Go̧dürea̧ Ma̧ȩ 17

Ütë tjamo̧ judi ta̧dëri pio judiri tuti yürürëremȩdejȩrȩ ui oa

1Ado icharaita judiro̧ ütëborë go̧dürëreji̧ri̧dirȩ Chi̧ quȩmȩ chiri maeari pio judiri. Ado Jeova judi yo̧a̧mi̧ japamitë boi̧chji̧ cjo̧ro̧pea̧ oa, jibëa̧ jo̧ oa ira̧ cji̧därëreji̧ri̧dirȩ. Ado japamitë chjätä ëte, Jeova judi yo̧a̧mi̧ ado chjereno̧ baäa̧dirȩ. Ado japamitë chjätä ëte, jibëa̧ jo̧ boi̧chji̧ oa ira̧ ado chjereno̧ cji̧deno̧a̧dirȩ Depjidi̧ quȩmȩräpȩ. Jabo judiro̧ ui oa jaratärea̧ ji̧, jararea̧ dadëa̧dirȩ. 2Ado pio ju̧i̧iä icharaita judiro̧ ado chjereno̧ goaedëri̧ yo̧a̧diro̧jo̧ȩ Moiche ju̧i̧:

—Ui yürüibe a̧ro̧rȩ jarapea̧ oa. Ja̧bo marea̧rȩ. Yürüibe —yo̧a̧diro̧jo̧ȩ.

Ado Moiche judi dëbë yo̧a̧dejȩrȩ:

—¿Tjana̧pea̧ ji̧ pio coaiäpȩmo̧ ji̧dë ma̧ goaedëri̧ yo̧renȩro̧coe? ¿Tjana̧pea̧ oa oëra̧ jo̧rȩte chjaonȩrȩ Jeova pio ju̧i̧ chjiari? Mȩnȩro̧ pio ju̧i̧ chjuari̧ quëna̧tärea̧ ji̧, oëra̧ jo̧rȩtanȩrȩ. 'Aja̧, Jeova judi tjamo̧ri̧ ju chiadë jirodida, ibë tjamo̧ri̧ a̧dorea̧mi̧dë jirodida, ado a̧ro̧rȩ chjai̧dëri̧ japea̧ ba oa tjamo̧ri̧ bape chjaodëpa jirodiibëda' quëna̧ jo̧rȩtaji̧ri̧rȩ ütarami̧ dari̧ japarenȩro̧jo̧ȩ. ¿Jabo tjana̧ ju̧i̧iä ja̧di dari̧ japarenȩro̧jo̧ȩ Jeova pio ju̧i̧?

3Jabo icharaita judiro̧ pio ju̧i̧ ta̧rëa̧ oaiä cjiadiämi̧ dari̧ cjiadiätärea̧ ji̧, cjiadiädëa̧dirȩ. Jabechji̧ ui ja̧bo tjamo̧ji̧ri̧rȩ cjo̧ro̧a̧ oaiä cjapiri̧ cjiadiädëa̧dirȩ, jabo ji̧dë ma goaedëri̧ yo̧ chjaorëreji̧ri̧diro̧jo̧ȩ Moiche ju̧i̧, ja̧di ta̧rëri̧ yo̧ji̧ri̧rȩ:

—¿Jabo tjana̧ ju̧i̧iä go̧dü tänȩa̧renȩibe Ejito chiriri pio judiri? ¿Tjana̧pea̧ oa ëba ma̧na̧renȩibe pio yoaiäpȩ? A̧ro̧rȩ ui ja̧boji̧ri̧rȩ ja̧bopea̧ oa ¿ëba ma̧na̧renȩibe? Ibëa̧ bori̧ pio ji̧ri̧ nöta, a̧ro̧rȩ goa̧ pio ji̧ri̧ nöta ja̧bopea̧ oa ¿pio jauëräpȩmo̧ ëba ma̧na̧renȩibe? —yo̧ji̧ri̧rȩ ya̧rëreji̧ri̧diro̧jo̧ȩ Moiche ju̧i̧.

4Ja̧dëa ji̧ Moiche judi uapamȩrȩ goë tuti ni̧bärëremȩdejȩ Jeova ju̧i̧:

—Danȩ, '¿yö̧ta japatäremȩcjivaquiji̧ri̧ pio jiro pumȩ ji̧ri̧?' quëna̧ jo̧rȩtarequede. Ërecjia tjamo̧pe bagapai̧ dadiro̧coe. Ta̧dëra̧ pio ju̧ri̧ra̧ ae ja̧bo tänȩpai̧ dadiro̧coe. A̧docoe —yo̧mȩrȩ goë tuti cjo̧dëa̧de Moiche judi Jeova pio ju̧i̧iä.

5Ado Jeova judi dëbë yo̧a̧dejȩ:

—Danȩ, mitëchji̧vä icharaita tjamo̧ cjo̧ro̧ji̧ri̧ pio ji̧ri̧, jabo o oamo̧i̧ oa. Ado ji̧dë u̧i̧ jachi oa ëba jäjȩrȩ pumȩ ja̧ yaboräpȩ. Mȩnȩ Niro quȩmȩ bea ui oa biderërea̧ to pio ju̧i̧ aramȩrȩ ëba jäjȩrȩ. 6Jächji̧vä Orebe quȩmȩ ya̧mi̧räpȩ#17:6 Orebe yo̧a̧ ji̧ Chinai quȩmȩ ya̧mi̧ pio judide. Ji̧mo̧ baäde.. Pio ju̧ri̧ dëbëdiäparequededibe. Ado ju̧ri̧pȩ go̧düdäräa̧rä, jabechji̧ cüdë cjiamȩ tadë pio ju̧i̧ gu̧na̧tä earequedemȩ na̧ tai̧rea̧ tora̧. Ado mȩnȩ pio jiro ta̧dë oa gu̧na̧ oaiä, jabechji̧ ui ji̧ra̧ri̧ go̧düpade icharaita judiro̧ chjadëri̧ jarapea̧ oa —yo̧mȩrȩ yo̧rëremȩdejȩ Moiche ju̧i̧ Ütë tjamo̧ judi.

Ado Jeova judi yo̧a̧mi̧ japarëremȩde Moiche judi. Ado gu̧na̧dejȩ ta̧dë oa. Ado chjaodëri̧ ca̧mȩpea̧de ui üdë ta̧dëri judiri. Goae tarari̧ ca̧rëremȩde. Aja̧, ja̧di dari̧ japamȩrȩ japarëremȩde Moiche judi icharaita tjamo̧ cjo̧ro̧ji̧ri̧ pio judiro̧ jachidai̧ dae cjiari̧.

7Ado Moiche judi pio ju̧ri̧pȩ quȩparëremȩdejȩ. Chjara chiari̧ quȩpea̧dejȩ. Macha quȩra̧, 'ütararea̧räpȩ' yo̧mȩ quȩra̧ quȩpea̧dejȩ. Ado Meriba quȩra̧ peaja̧di a̧de quȩpea̧dejȩ, 'goaedëri̧ yo̧rea̧räpȩ' yo̧mȩ quȩra̧. Aja̧, ja̧di dari̧ quȩpea̧dejȩ. Icharaita judiro̧ goaedëri̧ yo̧a̧ pio oaiä, judiro̧ Jeova pio ju̧i̧ ütaraji̧ri̧mi̧ dari̧ japea̧ oaiä, 'Aja̧, Jeova judi tjamo̧ri̧ ëba cjiadë jirodiibëda, ibë ui oa tjamo̧ri̧ yürürea̧mi̧dë jirodida' quëna̧ jo̧rȩta̧ oaiä, jabechji̧ ja̧di dari̧ quȩparëremȩdejȩ.

Currently Selected:

Go̧dürea̧ Ma̧ȩ 17: Pume

Highlight

Compare

Copy