Go̧dürea̧ Ma̧ȩ 24

Icharaita judiro̧ yo̧ë cji̧därëreji̧ri̧diro̧jo̧ȩ Ütë tjamo̧ ju̧i̧, jënȩro̧ ma̧ȩ oa nö̧tadäräri̧ ta̧rë ta̧rë japapea̧ ji̧

1Ja̧dëa ji̧ Jeova judi yo̧rëremȩdejȩ Moiche ju̧i̧:

—Ya̧mi̧ oa buatä earequedemȩ Aro̧ pio ju̧i̧ nöta. Pio coaiäpȩ jana̧chji̧coe. Ado Aro̧ ja̧ u̧ri̧ pio judiro̧borë buatä earequedejȩrȩ Nadabo quȩmȩ oa, ado Abiu quȩmȩ oa. Ado icharaita tjamo̧ cjo̧ro̧ji̧ri̧ judiro̧, 70rë, peaja̧di buatä earequedejȩrȩ. Pio coaiäpȩmo̧ chjacjiamȩri̧ jo̧rȩtapea̧ oa buatä earequededibe jabomo̧ jachi chja cjiapea̧ oa. 2Jabo pio mȩnȩmo̧rȩ ca̧ queri̧räpȩ jana̧parenȩque, o judiro̧dë. Ado chiriräpȩ cjiadiäa̧ji̧ri̧ pumȩ pio judiro̧, jabechji̧ ya̧mi̧ oa buadëtädirȩ.

3Ja̧dëa ji̧ Moiche judi ya̧mi̧ri pio judiri bira ëte yo̧a̧dejȩrȩ icharaita ji̧ri̧. Ma̧ȩ chjö̧na̧i̧ oa ni̧bä chjaorëremȩdejȩrȩ Jeova judi yo̧a̧mi̧. Tüdüa̧mi̧ darä cjo̧ro̧pea̧ ma̧ȩ chjö̧na̧i̧ oa yo̧a̧dejȩrȩ. Ado icharaita judiro̧ ütëborë cja̧rȩmȩ chji̧ chiami̧ dari̧ dëbë yo̧a̧diro̧jo̧ȩ:

—Aja̧, Jeova judi yo̧a̧mi̧ nötadäräri̧ ta̧rë ta̧rë japaparea̧rȩ.

4Ja̧dëa ji̧ Moiche judi go̧ȩpea̧dejȩ ma̧ȩ chjö̧na̧i̧ oa, Jeova judi pio jȩaiäpȩmo̧ yo̧a̧ pio ju̧i̧. Ado dopea̧rä peadai̧rä, gu̧na̧rea̧ mechja oa jëdano̧rëremȩdejȩ ya̧mi̧ curë yuroro ju̧ri̧. Ado 12 ta̧dë oa mitëa̧dejȩrȩ Icharai ja̧ u̧ri̧ pio judiri ja̧ji̧ri̧mi̧ da oa. Go̧a̧ti̧ oa, jujua oa cji̧däa̧dejȩrȩ uëräpȩmo̧ cjiari̧. 5Ado Moiche judi ja̧di dari̧ japa ëte, goe gu̧rori̧ cäë yürü tänȩa̧dejȩrȩ pea ütëti̧pea̧ oari pio ji̧ri̧. Jeova pio ju̧i̧iäpȩmo̧ cäë yürü tänȩa̧dejȩrȩ. Ado cja̧rȩmo̧ yürürea̧ oa peaja̧di cäë yürü tänȩa̧dejȩrȩ. Baca oari oa, pëi̧ chja oa cäë yürü tänȩa̧dejȩrȩ ori̧ bagari̧ ëba jurarea̧ quȩmȩ yürürea̧ pio ju̧i̧.#24:5 Ori̧ bagari̧ ëba jurarea̧ quȩmȩ yürürea̧ oa gu̧na̧ ji̧, o oamo̧ cäa̧diro̧jo̧ȩ. Codë oa cäadëa̧diro̧jo̧ȩ. O oa jura̧diro̧jo̧ȩ icharaita judiro̧. "Cja̧rȩmȩ pumȩa̧ro̧da, ji̧mo̧ ja̧mi̧ dari̧ cjo̧ro̧a̧ro̧da, Jeova ja̧ pumȩa̧ro̧da" quëna̧ jo̧rȩtaji̧ri̧rȩ ji̧mo̧ jura̧diro̧jo̧ȩ. 6Ado Moiche judi goe tjomo̧mi̧ mitëa̧dejȩ tachjarä. Ado o oa pjo̧dechäa̧dejȩ gu̧na̧rea̧ mechja chirirä. 7Ja̧di dari̧ japa ëte mitëa̧dejȩ yo̧ë cji̧däa̧ ma̧ȩ chiamȩ go̧ȩ i oa, jënȩ pea go̧ȩpea̧ ma̧ȩ pio ju̧i̧, Jeova judi icharaita ji̧ri̧iäpȩmo̧ yo̧rërea̧ ma̧ȩ pio ju̧i̧. Ado pumȩ judiro̧ ütëborë ta̧rëri̧ go̧ȩ ni̧bärëremȩdejȩ Moiche judi. Ado chjö̧na̧i̧ oa go̧ȩ ni̧bä ëte icharaita judiro̧ ado yo̧a̧dirȩ:

—Aja̧, Jeova judi ibë yo̧a̧mi̧ nötadäräri̧ ta̧rë ta̧rë japa maparea̧ro̧jo̧ȩ cjiadiädëri̧.

Aja̧, ja̧di ta̧rëri̧ yo̧ë cji̧däji̧ri̧rȩ yo̧rëreji̧ri̧diro̧jo̧ȩ Moiche ju̧i̧ icharaita judiro̧.

8Ja̧dëa ji̧ Moiche judi mitëa̧dejȩ tachjaräremȩ goe oa, ado pjo̧dechäa̧dejȩ icharaita pio ji̧ri̧iäpȩmo̧. Ado yo̧a̧dejȩrȩ:

—Pio jiro goe üdë na̧rȩrea̧mi̧ dade. Jeova judi dibë yürüa̧ ma̧ȩ pio ju̧i̧ chjiari na̧rȩrea̧mi̧ dade. Ado mȩnȩro̧ pio ju̧i̧iäpȩmo̧ dëbë yo̧a̧ pio ju̧i̧ chjiaribo na̧rȩrea̧mi̧ dade. Mȩnȩro̧ dëbë yo̧a̧ ji̧, “Aja̧, Jeova judi yo̧a̧mi̧ nötadäräri̧ ta̧rë ta̧rë japa maparea̧rȩ cjiadiädëri̧” yo̧mȩ ma̧ȩ pio ju̧i̧ yo̧a̧ pio ju̧i̧ chjiaribo na̧rȩrea̧mi̧ dade. Aja̧, mȩnȩro̧ Jeova pio ju̧i̧ yo̧ë cji̧däa̧ pio ju̧i̧ chjiari na̧rȩrea̧mi̧ dade goe üdë —yo̧mȩrȩ yo̧rëremȩdejȩrȩ Moiche judi, goe pio ju̧i̧ pjo̧dechämȩrȩ.

9Ja̧dëa ji̧ Moiche judi, Aro̧borë bua̧dirȩ ya̧mi̧räpȩ. Aja̧, Aro̧ ja̧ u̧ri̧ pio ji̧ri̧ nöta, buarëreji̧ri̧diro̧jo̧ȩ, icharaita tjamo̧ cjo̧ro̧ji̧ri̧ pio ji̧ri̧ nöta, 70 pumȩ pio ji̧ri̧ nöta. 10Ado buadäräa̧rä darëreji̧ri̧diro̧jo̧ȩ Icharai ja̧ Ütë oa. Ado judi boë cjaeäa̧ dabu oa a̧dë chjäte chjacjiamȩri̧ a̧rȩmȩ oa darëreji̧ri̧diro̧jo̧ȩ. Aja̧, tütüa oa, a̧dë imi̧ da oa, cjacjarë darea̧mi̧ da oa, coëri̧ coëri̧ jämȩmi̧ da oa darëreji̧ri̧diro̧jo̧ȩ jënȩ boë cjaeäa̧ pio ju̧i̧. 11Ado Ütë tjamo̧ judi icharaita tjamo̧ cjo̧ro̧ji̧ri̧ pio ji̧ri̧ gitoi̧ dari̧ japatärea̧ ji̧, japadëa̧dejȩrȩ. Ju̧i̧ ja̧ queri̧räpȩ cjiaji̧ri̧bo, uapai̧ daräpȩ cjiaji̧ri̧bo, eami̧ oa japadëa̧dejȩrȩ. Jabechji̧ pio jȩaiäpȩmo̧ daea̧ji̧ri̧bo eami̧ oa japadëa̧dejȩrȩ. Jabechji̧ Ütë tjamo̧ ja̧ dëbëräpȩ ji̧mo̧ jura̧dirȩ. Jara̧dirȩ peaja̧di.

Moiche judi ado buarëremȩdejȩ Chinai quȩmȩ ya̧mi̧ oa

12Ja̧dëa ji̧ Jeova judi yo̧rëremȩdejȩ Moiche ju̧i̧:

—Ji̧dë uë oa buavä ya̧mi̧räpȩ. Pio coaiäpȩ jana̧vä. Ado pio coadi cjiadiätä earequedemȩ japamitë. Ado pio yoaiä jana̧mȩ oa, yo̧a̧ri̧ ta̧dë pjatë oa yürüparequedemȩ ca̧ ma̧ȩ chiamȩ oa. Aja̧, cüdë go̧ȩpea̧ pio ju̧i̧, icharaita judiro̧ tüdüa̧mi̧ darä cjo̧ro̧pea̧ ma̧ȩ chjö̧na̧i̧ oa chiamȩ ta̧dë pjatë oa yürüparequedemȩ —yo̧mȩrȩ yo̧a̧dejȩ Moiche ju̧i̧ Ütë tjamo̧ judi.

13Pio ju̧i̧iä Moiche judi jëdano̧rëremȩde ji̧dë uë oa buapea̧ ji̧. Jȩa a̧domȩ pio ju̧i̧ nöta jëdano̧a̧de, Jochue quȩmȩ pio ju̧i̧ nöta. Ado jëdano̧däräa̧rä taruparëreji̧ri̧dirȩ ji̧dë uë oa buapea̧ ji̧ Ütë tjamo̧ pio ju̧i̧iäpȩ jäpea̧ oa. 14Jabo buabea yaboi̧, Moiche judi yo̧a̧dejȩrȩ tjamo̧ cjo̧ro̧ji̧ri̧ pio ji̧ri̧:

—Danȩrȩ, pio yi ya̧mi̧räpȩ cjiadiächji̧vä a̧ro̧rȩ bira̧rä yuro. Pio yide Aro̧ judi, Uru quȩmȩborë. Ado mȩnȩro̧ ado cja̧rȩmo̧ ju̧i̧ nöta goaedëri̧ dëbë ni̧bätarä judi, mȩnȩro̧ cja̧rȩmȩ chji̧ chiami̧ dari̧ jo̧rȩtadërä judi, jabechji̧ pio ji̧ri̧iäpȩmo̧ yo̧pea̧de. Pio judiro̧ chjadëri̧ goë tuti ni̧bäpadiro̧dibe mȩnȩro̧ chjadëri̧ jëdano̧pea̧ oa —yo̧mȩrȩ yo̧rëremȩdejȩrȩ Moiche judi ji̧dë u̧i̧ uë oa buabea yaboi̧.

15Ado Moiche judi ji̧dë u̧i̧ uë oa jämȩrȩ bua̧dejȩ ya̧mi̧ oa. Ado ya̧mi̧ üdë ina̧ oa cjiami̧ dari̧ cjiarëremȩde go̧a̧ra̧ ë ca̧ra̧ oaiä. 16-17Ado Jeova ja̧ tatarea̧ üdë a̧dë chjäte tatari̧ cjiamȩrȩ bira̧na̧ra̧rëremȩde ya̧mi̧räpȩ, ma̧i̧ dari̧ na̧rȩmȩrȩ. Ado ya̧mi̧ curëräpȩ cjiadiäa̧ji̧ri̧ icharaita pio judiro̧, ëteri pio judiri ya̧mi̧ uëräpȩmo̧ dae cjiaji̧ri̧rȩ ma̧i̧ da cjo̧dë gärimȩmi̧ da oa darëreji̧ri̧diro̧jo̧ȩ, uapai̧ da tjamo̧ oa. Ado go̧a̧ra̧ ë ca̧ra̧ üdë, jabechji̧ 6 do nöta ina̧mi̧ dari̧ cjiarëremȩdejȩ ya̧mi̧ oa. Ado pio jiro do chjätä ëte Jeova judi go̧a̧ra̧ ë ca̧ra̧ tjori judiri ëna̧diäa̧dejȩ Moiche ju̧i̧. 18Ado Moiche judi, ji̧dë uë oa bua̧ ji̧, jabechji̧ cjacjarë chjätämȩrȩ yu̧a̧rëremȩdejȩ go̧a̧ra̧ ë oa. Ado ju̧ri̧pȩ Moiche judi cjiadiärëremȩde japamitë ana̧. Aja̧, 40 do nöta, 40 gȩnȩ nöta cjiadiäa̧de pio ju̧ri̧pȩ Ütë tjamo̧ pio ju̧i̧ nöta.

Currently Selected:

Go̧dürea̧ Ma̧ȩ 24: Pume

Highlight

Compare

Copy