Go̧dürea̧ Ma̧ȩ 19
19
Moiche judi bua̧dejȩ ya̧mi̧ oa Ütë tjamo̧ pio ju̧i̧ dëbëdiäpea̧ oa
1-2Ado icharaita judiro̧ Depjidi̧ quȩmȩ chiriri pio judiri go̧düji̧ri̧rȩ go̧düdärärëreji̧ri̧dirȩ Chinai quȩmȩ chiri maearäpȩ. Gupënȩrȩ pea a̧rȩdiäa̧rä, judiro̧ Ejito chiriri pio judiri go̧düa̧ri ja̧ yo̧a̧ri̧ gupënȩ chjätäa̧rä, go̧düdärärëreji̧ri̧dirȩ. Ado jibëa̧ jo boi̧chji̧ oa ira̧ cji̧deno̧rëreji̧ri̧dirȩ ya̧mi̧ curë yuroro.
3Ja̧dëa ji̧ Moiche judi bua̧dejȩ ya̧mi̧ oa Ütë tjamo̧ pio ju̧i̧ dëbëdiäpea̧ oa. Ado Jeova judi ya̧mi̧räpȩ cjiamȩrȩ ëna̧diärëremȩdejȩ. Ado ja̧di ta̧rëri̧ yo̧mȩrȩ yo̧a̧dejȩ:
—Danȩ, ma̧ȩ yürüparequedemȩ icharaita ja̧ oa, Jacobo pio judiri ja̧ji̧ri̧ ja̧ oa. Ja̧di ta̧rëri̧ yo̧tä earequedemȩ pio ji̧ri̧iäpȩmo̧: 4"Danȩrȩ icharaita, Jeova pio judirequede. Ado cüdë ejichio ji̧ri̧ ca̧ jauëchjara̧ pio ju̧ri̧ra̧ ma̧i̧ dari̧ japea̧ pio ju̧i̧ irä daea̧nȩrȩ mȩnȩro̧. Ado dabanȩrȩ peaja̧di cüdë dibë pio jauëräpȩmo̧ ëba ma̧na̧pea̧ pio ju̧i̧ chjiari. Jabechji̧ agira quȩmȩ puarë japarëmi̧ cjiari̧, bori̧ pio ji̧ri̧ pjö̧dato oaiä chia ma̧na̧mi̧ dari̧ ëba ma̧na̧requededibe pio yoaiäpȩ pio coadi ëba cjiapea̧ oa. Ado pio ju̧i̧ chjiari tjamo̧ri̧ dabanȩrȩ. 5Ado yaba̧ chjadëri̧ ta̧rëchji̧coe. Danȩrȩ, mȩnȩro̧ ca̧ ma̧ȩ oa chjadëri̧ ta̧rë ta̧rë japarä judi, pio coa chjadëri̧ ta̧rëdiärä judi, 'jabechji̧ ca̧ pumȩ tjamo̧diro̧ca̧da, pio cüdë tänȩa̧ oa ca̧ pumȩ tjamo̧diro̧ca̧da' quëna̧ jo̧rȩtamȩrȩ daparequededibe. Danȩrȩ, Jeova pio judirequede cüdë. Ado cüdë jo̧rȩta̧mi̧ japapai̧ darequede. Cüdë jo̧rȩta̧mi̧ mitëpai̧ darequede. Ado mȩnȩro̧ chjadëri̧ ta̧rë ta̧rë japarä judi, jabechji̧ pio dibëmo̧i̧ oa mitëparequededibe, ado cja̧rȩmo̧ pumȩdë oa. 6Tjamo̧ davä. Mȩnȩro̧ coa ta̧rëdiärä judi, jabechji̧ china̧chjari̧ tutia̧ oa cjiami̧ dari̧ cjiapanȩrȩ ca̧ea̧ maearë. Ado o ji̧ri̧ chjiari goë tuti ja̧bepaji̧ri̧rȩ ja̧bepë yürüparenȩro̧coe." Aja̧ Moiche, ja̧di ta̧rëri̧ yo̧tä earequedemȩ icharaita ji̧ri̧iäpȩmo̧ —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi ya̧mi̧ uëräpȩ ju̧ri̧.
7Ado Moiche judi, ya̧mi̧ uëri pio judiri bira ëte a̧dopa tänȩrëremȩdejȩrȩ tjamo̧ cjo̧ro̧ji̧ri̧ pio ji̧ri̧. Ado Jeova judi yo̧a̧ chjö̧na̧i̧ oa ni̧bä chjaorëremȩdejȩrȩ. 8Ado pio jiro ma̧ȩ oa ta̧rëa̧ oaiä Icharaita judiro̧ ütëborë cja̧rȩmȩ chji̧ chiami̧ dari̧ dëbë yo̧a̧diro̧jo̧ȩ:
—Aja̧, Jeova judi pio ibë yo̧a̧mi̧ tjamo̧ri̧ ta̧rë ta̧rë japa maparea̧ro̧jo̧ȩ nötai̧däräri̧ —yo̧a̧diro̧jo̧ȩ.
Ado judiro̧ yo̧a̧mi̧ yo̧rëremȩdejȩ Moiche judi Jeova pio ju̧i̧iäpȩmo̧.
Ütë tjamo̧ judi uapai̧ dari̧ na̧rȩrëremȩdejȩrȩ icharaita ji̧ri̧
9Ja̧dëa ji̧ Jeova judi yo̧rëremȩdejȩ Moiche ju̧i̧:
—Danȩ, go̧a̧ra̧ ë ca̧ra̧rä cjiamȩrȩ biraparequede pio mȩa nöta ni̧bä chjaopea̧ oa. Icharaita judiro̧ ütëborë ta̧rërea̧mi̧ dari̧ ni̧bä chjaoparequedemȩ judiro̧ coëma cjiari̧ quëna̧pea̧ oa pio mȩa chjiari. ‘Chia chia, Moiche pio ju̧i̧ nöta irä ni̧bä chjaomi̧ dari̧ ni̧bä chjaodiji̧da, Moiche pio ju̧i̧ ba chia dadiji̧da, pio a̧ro̧rȩborë ba chia datäreji̧ri̧rea̧ro̧ju̧i̧da, jiade ta̧rërea̧ decjiari̧ ta̧rë ja̧botäreji̧ri̧a̧ro̧ju̧i̧da, bücjü dadëpea̧dida’ quëna̧ jo̧rȩtapea̧ oa ni̧bä chjaoparequedemȩ, pio judiro̧borë ta̧rëri̧ —yo̧mȩrȩ yo̧a̧dejȩ Moiche ju̧i̧ Ütë tjamo̧ judi.
Ja̧dëa ji̧ Moiche judi Icharaitarë dëbë yo̧a̧ pio ju̧i̧ yo̧rëremȩdejȩ Jeova ju̧i̧. "Aja̧, Jeova judi pio ibë yo̧a̧mi̧ tjamo̧ri̧ ta̧rë ta̧rë japa maparea̧ro̧jo̧ȩ nötai̧däräri̧" dëbë yo̧a̧ pio ju̧i̧ yo̧a̧dejȩ Jeova pio ju̧i̧iäpȩmo̧. 10Ja̧dëa ji̧ Jeova judi dëbë yo̧a̧dejȩ:
—Danȩ, yo̧jȩrȩ icharaita ji̧ri̧ judiro̧ chjadëri̧ jëdano̧tä pio coaiäpȩmo̧ chjacjiamȩri̧ jo̧rȩtapea̧ oa. Pio yaba̧ domȩ oa jëdano̧tädirȩ jaco dorobo. Joatädiro̧jo̧ȩ jibëa̧ chjibo oa. 11Ado jaco dopea̧rä judiro̧ jëdano̧däräa̧rä, a̧dëri pio judiri biraparequede Chinai quȩmȩ ya̧mi̧räpȩmo̧. Icharaita judiro̧ ütëborë dari̧ biraparequede. 12Ja̧di tara yo̧requedemȩ ya̧mi̧ yuroti̧ oa chjadëri̧ tutitä pumȩrȩ ya̧mi̧räpȩmo̧ järea̧mi̧dëri̧. Aja̧, uapai̧ ta̧rëri̧ chi̧dëeajȩrȩ judiro̧ ya̧mi̧ oa buadëtä, ya̧mi̧ queri̧räpȩ jädëtä. Jabechji̧ ya̧mi̧räpȩ jämȩ pio judi ja̧bopade. 13Tjamo̧ri̧ yo̧requedemȩ. Eami̧ pumȩ üdë, eami̧ baca üdë, eami̧ yae üdë tutia̧ oëräpȩmo̧ chjätärä judi, ja̧bopea̧ maeade. Ta̧dëra̧ ae ja̧bo tänȩpea̧ maeade. Ado ta̧dëra̧ ae ja̧bo tänȩrea̧ dadërä judi, jabechji̧ chjito̧ra̧ ae ja̧bo tänȩpea̧de. Aja̧, ja̧di dari̧ ja̧bo tänȩpea̧de. Ado ja̧dëa ji̧ pio ju̧i̧ ja̧ icjara üdë, jabechji̧ mitëdëpea̧de, ga̧rȩ taradëpea̧de. Aja̧, ja̧di dari̧ japapea̧de tutia̧ oëräpȩmo̧ chjätäa̧mȩ pio ju̧i̧. Jabo danȩrȩ, pjurarea̧ üdë ea cjia̧rä, pio judi japamitë ana̧ri̧ ea cjia̧rä, dëdë, jäpea̧de ya̧mi̧räpȩmo̧. Aja̧, ea cjia̧rämo̧ jäpea̧de, jabërädë —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.
14Ja̧dëa ji̧ bira̧de Moiche judi. Ya̧mi̧ uëri judiri birarëremȩde. Ado Ütë tjamo̧ judi yo̧a̧mi̧ yo̧a̧dejȩrȩ icharaita ji̧ri̧ jëdano̧tä, Jeova pio ju̧i̧iäpȩmo̧ chjacjiamȩri̧ jo̧rȩtapea̧ oa. Pio ju̧i̧iä joa̧diro̧jo̧ȩ jibëa̧ chjibo oa. 15Ado Moiche judi ji̧dë u̧i̧ yo̧mȩrȩ ja̧di ta̧rëri̧ a̧de yo̧rëremȩdejȩrȩ:
—Aja̧, chjadëri̧ jëdano̧chji̧vä jaco dopea̧rä a̧dopapea̧ oa. Ado pio yoa tjarari̧ do nöta, jabechji̧ ëba mo̧a̧dë machji̧jȩrȩ dibëa̧ ivi ji̧ri̧ —yo̧mȩrȩ a̧de yo̧a̧dejȩrȩ.
16Ja̧dëa ji̧ yo̧a̧ri̧ do chjätä ëte dopea̧rä, ma̧i̧ dari̧ bërëpe chjaorëremȩde ya̧mi̧ uëräpȩ ju̧ri̧. Ti̧ ma baärëremȩde ta̧rërea̧mi̧dëri̧. Ado go̧a̧ra̧ ë ca̧ra̧ti̧rȩ bira̧de ya̧mi̧ oa ina̧rea̧mi̧ dari̧. Ado ja̧dëa ji̧ pjurarea̧ üdë goae tarari̧ eamȩrȩ ea cjiarëremȩde japamitë ana̧. Ado pio ju̧i̧ ta̧rë oaiä, uapai̧ da oa daea̧ oaiä, cjäri̧ madirȩ, icharaita judiro̧ ütëborë uapa tjamo̧pe bagarëreji̧ri̧dirȩ i ma̧na̧guraji̧ri̧rȩ. 17Ja̧dëa ji̧ Moiche judi ëba jäa̧dejȩrȩ ya̧mi̧ curëräpȩ yuro. Jënȩro̧ cjo̧ro̧mȩ bë oa a̧dë jäji̧ri̧rȩ järëreji̧ri̧dirȩ Ütë tjamo̧ pio ju̧i̧ dëbëdiäpea̧ oa. 18Ado Chinai ya̧mi̧ üdë chjä maeara̧ ina̧ oa cjiami̧ dari̧ cjiarëremȩde. Jabechji̧ Jeova judi cjo̧dë gärimȩ tjoro cjiamȩrȩ bira̧ oaiä, chjä maeara̧ ina̧ oa cjiami̧ dari̧ cjiarëremȩde. Ado cjo̧dë gärimȩ tjori judiri ma̧i̧ dari̧ cjitërëremȩde chjä üdë. To cäarea̧ joë ana̧ tjamo̧ri judiri cjitëmi̧ dari̧ cjitërëremȩde, chjä gä cjiari̧. Ado ya̧mi̧ codërë ma̧i̧ dari̧ jö̧nö̧ jö̧nö̧ai̧ cjiari̧ cjiarëremȩde. 19Ado pjurarea̧ ea cjia̧ üdë ji̧dë u̧i̧ to̧bari̧ ea cjiarëremȩde. Ji̧dë ma ea cjiarëremȩde japamitë ana̧ri̧. Ado ma̧i̧ da tjamo̧pe baga̧rä Moiche judi ni̧bärëremȩdejȩ Jeova pio ju̧i̧. Ado pio judi dëbë yo̧mȩrȩ ni̧bärëremȩdejȩ dörö eari̧. 20Ado Jeova judi Chinai quȩmȩ ya̧mi̧ uëräpȩ biramȩrȩ ëna̧diäa̧dejȩ Moiche ju̧i̧ ya̧mi̧ oa ado chjereno̧ buatä. Ado pio ju̧i̧iämȩrȩ Moiche judi bua̧dejȩ. 21Ado buadäräa̧mȩ oa ja̧di ta̧rëri̧ yo̧a̧dejȩ Jeova judi Moiche pio ju̧i̧iäpȩmo̧:
—Ado chereno̧ biravä pumȩ ji̧ri̧ chjadëri̧ chi̧dëeapea̧ oa, judiro̧ tutia̧ jaueräpȩmo̧ jana̧chea oa, judiro̧ pio coaiäpȩmo̧ dachea oa. Ja̧di dari̧ japarä judi no̧i̧dërë ja̧bopadirȩ. 22Ado danȩ, o ji̧ri̧ chjiari goë tuti ja̧bepaji̧ri̧ pio judiro̧borë chjadëri̧ jëdano̧pea̧ chiadirȩ cüdë pio ji̧ri̧ bape chjaochea oa. Tjamo̧ dava. Judiro̧ ca̧ queri̧räpȩ jana̧diämi̧ dari̧ ja̧bepaji̧ri̧borë, jabechji̧ chjadëri̧ jëdano̧pea̧ chiadirȩ pio coaiäpȩmo̧ chjacjiamȩri̧ jo̧rȩtapea̧ oa. Aja̧, ja̧di dari̧ japapea̧ chiadirȩ cüdë ji̧ri̧ ma̧i̧ dari̧ japachea oa —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.
23Ado Moiche judi dëbë yo̧mȩrȩ yo̧a̧dejȩ Jeova ju̧i̧:
—Danȩ, mȩnȩ yo̧a̧mi̧ tutia̧ oa cjiade ya̧mi̧ üdë peadëri ja̧. Pumȩ judiro̧ pio jauëräpȩmo̧ jana̧rea̧mi̧dëri̧ tutia̧ oa cjiade. Mȩnȩ yo̧a̧ pio oaiä, "china̧chjari̧ tutichji̧vä ya̧mi̧ oa" yo̧a̧ pio oaiä, jabechji̧ tutia̧ oa cjiade —yo̧mȩrȩ dëbë yo̧rëremȩdejȩ Moiche judi.
24Ado ja̧dëa ji̧ Jeova judi yo̧a̧dejȩ:
—Danȩ, biravä. Ado na̧ ayima̧i̧ Aro̧ pio ju̧i̧ ëba buatä earequedemȩ. Jabo o judiro̧ chjätädë matädirȩ mȩnȩro̧ tutia̧ pio ju̧i̧. Pumȩ judiro̧, o ji̧ri̧ chjiari goë tuti ja̧bepaji̧ri̧ pio judiro̧borë chjätädë matädirȩ. Tutia̧ jauëräpȩmo̧ chjätärä judi bape chjaoparequedejȩrȩ. Aja̧, biravä —yo̧a̧dejȩ.
25Ado Jeova judi yo̧a̧mi̧ birarëremȩde Moiche judi. Ado pio jȩaiäpȩmo̧ yo̧a̧mi̧ yo̧rëremȩdejȩrȩ icharaita ji̧ri̧iäpȩmo̧.
Currently Selected:
Go̧dürea̧ Ma̧ȩ 19: Pume
Highlight
Share
Compare
Copy
Want to have your highlights saved across all your devices? Sign up or sign in
©2021 Global Partners, All Rights Reserved
