̧rȩ cjiadiärëreji̧ri̧dirȩ.

Currently Selected:

Go̧dürea̧ Ma̧ȩ 20: Pume

Highlight

Compare

Copy